November

Ciindi notubelekela Jehova, cilongezyo cimwi ncotujisi ncakuti Jehova uyootupa zintu zyoonse ba Adamu a Eva nzyobakasowa, kubikkilizya acoolwe cakuyoopona kukabe kutamani. Ba Adamu a Eva bakasala kutamubelekela Jehova akaambo kakuti tiibakali kumuyanda kapati. Nokuba boobo, Jehova wakabazumizya kuti bapone kwaciindi cilamfwu kutegwa bazyale bana alimwi akulibikkila zyeelelo zyabo beni zyakukomezya bana aabo. Izyakacitika akaambo kakusala kwaba Adamu a Eva kwakutayanda kusololelwa a Jehova, kakutanainda ciindi cilamfwu zyakatondezya caantangalala mbobakali bafwubafwuba. Mwanaabo wakusaanguna wakajaya munyina iwatakajisi mulandu, mpoonya mukuya kwaciindi bubi akuliyanda zyakaba mbobuumi bwabantu. (Matl. 4:8; 6:11-13) Nokuba boobo, Jehova wakajana nzila yakufwutula bana ba Adamu a Eva aabo boonse ibayanda kumubelekela. (Joh. 6:38-40, 57) Mbomuyaabwiiya zinji kujatikizya mbwakkazika moyo alimwi ambwatondezya luyando Jehova, cakutadooneka luyando lwanu kulinguwe luyookomena. Muyookaka kupona buumi mbobakasala ba Adamu a Eva alimwi muyoolyaaba kuli Jehova. w19.03 2 ¶3; 4 ¶9

Kutegwa tube alweetelelo, tweelede kusoleka kumvwisya buyumuyumu mbobajisi banamukwasyi alimwi abasyomima. Atutondezye kuti tulababikkila maano bakubusi ibali mumbungano, baciswa, bacembeede alimwi abaabo ibakafwidwa bayandwa babo. Atubabuzye kutegwa tuzyibe mbobapona. Tweelede kuswiililisya ciindi nobatwaambila kujatikizya mbobalimvwa. Atutondezye kuti tulabumvwisya kapati bukkale bwabo. Atulyaabe kubagwasya munzila iili yoonse njotukonzya. Ciindi notucita boobu, tutondezya luyando lwini-lwini. (1Joh. 3:18) Tweelede kuba bantu banyoneka ciindi notusoleka kugwasya bamwi. Nkaambo nzi? Akaambo kakuti bantu balaindana mbobalimvwa ciindi nobali mumapenzi. Bamwi balaanguluka kwaamba mapenzi ngobajisi, pele bamwi tabaanguluki. Aboobo nokuba kuti tulayanda kugwasya, tatweelede kubuzya mibuzyo iikonzya kubamvwisya nsoni. (1Tes. 4:11) Noliba leelyo bamwi nobaanguluka kutwaambila mbobalimvwa, talili lyoonse notukonzya kuzumina nzyobaamba. Pele tweelede kuzyiba kuti oobo mbombubo balo mbobalimvwa. Tweelede kufwambaana kuswiilila alimwi akumuka kwaambaula.—Mt. 7:1; Jak. 1:19. w19.03 19 ¶18-19

Sena mulaakuyoowa ciindi nomwaambaula mubuleya kujatikizya kasimpe? Amuyeeye kujatikizya Nehemiya. Wakabeleka munkuta yamwami singuzu. Nehemiya wakaluuside akaambo kakuti wakamvwa kuti bwaanda alimwi amilyango ya Jerusalemu yakanyonyoonwa. (Neh. 1:1-4) Amweezyeezye buyo mbwaakayoowede ciindi mwami naakamubuzya kupandulula ncaakali kulibonya kuusa! Nehemiya wakapaila cakufwambaana mpoonya akwiingula. Aboobo mwami wakacita zintu zinji kutegwa agwasye bantu ba Leza. (Neh. 2:1-8) Alimwi amuyeeye kujatikizya Jona. Ciindi Jehova naakamulomba kuti akabandike abantu baku Nineve, Jona wakayoowa kapati cakuti wakatijila kubusena kumbi. (Jon. 1:1-3) Pele kwiinda mukugwasyigwa a Jehova, Jona wakaunka akuyoobakambaukila bana Nineve. Alimwi majwi ngaakaamba, akabagwasya kapati bantu aabo ibakali mu Nineve. (Jon. 3:5-10) Kuli Nehemiya twiiya kujatikizya mbociyandika kapati kupaila katutanapa bwiinguzi. Alimwi kuli Jona twiiya kuti Jehova ulakonzya kutugwasya kumubelekela nokuba kuti tuliyoowede kapati. w19.01 11 ¶12

Ciindi notusala kupona kweelana akasimpe kamu Bbaibbele, zilongwe nzyotujisi abamwi alimwi abanamukwasyi zilakonzya kucinca. Nkaambo nzi? Jesu wakapaila boobu kujatikizya basikumutobela: “Kobasalazya akasimpe; ijwi lyako nkasimpe.” (Joh. 17:17; bupanduluzi buyungizyidwe.) “Kubasalazya” kulakonzya alimwi kwaamba ‘kubazandula.’ Notwatambula kasimpe, tulazandulwa kunyika eeyi nkaambo tatuceeleli kubumbwa anjiyo. Bantu lino batulanga munzila iimbi nkaambo twakacinca. Tulapona kweelana azyeelelo zyakasimpe kamu Bbaibbele. Nokuba kuti tatuyandi kuti kube lwaandaano, balongwe bamwi alimwi abanamukwasyi mbotwakali kumvwana limwi kapati balakonzya kutalika kututantamuka nokuba kutukazya buya akaambo kalusyomo lwesu. Eeci taceelede kutugambya pe. Jesu wakaamba kuti: “Masimpe, basinkondo bamuntu bayooba bantu bamuŋanda yakwe mwini.” (Mt. 10:36) Jesu alimwi wakasyomezya kuti bulumbu mbotujana kwiinda mukuula kasimpe mbupati kapati kwiinda mweelwe wamali aali oonse ngotukonzya kupa kutegwa tuule cintu cimwi. w18.11 6 ¶11

