March

Ibaalu ibabikkila maano kujatikizya zintu zikonzya kucitika kumbele balajana ciindi cakuyiisya bakwesu bakubusi luzyibo ndobajana mumyaka minji njobabeleka cakusyomeka. (Int. 71:17, 18) Baalu ibayiisya bamwi milimo ncilongezyo kubutanga. Bayumya mbungano. Munzila nzi? Kusoleka kwabaalu kuyiisya bamwi milimo kupa kuti kube bakwesu banji beelela ibakonzya kugwasya mbungano kuti izumanane kuyuma alimwi akukamantana, kutali buyo lino pe, pele kwaambisya ciindi cikatazya lyamapenzi mapati aaboola kumbele. (Ezk. 38:10-12; Mik. 5:5, 6) Aboobo, nobaalu bayandwa, twamulomba kuti ikuyiisya bamwi milimo acibe cibeela camulimo wanu mazuba aano. Masimpe, tulizyi kuti ciindi ncomubelesya kulanganya zintu ziyandika mumbungano ncinji cakuti inga mwalimvwa kuti tamujisi ciindi. Aboobo, inga mwayandika kubikka ciindi cimwi ambali akucibelesya kuyiisya bamwi milimo. (Muk. 3:1) Kucita boobo kulakonzya kuleta zilongezyo kumbele. w15 4/15 1:8-10

Cakutadooneka mulazumina kuti Bbaibbele lilijisi mulumbe wa Leza kubantu boonse. Pele sena Bbaibbele lilaamba ambomukonzya kuswena kuli Jehova nywebo kumugama? Inzya lilaamba. Munzila nzi? Lyoonse nomulibala akuliiya Bbaibbele, amubone ncomweelede kucita kujatikizya zintu nzyolyaamba alimwi amubikkile maano kubona mbomweelede kuzibelesya mubukkale bwanu; mwacita boobo muzumizya Jehova kwaambaula andinywe kwiinda mu Jwi lyakwe. Eeci cimupa kuba acilongwe cibotu anguwe. (Heb. 4:12; Jak. 1:23-25) Mucikozyanyo, amubale akuzinzibala kuyeeya majwi aa Jesu aakuti “amuleke kuliyobweda lubono anyika.” Ikuti naa mulimvwa kuti mubikkila kale maano kuzintu zya Bwami mubuumi bwanu, mulizyi kuti Jehova ulamulumbaizya. Kulubazu lumbi, ikuti naa mwabona kuti muyandika kuubya-ubya buumi bwanu alimwi akubikkila maano kapati kuzintu zya Bwami, nkokuti Jehova wamusinsimuna kumbazu imwi njomuyandika kubelekela kutegwa muswene afwaafwi anguwe.—Mt. 6:19, 20. w15 4/15 3:3-5

Mbubwenya mbotujisi bubi mumulimo wakukambauka mbuli ibwakali Paulo, tusyoma Jehova kuti uyoosinizya ncobeni kuti ‘twayungizyilwa’ zintu zyoonse nzyotuyandika. (Mt. 6:33) Mbotuli basikumwaya ba Bwami, ‘twapegwa mulimo wakukambauka,’ alimwi Jehova utubona kuti tuli “basimilimonyina.” (1Tes. 2:4; 1Kor. 3:9) Kwiinda mukuba basungu mumulimo wa Leza, ciyootuubaubila kulindila kugwasyigwa anguwe. Aboobo, atubelesye ciindi ecino kuyumya cilongwe cesu a Leza. Ikuti naa kuli bukkale buli boonse ibutupa kulibilika, atububelesye kuyumya cilongwe cesu a Jehova. Inzya, kwiinda mukwiiya Jwi lya Leza, kupaila lyoonse, alimwi akuzumanana kutola lubazu muzintu zyakumuuya, atusyome Jehova kuti ulakonzya kutugwasya alimwi uyoosinizya ncobeni kuti twazwidilila kulwana buyumuyumu mbotujisi lino alimwi abuyumuyumu buli boonse mbotukonzya kuyaanya kumbele. w15 4/15 4:17, 18

Kulisumpula kulakonzya kunyonganya luumuno lwambungano. Kusulaikana mumyoyo yesu akulimvwa kuti tulabainda bamwi kulakonzya kujatikizya ŋambawido yesu alimwi anzyotucita, calo cikonzya kubacisa bamwi. (Tus. 12:18) Kuti katujisi cilengwa cakulimvwa kuti tulabainda bamwi, tweelede kuyeeya kuti “muntu uulisumpula mumoyo ncisesemyo kuli Jehova.” (Tus. 16:5) Alimwi inga twacita kabotu kulilingula kujatikizya mbotubabona bantu bamibala imbi, bantu bakucisi cimbi, naa bantu ibajisi zilengwa ziindene azilengwa zyesu. Kuti mumoyo katulimvwa kuti tulabainda bamwi akaambo kamubala wesu naa akaambo kacisi cesu, nkokuti tatukabikkili maano kaambo kakuti ‘kuzwa kumuntu omwe Leza wakalenga bantu ibali muzisi zyoonse.’ (Mil. 17:26) Munzila eeyi kuli buyo musyobo omwe wabantu nkaambo bantu boonse bakazwa kumuntu omwe, Adamu. Aboobo, mbufwubafwuba kusyoma kuti bantu bamibala imbi balisumpukide kwiinda bambi naa kuyeeya kuti bambi tabasumpukide. Kuyeeya kuli boobu inga kweelela Saatani uuyanda kunyonganya luyando lwesu lwa Bunakristo alukamantano. (Joh. 13:35) Kutegwa tumulwane Saatani akumuzunda, tatweelede kuba bantu balisumpula.—Tus. 16:18. w15 5/15 2:8, 9

