September

Katanabasiya babelesi bakwe, Abrahamu wakaamba kuti: “Amusyaale aano ambongolo, pele mebo amulombe ooyu tulaunka okuya kuyookomba, twamana tulapiluka kulindinywe.” (Matl. 22:5) Ino Abrahamu wakali kupandulula nzi? Sena wakali kubeja naakaamba kuti ulapiluka a Izaka, kumwi kazyi kuti wakali kuyoomutuula? Peepe. Ibbaibbele lyaamba kuti Abrahamu wakalizyi kuti Jehova wakali kukonzya kumubusya Izaka. (Heb. 11:19) Abrahamu wakalizyi kuti Jehova wakamupa nguzu zyakuba amwana nokuba kuti walo a Sara bakalicembeede kapati. (Heb. 11:11, 12, 18) Aboobo wakalizyi kuti kunyina cintu citakonzyeki kuli Jehova. Abrahamu tanaakazyi cakali kuyoocitika buzuba oobo. Pele wakalijisi lusyomo lwakuti, ikuti kwayandika, Jehova wakali kukonzya kumubusya mwanaakwe kutegwa zisyomezyo zya Leza zyoonse zizuzikizyigwe. Nkakaambo kaako Abrahamu ncaambwa kuti ngu “usyi wabaabo boonse bajisi lusyomo”!—Rom. 4:11. w16.02 1:3, 13

Mwami Saulo, wakazanga, alimwi Jehova wakamukaka. (1Sam. 15:17-23) Nokuba boobo, Leza wakazumizya Saulo kuti azumanane kulela kwamyaka minji. Aboobo cakabayumina bantu kusyomeka kuli Leza ciindi mwami iwakasalwa kukkala “acuuno cabwami ca Jehova” naakali kucita zintu zibi kapati. (1Mak. 29:23) Nokuba boobo, Jonatani mwana wa Saulo wakazumanana kusyomeka kuli Jehova. Amuyeeye ncaakacita Jonatani ciindi Saulo naakatalika kuzangila Leza. (1Sam. 13:13, 14) Tulakonzya kusyomeka kuli Jehova kwiinda mukumvwida mfwulumende yamucisi oomo motukkala kufwumbwa ciindi nokuyandika kucita boobo. Jehova wabazumizya ‘beendelezi’ aaba kuti batweendelezye, alimwi uyanda kuti katubalemeka. (Rom. 13:1, 2) Nkakaambo kaako ncotweelede kumupa bulemu muntu uuli mumfwulumende nokuba kuti tasyomeki alimwi tulimvwa kuti teeleli kulemekwa. Mubwini tweelede kubalemeka boonse aabo bapedwe nguzu a Jehova zyakweendelezya.—1Kor. 11:3; Heb. 13:17. w16.02 3:5, 6, 8

Ibbaibbele lyaamba kuti bantu ba Jehova boonse, kubikkilizya abana, balakonzya kumubelekela “cakuliyandila.” Aboobo muntu uuyanda kubbapatizyigwa weelede kuba masimpe kuti ooku nkuyanda kwakwe mukamwini. Eeci cibikkilizya kukulingula kabotu-kabotu kuyanda kwanu kwakuti mubbapatizyigwe, kwaambisya ikuti naa mwakakomenena mukasimpe. Nomwali kukomena, muleelede mwalikubona bantu banji kababbapatizyigwa, ambweni mbalongwe banu naa mbanabokwanu. Pele amubone kuti tiimwatalika kulimvwa kuti mweelede kubbapatizyigwa akaambo kakuti mwasika amyaka imwi naa akaambo kakuti banji balabbapatizyigwa. Ino inga mwasinizya buti kuti lubbapatizyo mulubona mbwalubona Jehova? Amukkale ansi kuyeeya kujatikizya kaambo lubbapatizyo ncoluyandika kapati. w16.03 1:11, 12

Pele tulakonzya kucita oobo lilikke ‘notuswaanganizyidwe kabotu-kabotu’ akukamantana mumbungano. (Ef. 4:16) Kutegwa tubasikile bantu banji, tweelede kuweendelezya kabotu mulimo wesu wakukambauka. Malailile ngotutambula kuzwa kumbungano yesu alatugwasya kucita boobu. Twamanizya muswaangano wakulibambila kuya mumulimo wakukambauka, tulaunka kuyaabubandika abantu kujatikizya makani mabotu aa Bwami. Alimwi tulabaabila mabbuku aamba makani aajatikizya Bbaibbele. Twakaabila mamiliyoni aamabbuku aaya kubantu nyika yoonse mbwiizulwa. Zimwi ziindi tulaililwa kutola lubazu mumulimo wakukambauka kwaalubazu. Ciindi nomubeleka mulimo ooyu, mulikamantene amamiliyoni aa Banakristonyoko kuzinguluka nyika yoonse ibali mukukambauka mulumbe nguwenya ngomukambauka! Alimwi mubeleka abangelo, ibali mukugwasyilizya bantu ba Leza kukambauka makani mabotu.—Ciy. 14:6. w16.03 3:4, 5