Mwaapostolo Paulo wakabalumba bakwesu abacizyi alimwi wakatondezya oobo munzila mbwaakali kwaambaula kujatikizya mbabo. Lyoonse wakali kumulumba Leza akaambo kambabo mumipailo yakwe. Alimwi wakatondezya kulumba ciindi naakali kubalembela magwalo. Mutupango twakusaanguna tuli 15 twalugwalo lwa Baroma 16, Paulo wakabaamba mazina Banakristonyina ibali 27. Paulo wakayeeya kuti ba Purisika a Akula ‘bakalilibambilide kukosolwa nsingo’ akaambo kanguwe, alimwi wakaamba Febi kuti “wakagwasya bakwesu banji,” kubikkilizya a Paulo. Wakabalumbaizya bayandwa aabo, bakwesu abacizyi ibakali kubeleka canguzu. (Rom. 16:1-15) Paulo wakalizyi kuti bakwesu abacizyi tiibakalondokede, pele mukumanizya lugwalo lwakwe kubana Roma, wakabikkila maano kubube bwabo bubotu. Amuyeeyele buyo mbobakakulwaizyigwa bakwesu abacizyi aabo nobakamvwa majwi aa Paulo kaabalwa cakupozya kumbungano! Aboobo, cakutadooneka cilongwe cabo a Paulo cakayuma. Sena lyoonse mulatondezya kulumba akaambo kazintu zibotu nzyobaamba naa kucita bantu ibali mumbungano yanu? w19.02 16 ¶8-9

Sena tweelede kuyeeya kuti tuyandika kulondoka buya kutegwa katusyomeka? Peepe. Kayi tatulondokede alimwi tulalubizya ziindi zinji. Jehova tabikkili maano kuzibi zyesu. Ijwi lyakwe litwaambila kuti: “Ikuti nooli kulanga zinyonyoono, O Ja, ino nguni, O Jehova, uukonzya kwiima?” (Int. 130:3) Ulizyi kuti tuli bantu batalondokede aboobo ulatulekelela cabuuya. (Int. 86:5) Alimwi, Jehova ulikuzyi kulezya kwesu alimwi talangili kuti tucite zintu zinji kwiinda aali zyeezyo nzyotukonzya kucita. (Int. 103:12-14) Kubabelesi ba Jehova, luyando lulayandika kapati kutegwa kabasyomeka. Luyando lwesu kuli Leza, kulyaaba kwesu kulinguwe kali Taateesu wakujulu kweelede kuti kakumaninide lyoonse, kakutajisi kampenda. Kuti luyando lwesu kaluli boobo lyoonse nociba ciindi notwasunkwa, tuyootondezya kuti tulasyomeka. (1Mak. 28:9; Mt. 22:37) Tulizyi kuti Jehova ulijisi zyeelelo ziluleme, alimwi tulabikkila maano kucita cintu cikkomanisya Taateesu uuli kujulu. Luyando ndotujisi kulinguwe lutupa kumubikka mubusena bwakusaanguna muzintu nzyotusala kucita alimwi kwiinda mukucita boobo tutondezya kuti tulasyomeka. w19.02 3 ¶4-5

Ciindi coonse notubona bubotu buboola kwiinda mukucita ciluzi, lusyomo lwesu lulayuma. (Jak. 1:2, 3) Tulabotelwa akaambo kakuti tupa Jehova kukkomana kutwiita kuti tuli akati kabana bakwe, alimwi luyandisisyo lwesu lwakumukkomanisya lulakomena. (Tus. 27:11) Musunko uuli woonse utupa coolwe cakutondezya kuti tulilyaabide camoyo woonse kubelekela Taateesu uutubikkila maano. (Int. 119:113) Muciindi caboobo, tulatondezya kuti tulamuyanda Jehova amoyo woonse, moyo uumaninide kumvwida milawo yakwe alimwi akucita kuyanda kwakwe. (1Bam. 8:61) Sena kuli notuyoolubizya? Inzya; tatulondokede. Kuti naa twalubizya, tweelede kuyeeya cikozyanyo ca Mwami Hezekiya. Wakali kulubizya. Pele wakeempwa akuzumanana kubelekela Jehova “camoyo woonse.” (Is. 38:3-6; 2Mak. 29:1, 2; 32:25, 26) Aboobo, atukukake kusoleka kwa Saatani kwakuyanda kutunyonganya amizeezo yakwe. Atupaile kutegwa tube ‘amoyo uumvwida’ alimwi akuzumanana kusyomeka kuli Jehova.—1Bam. 3:9; Int. 139:23, 24. w19.01 18-19 ¶17-18