Cakutadooneka, tulikkomene kuti Leza wasyomezya bananike ibasyomeka buumi butafwi kujulu alimwi abuumi butamani anyika ‘kumbelele zimbi’ zya Jesu izisyomeka. (Joh. 10:16; 17:3; 1Kor. 15:53) Masimpe, buumi butafwi kujulu alimwi abuumi butamani anyika tazikanyonganizyigwi amapenzi aadumide sunu. Jehova ulaamvwisya mapenzi ngotujisi, mbubwenya mbuli mbwaakali kumvwisya mbobakali kupenga bana Israyeli ciindi nobakali bazike mu Egepita. Inzya, “mumapenzi aabo oonse wakali kupenga mumoyo awalo.” (Is. 63:9) Nokwakainda myaanda yamyaka, ba Juda bakayoowa akaambo kakukazyigwa abasinkondonyina mumulimo wakuyakulula tempele, pele Leza wakati: “Kufwumbwa uumuguma nywebo uguma mboni yaliso lyangu.” (Zek. 2:8) Mbubwenya mbuli mutumbu mbwajisi lweetelelo kumwanaakwe, Jehova ulabweza ntaamu caluyando kugwasya bantu bakwe. (Is. 49:15) Aboobo, inga twaamba kuti Jehova ulakonzya kulibikka mubukkale bwabamwi, alimwi wakatupa nguzu zyakucita boobo.—Int. 103:13, 14. w15 5/15 4:2

Sena Jesu wakali kwaamba kuti lyoonse kunooli bacete anyika? Peepe, wakali kwaamba kuti bacete banooliko anyika kufwumbwa kuti kabuciliko bweende bwazintu oobu bubyaabi. Mazuba aano myaanda myaanda yamamiliyoni aabantu tabajisi zintu nzyobayandika akaambo kabweendelezi bwabantu butaluleme. Nokuba boobo kulemununwa kuli afwaafwi! (Int. 72:16) Maleele a Jesu atupa kuba alusyomo munguzu zyakwe alimwi aluyando lwakwe mukubelesya nguzu zyakwe zyabweendelezi kutegwa tugwasyigwe, eeci ncayoocita lino-lino. (Mt. 14:14-21) Nokuba kuti tatukonzyi kucita maleele, tulakonzya cakumaninina kugwasya bantu kubikkila maano ku Jwi lya Leza ilyakasololelwa amuuya. Businsimi bwamu Bbaibbele businizya kuti kuli zintu zibotu kumbele. Mbotuli Bakamboni ba Jehova balyaabide ibajisi luzyibo oolu lubotu iluyandika kapati kujatikizya zintu zyakumbele, sena tatulimvwi kuti tujisi mukuli wakwaambila bantu makani aaya? (Rom. 1:14, 15) Kuzinzibala kuyeeya kujatikizya makani aaya akutukulwaizye kwaambila bamwi makani mabotu aajatikizya Bwami bwa Leza.—Int. 45:1; 49:3. w15 6/15 1:7, 10, 11

Ciindi notucibikkila kapati maano cilongwe cesu a Jehova, tulasolekesya kucita zintu zimukkomanisya mumbazu zyoonse zyabuumi bwesu, kubikkilizya azintu nzyotuyeeya. Tulayanda kuba ‘amoyo uusalala’ kwiinda mukuyeeya zintu zisalala, zintu zitambulika alimwi azibotu. (Int. 24:3, 4; 51:6; Flp. 4:8) Jehova ulizyi kuti tatulondokede. Ulizyi kuti tulakonzya kulombozya zintu zitali kabotu. Pele tulizyi kuti ulausa ciindi notulekela mizeezo iitaluzi kukomena muciindi cakusolekesya canguzu kwiikaka. (Matl. 6:5, 6) Kuzinzibala kuyeeya kujatikizya kaambo aaka kulakonzya kutupa kuba amakanze aakuzumanana kusalala mumizeezo. Nzila iiyandika kapati mbotukonzya kutondezya kuti tulamusyoma Jehova cakumaninina mukulwana mizeezo iitali kabotu nkwiinda mukupaila. Ciindi notuswena kuli Jehova mumupailo, awalo ulaswena kulindiswe. Ulatupa muuya wakwe uusalala, walo uukonzya kutuyumya mukukazya mizeezo yakutalilemeka mpoonya akuzumanana kusalala mukulilemeka. w15 6/15 3:4, 5