Bbaibbele litwaambila kuti munyika mpya, tuyootambula mabbuku aakuvwunga aanoojisi malailile mapya. Kwiinda mukwiiya mabbuku aaya, bantu boonse, kubikkilizya abaabo ibayoobusyigwa, bayookonzya kuzyiba Leza nzyayanda kulimbabo. Mabbuku aakuvwunga ayootugwasya kwiiya zinji kujatikizya mbwayeeya Jehova. Alimwi tuyoolimvwisya kabotu Bbaibbele, aboobo mu Paradaiso tuyootondezya luyando abulemu kuli umwi amweenzinyina. (Is. 26:9) Amweezyeezye buyo bunji bwazintu nzyotuyakwiiya akuyiisya bamwi ansi abweendelezi bwa Mwami, Jesu Kristo! Kuti tukaatobele malailile ‘aalembedwe mumabbuku aakuvwunga’ alimwi akuzumanana kusyomeka kuli Jehova mukusunkwa kwamamanino, mazina eesu taakamwaigwi pe ‘mubbuku lyabuumi.’ Tulakonzya kuyootambula buumi butamani! w16.03 4:19, 20

Baalu bacibwene alimwi balakankaizya mbociyandika kutalika kuyiisya bakwesu ciindi nobacili bana—ciindi nobakubuka-kubuka—kwiinda mukubapa milimo mumbungano yeendelana aciimo cabo. Kutalikizya kubayiisya munzila eeyi kuyoobagwasya bana kuzumanana kubikkila maano kumbaakani zyakumuuya baakuba amyaka iitandila ku 20 alimwi aciindi nobalwana zintu zinji zinyonganya. (Int. 71:17) Alimwi mwaalu ulakonzya kumukulwaizya sikwiiya kuyandisya kubelekela bamwi kwiinda mukumupandulwida ncayelede kucita alimwi akaambo ncayelede kucicita cintu eeco. Kwiinda mukupa twaambo, baalu baiya Mwiiyi Mupati, Jesu. Mucikozyanyo, katanabapa baapostolo bakwe mulimo wakuyiisya bantu kuti babe basikwiiya, Jesu wakabaambila kaambo ncobakeelede kumvwida. Wakati: “Ndapegwa nguzu zyoonse kujulu alimwi aanyika.” Mpoonya wakayungizya kuti: “Aboobo kamuya mukayiisye bantu bazisi zyoonse kuti babe basikwiiya.”—Mt. 28:18, 19. w15 4/15 2:5, 6

Cakali kukatazya ncobeni kuba Munakristo mu Roma. Akaambo kakutamikizyigwa kuumpa dolopo mu 64 C.E., basikutobela Kristo bakali kupenzyegwa kapati. Mwakali mubukkale buli boobu bukatazya mwaapostolo Paulo naakaangwa lwabili mu Roma. Sena Banakristo bamwi bakali kuyakumugwasya? Kuboneka kuti Paulo wakali kulibilika ikuti naa wakali kuyakugwasyigwa, inga twaamba boobu akaambo kamajwi ngaakalembela Timoteyo kuti: “Nindakali kulikwabilila mumulawo ciindi cakusaanguna kunyina wakandiiminina pe, pele boonse bakandilekelezya.” (2Tim. 4:16) Nokuba boobo, Paulo wakalizyi kuti kunyina naakali kukonzya kubula lugwasyo cakumaninina. Wakasyoma kuti Jehova wakali kuyakumugwasya kutegwa aliyumye mumasunko aakwe alimwi amubuyumuyumu buli boonse mbwaakali kukonzya kuyaanya kumbele. Alimwi buya, wakazumanana kwaamba kuti: “Mwami wangu uyoondivwuna kumulimo mubi uuli woonse.” (2Tim. 4:18) Inzya, Paulo wakazyiba kuti ciindi bantu nobakonzya kwaalilwa kugwasya, Jehova alimwi a Mwanaakwe balakonzya kupa lugwasyo luyandika ncobeni! w15 4/15 4:1-3

Ciindi Jesu naakazyalwa, Saatani wakalizyi kuti mwana muvwanda ooyu wakali kuyookomena akuba Mesiya iwakasyomezyedwe. Sena Saatani wakali kukonzya kuyeeya kuti kujaya mwana ooyu lwakali lunya? Saatani tabikkili maano kuzintu ziluzi naa zitaluzi. Alimwi buya, kujatikizya mwana Jesu, Saatani wakatalika kumulwana kakunyina akusowa ciindi. Munzila nzi? Mwami Heroda wakanyema kapati ciindi basikupandulula bweende bwanyenyeezi nobakabuzya kujatikizya “ooyo wakazyalwa kali mwami waba Juda,” alimwi wakalikanzide kumujaya. (Mt. 2:1-3, 13) Kutegwa asinizye ncobeni kuti mwana ooyo wajaigwa, wakalailila kuti bana basankwa bamu Betelehemu alimwi abamuzyooko zyamunzi boonse ibakajisi myaka yakuzyalwa iisika ali yobilo kuya ansi, bajaigwe. (Mt. 2:13-18) Jesu wakafwutuka kukujaigwa ooku kwalunya, pele ino eeci citondezya nzi kujatikizya sinkondoma Saatani? Eeci cisinizya ncobeni kuti Diabolosi tabulemeki buumi bwabantu. Tabeengeleli bana. Saatani ncobeni ‘ngusyuumbwa wabutambo uuvwuluma.’ (1Pet. 5:8) Tamweelede kubuubyaubya bukali bwakwe bupati! w15 5/15 1:10, 12, 13