Tulagwasyigwa lwesu ciindi notwiingula lyamiswaangano. (Is. 48:17) Mubuti? Cakusaanguna, ikuti naa tujisi makanze aakuyoopa bwiinguzi, tulakulwaizyigwa kapati kulibambila kabotu miswaangano. Ciindi notulibambila kabotu, tulalimvwisya kapati Jwi lya Leza. Mpoonya ikuti naa twalimvwisya kapati, cilauba-uba kuzibelesya zintu nzyotwiiya. Cabili, tulaikkomanina kapati miswaangano akaambo kakuti tulatola lubazu mumubandi. Catatu, akaambo kakuti kuyandika kusolekesya kapati kutegwa tupe bwiinguzi, kanji-kanji tulatuyeeya twaambo ntotwakaingula nokuba kuti kwainda ciindi. Alimwi tulamukkomanisya Jehova ciindi notwaamba kujatikizya lusyomo lwesu. Tulakonzya kuba masimpe kuti Jehova ulatuswiilila alimwi ulalumba kapati akaambo kakuti tulasolekesya kwiingula kumiswaangano. (Malk. 3:16) Ulatondezya kulumba kwiinda mukutulongezya ciindi notusolekesya kapati kumukkomanisya. (Malk. 3:10) Cakutadooneka, tulijisi twaambo tubotu ncotweelede kwiingula kumiswaangano. w19.01 8 ¶3; 9-10 ¶7-9

Jehova ulabalanganya cabusongo babelesi bakwe. Muciindi cakutupa milawo minji kapati, cakukkazika moyo ulatuyiisya mulawo waluyando. Uyanda kuti katupona kweelana azyeelelo zyakwe alimwi akusulaika cibi. Mulumbe wa Jesu waa Cilundu ncikozyanyo cibotu cakuyiisya kwa Leza nkaambo ulaamba cipa kuti bantu kabacita zibi. (Mt. 5:27, 28) Mbwali Mwami wa Bwami bwa Leza, Kristo uyoozumanana kutuyiisya munyika mpya kutegwa bululami alimwi abubi katububona mbuli mbwabubona. (Heb. 1:9) Alimwi uyoopa kuti tulondoke kumubili amumizeezo. Amuciyeeyele buyo, kunyina nomuyoolubizya limbi naa kupenga akaambo kacibi. Mpoonya kumamanino, muyooba “alwaanguluko lwabulemu” oolo Jehova ndwaakamusyomezya. (Rom. 8:21) Nokuba boobo, kunyina notuyooba alwaanguluko cakumaninina. Lwaanguluko lwesu lunooyendelezyegwa aluyando lwesu kuli Leza alimwi akubantuma.—1Joh. 4:7, 8. w18.12 23 ¶19-20

Mulawo wakali kuzumizya mulumi muna Israyeli kumuleka mukaintu wakwe ikuti “wajana cintu cuusya nsoni mulinguwe.” Mulawo kunyina nowakaamba icakali kukonzya kwaambwa kuti ‘ncintu cuusya nsoni.’ Nokuba boobo, cakeelede kuba cintu cipati, ikutali buyo cibi cisyoonto. (Dt. 23:14) Cuusisya ncakuti, kuzikusika mumazuba aa Jesu, bama Juda banji bakali kulekana “akaambo kakaambo kali koonse.” (Mt. 19:3) Cakutadooneka, inga tiitwayanda kuba mbuli mbabo. Musinsimi Malaki wakaamba kujatikizya mbwakubona Leza kulekana. Eeci cakali ciindi nocakadumide kumwaalumi kuleka ‘mukaintu wakwe wakubukubusi’ cabumpelenge, ambweni kutegwa akwate mukaintu uucili mwana-mwana walo uutakombi Leza. Kujatikizya mbwaakali kucibona eeci Leza, Malaki wakalemba kuti: “Ndilikusulide kulekana.” (Malk. 2:14-16) Eeci cakali kweendelana ancolyaamba Jwi lya Leza kujatikizya lukwatano lwakusaanguna kuti: ‘Mwaalumi uyookakatila kumukaintu wakwe, alimwi bayooba mubili omwe.’ (Matl. 2:24) Jesu wakabikkila maano kujatikizya mbobalubona lukwatano Bausyi, wakaamba kuti: “Aabo Leza mbaaswaanganya kutabi muntu uubaandaanya.”—Mt. 19:6. w18.12 11 ¶7-8

Bukkale bwabakwesu abacizyi bamwi bulabazumizya kulyaaba kuyoobeleka kumasena aali kulamfwu. Bube bwabo bulikozyene abwamusinsimi Isaya. Mukwiingula mubuzyo ngwaakabuzya Jehova wakuti, “Ino nguni ngonditiitume, alimwi ino nguni utiituunkile?” Isaya wakaingula kuti: “Ndime aano! Kondituma!” (Is. 6:8) Sena andinywe inga mwacikonzya alimwi akulyaaba kugwasyilizya mumbunga ya Jehova? Kujatikizya mulimo wakukambauka alimwi akugwasya bantu kuba basikwiiya, Jesu wakaamba kuti: “Aboobo, amulombe Simalelo wabutebuzi kuti atume babelesi mumulimo wakwe wakutebula.” (Mt. 9:38) Sena mulakonzya kubeleka kubusena bubulide, ambweni kamuli bapainiya? Naa sena inga mwagwasya bamwi kucita oobo? Bakwesu abacizyi banji balimvwa kuti nzila mbotu yakutondezya kuti tulamuyanda Leza alimwi abasimukoboma nkucita bupainiya mumasena naa muzilawo muyandika batebuzi bamulimo banji. Sena inga mwayeeya nzila zimbi momukonzya kuyungizya mulimo wanu? Lukkomano lunji lulaboola kwiinda mukucita boobo. w18.08 27 ¶14-15