Amubone kuti ooku nkulomba kwamuntu kumugama ikutali kwacakulya “cakwe” cabuzuba obuno pele kwacakulya “cesu” cabuzuba obuno. Ba Victor, imulangizi wabbazu mu Africa, bakapandulula kuti: “Kanji-kanji ndilamulumba camoyo woonse Jehova kuti mebo abakaintu bangu tatulibiliki kapati kujatikizya nkocitiizwe cakulya, naa uutibbadelele ŋanda. Bakwesu balatulanganya kabotu buzuba abuzuba. Pele ndilapaila kuti aabo ibatugwasya abalo bacikonzye kuzwidilila mubukkale buyumu bwakubula mali.” Ikuti katujisi cakulya cinji kwamazuba manji, tulakonzya kubayeeya bakwesu bacete naa aabo ibacitikilwa ntenda. Tatweelede buyo kubapailila pele tweelede kucita kweelana amipailo yesu. Mucikozyanyo, tulakonzya kwaabana nzyotujisi abakombima ibabulide. Alimwi ciindi aciindi tulakonzya kusanga kumulimo uucitwa nyika yoonse, mbotuzyi kuti mali aayo alabelesyegwa kabotu.—1Joh. 3:17. w15 6/15 5:4-6

Mulimo uutaliboteli wakubambulula uujatikizya cibeela caanyika cambunga ya Jehova wakasinsimwa mulugwalo lwa Isaya 60:17. Aabo bacili bana naa bapya mukasimpe bakabala makani aajatikizya bumboni bwakubambulula ooku naa bakamvwa kuli bamwi. Pele bali acoolwe kaka bakwesu alimwi abacizyi ibakalibonena cacigaminina kucinca ooku! Aanu nkakaambo kaako ncobasinizyide kuti kwiinda mu Mwami wakwe uubikkidwe, Jehova ulasololela akweendelezya mbunga yakwe! Balisinizyide ncobeni, mbubwenya mbotusinizyide toonse. Ikubamvwa kabaambaula kuzwa ansi amoyo kuyooyumya lusyomo lwanu alimwi alusyomo ndomujisi muli Jehova. Tacikwe makani aciindi ncotwakkala mukasimpe, tweelede kwaambila bamwi kujatikizya mbunga ya Jehova. Paradaiso yakumuuya njotujisi munyika eeyi mbyaabi alimwi iinyina luyando, maleele! w15 7/15 1:12, 13

Nkondo ya Amagedoni iyoopa kuti zina lya Jehova lisalala likasumpulwe. Aciindi eeco, bantu boonse ibali mbuli mpongo “bayoonyonyoonwa kukabe kutamani.” (Mt. 25:31-33, 46) Kumamanino, nyika yoonse iyoosalazyigwa kububi boonse, alimwi nkamu mpati iyoofwutuka cibeela camamanino camapenzi mapati. Mbwaanga tulangila zintu eezyi zikkomanisya, ino ncinzi umwi aumwi wesu ncayelede kunoocita lino? Mwaapostolo Petro wakasololelwa amuuya wa Leza kulemba kuti: “Mbwaanga zintu eezyi zyoonse ziyakweenzemuka boobu, amuyeeye buyo naa mweelede kuba bantu bali buti mubukkale busalala alimwi amilimo yakubelekela Leza cakulyaaba, nomulindila akuyeeyesya kusika kwabuzuba bwa Jehova, . . . Aboobo, nobayandwa, mbwaanga nywebo mulindila zintu eezyi, amusoleke kusikila mpomugolela kuti kumamanino akamujane kamutajisi kabala nokaba kampenda alimwi kamuli muluumuno.” (2Pet. 3:11, 12, 14) Aboobo, atukanze kuzumanana kusalala kumuuya, katugwasyilizya Mwami wa Luumuno. w15 7/15 2:17, 18

Mbunga ya Jehova yacita zyoonse nzyoikonzya kutegwa kube Maanda aa Bwami alimwi akubikka bubambe bwakujana mali aakuyasya maanda aaya. Mulimo wakubamba mapulani aamaanda, wakuyaka, alimwi awakubambulula ulabelekwa abasikulisungula ibatabbadelwi. Kutalikila mu November 1, 1999, masena mabotu aakubelesya mubukombi busalala aainda ku 28,000 ayakilwa mbungano nyika yoonse mbwiizulwa. Kweelana amweelwe waakati-kati, eeci caamba kuti Maanda aa Bwami osanwe alikuyakwa buzuba abuzuba mumwaka. Mbunga ilabikkila maano kugwasyilizya kutegwa Maanda aa Bwami ayakwe kufwumbwa kubusena nkwaayandika kuyakwa. Bubambe oobu bwaluyando buyeeme anjiisyo yamu Magwalo yakuti aabo bajisi zintu ziindilide bape baabo babulizyide, kutegwa “kube kweelana.” (2Kor. 8:13-15) Akaambo kabubambe oobu, mbungano izyatakali kukonzya kuliyakila Maanda aa Bwami zyayakilwa maanda mabotu aakubelesya mubukombi busalala. w15 7/15 4:9-11