Kucikonzya kweezyeezya zintu nzyotutanabona ncipego kuzwa kuli Leza. Kulatugwasya kusala cabusongo alimwi akulangila zintu zibotu izili kumbele. Jehova ulakonzya kubona izili kumbele, alimwi kanji-kanji ulatwaambila zintu ziyoocitika kumbele kwiinda mu Magwalo. Tulakonzya kweezyeezya ziyoocitika kumbele. Alimwi buya, kucikonzya kweezyeezya zintu zitalibonyi kulatugwasya kuba aalusyomo. (2Kor. 4:18) Ciindi Hana naakali kuyeeya mbocakali kuyooba naakali kuyootola mwanaakwe Samuele kuti akabelekele kutempele, wakalijisi kaambo ikakali kumupa kweezyeezya boobu. Kweezyeezya kwakwe kwakayeeme acintu ncaakakanzide kucita, eeci cakamugwasya kubikkila maano kucintu eeco. (1Sam. 1:22) Ikuti katweezyeezya zintu Leza nzyaasyomezya kuti uyoozicita, tuyeeya kujatikizya zintu iziyoocitika ncobeni. (2Pet. 1:19-21) Cakutadooneka, bantu banji ibakali kusyomeka ibaambidwe mu Bbaibbele bakali kweezyeezya kujatikizya zintu nzyaakabasyomezya Leza. w15 5/15 3:1-3

Kweezyeezya kubi nkweezyeezya kuba muntu uuvwubide kapati kumwi katutabikkili maano kuli Leza. Jesu wakaluula caano kutegwa atondezye bukkale buusisya bwamuntu “uuliyobweda lubono pele katali muvwubi kuli Leza.” (Lk. 12:16-21) Jehova ulakkomana ciindi notucita zintu izimukkomanisya. (Tus. 27:11) Eelo kaka tulabotelwa ciindi notukkomaninwa anguwe akaambo kakuti tuyobwede “lubono kujulu”! (Mt. 6:20) Alimwi cakutadooneka cilongwe cibotu a Jehova ncecintu ciinda kubota ncotukonzya kuba ancico. Amweezyeezye buyo kulibilika nkotukonzya kuba ankuko ikuti naa lyoonse katubikkila buyo maano kukuliyobweda “lubono anyika.” (Mt. 6:19) Jesu wakabelesya cikozyanyo kutegwa atondezye kuti “kulibilika kwamubweende bwazintu obuno akoongelezya kwalubono” zilakonzya kusyaanikizya jwi lya Bwami.—Mt. 13:18, 19, 22 w15 5/15 4:15, 16

Nguzu zya Leza zyakapa kuti Jesu Kristo acikonzye kucita maleele aagambya aaindene-indene. Taakasilika buyo bantu ibakali kuciswa cinsenda, pele alimwi abantu ibakali kuciswa malwazi aaindene-indene. Naakali kusilika bantu munzila eeyi, Jesu taakwe naakali kuyandika bantu batacisidwe kutegwa bape zizo zyamibili yabo. Wakali kusilika zizo nzyoona izyakajisi bulwazi! Alimwi wakali kusilika bantu mpoonya-mpoonya, zimwi ziindi wakali kusilika nokuba kuti muntu ooyo uucisidwe wakali kule. (Joh. 4:46-54) Ino zikozyanyo eezyi zigambya zitondezya nzi? Zitondezya kuti Jesu, mbwali Mwami lino uulela kujulu, tajisi buyo nguzu pele alimwi uliyandide kapati kusilika malwazi cakumaninina. Kwiiya Jesu mbwaakali kubeendelezya bantu kutupa lusyomo lwakuti munyika mpya, businsimi bwamu Bbaibbele buyoozuzikizyigwa bwakuti: “Muntu uupengede alimwi amucete uyoobafwida lubomba.” (Int. 72:13) Inzya, Jesu uyoocita kweelana anzyayandisisya kucita mumoyo wakwe kutegwa agwasye bantu boonse bapengede. w15 6/15 2:6