Makani Mabotu alatondezya kabotu-kabotu mbwayeeya Jehova kujatikizya zintu zyakumubili. Leza wakasala bazyali bantunsi ibakali kuyookomezya Mwanaakwe, nkokuti banabukwetene ibatakajisi zintu zinji zyakumubili. (Lev. 12:8; Lk. 2:24) Naakatumbukwa Jesu, Mariya “wakamuvwungaila muzisani akumulazika mucilido cabanyama nkaambo tiibakajana busena muŋanda yabeenzu.” (Lk. 2:7) Kuti Jehova naakayanda, naakabelesya nzila zili zyoonse kutegwa Mwanaakwe azyalilwe mubusena buli kabotu. Nokuba boobo, ncaakabikkila maano kapati, mbukkale bwakumuuya mwalo Jesu mwakali kuyookomenena alimwi akulanganizyigwa kabotu. Mucibalo eeci camu Bbaibbele tulakonzya kuzyiba mbwazibona zintu zyakumubili Jehova. Bazyali bamwi bayanda kuti bana babo kabajisi zintu zyakumubili zibotu kapati, nokuba kuti eeco cipa kuti cilongwe cabana babo a Jehova cinyongane. Nokuba boobo, cilasalala kuti, Jehova ubona kuti cilongwe cesu anguwe nceciyandika kapati. Sena andinywe muyeeya mbuli mbwayeeya Jehova? Ino zintu nzyomucita zitondezya nzi? w18.11 24 ¶7-8

Mbwaanga ngo Kasensa kalukkomano, Leza uyanda kuti katukkomene, alimwi ulatupa twaambo tunji itweelede kutupa kukondwa. (Dt. 12:7; Muk. 3:12, 13) Nokuba boobo, munyika mazuba aano, nciyumu kuba alukkomano. Nkaambo nzi ncocili boobo? Zintu zityompya mbuli kufwidwa muyandwa naa kuti wagwisyigwa mumbungano, kumana kwalukwatano naa kumaninwa mulimo zilakonzya kutumanina lukkomano. Kulwana muŋanda alimwi akutamvwana mukubandika kulakonzya kututyompya. Kusampaulwa ababelesima naa basicikoloma, kupenzyegwa akaambo kabukombi naa kwaangwa zilakonzya kutumanina lukkomano. Mbubwenya buyo kuciswa-ciswa, bulwazi butasilikiki naa kupenga mumizeezo azyalo inga zyatumanina lukkomano. Nokuba boobo, Jesu Kristo, “ooyo uukkomene alimwi Singuzu zinji uuli alikke,” wakali kukkomana kuumbulizya bantu alimwi akubaletela lukkomano. (1Tim. 6:15; Mt. 11:28-30) Mu Mulumbe wakwe Waacilundu, Jesu wakaamba bube buli mbobubede ibukonzya kutuletela lukkomano nokuba kuti kuli masunko manji munyika ya Saatani. w18.09 17-18 ¶1-3

Kuleka zilengwa zitali zyamu Magwalo cilakonzya kuba cintu cikatazya kapati kutegwa tuule kasimpe. (Tus. 23:23) Nokuba kuti kuli bamwi inga kacili cuuba-uba kuzumina kucinca zilengwa zitali zyamu Magwalo, ibamwi inga bawayawaya kuula kasimpe akaambo kakukazyigwa abanamukwasyi, babelesinyina alimwi abalongwe. Bukkale bulakonzya kuleta mazwanga, kwaambisya kuti cilengwa kacibikkilizya tunsiya-nsiya twakulemeka banamukwasyi ibakafwa. Zikozyanyo zyabaabo ibakali basicamba zilakonzya kutugwasya kusala kabotu. Ino ncinzi ncobakeelede kucita aabo ibakali Banakristo bapya mu Efeso balo musyule ibakajatikizyidwe amasalamuzi, kutegwa bazilekele limwi zilengwa eezyi zitali zyamu Magwalo akuula kasimpe? Bbaibbele lyaamba kuti: “Bakabungika mabbuku aabo akwaaumpa bantu boonse kabalangilila. Alimwi bakasanganya muulo woonse wamabbuku aayo, eelyo bakajana kuti akali kuulwa mali aansiliva aali 50,000.” (Mil. 19:19, 20) Banakristo aaba basyomeka bakalyaaba cakumaninina, eelyo bakalongezyegwa kapati. w18.11 7 ¶15-16

Ciindi bana Israyeli nobakazabuka buyo mulonga wa Jordano, Joshua wakaswaangana amwaalumi wakajisi panga lisomwedwe. Wakali “silutwe wampi ya Jehova,” iwakalibambilide kuvwuna bantu ba Leza. (Jos. 5:13-15) Joshua wakali kutambula malailile aasalede kuzwa mumungelo aatondezya mbwaakeelede kuuzunda munzi wa Jeriko. Kumatalikilo, malailile aamwi taakali kulibonya kuti ali kabotu kwaatobela. Mucikozyanyo, Jehova wakalailila kuti baalumi boonse bakeelede kupalulwa, calo cakali kukonzya kupa kuti kabataciti cintu cili coonse kwamazuba manji. (Matl. 34:24, 25; Jos. 5:2) Kweelede kuti basikalumamba bana Israyeli aaba bakali kulibuzya kujatikizya mbobakali kukonzya kwiikwabilila mikwasyi yabo ikuti naa basinkondonyina baizinguluka nkambi yabo. Pele muciindi cisyoonto buyo, kwakasika mulumbe wakuti munzi wa Jeriko “wakajalwa cakulomya akaambo kabana Israyeli.” (Jos. 6:1) Eelo kaka kweelede kuti mulumbe ooyu wakayumya lusyomo lwabo mubusolozi bwa Leza! w18.10 23 ¶5-7

