May

Tuyoocikonzya kubandika abamwi munzila yaluzyalo ikuti naa katubalemeka alimwi akubabikkila maano mbobalimvwa. Eeci ncaakacita Jesu. Mucikozyanyo, ciindi naakabona nkamu kaisolekesya kuswiilila nzyaakali kwaamba, wakakkomana kapati kuba aciindi cakuba ambabo alimwi akubayiisya. (Mk. 6:34) Nociba ciindi bantu nobakali kumutukila, Jesu kunyina naakatalika kutukila awalo. (1Pet. 2:23) Nokuba kuti tulabayanda bamukwasyi alimwi abalongwe, tulakonzya kwaambaula kulimbabo munzila iitali kabotu akaambo kakuti tulibazyi kabotu. Tulakonzya kuyeeya kuti tatweelede kubikkila maano kujatikizya mbotwaambaula kulimbabo. Pele Jesu kunyina naakaambaula munzila iitali kabotu kubalongwe bakwe. Ciindi bamwi akati kabo nobakakazyanya kujatikizya iwakali mupati, wakabalaya munzila yaluzyalo alimwi akubelesya cikozyanyo camwana musyoonto kutegwa abagwasye kucinca mbobakali kuyeeya. (Mk. 9:33-37) Baalu balakonzya kwiiya cikozyanyo ca Jesu kwiinda mukulaya bamwi munzila yalubomba.—Gal. 6:1. w15 12/15 3:15, 16

Ino nkaambo nzi ncociyandika kapati kuzumanana kutondezya luyando lwabunyina? Ikaambo kapati ncotweelede kutondezya luyando lwabunyina nkakuti Jehova utwaambila kucita oobo. Tatukonzyi kuyanda Jehova ikuti katutabayandi bakwesu. (1Joh. 4:7, 20, 21) Kaambo akambi nkakuti tuyandika bakwesu, ikwaambisya muziindi zikatazya. Ciindi Paulo naakalemba lugwalo lwakwe ku Banakristo Bahebrayo, wakalizyi kuti bamwi muciindi buyo cisyoonto bakali kuyoosiya maanda alimwi azintu zyabo. Jesu wakaamba mbocakali kuyookatazya ciindi eeco. (Mk. 13:14-18; Lk. 21:21-23) Aboobo kacitanasika ciindi eeco, Banakristo aabo bakeelede kuyandana kapati. (Rom. 12:9) Mapenzi mapati aatanacitikide alaafwaafwi kusika. (Mk. 13:19; Ciy. 7:1-3) Pele nzinji nzyotweelede kucita kunze buyo lyakuswaangana lyoonse. Paulo wakabayeezya Banakristo Bahebrayo kuti bakeelede kukulwaizyanya mukutondezya luyando alimwi akucitila umwi aumwi zintu zibotu.—Heb. 10:24, 25. w16.01 1:6-8

Oobu bwakali buzuba bwa Pentekosite yamumwaka wa 33. Alimwi eeci cakacitikila basikwiiya ba Jesu ibali 120 ibakali kupaila antoomwe muŋanda yamujulu mu Jerusalemu. (Mil. 1:13-15) Musinsimi Joeli wakalemba kujatikizya cintu eeci icakali kuyanda kucitika. (Joel. 2:28-32; Mil. 2:16-21) Mubuzuba bwa Pentekosite yamumwaka wa 33, Leza wakapa Banakristo aabo muuya wakwe uusalala, alimwi bakananikwa. (Mil. 1:8) Mpoonya, nkamu yabantu yakatalika kubungana akati kabo, alimwi basikwiiya bakatalika kwaamba kujatikizya zintu zigambya nzyobakazwa aakubona akumvwa. Mwaapostolo Petro wakapandulula zintu izyakazwa aakucitika alimwi akaambo ncozyakali kuyandika kapati. Mpoonya, wakaambila nkamu yabantu kuti: “Amweempwe, alimwi umwi aumwi wanu abbapatizyigwe muzina lya Jesu Kristo kutegwa mulekelelwe zibi zyanu, eelyo mulatambula cipego citabbadelwi camuuya uusalala.” Mubuzuba oobo, bantu ibakali kubalilwa ku 3,000 bakabbapatizyigwa, alimwi abalo bakatambula muuya uusalala.—Mil. 2:37, 38, 41. w16.01 3:1-3

Ino muunzila nzi munanike mbwanga walya cinkwa akunywa waini munzila “iiteelede” lya Ciibalusyo? Ikuti muntu katajisi cilongwe cibotu a Jehova alimwi akuti katasyomeki kulinguwe, nkokuti ciindi nalya cinkwa akunywa waini, tatondezyi bulemu. (Heb. 6:4-6; 10:26-29) Kucenjezya ooku kuyeezya bananike kuti beelede kuzumanana kusyomeka ikuti kabayanda kuyoopegwa ‘bulumbu bwakujulu mbwabaitila Leza kwiinda muli Kristo Jesu.’ (Flp. 3:13-16) Paulo wakaambila Banakristo bananike kuti: “Mebo ndemwaange mu Mwami, ndimulomba kuti kamweenda munzila yeendelana abwiite mbomwakaitilwa.” Ino inga bacita buti oobo? Paulo wakapandulula kuti: “Cakulicesya cakumaninina akubomba moyo, cakukkazika myoyo, akweengelelana caluyando. Kamusoleka camoyo woonse kuzumanana alukamantano lwamuuya mucaanzyo caluumuno.” (Ef. 4:1-3) Muuya uusalala wa Jehova ugwasya babelesi bakwe kulicesya, kutali kulisumpula.—Kol. 3:12. w16.01 4:5, 6