Bantu banji balakonzya kuwaamba Mupailo wa Mwami kakunyina kubala buya. Kanji-kanji, ciindi notukambauka kuŋanda aŋanda tulabagwasya bamukamwini ŋanda kumvwisya kuti Bwami bwa Leza nimfwulumende yancobeni iiyooleta zintu zinji zibotu anyika. Ambweni tulakonzya kumutondezya kulomba kwakusaanguna mumupailo kutondezya kuti Leza ulijisi zina limugeme, ilyeelede kusalazyigwa. (Mt. 6:9) Sena Jesu wakali kuyanda kuti mupailo wakwe kawiindulukwa bbala abbala kufwumbwa ciindi notupaila, kweelana ambobacita muzikombelo zya Bunakristo Bwanyika? Peepe. Katanaamba mupailo ooyu wacikozyanyo, wakati: “Ciindi nomupaila, mutanikwaambi majwi ngoonya cakwiinduluka-induluka.” (Mt. 6:7) Aciindi cimwi, wakawaamba alimwi mupailo ooyu pele wakabelesya majwi aaindene. (Lk. 11:1-4) Aboobo, Jesu wakatugwasya kuzyiba zintu nzyotweelede kulomba kweelana ambozitobelana. Aboobo, cileelela kwaamba kuti mupailo ooyu ngwacikozyanyo buyo. w15 6/15 4:1, 2

Jehova ulatupa muuya wakwe uusalala uujisi nguzu kapati, uukonzya kutuyumya akutugwasya kuzunda masunko. Leza alimwi ulatucenjezya kwiinda mu Jwi lyakwe ambungano kujatikizya bukkale mbotweelede kweeleba, mbuli kusowa ciindi cinji, mali alimwi anguzu mukucita zintu zyakumubili izitayandiki kapati. Ba Espen aba Janne ibakali bapainiya bajisi bana bobilo mbobalanganya. Ba Espen bakati: “Kanji-kanji tulapaila kuli Jehova kutegwa tutanjili mumasunko mbwaanga lino tatucikonzyi kubeleka ciindi cinji mbuli mbotwakali kabeleka kaindi mumilimo yakumuuya. Tulamulomba Jehova kutegwa atugwasye kuzumanana kuba bayumu kumuuya alimwi akuba basungu mumulimo wakukambauka.” Sunko limbi ilyaduma mazuba aano nkweebelela zintu ziletela muzeezo wakoonana. Bamwi bazundwa musunko eeli kwiinda mukulekela mizeezo yabo kubikkila maano kuzintu zibyaabi. Pele tulakonzya kuzunda mbubonya mbuli bakwesu banji mbobacita.—1Kor. 10:13. w15 6/15 5:15, 16

Ncinzi ciyoocitika zyaakumana kunyonyoonwa mbunga zyabukombi bwakubeja? Eeci cinooli ciindi cakuyubununa zini zili mumyoyo yesu. Bantu banji bayooyanda kukwabililwa ambunga zyabantu izili mbuli ‘myala yamumalundu.’ Nokuba boobo, munzila yacikozyanyo, bantu ba Leza bayootijila kumayubilo ngapa Jehova. Mumwaanda wamyaka wakusaanguna, ciindi cifwaafwi icakanyina manyongwe tiicakali ciindi cakusandula bama Juda banji kuti babe Banakristo. Kuli baabo ibakali Banakristo kale, cakali ciindi cakubweza ntaamu alimwi akumvwida. Mbubwenya buyo, tatukonzyi kulangila kuti ciindi cifwaafwi icinoonyina manyongwe aakutalika mapenzi mapati cinooli ciindi bantu banji nobayooba basyomi. Muciindi caboobo, cinooli coolwe ku Banakristo bakasimpe boonse cakuti basinizye luyando lwabo kuli Jehova alimwi akugwasyilizya banabokwabo Kristo.—Mt. 25:34-40. w15 7/15 2:7

Sena mbomwakakomezyegwa naa bukkale bwakubusena nkomwakakomenena zimupa kulimvwa kuti cisi naa busena oobo bulayandika kapati kwiinda bumwi? Sena kulimvwa kuli koonse kuli boobu kuciliko mumoyo wanu? Banakristo tabeelede kulekela kuyandisya cisi cokwabo kuti kunyonganye mbobababona bamwi. Pele ncinzi ncomukonzya kucita ikuti kamutababoni munzila yeelede bantu bazwa kumasi aambi, bukkale bumbi, ibakanana mwaambo uumbi, naa ibajisi mubala uumbi? Cilakonzya kugwasya kapati ikuti naa mwazinzibala kuyeeya mbwakubona Jehova kuyandisya cisi alimwi akusalulula. Mulakonzya kugwasyigwa kapati kwiinda mukuvwuntauzya makani aaya alimwi amakani aambi aakozyenye ayaaya lyaciiyo canu nobeni naa aciindi cakukomba mumukwasyi. Mpoonya amumulombe Jehova kutegwa amugwasye kwaalanga munzila mbwaalanga makani aaya. (Rom. 12:2) Kufwumbwa ciindi, babelesi ba Jehova boonse balakonzya kulijana mubukkale oomo manjezyeezya aabo mwaakonzya kubapa kuti baindane abantu babazingulukide—kufwumbwa naa mbalongwe babo, mbasicikolonyina, mbasimukobonyina, mbanamukwasyi, naa mbantu bambi buyo. Nokuba boobo, tweelede kwiindana abantu bambi! w15 7/15 3:14, 15