Mbuti mbotukonzya kwiiya cikozyanyo ca Paulo cakulicesya icilibedelede? Cakusaanguna, tweelede kulikaka sunko lili lyoonse lijatikizya kuyanda naa kupegwa bulemu akaambo kazintu nzyotucita munguzu zya Jehova. Umwi aumwi wesu weelede kulibuzya kuti: ‘Ino ndibabona buti bantu mbondikambaukila? Sena cakutazyiba ndilakonzya kutondezya muuya wakusalulula bantu bamwi uudumide mucilawo cangu?’ Cikkomanisya ncakuti, Bakamboni ba Jehova munyika yoonse bali kuzilanga-langa zilawo zyabo kutegwa babone naa kucili bantu bamwi ibakonzya kuswiilila kumakani mabotu. Zimwi ziindi, kucita boobo kuyandika kwiiya myaambo alimwi azilengwa zyabantu aabo kanji-kanji ibatabikkilwi maano kapati. Bakamboni aabo ibalyaaba kugwasya bantu bali boobo tabeelede kulibona kuti balabainda bantu bamwi. Muciindi caboobo, balasolekesya kumuzyiba kabotu muntu umwi aumwi kutegwa bamusike amoyo amulumbe wa Bwami. w18.09 5 ¶9, 11

Bana Roma bakamujaya Judasi. Kunze lya Judasi alimwi abasikuciindizya, ba Juda bamwi buyo caluyandisisyo bakali kulindila kuboola kwa Mesiya. Alimwi bakali kulangila kuti aakuboola, wakali kuyoobaangulula kubweendelezi bwabana Roma. (Lk. 2:38; 3:15) Banji bakali kusyoma kuti Mesiya wakali kuyootalisya bwami mu Israyeli anyika. Caakucitika eeco, ba Juda banji ibakamwaikide bakali kuyoopiluka kumunzi wabo. Kamuyeeya kuti Johane Mubbapatizi aciindi cimwi wakabuzya Jesu kuti: “Sena ndonduwe ooyo uuboola naa tweelede kulangila uumbi?” (Mt. 11:2, 3) Kweelede kuti Johane wakali kuyanda kuzyiba naa kuli umbi wakali kuyoozuzikizya bulangizi bwaba Juda. Basikwiiya bobilo ibakaswaangana a Jesu iwakabusyigwa, naakali munzila iiya ku Emau abalo bakajisi bulangizi bwakuti Jesu wakali kuyoobaangulula mubuzike. (Lk. 24:21) Kalitanalampa, baapostolo ba Jesu bakamubuzya kuti: “Mwami, sena ulapilusya Bwami ku Israyeli aciindi ecino?”—Mil. 1:6. w18.06 4 ¶3-4

Tweelede kucenjela kwaambisya ciindi notwajana malipooti aajatikizya bantu ba Jehova. Tatweelede kuluba kuti Saatani ngusikutamikizya babelesi ba Jehova basyomeka. (Ciy. 12:10) Aboobo, Jesu wakacenjezya kuti basikukazya ‘banootubejelezya zintu zibi ziindene-indene.’ (Mt. 5:11) Ikuti twakubikkila maano kucenjezya ooku ikuyandika kapati, tatukagambwi ciindi notuyoomvwa makani mabyaabi kujatikizya bantu ba Jehova. Sena muli muntu ukkomanina kutuma ma e-mail alimwi amameseji kubalongwe banu? Kuti kacili boobo, ciindi nomwamvwa makani mapya muli sikapepele naa kumvwa cintu cimwi cakacitika, mulakonzya kulimvwa mbuli simubweza twaambo muli sikapepele walo uuyanda kuba muntu wakusaanguna kwaambila bantu makani aakkomanisya. Aboobo, kamutanatuma meseji naa e-mail, amulibuzye kuti: ‘Sena ndilisinizyide kuti makani ngondiyanda kumwaya ngamasimpe? Sena ndilijisi twaambo twamasimpe?’ Ikuti kamutasinizyide, cakutazyiba mulakonzya kumwaya makani aakubeja akati kabunyina bwesu. Ikuti naa mulaadooneka makani, mutaitumi meseji naa e-mail, amwiimwaye. w18.08 3 ¶3; 4 ¶6-7

Jesu uyanda kuti tujane lukkomano kwiinda mukuba baabi. Bantu banji balakukkomanina kupegwa. Nokuba boobo, tabali boonse bayookkomana akaambo kabwaabi bwesu, pele kuti bacita oobo, kulumba kwabo kuyoobapa kuba baabi abalo. Aboobo amube baabi tacikwe makani naa bantu balalumba naa pe. Tamukonzyi kuzyiba bubotu bukonzya kuboola akaambo kakwaabila bamwi ciindi comwe buyo. Bantu baabila kuzwa ansi aamoyo tabaciti oobo kabajisi makanze aakuti bakapegwe abalo. Jesu wakali kuciyeeya eeci ciindi naakayiisya kuti: “Nowabamba pobwe, tamba bantu bacete, basunkuta, balema, aboofwu; eelyo uyookkomana mbwaanga tabajisi cakukupilusizya.” (Lk. 14:13, 14) Mulembi umwi iwakasololelwa amuuya wakaamba kuti: “Muntu mwaabi uyoolelekwa.” Aumwi wakaamba kuti: “Ulikkomene ooyo uumubikkila maano muntu uupengede.” (Tus. 22:9; Int. 41:1) Masimpe, tulajana lukkomano kwiinda mukugwasya bamwi. w18.08 21-22 ¶15-16