Kutegwa zitondezyo zikabeleke mulimo wanzizyo, ziyooyandika kuzuzikizyigwa munzila iizulide kutegwa zicenjezye baabo ibali kumvwida lulayo lwa Jesu lwakuti “amulangile.” (Mt. 24:27, 42) Alimwi eeci cali kucitika kuzwa mumwaka wa 1914. Kuzwa ciindi eeco kuya kumbele, zibeela zyacitondezyo zyali kuzuzikizyigwa. Aboobo, cilalibonya kuti lino tupona ‘kumamanino aabweende bwazintu,’ ciindi cisyoonto icisololela kulunyonyooko lwabweende bwazintu oobu bubyaabi. (Mt. 24:3) Aboobo, ino nkaambo nzi Banakristo mazuba aano ncobeelede kuzumanana kulangila? Akaambo kakumvwida Jesu Kristo, tulazumanana kulangila. Alimwi, twabona zitondezyo zyakubako kwakwe. Kulangila kwesu takuyeeme akulangila kwakwiinzya buyo mulawo, pele kuyeeme abumboni bwamu Magwalo bwalo ibutupa kuzumanana kupakamana, akulangila mamanino aabweende bwazintu oobu bubyaabi. w15 8/15 2:8, 9

Zintu zikondelezya alimwi izikkomanisya muntu umwi aumwi zinoojisi busena munyika mpya ya Leza. Mwayeeya buyo, nkaambo nzi Jehova ncaakatulenga aluyandisisyo lwakucita zintu nzyotukkomanina alimwi izikondelezya ikuti naatakali makanze aakwe kuti katuzicita zintu eezyi nzyotulombozya cakumaninina? (Muk. 2:24) Munzila eeyi alimwi anzila zimbi, Jehova lyoonse ‘uyookkutya cilenge coonse cipona kwiinda mukucipa ncociyanda.’ Kulikondelezya alimwi akulyookezya zilijisi busena bwanzizyo, pele lukkomano ilujanika kuzwa kulinzizyo lulayungizyika ciindi notubikka cilongwe cesu a Jehova mubusena bwakusaanguna. Oobo mbociyooba amunyika ya Paradaiso. Eelo kaka ncabusongo kwiiya kubikka zintu nzyotuyandisya kucita tobeni mubusena bweelede kumwi katubikka Bwami mubusena bwakusaanguna alimwi akubikkila maano kuzilongezyo zyakumuuya iziliko lino kubantu ba Jehova! (Mt. 6:33) Mu Paradaiso iiboola, tuyooba alukkomano ndotutana buzuba twaba aandulo. Atutondezye mbotubulombozya kapati buumi bwini-bwini kwiinda mukulibambila lino. w15 8/15 3:17, 18

Jesu wakali muntu uulondokede. Nokuba boobo, ciindi Jesu naakali anyika, wakazingulukidwe abantu batalondokede. Bazyali bakwe alimwi abanabokwabo tiibakalondokede pe. Nobaba basikumutobela bakwe mbaakali kuyandisya bakali kutondezya bube mbuli kulisumpula alimwi akuliyanda. Mucikozyanyo, kumangolezya katanajaigwa, basikwiiya bakwe bakatalika kukazyanya “kujatikizya wakali kubonwa kuti ngomupati kwiinda boonse.” (Lk. 22:24) Nokuba kuti bakalijisi mizeezo eeyi akaambo kakutalondoka, Jesu wakalizyi kuti basikumutobela bakali kuyooba Banakristo basimide akupanga mbungano iikamantene. Busiku mbubwenya oobo, Jesu wakabapailila kuti kabakamantene. Wakalomba Usyi wakujulu kuti bazumanane kukamantana, wakati: “Mbubonya yebo Taata andime mbotukamantene, ikuti abalo kabakamantene andiswe.” Wakayungizya kuti: “Ikutegwa babe bamwi mbubonya swebo mbotuli bamwi.”—Joh. 17:21, 22. w15 9/15 1:10, 11

Petro naakali kuyaabweenda atala aa Lwizi lwa Galilaya, wakatalika kuyoowa. Ino nkaambo nzi? Akaambo kaguwo alimwi amayuwe. Zintu eezyi zilakonzya kukozyanisyigwa kumasunko manji ngobayaanya Banakristo mazuba aano. Nokuba kuti mapenzi aaya alakatazya kapati, tulakonzya kuzumanana kuyuma kwiinda mukugwasyigwa a Jehova. Pele amuyeeye icakacitikila Petro. Tanaakabbila akaambo kaguwo alimwi amayuwe pe. Muciindi caboobo, Bbaibbele lyaamba kuti: “Naakabona guwo wakayoowa.” (Mt. 14:24-32) Petro wakazikucileka kulanga Jesu mpoonya akutalika kubikkila maano kuguwo ilyakali kuunga canguzu. Mpoonya lusyomo lwakwe lwakatalika kuyaabumana. Mbubwenya buyo, ikuti twatalika kubikkila kapati maano kumapenzi ngotujisi, tulakonzya kutalika kudooneka kuti Jehova ulakonzya kutugwasya. Tweelede kuzyiba kuti lusyomo lulakonzya kumana. Ino nkaambo nzi? Nkaambo Bbaibbele lyaamba kuti kusweekelwa lusyomo ‘ncibi eeco cifwambaana kutuzambaila.’ (Heb. 12:1) Mbubwenya mbuli Petro, ikuti twabikkila kapati maano kuzintu zitali kabotu, lusyomo lwesu inga lwamana cakufwambaana. w15 9/15 3:1, 6, 7