Jehova ulakumvwa kulomba kwesu alimwi ulatumvwisya noliba leelyo nokunyina muntu uucita boobo. Bwiinguzi bwakwe kumipailo yesu mbumboni bubotu kapati ibutondezya luyando lwakwe lutamani kulindiswe. Tulakonzya kwiiya zinji kumipailo iilembedwe mu Jwi lya Leza. Aboobo, zimwi ziindi cilakonzya kugwasya kulanga-langa mipailo iili boobo ciindi cakukomba mumukwasyi. Kuzinzibala kuyeeya babelesi ba Jehova bakaindi mbobakaamba zyakali kumoyo kuli Leza kulakonzya kutugwasya kuti katupaila kabotu. Mucikozyanyo, amulange-lange mupailo wa Jona uutondezya kuusa ciindi naakali mwida lyamuswi mupati. (Jon. 1:17–2:10) Amulange-lange mupailo wa Solomoni ngwaakapaila kuli Jehova kuzwa ansi amoyo ciindi tempele nolyakali kwaabwa. (1Bam. 8:22-53) Amuzinzibale kuyeeya mupailo wacikozyanyo ooyo ngwaakapaila Jesu kutegwa tugwasyigwe. (Mt. 6:9-13) Kwiinda zyoonse, lyoonse “amumuzyibye Leza nzyomulomba.” Kuti mwacita oobu, “luumuno lwa Leza oolo lwiinda maano oonse luyookwabilila myoyo yanu amizeezo yanu.”—Flp. 4:6, 7. w15 8/15 1:11, 12

Cinooli cintu cikkomanisya kuba ansi abubambe bwa Jehova munyika mpya katulangila kubotya nyika, kuyiisya bantu bayoobusyigwa, alimwi akucita ncayanda Jehova. Pele ino kuti naa twaakulaililwa kubeleka mulimo umwi uutatukkomanisyi? Sena tuyoobutobela busolozi kwiinda mukuubeleka mulimo ooyo kusikila mpotugolela alimwi buya akuukkomanina? Ibunji bwesu tulakonzya kwiingula kuti inzya! Aboobo, sena lyoonse tulalibombya kubusolozi bwa Leza lino? Ikuti naa tulacita oobo, tulibambila kuyoopona kukabe kutamani mubulelo bwa Jehova. Tulakonzya kulibambila kuyoopona munyika mpya ikutali buyo kwiinda mukulibombya kububambe bwa Jehova bucitwa mazuba aano pele alimwi akwiinda mukubeleka canguzu lino kuba amuuya wakukkutila amuuya walukamantano. Ikuti naa twabamvwida aabo ibeendelezya mazuba aano, ambweni akukkutila alimwi akukkomana amikuli mipya yamulimo, cakutadooneka tuyooba abube mbubwenya munyika mpya. w15 8/15 3:6, 7

Kuyanzana kwa Solomoni abantu babyaabi kwakapa kuti aleke kuyeeya mbuli musongo alimwi kwakapa kuti aleke bukombi bwakasimpe. (1Bam. 11:1-6) Cikozyanyo eeci cicenjezya Banakristo ibakonzya kutalika kuyeeya kukwatana amuntu uutayandi Jehova. Mbuti kuti muntu umwi waba mukombi wa Leza kakwetene kale amuntu uutasyomi? Bbaibbele lyaamba kuti: “Anywebo nobakaintu, amulibombye kubalumi banu, ikutegwa naa kuli bataliswiilili ijwi, bakonzye kukwelelezyegwa kakunyina kubelesya jwi pele kwiinda mubukkale bwabakaintu babo.” (1Pet. 3:1) Majwi aayo akalembelwa Banakristo bakwetwe, pele majwi ngoonya alabeleka akubaalumi bakwete ibatalika kukomba Jehova ciindi nobakwetene kale amukaintu uutasyomi. Lulayo lwamu Bbaibbele lulisalede: Amube mulumi naa mukaintu mubotu, alimwi amupone kweelana azyeelelo zya Leza zisumpukide izijatikizya cikwati. Banji ibatasyomi ibakwetene a Bakamboni bakatambula kasimpe akaambo kakulangilila mulumi naa mukaintu iwakacinca naakamana kweendelanya buumi bwakwe azyeelelo zya Leza. w15 8/15 4:15, 16

Mazuba aano, kulakonzya kakunyina busilisi kumalwazi aamwi. Aboobo, tweelede kucenjela abusilisi bumwi ibwaambwa kuti bulasilika bulwazi bumwi pele kakuli kunyina bumboni butondezya boobo. Paulo wakalemba kuti: “Bantu boonse abazyibe kuti mulanyoneka.” (Flp. 4:5) Kunyoneka kuyootugwasya kubikkila maano kukukomba Jehova muciindi cakubikkila maano mubuumi bwesu boonse kumakani aabusilisi. Ikuti naa makani aabusilisi aba ngamakani mapati mubuumi bwesu, tulakonzya kutalika kupona buumi bwakuliyanda. (Flp. 2:4) Tulizyi kuti tatukonzyi kuba abuumi bulondokede mubweende oobu. Aboobo, amubone kuti kubelekela Jehova ncecintu cipati mubuumi bwanu. (Flp. 1:10) Mumakani aabusilisi amumakani amwi, umwi aumwi wesu uyandika kulisalila alimwi akuzumina kufwumbwa icikonzya kucitika. w15 9/15 2:8, 10