Mazuba aano cilakatazya kujana makani aamasimpe akaambo kakuti makani manji inga taajisi bumboni bukkwene, alimwi akuti tatulondokede. Ino ncinzi cikonzya kutugwasya? Tweelede kuzizyiba kabotu alimwi akuzibelesya njiisyo zyamu Bbaibbele. Njiisyo iimwi njakuti mbufwubafwuba alimwi nkulijazya nsoni kuvwiila kotanaamvwisya kabotu makani. (Tus. 18:13) Aimwi njiisyo yamu Bbaibbele ituyeezya kutasyoma makani oonse katutanazyiba naa ngamasimpe. (Tus. 14:15) Camamanino, tacikwe makani aluzyibo ndotujisi mubukkale bwesu bwa Bunakristo, tatweelede kusyoma maano eesu tobeni. Njiisyo zyamu Bbaibbele ziyootukwabilila kuti katubelesya makani aamasimpe aazwa kubantu basyomeka notuyanda kuzyiba makani aamwi alimwi anotuyanda kusala cabusongo. w18.08 7 ¶19

Kwiinda mukubbapatizyigwa mumaanzi, tulatondezya caantangalala kuti tuli ba Jehova alimwi akuti tuliyandide kulibombya kulinguwe. Oobu mbwaakacita Jesu ciindi naakabbapatizyigwa, aboobo munzila imwi, wakaambila Jehova kuti: “Ndilayanda kucita kuyanda kwako, O Leza wangu.” (Int. 40:7, 8) Ino Jehova wakalimvwa buti ciindi Jesu naakabbapatizyigwa? Bbaibbele lyaamba kuti: “Lino naakamana kubbapatizyigwa, Jesu wakazwa mumaanzi; mpoonya julu lyakajaluka, eelyo wakabona muuya wa Leza ulaseluka mbuli nziba akuboola alinguwe. Alimwi kwakamvwugwa jwi kujulu lyakaamba kuti: ‘Ooyu Mwanaangu ngweyandisya, ngwekkomanina.’” (Mt. 3:16, 17) Nokuba kuti Jesu wakali kale kulubazu lwa Bausyi bakujulu, Jehova wakakkomana kubona kulyaaba kwa Mwanaakwe kutegwa acite kuyanda kwakwe cakumaninina. Mbubwenya buyo, Jehova ulakutambula kulyaaba kwesu, alimwi uyootulemeka kwiinda mukutupa cilongezyo.—Int. 149:4. w18.07 23 ¶4-5

Kwiinda mukubelesya bbala lyakuti “tumugwisizye,” Musa ambweni wakali kulyaamba lwakwe mwini alimwi a Aroni. Majwi aayo akatondezya kubula bulemu kuli Jehova, Kasensa kamaleele aayo. Makani aaya aleendelana ancotubala mulugwalo lwa Intembauzyo 106:32, 33: “Bakamunyemya Leza kumaanzi aaku Meriba, eelyo zintu tiizyakamweendela kabotu Musa akaambo kambabo. Bakanyemya moyo wakwe, eelyo wakaamba caambaambe amulomo wakwe.” (My. 27:14) Kufwumbwa naa cakali buti, ncaakacita Musa, tiicakapa bulemu mbwayelede Jehova. Kaambila Musa alimwi a Aroni, Jehova wakati: “Nywebo nyobilo tiimwakatobela malailile aangu.” (My. 20:24) Eeco cakali cibi cipati! Musyule, Jehova wakalibakasyide baluzubo lwa Israyeli boonse kunjila munyika ya Kanana akaambo kakutatobela malailile. (My. 14:26-30, 34) Aboobo cakali kweelela kuli Jehova kumubeteka munzila njiyonya Musa akaambo kakutatobela malailile. Tanaakazumizyigwa kunjila mu Nyika Yakasyomezyedwe. w18.07 14 ¶9, 12; 15 ¶13

Sena inga mwacileka kucita zintu zimwi nzyomuyanda alimwi izitaanyonganyi manjezyeezya aanu pele izinyonganya manjezyeezya aabamwi? Cakutadooneka, inga mwacita oobo. Kabatanaiya kasimpe, bakwesu bamwi bakali kunywa bukoko cakuciindizya, pele lino balikanzide kubutantamuka. Kwaamba masimpe, kunyina naba omwe wesu uunga wayanda kupa kuti bakwesu aaba bapilukile mubukkale oobu ibukonzya kubaletela ntenda mpati! (1Kor. 6:9, 10) Aboobo, inga tiikwaba kutondezya luyando kumuntu iwatamba bantu kusungilizya mukwesu kunywa bukoko ikuti naa walo katayandi kucita boobo. Kulibonya kuti kali mukubusi naa kali amyaka iili kuma 20, mwaalumi Timoteyo wakazumina kupalulwa ikwakali kucisa kapati kutegwa atabalebyi ba Juda mbaakali kuyanda kukambaukila. Zintu wakali kuzibona mbuli mbwaakali kuzibona mwaapostolo Paulo. (Mil. 16:3; 1Kor. 9:19-23) Mbubwenya mbuli Timoteyo, sena mulilibambilide kuliimya zintu zimwi kutegwa mukkomanisye bamwi? w18.06 18-19 ¶12-13