Ikuti muntu umwi wamupa cipego, cakutadooneka mulangilwa kumulumba muntu ooyo. Alimwi akaambo kakuti mulaciyanda cipego eeco, mulacibelesya. Tulamulumba kapati Jehova akaambo kakuti ulatupa zintu zyoonse nzyotuyandika kutegwa tupone alimwi akukkomana. Tulizyi mbwatuyanda kapati, alimwi tuyanda kumutondezya kuti andiswe tulamuyanda. Sena oobo mbomulimvwa? Bana Israyeli bakatambula zintu zibotu zinji kuzwa kuli Jehova. Kwamyaanda yamyaka, wakabasololela amilawo yakwe alimwi akubapa zintu zyoonse nzyobakali kuyandika kutegwa bapone. (Dt. 4:7, 8) Alimwi bana Israyeli bakali kukonzya kutondezya kulumba kwabo kuli Jehova kwiinda mukumvwida milawo njaakabapede. Mucikozyanyo, ciindi nobakali kutuula zituuzyo kuli Jehova, bakali kuyandika kumupa “micelo mitaanzi mibotu kapati” njobakali kulima. (Kul. 23:19) Bana Israyeli bakalizyi kuti Jehova wakali kuyoozumanana kubalongezya ikuti nobakali kuyoozumanana kumumvwida alimwi akumupa zintu zyabo ziinda kubota.—Dt. 8:7-11. w15 9/15 5:5, 6

Mbuti mbomukonzya kulibona janza lya Jehova mubuumi bwanu? Atulange-lange zikozyanyo zyosanwe. Cakusaanguna, mulakonzya kulimvwa kuti Jehova wakamugwasya kutegwa mujane kasimpe. Cabili, ambweni mulakonzya kuyeeya ciindi nomwakali kuunka kumiswaangano ya Bunakristo, kuswiilila makani, alimwi akulyaambauzya mumoyo kuti: “Aaya ngamakani ngondali kuyandika!” Catatu, ambweni mwakabona Jehova mbwaakaingula mupailo wanu umwi. Cane, ambweni mwakali kuyanda kucita zinji mumulimo wa Jehova alimwi mwakabona mbwaakamugwasya kuzuzikizya mbaakani yanu. Casanu, ambweni mwakauleka mulimo wanu wakumubili akaambo kakuti wakali kumumanina ciindi cakubelekela Jehova mpoonya mwakabona Leza mbwaakazuzikizya cisyomezyo cakuti: “Tandikakulekelezyi pe.” (Heb. 13:5) Ikuti twaba acilongwe ciyumu a Jehova alimwi ‘akusalala mumoyo,’ cilakonzya kuuba-uba kulibona janza lyakwe mubuumi bwesu. Ino eeci caamba nzi? Tweelede kusalala mumizeezo alimwi akucileka kucita cintu cili coonse cibyaabi. (2Kor. 4:2) Kutegwa tumubone Leza, tweelede kuzumanana kuyumya cilongwe cesu anguwe. w15 10/15 1:17, 19

Bantu bamwi ba Giriki, ibakaboolede ku Jerusalemu kuzoosekelela Pobwe Lyakwiindilila, bakabona ncaakacita Jesu alimwi cakabakkomanisya. Aboobo, bakalomba mwaapostolo Filipo kuti babonane a Jesu. Pele Jesu taakwe naakali kuyandaula bantu ibakali kukonzya kumugwasya akumukwabilila kuli basinkondonyina. Wakalizyi icakali kuyandika kapati. Wakabikkila maano kucita kuyanda kwa Jehova, nkokuti kwaaba buumi bwakwe kacili cituuzyo. Aboobo, wakaibalusya basikwiiya bakwe kuti wakali kuyoofwa akuti boonse aabo ibamutobela beelede kulisungula kwaaba buumi bwabo abalo akutobela majwi aali mulugwalo lwabuzuba bwasunu. Wakati: “Kufwumbwa ooyo uuyandisya buumi bwakwe ulabunyonyoona, pele kufwumbwa ooyo uusulaika buumi bwakwe munyika eeyi ubuyobweda buumi butamani.” Filipo wakali kukonzya kwaambila ba Giriki aabaya mulumbe ooyu uukulwaizya. (Joh. 12:20-25) Ciindi Jesu naakali anyika, mulimo wakwe mupati wakali wakukambauka makani mabotu. Nokuba kuti wakabikkide maano kukukambauka mubuumi bwakwe boonse, tanaakali kuyeeya buyo mulimo wakukambauka lyoonse. w15 10/15 3:13, 14

Mucikozyanyo, basikwiiya bakwe bakali kukazyanya ziindi zinji kujatikizya iwakali mupati akati kabo. Jesu wakalibikkila maano penzi eeli. Aboobo wakabalaya cakwiinduluka-induluka. Pele lyoonse wakali alubomba, alimwi wakali kulindila kuti kube ciindi cibotu alimwi abusena bubotu kutegwa abalulamike. (Mk. 9:33-37) Akaambo kakuti mulabayanda bana banu, mulizyi kuti mweelede kubalaya. Zimwi ziindi cilagwasya kubapandulwida buyo cimwi cintu ncociluzi naa ncocitaluzi. Pele ino kuti bazumanana kutatobela malailile? (Tus. 22:15) Amwiiye kuli Jesu. Cakukkazika moyo amuzumanane kubalaya kwiinda mukubasololela, kubayiisya, alimwi akubalulamika. Amusale ciindi abusena buli kabotu kuti mubape lulayo, alimwi amucite oobo calubomba. Mucizyi waku South Africa wazina lya Elaine wakaamba kuti: “Kunyina nobakali kundipa lulayo cabukali naa kakunyina kundipandulwida ncobakali kundipeda cisubulo.” Akaambo kaceeci, wakalizyi lyoonse kuti bazyali bakwe bakali kumuyanda. w15 11/15 1:5, 6