Jehova ngu “Leza wakasimpe.” (Int. 31:5) Ulakkomana kutuyiisya kasimpe kajatikizya nguwe. Alimwi ulatuyiisya mbotweelede kumukomba akututondezya mbotweelede kupona munzila yiinda kubota. Aboobo, ino ncinzi Jehova ncatuyiisya icitondezya mbwatuyanda? Cakusaanguna, Jehova ulatwaambila makani aajatikizya nguwe. Uyanda kuti tumuzyibe. (Jak. 4:8) Aboobo, ulatwaambila izina lyakwe. Alimwi buya, Bbaibbele lilatwaambila zinji kujatikizya zina lyakwe kwiinda izina lili lyoonse. Alimwi Jehova ulatwaambila mbwabede. Ciindi twalanga zintu nzyaakalenga, tulazyiba kuti ngusinguzu alimwi musongo. (Rom. 1:20) Alimwi ciindi notubala Bbaibbele tulaiya bubotu mbwajisi alimwi ambwatuyanda. Mbotuyaabuzyiba bube bwa Jehova bubotu, cilongwe cesu anguwe cilayuma. w15 9/15 4:8, 9

Bantu banji bayeeya kuti nzyobacita taakwe mbozimujatikizya Leza. Bayeeya kuti Leza tazibikkili maano zintu zibacitikila. Mucikozyanyo, ciindi cibeela cipati cacisi ca Philippines nocakanyonyoonwa amvwula mpati yaguwo mu November 2013, mupati wadolopo limwi wakaamba kuti: “Kweelede kuti aciindi eeci, Leza tanaakaliko pe.” Bantu bamwi bayeeya kuti Leza takonzyi kubona zintu nzyobacita. (Is. 26:10, 11; 3Joh. 11) Bantu ibakali kupona ciindi ncaakali kupona mwaapostolo Paulo abalo mbobakali kuyeeya oobu. Kujatikizya mbabo, wakati: ‘Tiibakayanda kuba aluzyibo lwini-lwini kujatikizya Leza.’ Tiibakaluleme, bakali babi alimwi bakali basyaacivwulemwangu. (Rom. 1:28, 29) Ino mbuti swebo? Tulizyi kuti Jehova ulazibona zintu zyoonse nzyotucita. Pele sena tulasyoma kuti Jehova ulatubikkila maano? Sena tulalibona janza lyakwe iligwasya mubuumi bwesu? w15 10/15 1:1-3

Kukambauka ninzila mbotu kapati mbotukonzya kutondezya lusyomo lwesu. Ino nkaambo nzi? Nkaambo ciindi notukambauka, tutondezya kuti tulasyoma kuti mamanino ali afwaafwi akuti ‘taakamuki pe!’ (Hab. 2:3) Kutegwa tubone naa lusyomo lwesu nduyumu, tulakonzya kulibuzya kuti: ‘Ino mulimo wakukambauka uyandika kapati buti kulindime? Sena ndilabaambila bantu kujatikizya Leza kusikila mpondigolela? Sena ndilabikkila maano kubona nzila azimbi nzyondikonzya kubelesya kubelekela Jehova? (2Kor. 13:5) Atutondezye mboluli luyumu lusyomo lwesu kwiinda ‘mukwaambilizya antangalala kutegwa tujane lufwutuko,’ nkokuti, kwiinda mukukambauka makani mabotu. (Rom. 10:10) Alimwi tulatondezya lusyomo lwesu muli Jehova ciindi notuliyumya mumapenzi aali munyika eeyi. Ciindi notucisidwe, notutyompedwe notuli bacete, naa notujisi mapenzi aambi buyo, tweelede kuba alusyomo lwakuti Jehova alimwi a Jesu ‘bayootugwasya aciindi ceelede.’ (Heb. 4:16) Tulatondezya kuti tulijisi lusyomo muli Jehova ciindi notumulomba kuti atugwasye. w15 10/15 2:12-14

Nokuba kuti inga mwaakulijana mubukkale momutazumizyidwe kuba a Bbaibbele, mulakonzya kuzinzibala kuyeeya zintu nzyomwakapeta, zintu mbuli magwalo ngomuyandisya naa nyimbo zya Bwami. (Mil. 16:25) Alimwi muuya wa Leza uyoomugwasya kuziyeeya zintu nzyomwakaiya, calo ciyakumugwasya kuzumanana kusyomeka. Ino ninzila nzi imwi mbomukonzya kulibambila kubala Bbaibbele buzuba abuzuba? Amulibambile lino kwiinda mukuzandula ciindi cakubala akuzinzibala kuyeeya twaambo tuzwa mukubala Bbaibbele kwansondo ansondo. Ciindi alimwi ceelede kuzandulwa cakubala Makani Mabotu aakaluulwa a Matayo, Marko, Luka a Johane alimwi akuzinzibala kuyeeya makani ngaakaamba Jesu alimwi anzyaakali kucita. (Rom. 10:17; Heb. 12:2; 1Pet. 2:21) Alimwi tulijisi bbuku lipandulula makani aabuumi bwa Jesu aapandulwidwe cakutobelana kweelana ambozyakali kucitika zintu. Bbuku eeli liyoomugwasya kutegwa mugwasyigwe kapati ciindi nomubala Mabbuku aa Makani Mabotu.—Joh. 14:6. w15 10/15 4:11, 12