Amweezyeezye ciindi Abrahamu naakajisi myaka yakuzyalwa iibalilwa ku 125 katanta cilundu asyoonto-syoonto. Kusyule lyakwe kwakali Izaka mwanaakwe, iwakali amyaka yakuzyalwa iili 25. Izaka wakanyamwide nkuni, mpoonya Abrahamu wakajisi cipeni alimwi azimwi izyakali kuyandika kuyasya mulilo. Lweendo oolu ambweni ndolwakali lweendo luyumu kwiinda mubuumi bwa Abrahamu. Pele tiikwakali kucembaala kwakwe pe ikwakapa kuti luyume. Wakacijisi nguzu zinji. Muciindi caboobo, lweendo oolu lwakali luyumu nkaambo Jehova wakamwambila kuti atuule mwanaakwe! (Matl. 22:1-8) Ambweni eeli ndelyakali sunko lipati kwiinda ilyakasunka lusyomo lwa Abrahamu. Bantu bamwi baamba kuti Leza wakatondezya lunya kuli Abrahamu kwiinda mukumwaambila kuti atuule mwanaakwe. Pele Abrahamu tanaakamwvida Leza cakutazyiba, nkokuti kumumvwida kakunyina kuyeeya ncaakali kucita. Wakamumvwida nkaambo wakajisi lusyomo lwini-lwini. Wakalizyi kuti Jehova tanaakali kukonzya kumwaambila kucita cintu cakali kukonzya kumupa kuusa mubuumi bwakwe boonse. Abrahamu wakalizyi kuti ikuti naa wamvwida, Jehova wakali kuyoomulongezya walo amwanaakwe ngwaakali kuyandisya. Ino ncinzi Abrahamu ncaakali kuyandika kutegwa abe alusyomo luyumu luli boobu? Wakali kuyandika kuba aluzyibo alimwi akucitikilwa zintu zimwi. w16.02 1:3, 4

Mariya wakali kuyoomita akuzyala Mwana wa Leza alimwi akumukomezya! Kanji-kanji tulaamba kujatikizya coolwe cipati Mariya ncaakapegwa. Pele ino kulangilwa kuti nzintu nzi zimwi nzyaakali kuyoowa? Mucikozyanyo, mungelo Gabriyeli wakaamba kuti wakali kuyoomita kakunyina koona amusankwa. Pele Gabriyeli tanaakabapandulwida bamukwasyi wa Mariya naa basimukobonyina mbwaakali kuyoomita. Ino ncinzi ncobakali kuyooyeeya? Mbuti mbwaakali kuyoomupandulwida Josefa kutegwa asyome kuti tanaakacita cakutasyomeka kulinguwe? Kuyungizya waawo, wakajisi mukuli mupati wakukomezya Mwana wa Leza kali muntunsi! Tatuzyi zintu zyoonse nzyaakali kulibilika Mariya, pele tulizyi ncaakacita Mariya ciindi naakamana kubandika anguwe Gabriyeli. Wakaingula kwiinda mukwaamba majwi aali mulugwalo lwabuzuba bwasunu.—Lk. 1:26-37. w16.02 2:13, 14

Husai wakali umwi wabalongwe basyomeka ba Mwami Davida. Ciindi bantu nobakali kuyanda kuti babikke Abisalomu kuba Mwami, Husai wakali kuyandika busicamba kutegwa azumanane kusyomeka kuli Davida akuli Leza. Wakalizyi kuti Abisalomu wakasikide ku Jerusalemu abasikalumamba bakwe akuti Davida wakatija. (2Sam. 15:13; 16:15) Pele ino Husai wakacita nzi? Sena wakamulekelezya Davida akutalika kugwasya Abisalomu? Peepe. Nokuba kuti Davida wakalicembeede alimwi bantu banji bakali kuyanda kumujaya, Husai wakazumanana kusyomeka kulinguwe nkaambo Jehova wakasalide Davida kuti abe mwami. Aboobo Husai wakaunka ku Cilundu Camaolifa kuti akaswaangane a Davida. (2Sam. 15:30) Davida wakalomba Husai kuti apiluke ku Jerusalemu akuyoolicengeezya kuba mweenzinyina wa Abisalomu kutegwa aambile Abisalomu kuswiilila kululayo lwakwe muciindi cakuswiilila kululayo lwa Ahitofeli. Husai wakali sicamba alimwi wakabikka buumi bwakwe muntenda kutegwa acite ncaakaamba Davida akuzumanana kusyomeka kuli Jehova. Davida wakapaila kuti Jehova agwasye Husai, alimwi eeci ncecakacitika. Abisalomu wakaswiilila nzyaakaamba Husai muciindi cakuswiilila Ahitofeli.—2Sam. 15:31; 17:14. w16.02 4:15, 16

Mbotuli Banakristo, tulakonzya kugwasyigwa amalailile Jehova ngaakapa mu Mulawo. Munzila nzi? Tulakonzya kwiima akulanga njiisyo mpouyeeme Mulawo. Nokuba kuti lino tatuceendelezyegwi amilawo eeyo, tulakonzya kugwasyigwa abunji bwamilawo eeyo kutegwa kaitusololela mubuumi bwesu bwabuzuba abuzuba alimwi anotukomba Jehova. Wakayanda kuti milawo eeyo ilembwe mu Bbaibbele kutegwa tukonzye kwiiya kulinjiyo, kusololelwa anjiisyo zijanika mumilawo eeyo, alimwi akulumba kapati kuti Jesu wakatuyiisya cintu cimwi iciyandika kapati kwiinda Mulawo. Amuswiilile nzyaakaamba Jesu: “Mwakamvwa kuti kwakaambwa kuti: ‘Utaciti bumambe.’ Pele ndimwaambila kuti kufwumbwa muntu uulangisisya mukaintu cakumunyomenena, wacita kale bumambe anguwe mumoyo wakwe.” Aboobo, tatweelede buyo kutacita bumambe pele alimwi tweelede kukaka mizeezo mibi akulombozya kubi.—Mt. 5:27, 28. w16.03 4:6, 8