Jehova ulabakwela aabo mbazumizya kuba bamukwasyi wakwe wakumuuya, aabo babombe myoyo ulabaleta mubukombi bwakasimpe. (Joh. 6:44) Nomuswaangana ciindi cakusaanguna amuntu umwi uutali mukasimpe, sena kuli cili coonse ncomuzyi kujatikizya muntu ooyo? Ambweni inga mwazyiba buyo zina lyakwe alimwi akubona buyo mbwalibonya, nkokuti mulazyiba buyo zintu zisyoonto kujatikizya muntu ooyo. Pele tacikonzyi kuba boobo ciindi nomuswaangana amuntu umwi uumuzyi alimwi uumuyanda Jehova. Nokuba kuti muntu ooyo muliindene mbomwakakomezyegwa, muliindene zisi, mwaambo, naa bukkale, inga mwazyiba kale zinji kujatikizya nguwe alimwi awalo ulazyiba zinji kujatikizya ndinywe! Mucikozyanyo, cakufwambaana mulauzyiba “mwaambo” wanu nyoonse, nkokuti “mwaambo uusalala” wakasimpe. Aboobo mulazyiba aumwi nzyasyoma kujatikizya Leza, zyeelelo zyakulilemeka alimwi abulangizi bwakumbele, ikwaamba buyo zisyoonto. Kuyungizya waawo, eezyo nzyezintu ziyandika kapati nzyotweelede kuzyiba kujatikizya muntu umwi, nkokuti zintu zipa kuti kube kusyoma umwi amweenzinyina. Alimwi zipa kuti kube cilongwe cibotu alimwi icitamani. w18.12 21 ¶9-10

Kwiinda mukusololelwa a Kristo, bakabunga keendelezya bakacisalazya kuti Banakristo ibatakali ba Juda tiibakeelede kupalulwa. (Mil. 15:19, 20) Pele kakwiindide myaka minji kuzwa naakakosolwa makani aayo, ba Juda basyomi banji bakazumanana kupalula bana babo. Pele tulakonzya kulibuzya kuti, ‘Nkaambo nzi Jesu ncaakalekela makani aaya kuti atabambwi kwaciindi cilamfwu kakuli lufwu lwakwe lwakaumanizya Mulawo wa Musa?’ (Kol. 2:13, 14) Kubantu bamwi, citola ciindi kutegwa bakuzumine kucinca kwaba mukumvwisya. Ba Juda Banakristo bakali kuyandika ciindi kutegwa bacince mbobakali kuzibona zintu. (Joh. 16:12) Bamwi cakabayumina kuzumina kuti kupalulwa tiicakacili citondezyo cakuba acilongwe cilibedelede a Leza. (Matl. 17:9-12) Bamwi akaambo kakuyoowa kupenzyegwa, bakali kuwaya-waya kupona buumi bwiindene abwaba Judanyina mbobakali kukkala limwi. (Gal. 6:12) Nokuba boobo, mukuya kwaciindi, Kristo wakapa busolozi abumbi kwiinda mumagwalo aakasololelwa amuuya ngaakalemba Paulo.—Rom. 2:28, 29; Gal. 3:23-25. w18.10 24-25 ¶10-12

Kayafa wakatuma basikalumamba masiku kuti bakamujate Jesu. Lino Jesu wakalaazyi makanze aaya aatali kabotu, aboobo naakali kulya cakulya camamanino abaapostolo bakwe, wakabaambila kuti babweze mapanga. Obilo akali manji kutegwa abayiisye ciiyo icakali kuyandika kapati. (Lk. 22:36-38) Masiku ngoonya aayo, Petro wakabelesya panga kulwana umwi muntu wakali munkamu eeyo yakaunka kuyoojata Jesu. Cakutadooneka, kwakamucisa kapati kutalulama ikujatikizya kujata Jesu masiku. (Joh. 18:10) Pele Jesu wakaambila Petro kuti: “Pilusya panga lyako muciyobwedo candilyo, nkaambo boonse aabo babweza panga bayoojaigwa apanga.” (Mt. 26:52, 53) Ciiyo eeci iciyandika kapati cakali kweendelana amajwi ngaakaamba Jesu mumupailo masiku ngoona aayo kuti, tiibakeelede kuba banyika. (Joh. 17:16) Kulwana kutalulama mulimo iwakeelede kusiilwa Leza. Aboobo swebo tulazumanana aluumuno alimwi alukamantano lwesu. Alimwi ciindi Jehova nabona mboyaandaanizyidwe nyika yesu, kweelede kuti cilamukkomanisya kapati kubona lukamantano iluli akati kabantu bakwe.—Zef. 3:17. w18.06 7 ¶13-14, 16