Jesu tanaakali buyo Simalelo wabaapostolo bakwe pe. Pele alimwi wakali mulongwe wabo. Kaindi, simalelo tanaakali kuvwula kubandika abazike bakwe kujatikizya mbwayeeya alimwi ambwalimvwa. Pele Jesu tanaakali kubacita mbuli bazike baapostolo bakwe. Wakali kubayanda akujana ciindi cakuba ambabo. Cakali kumukkomanisya kubaambila mbwaakali kuyeeya alimwi akulimvwa, alimwi wakaswiililisya ciindi nobakali kwaamba mbobakali kuyeeya alimwi akulimvwa. (Mk. 6:30-32) Kubandika ooko ikwakaliko akati ka Jesu abaapostolo bakwe kwakabapa kuti babe balongwe beni-beni alimwi kwakabagwasya baapostolo kuti balibambile mulimo ngobakali kuyoocita kumbele. Jesu wakalizyi kuti, ikuti naa basikwiiya bakwe kabakkomene kubelekela Jehova alimwi kabajisi bubi kukambauka makani mabotu, bakali kuyookkomana ncobeni. Aboobo wakabakulwaizya kubeleka canguzu mumulimo wakukambauka, alimwi wakasyomezya kuti wakali kuyoobagwasya.—Mt. 28:19, 20. w15 11/15 2:3, 5

Luyando mbobube bupati bwa Jehova Leza. (1Joh. 4:16) Cilenge cakwe citaanzi, Jesu Kristo, wakakkala kwamabbiliyoni aamyaka kujulu antoomwe a Bausyi alimwi wakayiya Jehova Leza mbwali siluyando. (Kol. 1:15) Jesu walutondezya luyando lukozyenye mubuumi bwakwe boonse, kujulu aanyika. Aboobo tulakonzya kuba masimpe kuti Jehova alimwi a Jesu lyoonse bayakweendelezya caluyando. Ciindi umwi muntu naakabuzya Jesu naa nguuli mulawo mupati kwiinda, Jesu wakati: “‘Weelede kuyanda Jehova Leza wako amoyo wako woonse, abuumi bwako boonse alimwi amizeezo yako yoonse.’ Ooyu ngomulawo mupati alimwi ngonguwe wakusaanguna. Alimwi ngooyu wabili uuli mbuli yooyu: ‘Weelede kuyanda simukobonyoko mbubonya mbuli mboliyanda omwini.’” (Mt. 22:37-39) Cilayandika kapati kutondezya luyando kubantu boonse. Jesu wakaamba kuti tweelede kuyanda Jehova alimwi akuyanda basimukoboma. w15 11/15 4:1-3

Jehova tanaakali kubandika abantu mu Chihebrayo lyoonse pe. Aciindi bana Israyeli nobakaangululwa kuzwa ku Babuloni, bamwi bakali kwaambaula Chiaramu mubuumi bwabo bwabuzuba abuzuba. Ambweni nkakaambo Daniele, Jeremiya, alimwi a Ezara ncobakalembela zibeela zimwi zyamu Bbaibbele mu Chiaramu. Mukuya kwaciindi Alekizanda Mupati wakazikuzunda cibeela cipati canyika, aboobo mwaambo wa Chigiriki iwakazyibidwe abantu banji uutegwa Koine ngowazikuba mwaambo iwakali kubelesyegwa mumasi manji. Bama Juda banji bakatalika kukanana Chigiriki, kumane Magwalo aa Chihebrayo akasandululwa mu Chigiriki. Busanduluzi oobu bwiitwa kuti Septuagint. Bwakali busanduluzi bwa Bbaibbele bwakusaanguna alimwi buyandika kapati. Basyaazibwene baamba kuti basanduluzi ibali 72 bakatola lubazu mukubamba Septuagint. Bamwi bakali kusandulula bbala abbala kuzwa mu Magwalo aa Chihebrayo, pele bamwi tiibakali kucita oobo. Nokuba boobo, bama Juda a Banakristo ibakali kukanana Chigiriki bakali kusyoma kuti Septuagint lyakali Jwi lya Leza. w15 12/15 1:4-6