Ino buumi bwabantu bwakumbele nibwakali kuyooba buti ikuti luyando nolwatakali bube bupati bwa Leza? Bantu nibakali kuyoozumanana kweendelezyanya akuyungwa a Saatani, uunyina luyando alimwi leza uujisi lunya. (2Kor. 4:4; 1Joh. 5:19; Ciy. 12:9, 12) Buumi bwakumbele nibwakali kuyoobija ikuti Jehova naatakatuyanda! Ciindi Saatani naakazangila bweendelezi bwa Leza, wakayunga abazyali besu bakusaanguna kuti bazange. Wakakazya nguzu zya Leza zyakuba Mweendelezi Wabubumbo Boonse. Saatani wakaamba kuti bweendelezi bwakwe bwakali kuyooba bubotu kwiinda bwa Leza. (Matl. 3:1-5) Cabusongo, Jehova wakamuzumizya Saatani kaindi kasyoonto buyo kutegwa abone naa ncaakali kwaamba ncamasimpe. Pele cacitika catondezya kuti bantu alimwi a Saatani tabakonzyi kuba beendelezi babotu. w15 11/15 3:3, 4

Kulicesya kulatugwasya kutobela njiisyo iiyandika kapati njaakapa Jesu. Wakapandulula kuti: “Mwakamvwa kuti kwakaambwa kuti: ‘Weelede kuyanda simukobonyoko akusulaika sinkondonyoko.’ Pele ndimwaambila kuti: Amuzumanane kuyanda basinkondonyoko akubapailila aabo bamupenzya, ikutegwa musinizye kuti muli bana ba Uso uuli kujulu, nkaambo ulapasuzya zuba lyakwe kubantu babi ababotu alimwi ulapa mvwula kubantu baluleme abataluleme.” (Mt. 5:43-45) Mbotuli babelesi ba Leza, tweelede kubayanda basinkondoma tacikwe makani ambobatweendelezya. Ciindi coonse, tweelede kutondezya kuti tulamuyanda Jehova alimwi abasimukoboma. Nokuba kuti bantu balatukazya alimwi akukazya mulumbe wesu, tulabagwasya ciindi nobali mumapenzi. w15 11/15 4:17, 19, 20

Bantu ba Leza lyoonse bali kubelesya cipego camwaambo kutembaula Jehova alimwi akwaambila bamwi kujatikizya nguwe. Mumyaka yainda, bantu ba Leza bali kubelesya cipego eeci kusandulula Bbaibbele kutegwa bantu banji bakonzye kwiiya kujatikizya Jehova. Kuli zyuulu zinji zyama Bbaibbele aakasandululwa, pele amwi akasandululwa munzila iiluzi kwiinda aambi. Kutegwa basandulule Bbaibbele munzila iiluzi, iba New World Bible Translation Committee bakatobela twaambo ootu totatwe ituyandika kapati: (1) Kulemeka zina lya Leza alimwi akulibelesya mu Jwi lyakwe mbubonya mbolibelesyedwe mumalembe aakusaanguna. (Mt. 6:9) (2) Kusandulula mulumbe wamumwaambo wakusaanguna bbala abbala kufwumbwa nocikonzyeka. Ikuti naa kacitakonzyeki, kusandulula kaambo kaambwa munzila iiluzi. (3) Kubelesya mwaambo uutakatazyi kubala alimwi uulimvwisya.—Neh. 8:8. w15 12/15 2:1, 2

Kulila kumbi kwakali kwaamba kuti basikalumamba beelede kusaala. Amuyeeye buyo cakali kukonzya kucitika kuli basikalumamba ikuti naa kulila kwamweembo tiikwalimvwisya kabotu! Ikuti naa katutazipandululi zintu munzila iilimvwisya, bantu balakonzya kunyongana naa kusyoma zintu zitali zyamasimpe. (1Kor. 14:9) Nokuba kuti tuyanda kwaamba munzila iilimvwisya, tweelede kucenjela kutegwa nzyotwaamba katuzyaamba cabulemu ikutali cakusampaula. Zintu Jesu nzyaakaamba kulugwalo lwa Matayo zyaandaano 5 kusikila ku 7 nzikozyanyo zibotu zijatikizya Jesu mbwaakasala majwi aatakatazyi kumvwa. Mumakani ngaakapa, tanaakasola kukondelezya bantu kwiinda mukubelesya mabala aakatazya kumvwa naa aatayandiki. Alimwi tanaakaamba zintu izyakali kukonzya kubanyemya bamwi. Muciindi caboobo, wakabelesya majwi maubauba alimwi aatakatazyi kumvwa kutegwa abasike amoyo bantu ibakali kumuswiilila. Mucikozyanyo, Jesu wakali kuyanda kubakkazyika myoyo basikwiiya kuti tiibakali kuyandika kulibilika kujatikizya zyakulya zyabuzuba abuzuba. Aboobo wakabapandulwida kuti Jehova lyoonse ulabasanina bayuni. Mpoonya wakababuzya kuti: “Sena tamuyandiki kwiinda mbabo?” (Mt. 6:26) Kwiinda mukubelesya majwi maubauba aaya, Jesu wakabagwasya kumvwisya ciiyo ciyandika kapati alimwi bakakulwaizyigwa. w15 12/15 3:13, 14

