February

Jesu wakali aaluzyalo kapati kubantu. Bantu bakali kubona kuti ulabayanda alimwi bakali kuswiilila mulumbe wa Bwami. Kuti twazumanana kuba aluzyalo kubantu mbubwenya mbuli Jesu, tuyoocikonzya kuzwidilila mumulimo wesu wakukambauka. Ino ncinzi cikonzya kutugwasya kutondezya lweetelelo kuli baabo mbotukambaukila? Tweelede kweezyeezya kujatikizya mbobayeeya alimwi ambobalimvwa bantu mbotujana, alimwi akubeendelezya munzila njotunga twayanda kuti tweendelezyegwe andiswe ikuti naa katuli mubukkale bwabo. (Mt. 7:12) Amuyeeye nzyayandika umwi aumwi. Tatweelede kubelesya nzila yomwe buyo kumuntu uuli woonse ngotujana mumulimo wesu wakukambauka. Muciindi caboobo, tweelede kubikkila maano kubukkale bugaminide alimwi ambwayeeya muntu umwi aumwi kumugama. Cabupampu amumubuzye mibuzyo kutegwa muzyibe cintu cimwi kujatikizya muntu ooyo alimwi anzyasyoma. (Tus. 20:5) Ciindi notubuzya mibuzyo, tulazyiba nzyobayandika. Ciindi notwazyiba, tulakonzya kubeetelela alimwi akugwasya, mbubwenya mbwaakacita Jesu.—Amweezyanisye 1Kor. 9:19-23. w19.03 20 ¶2; 22 ¶8-9

Adamu a Eva bakatondezya kuti tiibakalumba kuzintu zyoonse zibotu Jehova nzyaakabacitila. Toonse tulijisi coolwe cakutondezya kuti tatukuzumini naaceya kusala kwabo. Kwiinda mukubbapatizyigwa, tutondezya Jehova kuti tulamusyoma kuti ulijisi nguzu zyakutubikkila zyeelelo kujatikizya zintu ziluzi alimwi azitaluzi. Tutondezya kuti tulamuyanda alimwi akumusyoma Taateesu. Mukuli ngotujisi lwainda lubbapatizyo ngwakupona kweelana azyeelelo zya Jehova buzuba abuzuba, ikutali zyesu. Mamiliyoni aababelesi ba Leza mbobapona oobo mwaka amwaka. Mulakonzya kuba mbuli mbabo ikuti naa mwazumanana kuyungizya luzyibo lwanu kujatikizya Jwi lya Leza, Ibbaibbele; kuyanzana lyoonse a Banakristonyoko; alimwi akusungwaala kwaambila bamwi nzyomwakaiya kujatikizya Uso siluyando. (Heb. 10:24, 25) Ciindi nomusala zyakucita, amuswiilile kululayo ndwamupa Jehova kwiinda mu Jwi lyakwe alimwi ambunga yakwe. (Is. 30:21) Mpoonya zyoonse nzyomunoocita ziyoozwidilila.—Tus. 16:20. w19.03 7 ¶17-18

Jehova watupa cakulya cakumuuya cinji kapati. Mucikozyanyo, tulatambula malailile aagwasya kumiswaangano yesu, mumamagazini alimwi amumawebbusaiti eesu. Sena mwakaswiilila kale makani, kubala cibalo naa kweebelela pulogilamu ya jw broadcasting akuyeeya kuti, ‘Ncencico ncondali kuyandika’? Mbuti mbotukonzya kutondezya kulumba kuli Jehova? (Kol. 3:15) Nzila imwi nkwiinda mukumulumba lyoonse mumipailo yesu akaambo kazipego zibotu eezyi. Nzila aimbi motutondezya kulumba kuli Jehova nkwiinda mukubamba busena bwesu bwakukombela munzila yabulondo. Tulatola lubazu lyoonse mukusalazya alimwi akubamba Maanda eesu aa Bwami, alimwi aabo ibalanganya mincini iibelesyegwa ambungano balabikkila maano kutegwa itanyonyooki. Ciindi notwaabamba kabotu Maanda eesu aa Bwami, ayookkala kwaciindi cilamfwu alimwi anooyandika buyo kubambululwa kusyoonto. Munzila eeyo, tuyakuyobola mali manji aakubelesya mukuyaka alimwi akubambulula Maanda aa Bwami aambi munyika yoonse mboizulwa. w19.02 18 ¶17-18

Jobu wakali kujana ciindi cakuzinzibala kuyeeya zilenge zya Jehova zigambya. (Job. 26:7, 8) Cakamugambya kapati ciindi naakayeeya kujatikizya nyika, mulenga-lenga, makumbi alimwi amuzumo, pele wakabona kuti tanaakazizyi zintu zyoonse nzyaakalenga Jehova. Alimwi wakabikkila maano kapati kumajwi aa Jehova. Jobu wakaamba boobu kujatikizya majwi aa Leza: “Ndaabamba majwi aakwe.” (Job. 23:12) Jobu wakagambwa amilimo ya Jehova alimwi wakamulemeka kapati. Wakali kumuyandisya Usyi alimwi wakali kuyanda kumukkomanisya. Aboobo Jobu wakalikanzide kapati kuzumanana kusyomeka. Andiswe tweelede kucita mbubwenya mbwaakacita Jobu. Tulizyi zintu zinji izigambya kujatikizya zilenge kwiinda nzyobakazyi bantu ibakapona kuciindi ca Jobu. Alimwi tujisi Bbaibbele lyoonse mbolizulwa ilyakasololelwa amuuya ilikonzya kutugwasya kumuzyiba mbwabede Jehova. Zyoonse nzyotwiiya zilakonzya kutugwasya kuba abulemu kapati mumoyo. Kuba abulemu kujatikizya kuyanda kwa Jehova kuyootupa kumuyanda akumumvwida alimwi akutugwasya kuyandisisya kuzumanana kusyomeka.—Job. 28:28. w19.02 5 ¶12