Jakobo wakaamba kuti: “Mulaka uli mbuli mulilo.” (Jak. 3:6) “Mulaka” caamba nguzu nzyotujisi zyakwaambaula. Alimwi mbubwenya mbuli mulilo, nzyotwaambaula zilakonzya kuleta mapenzi kapati. Majwi eesu alakonzya kubajatikizya kapati bamwi. Mane buya Bbaibbele litwaambila kuti nzyotwaamba zilakonzya kupa buumi naa kuleta lufwu kubantu. (Tus. 18:21) Pele sena eeci caamba kuti tatweelede kwaamba cili coonse akaambo buyo kakuti tulakonzya kwaamba cintu cimwi citali kabotu? Peepe. Tatukonzyi kuleka kuubelesya mulilo akaambo buyo kakuti tulakonzya kupya. Muciindi caboobo, tulabikkila maano mbotuubelesya. Mucikozyanyo, tulakonzya kubelesya mulilo kujika cakulya, kulikasaazya, alimwi akuti tube amumuni. Mbubwenya buyo, ikuti katubikkila maano mbotwaambaula, tulakonzya kucibelesya cipego eeci kulemeka Jehova akugwasya bamwi. (Int. 19:14) Jehova wakatulenga munzila yakuti katukonzya kwaambila bamwi nzyotuyeeya ambotulimvwa, kwiinda mukwaambaula naa kubelesya mwaambo wakutambaika. Aboobo, cipego eeci ceelede kubelesyegwa kuyaka bamwi kutali kumwaya.—Jak. 3:9, 10. w15 12/15 3:1-3

Kuboneka kuti Luka wakamugwasya Paulo alimwi abambi ciindi nobakali kuciswa munyendo zyabo zyabumisyinali. (Gal. 4:13) Mbubonya mbuli Jesu mbwaakaamba kuti, “baciswa mbabayandika musilisi.” (Lk. 5:31) Luka tanaakali buyo muntu iwakali kuyanda kupa mizeezo iijatikizya busilisi. Wakayiisyigwa kuba dokota. Ibbaibbele talyaambi busena naa ciindi Luka naakayiisyigwa kuba dokota. Pele lilaamba kuti Paulo wakatuma myooni ku Bakolose kuzwa kuli Luka. Aboobo kuboneka kuti Luka wakayiila ku Laodikeya mulimo wakwe wabusilisi, munzi iwakali afwaafwi aku Kolose. Alimwi, ciindi Luka naakalemba Makani aakwe Mabotu alimwi abbuku lya Milimo, wakabelesya mabala aabelesyegwa abamadokota. Akaambo kakuti wakali dokota, wakabikkilizya twaambo tunji twaziindi Jesu naakali kuponya bantu. w15 12/15 4:11, 12

Jehova wakatupa cipego caluyando icipati kwiinda ciindi naakatuma Jesu, Mwanaakwe uuyandwa kapati, kuboola anyika! (Joh. 3:16; 1Joh. 4:9, 10) Mwaapostolo Paulo wakapandulula cipego eeci kuti ‘ncipego citabbadelwi citakonzyi kupandululwa.’ Paulo wakalizyi kuti cituuzyo ca Jesu cipa cisyomezyo cakuti zisyomezyo zya Leza zyoonse zitaliboteli ziyoozuzikizyigwa. (2Kor. 1:20) Eeci caamba kuti ‘cipego ca Leza citabbadelwi citakonzyi kupandululwa’ cibikkilizya cituuzyo ca Jesu, bubotu boonse alimwi aluyando lutamani eezyo Jehova nzyatutondezya. Cipego citaliboteli cili boobu tacikonzyeki pe kucipandulula munzila njotukonzya kumvwisya cakumaninina. Ino cipego eeci cilibedelede ceelede kutupa kulimvwa buti? Sena cilamukulwaizya kulanga-langa micito yanu nokuba kucinca bukkale bwanu? Sena mulakulwaizyigwa kuba baabi, kubayanda bamwi alimwi akubalekelela aabo bamulubizyila? Kamuyeeya kuti, icintu Jehova ncaakatupa kwiinda muli Kristo ncecipengo cipati kwiinda zyoonse.—1Pet. 3:18. w16.01 2:1, 2, 4, 5

Muntu iwakananikwa inga walibuzya kuti, ‘Nkaambo nzi Jehova ncaakandisalila mebo muciindi cakusala umbi?’ Inga watalika kulibuzya naa uleelela kutambula mukuli ooyu. Pele tadooneki pe kuti Jehova wakamusala. Muciindi caboobo, ulakkomana kapati alimwi ulalumba kapati akaambo kacipego eeci. Bananike balimvwa mbwaakalimvwa Petro ciindi naakati: “Aatembaulwe Leza alimwi Usyi wa Mwami wesu Jesu Kristo, nkaambo muluse lwakwe lupati wakatupa kuzyalwa kupya kuti tube abulangizi bupona kwiinda mububuke bwa Jesu Kristo kuzwa kubafwu, kuti mube alukono lutanyonyooki, lunyina kampenda alimwi lutajujuki. Mwakayobodwa lukono oolu kujulu.” (1Pet. 1:3, 4) Ciindi munanike nabala majwi aaya, cakutadooneka ulizyi kuti Usyi ulaambaula kulinguwe kumugama. w16.01 3:11, 12