Samuele wakalengaana kucita ncobakali kuyanda bantu cakuti Jehova wakacita kumwaambila buya ziindi zyotatwe kuti aswiilile ncobakali kwaamba bantu. (1Sam. 8:7, 9, 22) Nokuba boobo, Samuele tanaakanyema naa kumubikkilila muntu iwakali kuyakumulida zina. Ciindi Jehova naakamwaambila kunanika Saulo, musinsimi wakamvwida, ikutali kuyanda buyo kwiinzya mulawo, pele wakalisungula akaambo kaluyando. Mbubwenya mbuli Samuele, baalu mazuba aano ibajisi luzyibo balabutondezya bube oobu kuli baabo mbobayiisya. (1Pet. 5:2) Baalu bali boobu tabawayiwayi kuyiisya bamwi milimo kabayoowa kuti ambweni basikwiiya balakonzya kubweza mikuli imwi mumbungano. Bantu mbobayiisya tabababoni kuti mbaasikuzundana limwi, pele bababona kuti ‘mbaasimilimonyina’—zipego zibotu kapati kumbungano. (2Kor. 1:24; Heb. 13:16) Eelo kaka balimvwa kukkutila bamayi aaba balisungwide ciindi nobabona basikwiiya mbobabelesya zintu nzyobayiisyigwa kutegwa mbungano igwasyigwe!—Mil. 20:35. w15 4/15 1:16, 17

Mwami Azariya “wakazumanana kucita ziluleme mumeso aa Jehova.” Nokuba boobo, “Jehova wakapa kuti mwami aciswe, aboobo wakazumanana kali sicinsenda kusikila buzuba naakafwa.” (2Bam. 15:1-5) Ino nkaambo nzi? Cibalo tacaambi pe. Sena makani aaya ayelede kutunyonganya naa kutupa kuyeeya kuti Jehova wakasubula Azariya kakunyina kaambo? Inga tiitwayeeya boobo pe ikuti katuzizyi kabotu nzila zya Jehova. Mwami Azariya alimwi wakazyibidwe kuti Mwami Uziya. (2Bam. 15:7, 32) Mucibalo cimwi cikozyenye aceeci mulugwalo lwa 2 Makani 26:3-5, 16-21, twiiya kuti nokuba kuti Uziya wakacita zililume mumeso aa Jehova kwaciindi cili mbocibede, kumbele “moyo wakwe wakalisumpula akulinyonyoona.” Cakulisumpula, wakasola kucita milimo yabapaizi eeyo njaatakazumizyidwe kucita. Bapaizi ibali 81 bakamusikila kutegwa bamululamike. Ino Uziya wakacita buti? Wakatondezya kulisumpula kapati. Uziya “wakanyema” akaambo kalulayo ndwaakapegwa abapaizi. Anu nkakaambo kaako Jehova ncaakamusubula acinsenda! w15 4/15 3:8, 9

Mbubwenya mbokulembedwe atala aawa, Saatani waambwa kuti Diabolosi, izina lyaamba “Sikubejekezya.” Eeci cituyeezya kuti Saatani usampaula Jehova kwiinda mukumwaamba kuti ulabeja. Majwi aakuti “imuzoka ooyo wakaindi” atuyeezya cakacitika mu Edeni ibuzuba Saatani naakabelesya nzoka kweena Eva. Majwi aakuti “simwaaba ooyo mupati” atuyeezya cinyama cipati ciyoosya alimwi alamweelela Saatani akaambo kabukali bwakwe mukuyandisya kunyonganya makanze aa Jehova alimwi akunyonyoona bantu ba Leza. Masimpe cilalibonya kuti Saatani ulayandisisya kunyonganya lusyomo lwesu. Nkakaambo kaako Bbaibbele litucenjezya kuti: “Amulibatamike, amupakamane! Sinkondonyoko, Diabolosi, uyaabweendeenda mbuli syuumbwa wabutambo uuvwuluma, uyandaula muntu ngwatiimene buumbulu.” (1Pet. 5:8) Saatani ulakkomana kapati ciindi mubelesi wa Jehova naacita cibi cipati alimwi ulakonzya kubelesya kuzunda ooku mukusampaula Jehova.—Tus. 27:11. w15 5/15 1:3, 4, 10