Kuyungizya aakuteya tukole, Saatani ulasola kutukonga kutegwa tucileke kusyomeka kuli Jehova. Mucikozyanyo, ulakonzya kupa kuti mfwulumende zilesye mulimo wesu wakukambauka. Ambweni ulakonzya kupa kuti mbotubeleka limwi naa basicikoloma kabatufwubaazya akaambo kakuti tupona kweelana azyeelelo zyamu Bbaibbele ziluleme. (1Pet. 4:4) Alimwi ulakonzya kuyunga banamukwasyi ibayeeya kuti bajisi mizeezo mibotu ikututyompya kutegwa tucileke kujanika kumiswaangano. (Mt. 10:36) Mbuti mbotukonzya kuliyumya? Cakusaanguna, tweelede kukulangila kupenzyegwa kuli boobu, nkaambo tuli mukulwanwa a Saatani. (Ciy. 2:10) Alimwi tweelede kubona kaambo kapati ikajatikizyidwe mumakani aaya, Saatani ulitaminina kuti swebo tulamubelekela Jehova lilikke buyo kuti zintu kazitweendela kabotu. Waamba kuti, ikuti naa twasunkwa, tulakonzya kumukaka Leza. (Job. 1:9-11; 2:4, 5) Camamanino, tweelede kusyoma Jehova kutegwa atupe nguzu. Alimwi lyoonse katuyeeya kuti, kunyina nayootulekelezya pe.—Heb. 13:5. w18.05 26 ¶14

Nokuba kuti cilibonya mbuli kuti mulumbe wa Bwami ngotukambauka taubasiki aamoyo bantu, tatweelede kuubya-ubya mbuubajatikizya kapati mulimo wesu wakusyanga. Masimpe, nokuba kuti bantu banji tabatuswiilili, pele balatulangilila. Balatubona mbotusama kabotu, mbotulilemeka kabotu alimwi ambotumweta-mweta. Mukuya kwaciindi, bukkale bwesu bulakonzya kubagwasya bamwi kutegwa babone kuti mizeezo njobajisi kujatikizya ndiswe tailuzi pe. Ba Sergio aba Olinda bapainiya bakati: “Kwaciindi cili mbocibede, akaambo kakuciswa, tiitwakali kuunka kucitisyini. Notwakatalika kuunka, basimweenda nzila bakali kubuzya kuti, ‘Ino mwakali kuli? Tiimwakali kulibonya.’” Masimpe, kufwumbwa buyo kuti ‘katutalekeli maanza eesu kulyookezya’ ikusyanga mbuto zya Bwami, tunoojisi lubazu luyandika kapati mukupa “bumboni kumasi oonse.” (Mt. 24:14) Kwiinda zyoonse, tunoojisi lukkomano luboola akaambo kakuzyiba kuti tulakkomaninwa a Jehova, mbwaanga ulabayanda boonse aabo ‘ibazyala micelo cakuliyumya’!—Lk. 8:15. w18.05 16 ¶16-18

Kuzwa ciindi bantu nobakaba acibi alimwi akutalondoka, Jehova watondezya kuti ngu Leza uuyumya-yumya. Kalitanalampa nobakazanga mu Edeni, wakapa baluzubo lwa Adamu kaambo ncobakeelede kuba basicamba. Cisyomezyo cabusinsimi icilembedwe ku Matalikilo 3:15 cakali kuyoopa bantu bulangizi bwakuti mukuya kwaciindi “imuzoka ooyo wakaindi,” Saatani Diabolosi, amilimo yakwe mibi yoonse yakali kuyoonyonyoonwa. (Ciy. 12:9; 1Joh. 3:8) Mubelesi wa Jehova Nowa wakapona munyika bantu mobatakali kumuyanda Leza mwalo balikke ibakali kukomba Jehova bakali bamukwasyi wakwe. Kazingulukidwe ankondo alimwi akutalilemeka mumakani akoonana, Nowa wakali kukonzya kutyompwa. (Matl. 6:4, 5, 9, 11; Jud. 6) Jehova wakaambila Nowa kuti wakali kuyooyinyonyoona nyika mbyaabi eeyo alimwi wakamulailila kujatikizya ncaakeelede kucita kutegwa abone masimpe kuti mukwasyi wakwe ulikwabilidwe. (Matl. 6:13-18) Jehova wakamutondezya Nowa kuti wakali Leza uuyumya-yumya. w18.04 15 ¶1-2

Inga kwaba kulubizya ikuti twayeeya kuti tatukonzyi kukulwaizya bamwi akaambo kakuti tulibaumuzi. Takuyandiki kucita zinji buya kutegwa kamukulwaizya, ambweni inga kwayandika buyo kumweta-mweta ciindi nomwaanzyanya. Ikuti kakunyina kumweta-mweta, cilakonzya kwaamba kuti kuli cilubide, alimwi ikumuswiilila buyo muntu umwi kulakonzya kuletela luumbulizyo. (Jak. 1:19) Toonse tulakonzya kumukulwaizya mukwesu naa mucizyi uuyandika luumbulizyo. Mwami Solomoni wakalemba kuti: “Ijwi lyaambwa aciindi ceelede, eelo kaka ndibotu kapati! Kulangwa amuntu uukkomene kupa moyo kukondwa; mulumbe mubotu upa kuti mafwuwa abe anguzu.” (Tus. 15:23, 30, bupanduluzi buyungizyidwe) Paulo wakatondezya kuti nokuba kwiimbila antoomwe nyimbo zya Bwami kulakonzya kukulwaizya. (Kol. 3:16; Mil. 16:25) Kukulwaizyanya kuyoozumanana kuyandika kapati ciindi notubona buzuba bwa Jehova ‘kabuyaabuswena afwaafwi.’—Heb. 10:25. w18.04 23 ¶16; 24 ¶18-19