Kuzwa kaindi, beendelezi bantunsi bali kubapenzya bantu ba Jehova. Balakonzya kutupa “milandu” iindene-indene, pele kaambo keni kapa kuti kabacita oobo nkakuti twakasala “kumvwida Leza mbwali mweendelezi kutali bantu.” (Mil. 5:29) Tulakonzya kusampaulwa, kwaangwa naa kuumwa buya. Nokuba boobo, kwiinda mukugwasyigwa a Jehova, tatukapilusyi cibi pele tuyoozumanana kuba babombe mumasunko oonse. Amulange cikozyanyo ncobakatusiila bana Hebrayo botatwe ibakatolwa mubuzike, nkokuti Hananiya, Misayeli alimwi a Azariya. Munzila yabubombe, bakamupandulwida mwami ikaambo ncobatakali kukonzya kukomba cibumbwa. Muciindi caboobo, bakalilibambilide kutambula kufwumbwa eeco Jehova ncaakali kuyoozumizya kuti cicitike. (Dan. 3:1, 8-28) Ciindi kusyomeka kwesu kuli Leza nokwasunkwa, mbuti mbotukonzya kubaiya bana Hebrayo botatwe aaba? Cakulibombya tweelede kusyoma kuti Jehova uyootulanganya. (Int. 118:7) Tulabaingula cakubomba moyo alimwi cabulemu aabo ibatutamikizya zintu zibyaabi. (1Pet. 3:15) Alimwi tulakaka kucita cintu cili coonse icikonzya kunyonganya cilongwe cesu a Taateesu siluyando. w19.02 10-11 ¶11-13

Tulakonzya kubuyumya busicamba bwesu kwiinda mukuyeeya kujatikizya bulangizi mbotujisi akaambo kacinunuzyo ca Kristo. (Joh. 3:16; Ef. 1:7) Kakusyeede nsondo zisyoonto kutegwa Ciibalusyo cicitwe, tunoojisi coolwe cilibedelede cakutondezya kulumba kwesu akaambo kacinunuzyo. Muciindi eeco, amuzumanane kutobela mulongo wakubala Bbaibbele lya Ciibalusyo alimwi akuzinzibala kuyeeya zintu izyakacitika kali afwaafwi kufwa Jesu. Mpoonya twaakuswaangana lya Mulalilo wa Mwami, tuyoomvwisya kapati ncozyaamba zitondezyo zya Ciibalusyo alimwi acipaizyo ciyandika ncoziiminina. Ciindi notumvwisya ncaakatucitila Jesu a Jehova akumvwisya mbocitugwasyilizya swebo antoomwe abayandwa besu, bulangizi bwesu bulayuma, alimwi tulakulwaizyigwa kuzumanana kuliyumya cabusicamba mane kusikila kumamanino. (Heb. 12:3) Eelo kaka tulalumba kapati kuti Jesu wazumanana kutondezya bube oobu mbwali Mupaizi wesu Mupati kujulu, ooyo uutukombelezyela kutegwa tukafwutuke! (Heb. 7:24, 25) Kutondezya kulumba kwesu kupati, cakusyomeka tweelede kuzumanana kwiibaluka lufwu lwa Jesu mbubwenya mbuli mbwaakalailila.—Lk. 22:19, 20. w19.01 22 ¶8; 23-24 ¶10-11

Toonse Jehova wakatupa coolwe cakumutembaula. Bwiinguzi bwesu kumiswaangano ncibeela ‘cacipaizyo cantembauzyo’ cesu, alimwi kunyina uukonzya kutupeda cipaizyo eeco. (Heb. 13:15) Sena Jehova uyanda kuti katupa cipaizyo cikozyene, naa bwiinguzi bukozyene? Peepe! Miswaangano yambungano amwiibone mbuli cakulya cilidwa antoomwe abalongwe babotu. Amweezyeezye kuti mwatambwa kutegwa mukalye cakulya antoomwe abalongwe bamwi bamumbungano alimwi mwalombwa kuti mukaletelezye cakulya cisyoonto. Ino inga mwalimvwa buti? Mulakonzya kulibilika, pele cakutadooneka mulakonzya kusolekesya kapati kutolelezya cakulya ncobakonzya kukkomanina boonse. Jehova, Sikututamba, watubambila tebulu lyazintu zibotu zinji kumiswaangano yesu. (Int. 23:5; Mt. 24:45) Alimwi ulakkomana ciindi notutolelezya cipego cisyoonto, ncotukonzya. Aboobo amulibambile kabotu alimwi akutola lubazu cakwaanguluka kweelana ambomukonzya. Kuti mwacita oobo, tamukalidi buyo atebulu lya Jehova pele alimwi muyooletelezya acipego cakupa mbungano. w19.01 8 ¶3; 13 ¶20