Tulizyi kuti Jehova uyanda kuti katukkomana mubuumi nkaambo wakapa ba Adamu a Eva Paradaiso yeebeka kutegwa kabakkala mumo. (Matl. 2:9) Pele Saatani ulakonzya kunyonganya kulombozya kwesu kwiinda ‘mukutoongelezya alubono.’ (Mt. 13:22) Bantu banji bayeeya kuti mali inga abapa kukkomana naa kuti zintu zyakumubili inga zyabapa kuzwidilila. Kuyeeya kuli boobu nkweenwa ncobeni, alimwi inga kwapa kuti tusweekelwe cintu ciyandisi ncotujisi, nkokuti cilongwe cesu a Jehova. Jesu wakacenjezya basikumutobela kuti: “Taakwe uukonzya kubelekela basimalelo bobilo; nkaambo uyoosula umwi akuyanda umbi, naa uyoosyomeka kuli umwi akusampula umbi. Tamukonzyi kubelekela Leza alimwi a Lubono.” (Mt. 6:24) Kuti naa twabelekela Lubono cakumaninina, nkokuti twaleka kubelekela Jehova, eeci Saatani ncayanda kuti tucite! Tutalekeli mali naa zintu zikonzya kuulwa amali kunyonganya cilongwe cesu a Jehova. Kutegwa tumulwane Saatani, tweelede kuzibona munzila yeelede zintu zyakumubili.—1Tim. 6:6-10. w15 5/15 2:12

Talili lyoonse nocili cuubauba kwaamvwisya mapenzi ngobajisi bamwi. Ibantu banji bajisi mapenzi aatana buzuba atucitikila. Bamwi bajisi buyumuyumu bwakumubili akaambo kakulicisa, kuciswa, naa kucembaala. Ibambi balapenga mumizeezo akaambo kakutyompwa, kutakkalikana mumizeezo, naa buyumuyumu buboola akaambo kakutundululwa. Mpoonya bamwi bazulilwa mumikwasyi mobaindene bukombi naa imuli muzyali omwe. Umwi aumwi ulijisi mapenzi amwi, alimwi kanji-kanji inga mapenzi aatana buzuba atucitikila. Mubukkale buli boobu, mbuti mbotukonzya kulwiiya luyando lwa Leza? Kwiinda mukuswiililisya akumvwisya mbwalimvwa muntu ooyo kusikila mpotugolela. Eeci ciyootukulwaizya kwiiya luyando lwa Jehova kwiinda mukucita kweelana azintu ziyandika. Zintu ziyandika ziliindene kumuntu umwi aumwi, pele tulakonzya kubayumyayumya kumuuya alimwi akubapa lugwasyo lumwi luyandika.—Rom. 12:15; 1Pet. 3:8. w15 5/15 4:6, 7

Nguzu zya Kristo zizwa kuli Jehova, aboobo tulijisi twaambo tulimvwisya twakusyoma kuti Leza Singuzuzyoonse ulakonzya kweendelezya zilengwaleza. Amubone zikozyanyo eezyi zitobela. Kaitanatalika Zambangulwe, Jehova wakaamba kuti: “Kwainda buyo mazuba aali ciloba ndilawisya mvwula anyika mazuba aali 40, syikati amasiku.” (Matl. 7:4) Lugwalo lwa Kulonga 14:21 alwalo lwaamba kuti: “Jehova wakapa kuti maanzi aandaane kwiinda mukubelesya guwo ilyakali kuzwa kujwe.” Alimwi alugwalo lwa Jona 1:4 lwaamba kuti: “Jehova wakatuma guwo pati mulwizi, eelyo kwakaba mayuwe mapati kapati mulwizi cakuti bwato bwakali kuyanda kunyonyooka.” Cilayumya-yumya kuzyiba kuti Jehova ulakonzya kweendelezya zintu nzyaakalenga. Cilakkomanisya kuzyiba kuti munyika mpya Leza unooyendelezya zilengwaleza. Eelo kaka cilakkomanisya kuyeeya ciindi zilengwaleza naa ntenda zilicitikila nozitakajayi limbi bantu, nkaambo ‘tente lya Leza liyooba akati kabantu’! (Ciy. 21:3, 4) Tulijisi lusyomo lwakuti nguzu zya Leza izyakatondezyegwa kwiinda muli Jesu ziyakweendelezya zilengwaleza mumyaka iili 1,000. w15 6/15 1:15, 16

Ntenda iiliko mukuunduluzya lulayo oolu ilitondezyedwe mulugwalo lwa Tusimpi caandaano 7, mwalo mwaambidwe mulombwana umwi iwakainda munsi-munsi aaŋanda yamukaintu uutalilemeki. Mpoonya bakacita bwaamu. Nicakabota naatakasola kuswena afwaafwi amukaintu ooyu! (Tus. 7:6-27) Sena andiswe inga twayanda kuba bafwubafwuba mbuli mulombwana wamucikozyanyo, ambweni kwiinda mukulibikka mubukkale bubyaabi ibukonzya kutupa kuba amizeezo yakucita bwaamu? Mucikozyanyo, masiku, basikweendelezya mapulogilamu aa TV balakonzya kutondezya zintu zitali kabotu. Pele mbuti kuti tujisi cilengwa cakulangaula mapulogilamu aa TV? Ambweni tulakonzya kutalika kutobela makkeyala aa Intaneti pesi mubwini kakunyina ancotulangaula, makkeyala alo aakonzya kututola kumakkeyala aatondezya zintu ziletela muzeezo wakoonana. Mubukkale buli boobu, sena zintu eezyo inga tiizyatupa kuba aamizeezo iitali kabotu alimwi akutupa kuti tucileke kusalala mukulilemeka? w15 6/15 3:8, 9