Ino luyando lwabunyina ninzi? Luyando lwabunyina nduyando luli akati kabanamukwasyi naa akati kabalongwe ibamvwana kapati. (Joh. 11:36) Tatulicengezyi buya kuba babunyina. Tuli babunyina. (Mt. 23:8) Paulo wakaamba kuti: “Muluyando lwabunyina amuyandane kapati. Mumakani aakulemekana, amube ndinywe nomuli kumbele kulemeka bamwi.” (Rom. 12:10) Majwi aaya atondezya mbotubayanda kapati bakwesu. Luyando lwabunyina oolu, antoomwe aluyando lwa Bunakristo lugwasya bantu ba Leza kumvwana kapati alimwi akukamantana. Mbotuli Banakristo bakasimpe, Munakristo wakasimpe uuli woonse “mukwesu”, tacikwe makani acisi nkwazwa. (Rom. 10:12) Jehova watuyiisya kumvwana abakwesu.—1Tes. 4:9. w16.01 1:5, 6

Luyando ndotujisi kuli Jesu lutukulwaizya kukambauka alimwi akuyiisya cabusungu. (Mt. 28:19, 20; Lk. 4:43) Mumyezi ya Ciibalusyo, sena inga mwabambulula bukkale bwanu kutegwa mucite bupainiya bwakugwasyilizya akubeleka mawoola aali 30 naa 50 mumulimo wakukambauka? Mwaalumi umwi uujisi myaka iili 84 iwakafwidwa mukaintu wakali kuyeeya kuti takonzyi kubeleka kali mupainiya akaambo kaciimo cakwe alimwi akuciswa-ciswa. Pele bapainiya ibakali mubusena mwaakali kukkala bakali kuyanda kumugwasya. Bakabikka bubambe bwakuti kabamunyamuna mumootokala alimwi akusala cilawo ceelede mwaakali kukonzya kunoobelekela. Akaambo kabubambe oobu, mukwesu ooyu wakaizuzikizya mbaakani yakwe yamawoola aali 30. Sena mulakonzya kugwasya muntu umwi kucita bupainiya bwakugwasyilizya mu March naa mu April? Masimpe kuti tabali boonse ibakonzya kucita bupainiya, pele tulakonzya kubelesya ciindi cesu alimwi anguzu kuyungizya mulimo wesu kuli Jehova. w16.01 2:7, 11

Ikuti kacitakonzyeki mazuba aano kuzyiba mazina abaabo boonse bananikidwe anyika, ino bambelele zimbi inga ‘beenda’ buti ambabo? Ibbaibbele lyaamba kuti “bantu bali kkumi” “bayoojatisya cikobela camu Juda, akwaamba kuti: ‘Tuyanda kuunka andinywe, nkaambo twamvwa kuti Leza ulaandinywe.’” Kapango aaka kamu Bbaibbele kaamba mu Juda omwe. Nokuba boobo majwi aakuti “andinywe” alimwi aakuti “ulaandinywe” aamba bantu banji. Eeci caamba kuti mu Juda tali buyo muntu omwe pele wiiminina nkamu yoonse yabananike. Ibambelele zimbi balikazyi kaambo aaka aboobo babelekela Jehova antoomwe ankamu eeyo. Tabayandiki kwaazyiba mazina abaabo boonse bali munkamu eeyi akumutobela umwi aumwi wambabo. Jesu ngo Musololi wesu, alimwi Bbaibbele litwaambila kuti tweelede kutobela buyo nguwe alikke.—Mt. 23:10. w16.01 4:4

Kuzwa ciindi notwazyalwa kusikila ciindi notwafwa, toonse tuyandika luyando. Bantu bayandika balongwe beni-beni alimwi basiluyando, ikutali buyo luyando luli akati kamusankwa amukaintu. Pele kwiinda zyoonse, tuyandika luyando luzwa kuli Jehova. Bantu banji tabasyomi kuti bantu balakonzya kuba acilongwe cini-cini a Leza alimwi icaluyando nkaambo talibonyi alimwi mupatikampatila. Pele tulikazyi kasimpe! Tulizyi kuzwa mu Bbaibbele kuti bantu bakaba balongwe ba Leza. Tweelede kwiiya kuzikozyanyo zyabo. Nkaambo nzi? Nkaambo kuba acilongwe a Leza nembaakani iiyandika kapati njotukonzya kuba ayalo mubuumi. Aboobo atulange-lange cikozyanyo ca Abrahamu. (Jak. 2:23.) Ino wakaba buti mulongwe wa Leza? Cilongwe ca Abrahamu cini-cini cakayeeme alusyomo, alimwi uzyibidwe kuti ngu “usyi wabaabo boonse bajisi lusyomo.”—Rom. 4:11. w16.02 1:1, 2