Kaindi, bukombi bwakubeja kanji-kanji bwakali kubikkilizya akutalilemeka mumakani aakoonana. (Hos. 4:13, 14) Kwaamba masimpe, bukombi buli boobu bwakali kulibonya kuba kabotu kubantu basizibi. Pele tiibwakaleta lukkomano lutamani. Cakacitika cakaliimpene kapati! Davida wakaamba kuti, ‘Aabo ibakatobela baleza bambi bakalivwuzyila mause.’ Alimwi bakaleta mapenzi kubana banji kapati. (Is. 57:5) Jehova wakasesemwa akaambo kalunya luli boobu! (Jer. 7:31) Mazuba aano, mbubwenya buyo bukombi bwakubeja bulabikkilizya akutalilemeka mumakani aakoonana, nokuba koonana kwabantu bajisi zizo zikozyene. Pele zitobela akaambo kakulipa lwaanguluko luli boobu mumakani aakulilemeka tiizyacinca kuzwa kaindi. (1Kor. 6:18, 19) Kweelana ambomwabona, bantu “balivwuzyila mause.” Aboobo nobakubusi, amumuswiilile Uso wanu uuli kujulu. Amubone masimpe kuti kumumvwida caba cintu ncomuyandisya kapati. Kamuyeeya lyoonse kuti mapenzi aaboola akaambo kakucita zintu zibyaabi manji kapati kwiinda lukkomano lwaciindi cisyoonto lujanika kwiinda mukucita zintu zibyaabi eezyo.—Gal. 6:8. w18.12 27-28 ¶16-18

Ikuti umwi wabanabukwetene Munakristo wacita bwaamu, ooyo uusyomeka weelede kusala cakucita. Jesu wakaamba kuti ooyo uusyomeka ulijisi kaambo kalimvwisya kakulekana angobakwetene limwi alimwi akwaanguluka kukwata naa kukwatwa kumbi. (Mt. 19:9) Kulubazu lumbi, ooyo uusyomeka ulakonzya kumulekelela ngobakwetene limwi. Kucita boobo takuli kulubizya. Hosea wakamujola Gomeri. Ciindi Gomeri naakajokela kuli Hosea, tanaakeelede koonana amwaalumi uumbi uuli woonse. Hosea kunyina ‘naakali koonana’ a Gomeri kwaciindi cili mbocibede. (Hos. 3:1-3, bupanduluzi buyungizidwe.) Pele mukuya kwaciindi, kweelede kuti Hosea wakatalika alimwi koonana anguwe, eeci citondezya mbwaakalibambilide Leza kubatambula alimwi bantu bakwe alimwi akuzumanana kuba acilongwe ambabo. (Hos. 1:11; 3:4, 5) Ino eeci cituyiisya nzi kujatikizya lukwatano mazuba aano? Ikuti ooyo uusyomeka watalika alimwi koonana angobakwetene limwi uutasyomeki, eeco citondezya kuti ooyo uusyomeka wamulekelela ngobakwetene limwi. (1Kor. 7:3, 5) Mpoonya kucinoonyina kaambo kalimvwisya ikeelede kubapa kulekana. Kuzwa waawo, banabukwetene beelede kubeleka canguzu kulubona mbwalubona Leza lukwatano. w18.12 13 ¶13

Ciindi notwiiya, inga cabota kulanga-langa mbwayeeya Jehova mubukkale motukonzya kuyoolijana kumbele. Kuti twacita oobo, twaakulijana mubukkale buyandika kusala cakufwambaana, tunoocizyi cakucita. Kwiinda mukukaka cakufwambaana koongelezya kwamukaintu wa Potifara, Josefa wakatondezya kuti wakayeeyela limwi kujatikizya Jehova mbwaabona makani aakusyomeka mulukwatano. (Matl. 39:8, 9) Kuyungizya waawo, bwiinguzi bwakwe kumukaintu wa Potifara bwakuti: “Ino inga ndacitila nzi cibi cipati cili boobu akubisizya Leza?” butondezya kuti wakalisalide kale kuyeeya mbuli mbwayeeya Leza. Mbuti kujatikizya ndiswe? Mbuti kuti mubelesima watalika kusobana nkwela andiswe? Mbuti kuti muntu umwi watutumina meseji naa cifwoto ciletela muzeezo wakoonana? Inga cauba-uba kusala kusyomeka kuli Jehova ikuti naa twakasala kale kubona zintu mbuli mbwazibona walo mumakani aali boobu alimwi akuti naa twakasalila limwi ncotukonzya kucita. w18.11 25 ¶13-14