Jesu wakati: “Kotulekelela zikwelete zyesu.” (Mt. 6:12, bupanduluzi buyungizyidwe) Aciindi cimbi wakaamba kuti: “Kotulekelela zibi zyesu.” (Lk. 11:4) Myaka yiinda ku 60 yainda, Ngazi Yamulindizi yakapandulula kabotu-kabotu kuti: “Cibi icijatikizya kusotoka mulawo wa Leza citupa kuba acikwelete kulinguwe. . . . Nkaambo cibi cesu cilakonzya kupa kuti Leza atunyange buumi bwesu. . . . Ulakonzya kutunyanga luumuno lwakwe, akucimana cilongwe coonse ncotujisi anguwe.  . . Tujisi cikwelete cakutondezya luyando kulinguwe, luyando ilutondezyegwa kwiinda mukumvwida; ciindi notubisya tulaalilwa kubbadela cikwelete cesu caluyando kulinguwe, nkaambo cibi nkutatondezya luyando kuli Leza.” (1Joh. 5:3) Ikulekelelwa nkotuyandika buzuba abuzuba kutondezya nzila ilikke njakonzya kubelesya Leza kumana zibi zyesu, nkokuti cipaizyo cacinunuzyo ca Jesu. Nokuba kuti cinunuzyo eeci cakabbadelwa myaka iisika ku 2,000 yainda, tweelede kucikkomanina mbuli kuti ncipego capegwa sunu. “Muulo wakunununa buumi” bwesu “ngwaatala kapati” cakuti kunyina muntu uutalondokede ncakonzya kutucitila cikonzya kweelana naaceya kukucibbadela.—Int. 49:7-9; 1Pet. 1:18, 19. w15 6/15 5:9, 10

Eelo kaka cilakkomanisya kwaabila mabbuku aagwasya alimwi aaboneka kabotu ciindi notuli mumulimo wamumuunda! Alimwi notubelesya mincini yamazuba aano kumwaya kasimpe, mucikozyanyo kwiinda mukubelesya Webbusaiti ya jw.org/toi, tutondezya kuti Jehova ulababikkila maano bantu kufwumbwa nkobabede kwiinda mukubapa busolozi bunji bwabo mbobayandika kapati. Icimbi ncotuteelede kuluba mbusongo ibwakapa kuti kube kucinca ooko ikwakatupa coolwe cakuba abubambe bwa Kukomba Mumukwasyi naa ciindi cinji cakucita ciiyo cesu tobeni. Alimwi tulalumba kapati kuyaambele kucitwa mumapulogilamu aamiswaangano yabbazu alimwi ayacooko. Kanji-kanji tulaamba kuti miswaangano iyaabwiindila kubota mwaka amwaka! Alimwi tulikkomene alwiiyo luyungizyidwe iluli mukupegwa kwiinda muzikolo zinji zyeendelezyegwa a Leza. Mukucinca koonse ooku, cilalibonya kuti Jehova ulaisololela mbunga yakwe. Buce-buce ulaibotya mbunga alimwi aparadaiso yakumuuya eeyo iitukkomanisya noliba lino! w15 7/15 1:16, 17

Ikuti naa kamutazyi ncomweelede kucita mubukkale bumwi, ncabusongo kulibuzya kuti, ‘Naali Jesu, ino naacita buti?’ Cisi mwaakali kukkala Jesu cakajisi bantu ibakali kuzwa muzyooko ziindene-indene—ku Judaya, ku Galilaya, ku Samariya, alimwi akuzyooko zimbi. Zibalo zyamu Bbaibbele zitondezya kuti kwakali kutamvwana akati kabantu bakumasena aaya aaindene-indene. (Joh. 4:9) Kutamvwana alimwi kwakaliko akati kaba Farisi aba Saduki (Mil. 23:6-9), akati kabantu buyo abasimutelo (Mt. 9:11), alimwi aakati kabaabo bakayiisyigwa muzikolo zyaba Juda alimwi abaabo batakaiya muzikolo eezyo. (Joh. 7:49) Mumwaanda wamyaka wakusaanguna, bana Israyeli bakali kweendelezyegwa abana Roma, aabo mbobakasulide kapati. Nokuba kuti Jesu wakali kusumpula kasimpe kabukombi alimwi akuzumina kuti lufwutuko lwakali kuzwa kuba Juda, kunyina naakakulwaizya basikwiiya bakwe kuba amuuya wakuzwangana. (Joh. 4:22) Muciindi caboobo, wakakulwaizya basikwiiya bakwe kunooyanda bantu boonse nkaambo bakali basimukobonyina. w15 7/15 3:5

Bantu bakalengwa munzila yakuti kabatondezya luyando alimwi akuti kabatondezyegwa luyando. Ncuuba-uba kumuntu kutyompwa ikuti naa eeci tiicazuzikizyigwa akaambo kazintu zicitika cakutayeeyelwa naa zintu zityompya, kuciswa, kubula mali, naa kutazwidilila mumulimo wamumuunda. Ikuti naa twatalika kulimvwa kuti Jehova tacituyandi, inga twacita kabotu kuyeeya kuti tulayandika kapati kulinguwe alimwi akuti nkwali lyoonse, ‘katujatide kujanza lyakwe lyalulyo’ alimwi akutugwasya. Takatulubi ikuti naa katusyomeka kulinguwe. (Is. 41:13; 49:15) Ba Brigitte, ibakakomezya bana bobilo kabali balikke ciindi balumi babo nobakafwa, bakaamba kuti: “Kukomezya bana mubweende oobu bwa Saatani ncintu cimwi cikatazya kapati, kwaambisya kumuzyali uuli alikke. Pele ndilisinizyide kuti Jehova ulandiyanda nkaambo wandisololela muziindi zyamause amuziindi zikatazya, alimwi taakwe nandilekela kunjila mumasunko ngonditakonzyi kuliyumya.”—1Kor. 10:13. w15 8/15 1:1-3