Nokuba kuti bausyi bakali umwi wabami babyaabi kapati mu Juda, Hezekiya wakaba umwi wabami bali kabotu kapati. (2Bam. 18:6) Wakasala kutatobela cikozyanyo cibyaabi cabausyi. Muciindi caboobo, wakasala kuswiilila kapati kubasinsimi ba Jehova, mbuli Isaya, Mika, a Hosea. Wakabikkila maano kapati kululayo lwabo alimwi akukululamika kwabo. Eeci cakamukulwaizya kwaamana mapenzi manji bausyi ngobakaleta. Wakasalazya tempele, wakalomba Leza kuti alekelele zibi zyabantu, alimwi wakainyonyoona mituni mucisi coonse. (2Mak. 29:1-11, 18-24; 31:1) Kumbele, ciindi mwami wa Asuri Sanakeribu naakayanda kulwana Jerusalemu, Hezekiya wakatondezya busicamba kapati alimwi alusyomo. Wakasyoma kuti Jehova ulabakwabilila alimwi wakayumya bantu bakwe. (2Mak. 32:7, 8) Aciindi cimwi Hezekiya wakalisumpula, pele ciindi Jehova naakamululamika, wakalibombya. (2Mak. 32:24-26) Cilisalede kuti, Hezekiya ncikozyanyo cibotu kapati ncotweelede kwiiya. Kunyina naakalekela bukkale mwaakakomenena kunyonganya buumi bwakwe. Muciindi caboobo, wakatondezya kuti wakali mulongwe wa Jehova. w16.02 2:11

Andinywe mulakonzya kusaanguna kusyomeka kuli Jehova alimwi akusyomeka kubantu bambi kwiinda mukuba basilubomba. Mucikozyanyo, mulakonzya kamujisi bumboni ibusinizya kuti mukwesu wakacita cibi cipati. Inga mwayanda kuzumanana kusyomeka kulinguwe, kwaambisya kuti kali mulongwe wanu ngomumvwana kapati naa wamumukwasyi. Pele alimwi mulizyi kuti kusyomeka kuli Jehova kulayandika kwiinda. Amumumvwide Jehova, pele amutondezye lubomba kumukwesu. Amumwaambile kuti alombe lugwasyo kubaalu akuti afwambaane kucita oobo. Kuti tabaambili baalu, nkokuti mweelede kubaambila nywebo lwanu. Kwiinda mukucita boobu, munoosyomeka kuli Jehova. Alimwi aciindi nciconya, mutondezya lubomba kumunyoko nkaambo baalu balakonzya kumugwasya kutegwa alimwi abe aacilongwe cibotu a Jehova. Bayoomululamika cabubombe.—Lev. 5:1. w16.02 4:14

“Milimo yakubelekela Leza cakulyaaba” ibikkilizya milimo yanu njomucita mumbungano, mbuli kuunka kumiswaangano alimwi akukambauka. Pele alimwi ilabikkilizya amilimo eeyo bamwi njobataboni, mbuli mipailo njomupaila kuli Jehova nyolikke alimwi aciiyo canu nobeni. Muntu iwakalyaaba kuli Jehova takayeeyi kuti milimo eeyi ilaminya. Uyoolimvwa mbubwenya mbwaakalimvwa Mwami Davida, iwakati: “Ndilakukkomanina kucita kuyanda kwako, O Leza wangu, alimwi mulawo wako uli mukati kamoyo wangu.” (Int. 40:8) Mwalyaaba kuli Jehova alimwi akubbapatizyigwa, munoojisi cilongwe cimugeme anguwe. Aboobo, nzyomucitila Jehova tazyeelede kuyaama aabazyali banu naa amuntu uuli woonse. Bukkale bwanu busalala alimwi amilimo yakubelekela Leza cakulyaaba itondezya kuti mulisinizyide kuti mulijisi kasimpe alimwi muyanda kutobela zyeelelo zya Leza. Lino-lino muyakweelela kubbapatizyigwa. w16.03 2:10, 12, 15

Mulawo wakali kukwabilila bana Israyeli kukutalilemeka alimwi akubukombi bwakubeja bwazisi izyakabazingulukide. Ciindi bana Israyeli nobakali kumuswiilila Leza, bakali kutambula zilongezyo zyakwe. Ciindi nobatakali kumuswiilila, bakali kupenga kapati. (Dt. 28:1, 2, 15) Kuli kaambo akambi ikakapa kuti malailile mapya ayandike. Mulawo wakapa kuti bana Israyeli balibambile kujatikizya cintu cimwi iciyandika kapati mumakanze aa Leza, kuboola kwa Mesiya, Jesu Kristo. Mulawo wakabayeezya bana Israyeli kuti bakali bantu batalondokede. Alimwi wakabagwasya kumvwisya kuti bakali kuyandika cinunuzyo, nkokuti cituuzyo cilondokede icakali kukonzya kugwisya zibi zyabo cakumaninina. (Gal. 3:19; Heb. 10:1-10) Kuyungizya waawo, Mulawo wakakwabilila mulongo wazyalani lya Mesiya akugwasyilizya bana Israyeli kuti bamuzyibe ciindi naakasika. Inzya, Mulawo wakali mbuli “musolozi” waciindi cisyoonto iwakabasololela kuli Kristo. w16.03 4:6, 7