Basyaazibwene bamwi bayeeya kuti kapango aaka kaamba kuti “Ndiyoosotoka cakukondwa mu Mwami; ndiyoozinguluka calukkomano muli Leza.” Eelo kaka ncisyomezyo cibotu kapati kulindiswe toonse! Jehova tanaatupa buyo zisyomezyo zibotu pele alimwi watusyomezya kuti ulimukubeleka cakufwambaana kutegwa azuzikizye makanze aakwe. Cakutadooneka, mulumbe uuyandika kapati wa Habakuku ngwakusyoma Jehova. (Hab. 2:4) Tulakonzya kuba alimwi akuzumanana kusyoma ikuti twaciyumya cilongwe cesu a Jehova kwiinda (1) mukupaila lyoonse, kumwaambila Jehova kujatikizya nzyotulibilika alimwi amapenzi eesu; (2) mukulibikkila maano kapati Jwi lya Jehova abusolozi buli boonse mbotutambula kwiinda mumbunga yakwe; alimwi (3) amukulindila Jehova calusyomo alimwi cakukkazika moyo. Oobo mbwaakacita Habakuku. Nokuba kuti wakatalika bbuku lyakwe kali mubuumba, wakamanizya kajisi lusyomo alimwi kakkomene kapati. Atucitobele cikozyanyo cikulwaizya kapati eeci kutegwa andiswe Taateesu Jehova atukumbate! Sena kuli luumbulizyo lwiinda aali loolu ndotukonzya kujana munyika eeyi mbyaabi? w18.11 17 ¶18-19

Nkaaka kaambo akambi ikatupa kulukkomanina luyando lwa Leza: “Wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atanyonyoonwi, pele abe abuumi butamani.” (Joh. 3:16) Eelo kaka nduyando lupati awalo Jesu ndwaakatondezya kwiinda mukwaaba buumi bwakwe akaambo kandiswe! Alimwi luyando oolu lulatukulwaizya kapati! Ijwi lya Leza lisyomezya kuti naaba “mapenzi, naa kukatazyigwa” tazikonzyi pe “kutwaandaanya kuluyando lwa Kristo.” (Rom. 8:35, 38, 39) Ciindi notwajana masunko aakumubili, mumizeezo, naa kutyompwa kumuuya, luyando lwa Kristo lulakonzya kutupa nguzu zyakuliyumya. (2Kor. 5:14) Luyando lwa Jesu lulijisi nguzu zyakutugwasya alimwi akutukulwaizya kuzumanana, nokuba kuti tuli mumasunko aali mbuli ntenda, kupenzyegwa, kutyompwa, naa kulibilika kapati. w18.09 14 ¶8-9

Kutegwa tweende mukasimpe, tweelede kuzumina akumvwida majwi aa Jehova oonse. Kasimpe keelede kuba mubusena bwakusaanguna mubuumi bwesu alimwi akupona kweelana anjiisyo zyamu Bbaibbele. Mbubwenya mbuli Davida, tweelede kuba amakanze aakuzumanana kweenda mukasimpe ka Leza. Ikuti katutajisi makanze, tulakonzya kutalika kuyeeya zintu nzyotwakabbadela kutegwa tube akasimpe alimwi akusunkwa kujokela kuzintu eezyo. Muciindi caboobo, tulakakatila kukasimpe koonse. Tulizyi kuti tatukonzyi kusala twaambo twakasimpe tumwi akusiya tumwi. Kayi, tweelede kweenda ‘mukasimpe koonse.’ (Joh. 16:13) Kutegwa tutaunkilili akusweeka kukasimpe, tweelede kucibelesya kabotu ciindi cesu. Ikuti katutabikkili maano, tulakonzya kubelesya ciindi cinji kuzyakulikondelezya, kucita zintu nzyotuyandisya, kubelesya intaneti, naa kweebelela TV. Nokuba kuti zintu eezyi tazilubide, ciindi ncotubelesya kulinzizyo cilakonzya kuba nceciindi ncotwakali kubelesya kucita ciiyo cesu tobeni alimwi akucita zintu zimwi zyakumuuya. w18.11 10 ¶7-8

Ciindi bukkale bwesu nobucinca cakutayeeyela, tulakonzya kuyoowa alimwi akutyompwa kujatikizya mbotweelede kupona kweelana akucinca ooko. (Tus. 12:25) Ambweni buya cilakonzya kutuyumina kukuzumina kucinca ooko. Mubukkale buli boobu, ino mbuti mbotukonzya ‘kuwuumbulizya akuwuumuzya’ moyo wesu? (Int. 131:1-3) Nomuba mubukkale bukatazya, andiswe mazuba aano tulakonzya kuumbulizyigwa cakaanzambwene ‘aluumuno lwa Leza’ ilukwabilila mizeezo yesu. (Flp. 4:6, 7) Aboobo ikuti naa twapaila kuli Jehova ciindi notulibilikide kapati, luumuno lwa Leza lulakonzya kuyumya makanze ngotujisi aakuzuzikizya mbaakani zyakumuuya alimwi akutukwabilila kucilengwa cili coonse cakutyompwa. Kunze lyakutupa buyo kukkalwa moyo, muuya wa Leza ulakonzya kutugwasya kugamika mizeezo yesu kumagwalo aayandika kapati aayootugwasya kubikkila maano kuzintu ziyandika kapati zyakumuuya.—Joh. 14:26, 27. w18.10 27 ¶2; 28 ¶5, 8