Musinsimi Habakuku, wakaambilwa kusinsima lunyonyooko lwa Jerusalemu. Kuzikusika ciindi naakaba musinsimi, mulumbe wakucenjezya kuti munzi ooyo wakali kuyoonyonyoonwa wakalaambilizyidwe kale kwamyaka minji. Bukkale bwakalibijide kapati cakuti ‘babi bakazingulukide balulami alimwi abululami bwakalinyonganizyidwe.’ Nkakaambo kaako tacigambyi kuti Habakuku wakabuzya kuti: “O Jehova, ino ndilalilila lugwasyo kwaciindi cilamfwu buti?” Jehova wakasyomezya musinsimi uusyomeka kuti lunyonyooko ilwakasinsimidwe tiilwakali ‘kuyoomuka pe.’ (Hab. 1:1-4) Atwaambe kuti Habakuku naakatyompwa alimwi akwaamba kuti: ‘Ndali kumvwa kwaambilizyigwa kwalunyonyooko lwa Jerusalemu kwamyaka minji. Mbuti kuti naa lunyonyooko lucili kulamfwu? Taciciyandiki kuzumanana kusinsima mbuli kuti munzi ulanyonyoonwa mpoonya aawa. Ndilalekela bamwi kuti basinsime.’ Ikuti Habakuku naakazumanana kuba amizeezo eeyi, naakasweekelwa coolwe cibotu ncaakajisi kuli Jehova—alimwi buya akusweekelwa buumi bwakwe ciindi Jerusalemu naakali kuyoonyonyoonwa abana Babuloni. w15 8/15 2:12, 13

Kutegwa tutanyonyooni zilengwa zyesu zibotu, tatweelede kuba abalongwe ibacita zintu zibi. Eeci tacijatikizyi buyo kuyanzana abantu batasyomi ibacita zibi pele alimwi cilajatikizya akuyanzana abaabo ibaamba kuti bakomba Jehova pele kabatatobeli milawo yakwe acaali. Kuti bantu bali boobu ibalyaamba kuti Mbanakristo bacita cibi cipati alimwi kabateempwi, tatuzumanani kuyanzana ambabo. (Rom. 16:17, 18) Kuti naa twatalika kuyanzana abantu ibatatobeli milawo ya Leza, tulakonzya kuba acilengwa cakucita nzyobacita kutegwa kabatukkomanina. Mucikozyanyo, kuti naa twatalika kuyanzana abasibwaamu, tulakonzya kusunkwa kucita bwaamu. Eeci cakabacitikila kale Banakristo balyaabide, alimwi bamwi bambabo bakagwisyigwa mumbungano nkaambo tiibakatondezya kweempwa. (1Kor. 5:11-13) Ccita kuti beempwa, bukkale bwabo bulakonzya kweelana abukkale mbwaakaamba Petro.—2Pet. 2:20-22. w15 8/15 4:4-6

Jesu wakasala kabotu aabo bakaba balongwe bakwe. Jesu wakasala balongwe akati kabantu ibakali kumutobela cakusyomeka alimwi ibakali kuyanda kubelekela Jehova. Sena musala balongwe bayanda Jehova amoyo woonse? Ino nkaambo nzi ncociyandika? Luyando lwabakwesu abacizyi lulakonzya kumugwasya kuba Munakristo uusimide. Sena muli mukubusi uuyandaula cakucita mubuumi? Ikuti naa mboobo, ncamaano kusala balongwe ibabelekela Jehova kwaciindi cili mbocibede alimwi ibakulwaizya muuya walukamantano mumbungano. Ambweni bakajisi mapenzi amwi mubuumi bwabo alimwi ambweni bakaliyumya mubuyumuyumu bumwi mukubelekela Jehova. Balakonzya kumugwasya kusala nzila yiinda kubota mubuumi. Ciindi nomujanika ambabo, balakonzya kumugwasya kusala cabusongo alimwi akuzumanana kukomena kumuuya mbomuli Munakristo.—Heb. 5:14. w15 9/15 1:14, 15

Jesu wakabagwasya basikwiiya bakwe kuti bayumye lusyomo lwabo kwiinda muzintu nzyaakali kwaamba akucita. (Mk. 11:20-24) Tweelede kwiiya cikozyanyo ca Jesu. Ikuti twacita oobo, tuyooyumya lusyomo lwesu alimwi alwabamwi.(Tus. 11:25) Mbuti mbomukonzya kugwasya bantu bamucilawo canu? Ciindi nomuyiisya bamwi Bbaibbele, amukankaizye kapati bumboni butondezya kuti Leza nkwali, akuti ulatulanganya, alimwi akuti Bbaibbele ndi Jwi lya Leza. Mbuti mbomukonzya kugwasya Banakristonyoko kuti bazumanane kuyuma mulusyomo? Ikuti mwabona umwi katongooka bakwesu basololela, mutafwambaani kutalika kumweeleba. Amubelesye bupampu kubagwasya kutegwa lusyomo lwabo luyume alimwi. (Jud. 22, 23) Ikuti kamucili basicikolo mpoonya bayi banu baamba kujatikizya njiisyo yakusanduka, amube basicamba akwiiminina lusyomo lwanu lujatikizya kulengwa kwazintu. Mulakonzya kugambwa kapati ambobakonzya kujatikizyigwa bayi banu alimwi abasicikolonyoko. Jehova ulagwasya umwi aumwi wesu kwiima nji mulusyomo. (1Pet. 5:10) Kuyandika kusolekesya kapati kutegwa tube alusyomo luyumu, pele Jehova uyootulumbula ikuti twasolekesya kusikila mpotugolela. w15 9/15 3:20, 21