Ino ncintu nzi cakacitika kaindi calo icibajatikizya kapati bantu? Nkubeja! Nkokuti, ikwaamba makani aamwi muntu ngazyi kuti taali amasimpe kutegwa acenge muntu uumbi. Pele ino nguni wakatalisya kubeja? Jesu Kristo wakaamba “Diabolosi” kuti “ngousyi wabubeji.” (Joh. 8:44) Ino ndilili naakabeja ciindi cakusaanguna? Bubeji bwakusaanguna bwakacitika kaindi kapati mumuunda wa Edeni. Banabukwetene bakusaanguna, ba Adamu a Eva, bakali kupona buumi bubotu mu Paradaiso njaakababambila Mulengi wabo. Mpoonya Saatani wakanjililila. Wakalizyi kuti Leza wakalailila banabukwetene aaba kuti tabeelede kulya ‘kucisamu cakuzyiba bubotu abubi,’ buyo-buyo bakali kuyoofwa kuti naa tiibamvwida. Nokuba boobo, kwiinda munzoka, Saatani wakaambila Eva kuti: “Tamukonzyi kufwa pe. Nkaambo Leza ulizyi kuti buzuba mbomuyoolya kulincico, meso aanu ayoojaluka alimwi muyooba mbuli Leza, muyoozyiba bubotu abubi.”—Matl. 2:15-17; 3:1-5. w18.10 6 ¶1-2

Kutegwa katusalala mumoyo, nzyotuyeeya alimwi anzyotulombozya zyeelede kuti kazisalala. Eeci cilayandika kapati kutegwa Jehova abutambule bukombi bwesu. (2Kor. 4:2; 1Tim. 1:5) Nokuba boobo, ino mbuti ibasalala mumoyo ‘mbobamubona Leza’ kakuli mubwini ‘kunyina muntu uukonzya kumubona Leza akuzumanana kupona’? (Kul. 33:20) Ibbala lya Chigiliki lisandululwa kuti “kubona” lilakonzya kwaamba kweezyeezya, kumvwisya, kuzyiba. Aabo ibamubona Leza ‘mumyoyo yabo’ mbabaabo ibamuzyi bwini mbwabede, ibamulumba akaambo kabube bwakwe. (Ef. 1:18) Kunze lyakuzyiba bube bwa Leza, bakombi bakasimpe balakonzya ‘kumubona Leza’ kwiinda mukubona zintu nzyabacitila. (Job. 42:5) Alimwi ‘balazibona mumyoyo yabo’ zilongezyo zibotu eezyo Leza nzyabambilide baabo ibasolekesya kuzumanana kusalala alimwi akumubelekela cakusyomeka. w18.09 20 ¶13, 15-16

Kucita zintu nzyotuzyi kuti zililuzi kuletela zilongezyo zinji. Nokuba kuti busongo buyeeme aluzyibo, bujatikizya kapati zyakusala zyesu ikutali buyo makani aamasimpe ngotuzyi. Notuba tunyenyene tulatondezya busongo. Tunyenyene tulatondezya busongo mbwaakatupa Leza kwiinda mukubamba cakulya cantuto ciindi cacilimo. (Tus. 30:24, 25) Kristo, iwaambwa kuti “mbusongo bwa Leza,” lyoonse ulacita zintu zikkomanisya Bausyi. (1Kor. 1:24; Joh. 8:29) Leza ulikuzyi kwiindana kuliko akati kakusala munzila iiluzi alimwi akucita kweelana akusala ooko. Alimwi ulabapa bulumbu aabo ibalicesya kumwi kabaliyumya alimwi abaabo ibacita zintu nzyobazyi kuti zililuzi. (Mt. 7:21-23) Aboobo, amukwabilile bukkale bubotu bwakumuuya mwalo kulicesya kwini-kwini mokukonzya kuzumanana. Ikucita zintu nzyotuzyi kuti zililuzi kuyanda ciindi akukkazika moyo, pele kulicesya nkokupa kuti katukkomene lino alimwi mane kukabe kutamani. w18.09 7 ¶18

Jehova naakalenga bantu, wakali kuyanda kuti bakabe basimilimonyina anguwe. Nokuba kuti bantu tabalondokede lino, aabo basyomeka balakonzya kubeleka a Jehova abuzuba. Mucikozyanyo, tuba “basimilimonyina a Leza” kwiinda mukukambauka makani mabotu aa Bwami bwakwe alimwi akugwasya bantu kuba basikwiiya. (1Kor. 3:5-9) Amuciyeeyele buyo coolwe ncotujisi cakubeleka calukamantano a Mulengi singuzu zyoonse mumulimo uuyandika kapati! Nokuba boobo, kukambauka alimwi akugwasya bantu kuba basikwiiya tazili nzila zilikke motubeleka a Jehova. Nzila zimbi motukonzya kucita oobo, nkwiinda mukugwasya banamukwasyi alimwi abakombima, kwiinda mukusamausya bamwi, kwiinda mukulyaaba mumilimo ya Bunakristo, alimwi akwiinda mukuyungizya mulimo wesu uusetekene. (Kol. 3:23) Nokuba boobo, muteezyanisyi nzyomukonzya kumucitila Jehova alimwi anzyobakonzya kumucitila bamwi. Amuyeeye kuti bantu baliindene ziimo, buumi, bukkale, alimwi anzyobakonzya kucita. w18.08 23 ¶1-2