Mazuba aano, Jehova ulatuyiisya zintu zinji zijatikizya nguwe, makanze aakwe, zilenge zyakwe, alimwi a Jwi lyakwe. Nyika ikulwaizya bantu kuba alwiiyo lwaatala lwalo kanji-kanji lupa kuti bantu aabo balujana bacileke kumuyanda Leza. Mukwiimpana, Jehova uyanda kuti tube aluzyibo alimwi akutugwasya kuba basongo. Uyanda kuti tubelesye zintu nzyotwiiya kutegwa tugwasyigwe alimwi akugwasya bambi. (Tus. 4:5-7) Mucikozyanyo, uyanda kuti twaambile bamwi “luzyibo lwini-lwini lwakasimpe” alimwi akubagwasya kuti bakafwutuke kumbele. (1Tim. 2:4) Tulatondezya kuti tulamuyanda Jehova alimwi abantu kwiinda mukuyiisya bantu banji makani aajatikizya Bwami bwa Leza alimwi ancobuyoocitila bantu.—Int. 66:16, 17. w15 9/15 5:10, 11

Ciindi nomuzinzibala kuyeeya cikozyanyo ca Elija, amubikkile maano kubukkale bosanwe mwaakatondezya lusyomo luyumu muli Jehova. (1) Ciindi Elija naakaambila Mwami Ahabu kuti Jehova wakali kuyooleta ciyumayuma, wakaamba cakusinizya kuti: “Mbubonya Jehova Leza wa Israyeli ngondikomba mbwali muumi, mumyaka eeyo takukooyooba mume noiba mvwula.” (1Bam. 17:1) (2) Elija wakali kusyoma kuti Jehova wakali kuyoomupa antoomwe abamwi zintu nzyobakali kuyandika nokwakali ciyumayuma. (1Bam. 17:4, 5, 13, 14) (3) Elija awalo wakalisinizyide kuti Jehova wakali kukonzya kumubusya mwana wamukamufwu. (1Bam. 17:21) (4) Taakwe naakali kudooneka kuti mulilo wa Jehova wakali kuyoocuumpa cakumaninina cipaizyo cakwe a Cilundu ca Karameli. (1Bam. 18:24, 37) (5) Nociba ciindi kakutanawa mvwula iili yoonse, Elija wakaambila Ahabu cakusinizya kuti: “Koya ukalye akunywa, nkaambo kumvwika kuvwuuma kwamvwula mpati.” (1Bam. 18:41) Aboobo, notwalanga-langa zintu eezyi zyakacitika, tulakonzya kulibuzya kuti: ‘Sena lusyomo lwangu nduyumu mbuli mbolwakabede lusyomo lwa Elija?’ w15 10/15 2:4, 5

Ikucikonzya kubelesya mwaambo ncipego ncotwakapegwa a Jehova. (Int. 139:14; Ciy. 4:11) Leza alimwi wakatupa cipego acimbi icitupa kuti twiindane abanyama. Bantu bakalengwa “mucinkozya ca Leza.” Tulijisi lwaanguluko lwakulisalila zintu nzyotuyanda. Tulakonzya kusala kubelesya mwaambo kutegwa tumubelekele Jehova alimwi akumutembaula. (Matl. 1:27) Jehova wakatutondezya mbotweelede kumubelekela alimwi akumutembaula kwiinda mukutupa Bbaibbele. Ibbaibbele lyoonse mbolizulwa naa zibeela zyandilyo lilajanika mumyaambo iinda ku 2,800. Ciindi notuzinzibala kuyeeya ncolyaamba Bbaibbele, tulakonzya kutalika kuyeeya mbwayeeya Leza. (Int. 40:5; 92:5; 139:17) Alimwi mizeezo ya Jehova itupa kuba basongo akutusololela kubuumi butamani. (2Tim. 3:14-17) Kuzinzibala kuyeeya caamba kubikkila maano kuyeeya cintu cimwi alimwi akuyeeyesya cakusitikila kujatikizya cintu eeco. (Int. 77:12; Tus. 24:1, 2) Tulagwasyigwa kapati ciindi notuzinzibala kuyeeya nzyotwiiya kujatikizya Jehova alimwi a Jesu.—Joh. 17:3. w15 10/15 4:2-4

Jesu wakaambila basikwiiya bakwe kuti kabalicesya akutaliyanda, alimwi wakabapa cikozyanyo. (Lk. 22:27) Baapostolo bakwe bakabona kuti wakalyaaba kubelekela Jehova akugwasya bamwi, alimwi abalo bakayiya kucita mbubonya. Andinywe mulakonzya kubayiisya bana banu kwiinda mucikozyanyo canu. Ba Debbie, ibajisi bana bobilo, bakaamba kuti: “Akaambo kakuti balumi bangu mwaalu, kunyina nondakali kubijilwa ciindi nobakali kuba abantu bamwi. Ndakalizyi kuti kufwumbwa ciindi imukwasyi wesu nowakali kuyanda balumi bangu, bakali kujana ciindi cakuba andiswe.” Ino cikozyanyo caba Debbie alimwi abalumi babo ba Pranas, cakaugwasya buti mukwasyi wabo? Ba Pranas bakaamba kuti bana babo lyoonse bakali kulisungula kugwasya kubeleka lyamiswaangano mipati. Bakalikkomene, bakapanga balongwe babotu alimwi bakali kuyanda kuba akati kabakwesu abacizyi. Lino boonse mumukwasyi wabo babelekela Jehova mumulimo waciindi coonse. Ikuti kamulicesya alimwi kamutaliyandi, muyiisya bana banu kulisungula kugwasya bamwi. w15 11/15 1:9