Jehova wakamusyomezya Habakuku caluyando kuti mibuzyo yakwe iipa kukkala aansi kuyeeya yakali kuyooyingulwa. Mapenzi aakwe oonse akali kuyoomana kakutanainda ciindi cilamfwu. Munzila imwi, Leza wakali kwaambila musinsimi kuti: “Kokkazika moyo, kondisyoma. Ndiyooyingula nokuba kuti kwalibonya mbuli kuti ndamuka!” Jehova wakamuyeezya kuti ulibikkide ciindi ceelede cakuzuzikizya zisyomezyo zyakwe. Wakamulaya Habakuku kuti alindile kuzuzikizyigwa kwamakanze aakwe. Mpoonya, musinsimi tanaakali kuyootyompwa. Kulindila Jehova cakukkazika moyo alimwi akubikkila maano kuzintu nzyatwaambila kuyootupa kuba alusyomo alimwi kuyootugwasya kuba amoyo uukkede nokuba kuti kuli mapenzi abuyumuyumu. Jesu wakasinizya kuti tulakonzya kumusyoma Jehova kuti ngu Sikubamba Ciindi Mupati, ikutali kubikkila maano ‘kuziindi naa mazuba’ nzyatanayubununa Leza. (Mil. 1:7) Aboobo atuzumanane kulindila cakulicesya, calusyomo, alimwi acakukkazika moyo, atucibelesye kabotu ciindi ncotujisi kubelekela Jehova kusikila mpotugolela.—Mk. 13:35-37; Gal. 6:9. w18.11 16 ¶13-14

Mbubwenya mbuli ba Juda bakuciindi cakwe, Petro wakali kusyoma kuti Bamasi bakalisofweede. Nokuba boobo, Petro wakabona zintu izyakamupa kucinca mbwaakali kuzibona zintu. Mucikozyanyo, Petro wakabona cilengaano cizwa kuli Leza. (Mil. 10:9-16) Mbubwenya mbuli Petro, tweelede kulilingula kabotu-kabotu alimwi akulomba lugwasyo kutegwa tubone naa tulijisi muuya wakusalulula uuli woonse mumyoyo yesu. Ino ncinzi cimbi ncotukonzya kucita? Kuti twajalula myoyo yesu, tuyoopa kuti luyando lugwisye lusalululo. (2Kor. 6:11-13) Sena mujisi cilengwa cakumvwana buyo abaabo mbomukozyenye mubala, mwaambo, musyobo, naa ibazwa kucisi nkomuzwa? Ikuti naa mbocibede oobo, amujalule myoyo yanu. Mbuti kuti mwabatamba aabo ibazwa mubukkale bwiindene abwanu kubeleka limwi mumulimo wamumuunda, kucakulya kuŋanda, naa kupobwe? (Mil. 16:14, 15) Kuti mwacita oobo, moyo wanu uyoozula luyando cakuti lusalululo luyoobula busena. w18.08 9 ¶3, 6; 10 ¶7

Bakamboni bamwi tabanaileka cakumaninina micito yanyika. Nzyanino alimwi amicito yabo kumapobwe tazitondezyi zintu zyeelede ku Banakristo. Balatuma mafwoto aabo alimwi akulemba zintu aa intaneti iziteeleli kubantu basimide kumuuya. Aboobo, balakonzya kuyunga beenzinyina munzila mbyaabi aabo ibasoleka kuzumanana abukkale bubotu akati kabantu ba Jehova. (1Pet. 2:11, 12) Nyika isumpula kapati “zisusi zyanyama alimwi azisusi zyameso amambonwa akaambo kazintu nzyajisi muntu.” (1Joh. 2:16) Nokuba boobo, akaambo kakuti tuli bantu ba Jehova, tucenjezyegwa “kukaka bukkale bwakutayoowa Leza azisusi zyanyika akuti tweelede kupona cakulibatamika, cabululami alimwi acakubelekela Leza cakulyaaba mubweende bwazintu obuno.” (Tit. 2:12) Ŋambawido yesu, mbotulya alimwi ambotunywa, nsamino yesu, mbotulibamba alimwi ambotubeleka, nkokuti zyoonse nzyotucita zyeelede kubatondezya bamwi kuti tukomba buyo Jehova alikke. w18.07 25 ¶13-14

Ikuti twagamika meso eesu aacikozyanyo kulanga kuli Jehova, tatukazumizyi micito yabamwi kutunyonganya naa kunyonganya cilongwe cesu anguwe. Eeci cilayandika kapati kwaambisya ikuti, mbubwenya mbuli Musa, tupedwe mukuli mumbunga ya Leza. Nokuba kuti umwi aumwi wesu weelede ‘kuzumanana kubelekela lufwutuko lwakwe cakuyoowa akukankama,’ tweelede kuyeeya kuti Jehova tajisi ceelelo comwe cigaminide ncabelesya kutubeteka. (Flp. 2:12) Muciindi caboobo, ulacita oobo kweelana amukuli ngotujisi. (Lk. 12:48) Pele kuti katumuyanda ncobeni Jehova, kunyina ciyakutulebya naa kutwaandaanya kuluyando lwakwe. (Int. 119:165; Rom. 8:37-39) Muziindi eezyi zikatazya, atuzumanane kuwaala meso eesu kuli yooyo ‘uukkede acuuno cabwami kujulu,’ kutegwa tuzyibe nzyayanda kuti tucite. (Int. 123:1) Tutasoli kulekela micito yabamwi kunyonganya cilongwe cesu a Jehova. w18.07 16 ¶19-20

Eelo kaka cilakkomanisya kumvwa mweelwe wabantu ba Jehova mbouyaabuyungizyika! Mwaka wa 2017 twakasololela ziiyo zya Bbaibbele iziinda ku 10,000,000. Eeci citondezya kuti babelesi ba Jehova balamunika mumuni wabo. Alimwi amuyeeye buyo kujatikizya bantu banji ibajisi luyandisisyo ibakaboola ku Ciibalusyo. Bakaiya kujatikizya luyando ndwaakatondezya Leza ciindi naakapa cinunuzyo. (1Joh. 4:9) Nyika yoonse mbwiizulwa, bantu ba Jehova baambaula myaambo iindene-indene. Nokuba boobo, eeci tacitukasyi kumutembaula caantoomwe Taateesu, Jehova. (Ciy. 7:9) Tacikwe makani amwaambo wesu alimwi abusena nkotukkala, tulakonzya kumunika “mbuli mimuni munyika eeyi.” (Flp. 2:15) Ikuyungizyika nkotubona, lukamantano ndotujisi alimwi amuuya wakulangila ngotusolekesya kuba anguwo, zyoonse eezyi zipa kuti katupa bulemu kuli Jehova. w18.06 21 ¶1-3

Bwiinguzi bwa Jesu bwakatondezya kuti wakabikkilide kapati maano kumubandi wakumuuya cakuti tanaakali kukonzya kwiimvwa anzala. Kukambauka, nokuba kumukaintu muna Samariya, kwakali kuyanda kwa Bausyi, alimwi cakali mbuli cakulya kulinguwe. (Joh. 4:32-34) Jakobo a Johane tiibakacimvwisya ciiyo eeci. Nobakali kweenda a Jesu mu Samariya, basikwiiya bakali kuyanda kuti bajane kwakoona mumunzi wa Samariya. Bana Samariya bakakaka kubatambula, aboobo Jakobo a Johane kabanyemede bakali kuyanda kuti mulilo uboole kuzwa kujulu kutegwa unyonyoone munzi woonse. Jesu wakabakalalila. (Lk. 9:51-56) Tulakonzya kulibuzya ikuti naa Jakobo a Johane nobakacita mbubwenya oobo ikuti munzi iwakakaka kubatambula nowakali mucilawo cabo ca Galilaya. Kulibonya kuti kusalulula kwakapa kuti babasulaike kapati. Ciindi naakakkomene akaambo kakuzwidilila mumulimo wakukambauka kubana Samariya, kweelede kuti mwaapostolo Johane wakamvwa nsoni naakayeeya mbobakalaacite kumatalikilo.—Mil. 8:14, 25. w18.06 10-11 ¶12-13

Ciindi kasimpe nokaangwa mulindiswe, tuyookulwaizyigwa kupona kweelana ankako alimwi akwaamba masimpe ciindi coonse. Nkaambo nzi ncotweelede kweeleba kubeja? Nkaambo kubeja ninzila imwi yali kumubelekela kabotu Saatani. Kubeja kulabanyonganya boonse sikubeja alimwi asikusyoma zyakubeja. (Joh. 8:44) Aboobo, nokuba kuti tatulondokede, tweelede kusolekesya kwaamba masimpe. (Ef. 4:25) Pele kucita boobo tacili cuuba-uba. Abigail uujisi myaka yakuzyalwa iili 18, wakaamba kuti: “Kwaamba masimpe zimwi ziindi inga kwalibonya mbuli kuti takugwasyi, ikapati kubeja nokukonzya kupa kuti utanjili mumapenzi.” Pele ino nkaambo nzi lyoonse ncotweelede kwaamba masimpe? Victoria, uujisi myaka yakuzyalwa iili 23, wakaamba kuti: “Ikuti waamba masimpe alimwi akwiiminina nzyosyoma, ulakonzya kukongwa. Pele lyoonse unoojana mpindu: Unoojisi busicamba bwakwiiminina kasimpe, uyooba acilongwe cibotu a Jehova alimwi unoolemekwa abaabo ibakuyanda.” Masimpe, cilagwasya kuzumanana “kwaangilila lutambo lwakasimpe mucibuno cako” ciindi coonse. w18.05 28 ¶3, 5