Jehova walutondezya luyando lwakwe lupati munzila zinji. Amuyeeye buyo bupati alimwi abubotu bwabubumbo bwesu boonse. Bujisi mabbiliyoni aamilalabungu, alimwi mulalabungu umwi aumwi ujisi mabbiliyoni aanyenyezi amapulaneti. Mumulalabungu wesu, imwi yanyenyezi ndizuba. Ikuti kakunyina zuba, buumi tabukonzyi kubako aano anyika. Zintu zyoonse eezyi izyakalengwa zitondezya kuti Jehova ngo Mulengi wesu, alimwi zitondezya bube bwakwe, mbuli nguzu, busongo, alimwi aluyando. Jehova wakailenga nyika kutegwa kaikkalwa azilenge zyuumi. Zyoonse izili anyika zigwasya zinyama abantu. Leza wakabamba muunda mubotu kutegwa bantu kabakkala mumo alimwi wakabapa bongo bulondokede alimwi amibili iyakali kukonzya kupona kukabe kutamani. (Ciy. 4:11) Kuyungizya waawo, “ulazipa cakulya zilenge zyoonse zipona, nkaambo luyando lwakwe lutamani nkoluli lyoonse mane kukabe kutamani.”—Int. 136:25. w15 11/15 3:7, 8

Mwami wesu watupa zibelesyo nzyotukonzya kubelesya kugwasya bantu kutambula mulumbe wesu. Zibelesyo zimwi zyakabelesyegwa buyo kwaciindi cisyoonto, pele zimwi zicibelesyegwa amazuba aano. Pele zibelesyo zyoonse zyatugwasya kuyungizya luzyibo lwesu mumulimo wakukambauka. Mu 1933, basikumwaya bakatalika kubelesya makkaadi aakalembedwe mulumbe uupa bumboni, cibelesyo icakagwasya banji kutalika kukambauka. Aaka kakali kakkaadi kakalembedwe mulumbe mufwaafwi. Makkaadi aakalembedwe mulumbe uupa bumboni akali kugwasya basikumwaya munzila zisiyene-siyene. Mucikozyanyo, basikumwaya bamwi bakalaansoni, alimwi nokuba kuti masimpe bakali kuyanda kukambauka, tiibakazyi zyakwaamba. Basikumwaya bambi bakali basicamba kapati. Bakali kukonzya kwaambila mukamwini ŋanda zyoonse nzyobakazyi mumaminiti buyo masyoonto, pele nzyobakali kwaamba tiizyakali kwaambwa cabupampu. Imakkaadi aalembedwe mulumbe akagwasya basikumwaya boonse kukambauka munzila iilimvwisya alimwi iitakatazyi. w15 11/15 5:3-6

Magwalo manji atondezya kuti zina lya Leza lilayandika kapati alimwi lyeelede kulemekwa. (Kul. 3:15; Int. 83:18; Is. 42:8; 43:10; Joh. 17:6, 26; Mil. 15:14) Alimwi Jehova wakasololela balembi ba Bbaibbele kubelesya zina lyakwe kwazyuulu-zyuulu mumabbuku aakaindi. (Ezk. 38:23) Aboobo ciindi basanduluzi nobaligwisya zina lya Leza, tabalemeki Jehova. Mazuba aano, tulijisi bumboni bunji butondezya kuti tweelede kulibelesya zina lya Jehova. Mu Bbaibbele lya Busanduluzi Bwanyika Mpya lyamu Chingisi ilyakalembululwa mu 2013, zina lya Leza lilabelesyegwa ziindi zili 7,216. Nkokuti kwayungizyigwa ziindi zili cisambomwe kwiindana a Bbaibbele lyakusaanguna. Ziindi eezyi zyosanwe zyakayungizyigwa akaambo kakuti zina lya Leza lyakajanwa mumabbuku aaku Lwizi Lutajisi Buumi aakamwaigwa lino-lino. Tupango ootu tosanwe tujanika mu 1 Samuele 2:25; 6:3; 10:26; 23:14, 16. Mukapango kacisambomwe ku Babetesi 19:18, zina lya Leza lyakabikkilizyigwa akaambo kabuvwuntauzyi bwakacitwa mumabbuku aa Bbaibbele aakaindi aasyomeka aakalembwa amaanza. w15 12/15 2:5, 6

Tweelede kuyumya luyando lwesu lwabunyina lino nkaambo ciyootugwasya kuliyumya kumasunko aali woonse aakonzya kuyootusikila kumbele. Tulijisi zyoolwe zinji izyakutondezya luyando lwabunyina naaba mazuba aano, naatanatalika mapenzi mapati. Bunji bwabakwesu balapenga akaambo kamizuzumo yanyika, kupaya kwamaanzi, alimwi antenda zimwi zilicitikila. Bakwesu bamwi balaliyumya kukupenzyegwa. (Mt. 24:6-9) Alimwi buzuba abuzuba kuli buyumuyumu bwakujana mali akaambo kakuti tupona munyika eeyi iinyongene. (Ciy. 6:5, 6) Nokuba boobo, mapenzi mbwaayaabubavwulila bakwesu, citupa zyoolwe zinji zyakutondezya kuti tulabayanda kapati. Nokuba kuti bantu munyika eeyi tabajisi luyando, tweelede kuzumanana kutondezya luyando lwabunyina.—Mt. 24:12. w16.01 1:8, 9