Mboziyaabwiindila kubija zintu, toonse tweelede kuzumanana kulangila. Ciindi Jehova aakubweza ntaamu, uyoocita boobo aciindi ceelede. (Mt. 24:42-44) Pele kwaciindi ecino, amukkazike moyo akuzumanana kulangila. Amubale Jwi lya Leza abuzuba alimwi akupakamana kupaila. (1Pet. 4:7) Amubikkile maano kuzikozyanyo zibotu zyabakwesu abacizyi aabo ibatondezya kuti balikkomene mubuumi bwabo akaambo kakuzumanana kulangila alimwi akumunika mumuni wabo. Amujate bubi mumulimo wa Jehova. Amucitile bamwi milimo yaluzyalo alimwi akujana ciindi cakuyanzana a Banakristonyoko. Kucita boobo kuyoomuletela lukkomano lunji alimwi muyoobona mbuli kuti ciindi cileenda cakufwambaana. (Ef. 5:16) Cilayumya lusyomo kuzyiba kuti kutalondoka kwesu takukonzyi kutulesya kubelekela Jehova munzila iitambulika. Aboobo, amutondezye kulumba ‘kuzipego mubantu’ nzyaakatupa Jehova, nkokuti, baalu mumbungano. (Ef. 4:8, 11, 12) Ciindi ciboola mwaalu aakumuswaya, amukacibelesye coolwe eeci kwiiya kuzwa kubusongo bwakwe alimwi akugwasyigwa alulayo lwakwe. w18.06 24-25 ¶15-18

Jesu wakaambila basikwiiya bakwe ‘kuzumanana muluyando lwakwe.’ Ino nkaambo nzi? Nkaambo kuzumanana kuba sikwiiya wa Kristo mwini-mwini kuyandika kuliyumya. Jesu wakayungizya kwaamba mbociyandika kuliyumya kwiinda mukubelesya bbala ‘lyakuzumanana’ alimwi amabala aakozyenye abbala eeli ziindi zinji mucibalo cilembedwe mulugwalo lwa Johane 15:4-10. Mbuti mbotutondezya kuti tuyanda kuzumanana muluyando lwa Kristo alimwi akukkomaninwa anguwe? Nkwiinda mukutobela milawo ya Jesu. Mubufwaafwi, Jesu utwaambila kuti, ‘Amundimvwide.’ Nokuba boobo, Jesu wakatwaambila buyo kucita ceeco awalo ncaakacita, nkaambo wakayungizya kuti: “Mbubonya andime mbondaitobela milawo ya Taata akuzumanana muluyando lwakwe.” Jesu upa cikozyanyo cibotu kulindiswe. (Joh. 13:15) Kwiinda mukutobela mulawo wa Jesu wakuunka kuyookambauka, andiswe tulatondezya luyando ndotujisi kuli Leza nkaambo milawo ya Jesu itondezya kuyeeya kwa Bausyi. (Mt. 17:5; Joh. 8:28) Akaambo kakuti tulabayanda, Jehova alimwi a Jesu balazumanana kutuyanda. w18.05 18 ¶5-7

Bakubusi beelede kusala kujatikizya lwiiyo, mulimo alimwi amakani aambi. Ikuti kamuzizyi mbaakani zyanu, kusala kabotu inga cilauba-uba. Ikuti naa mwafwambaana kuba amakanze kwiinda mukulibikkila mbaakani zibotu, tacikamutoleli ciindi kuti muzwidilile. Bakubusi banji ibali mumbungano nyika yoonse beelede kulumbaizyigwa kapati. Balalyaaba kubelekela Jehova alimwi babikkila maano kumbaakani zyakumuuya. Bakubusi ibali boobo balakkomana kapati mubuumi alimwi kulubazu lumwi balaiya kutobela busolozi bwa Jehova muzintu zyoonse nzyobacita. Eeci cilabikkilizya abuumi bwamumukwasyi. Solomoni wakalemba kuti: “Kosyoma Jehova amoyo wako woonse.  . . Munzila zyako zyoonse kolanga kulinguwe, eelyo walo ulalulamika nzila zyako.” (Tus. 3:5, 6) Bakubusi mumbungano ya Bunakristo balayandika kuli Jehova, walo uubayanda kapati akubakwabilila, kubasololela alimwi akubalongezya. w18.04 26 ¶7; 27 ¶9

Mwaapostolo Johane wakali musemu mumbungano ya Banakristo yakusaanguna. Cibalo cakwe ca Makani Mabotu cikondelezya icijatikizya mulimo wa Jesu cakali kubakulwaizya Banakristo mumyaanda yamyaka yoonse, alino cicikulwaizya. Makani Mabotu aakwe alikke ngaamba majwi aa Jesu aakuti luyando ndoluzyibya basikwiiya bakwe beni-beni. (Joh. 13:35) Magwalo aa Johane otatwe alijisi mbono azimwi zyakasimpe. Ciindi notulemenwa akaambo kacibi, sena tatukatalusyigwi notubala kuti “bulowa bwa Jesu . . . bulatusalazya kuzibi zyoonse”? (1Joh. 1:7) Alimwi ikuti naa moyo wesu wazumanana kutupa mulandu, sena tatulimvwi kuusa kapati mpoonya alimwi akulumba kapati ciindi notubala kuti “Leza mupati kwiinda myoyo yesu”? (1Joh. 3:20) Johane alikke nguwakalemba kuti “Leza nduyando.” (1Joh. 4:8, 16) Lugwalo lwakwe lwabili alwatatu lulumbaizya Banakristo ibazumanana “kweenda mukasimpe.”—2Joh. 4; 3Joh. 3, 4. w18.04 18 ¶14-15