August

Noliba leelyo naakali kupenzyegwa, Jesu wakalijisi luumuno lwamumizeezo akaambo kakuti wakalizyi kuti wakali kupa kuti Bausyi bakkomane kwiinda mukuliyumya cakusyomeka. Wakazumanana kumvwida ciindi nocakali kukatazya kucita boobo. Wakali kubayanda Bausyi alimwi kubelekela Jehova cakali cintu ciyandika kapati mubuumi bwakwe. Katanaboola anyika, wakali ‘mubelesi wa Leza uucibwene.’ (Tus. 8:30) Alimwi naakali anyika cabusungu wakayiisya bamwi kujatikizya Bausyi. (Mt. 6:9; Joh. 5:17) Mulimo ooyu wakapa kuti Jesu akkomane kapati. (Joh. 4:34-36) Tulakonzya kumwiiya Jesu kwiinda mukumvwida Jehova alimwi ‘lyoonse atube azintu zinji zyakucita mumulimo wa Mwami.’ (1Kor. 15:58) Ikuti ‘katubelesya ciindi cesu coonse’ mumulimo wakukambauka, tunakwaabona munzila yeelede mapenzi eesu. (Mil. 18:5) Mucikozyanyo, aabo mbotujana mumulimo wesu wakukambauka kanji-kanji balajana mapenzi manji kwiinda ndiswe. Pele ciindi nobaiya kuyanda Jehova alimwi akubelesya lulayo lwakwe, buumi bwabo bulabota alimwi balakkomana. Ciindi notuzibona zintu eezyi kazicitika, tulaba alusyomo lwakuti Jehova uyootulanganya. w19.04 10-11 ¶8-9

Bantu aabo bakacita kufwumbwa ncobakali kukonzya kutegwa bazunde myuuya mibi. Mabbuku aabo aamasalamuzi akali kudula kapati. Pele muciindi cakwaapa bantu naa kwaasambala, bakaanyonyoona. Bakabikkilide maano kukukkomanisya Jehova muciindi cakubikkila maano kumweelwe wamali ngaakali kukonzya kuulwa mabbuku. Mbuti mbotukonzya kwiiya cikozyanyo ca Banakristo bamumwaanda wamyaka wakusaanguna? Inga caba camaano kusowa cintu icili coonse njotujisi iciswaangene amizimo. Eeci cibikkilizya zitumwa, misamu yakulikwabilila, naa zintu zimwi buyo nzyobasama bantu naa nzyobajisi kusola kulikwabilila kumyuuya mibi. (1Kor. 10:21) Amuzilange-lange cakubikkila maano zyakulikondelezya nzyomusala. Amulibuzye kuti, ‘Sena ndilabala mabbuku, mamagazini, naa zibalo izili aa Intaneti izijatikizya mizimo?’ Atube amakanze aakusala zintu iziyootugwasya kutantamuka cintu cili coonse ncasulide Jehova. Tuyanda kusoleka kusikila mpotugolela “kuba amanjezyeezya aasalala kuli Leza akubantu.”—Mil. 24:16. w19.04 22-23 ¶10-12

Kuli twaambo tunji ntobabikkila maano baalu ciindi nobamvwa kuti muntu umwi wacita cibi cipati. Makanze ngobajisi ngakulemeka Jehova alimwi akukwabilila mpuwo yakwe. (Lev. 22:31, 32; Mt. 6:9) Alimwi baalu balabikkila kapati maano kubukkale bwakumuuya bwabakwesu abacizyi mumbungano alimwi bayanda kugwasya uuli woonse iwakatundululwa mumakani aakoonana. Kuyungizya waawo, baalu balasola kulanga-langa naa ooyo iwakacita cibi cipati ulatondezya kweempwa. Ikuti naa ulacita oobo, balamugwasya kubambulula cilongwe cakwe a Jehova. (Jak. 5:14, 15) Munakristo iwazundwa azisusi zibyaabi alimwi akucita cibi cipati mulwazi kumuuya. Eeci citondezya kuti tacijisi cilongwe cibotu a Jehova. Munzila imwi, baalu mbasilisi bakumuuya. Balasolekesya ‘kumuponya ooyo uucisidwe [nkokuti mubukkale oobu, sikubisya ooyo.]’ Lulayo lwabo lwamu Magwalo lulakonzya kumugwasya kubambulula cilongwe cakwe a Leza, pele eeci cilakonzyeka lilikke buyo ikuti weempwa kuzwa ansi aamoyo.—Mil. 3:19; 2Kor. 2:5-10. w19.05 10 ¶10-11

Jehova ulakonzya kupa kuti katukanza kucita zintu. Tulakonzya kumvwa kuti muntu umwi mumbungano yesu uyandika lugwasyo naa kuti kuli mulimo umwi uuyandika kucitwa mumbungano. Eeci cilakonzya kutupa kulibuzya kuti, ‘Ino ncinzi ncondikonzya kucita kutegwa ndikagwasyilizye’? Ambweni tulakonzya kupegwa mulimo uukatazya alimwi tatuzyi naa inga twaubeleka kabotu. Twamana kubala cibalo cimwi camu Bbaibbele, ambweni tulakonzya kulibuzya kuti, ‘Mbuti mbondikonzya kucibelesya cibalo eeci kugwasya bamwi?’ Ciindi Jehova nabona kuti tuleezyeezya kujatikizya ncotukonzya kucita, uyootugwasya kukanza kucita zintu. Kuyungizya waawo, Jehova ulakonzya kutupa nguzu zyakucita zintu. (Is. 40:29) Munzila nzi? Ulakonzya kutupa muuya uusalala kutegwa utugwasye kuzicita kabotu zintu nzyotuzyi kale. (Kul. 35:30-35) Kwiinda mumbunga yakwe, Jehova ulakonzya kutuyiisya mbotukonzya kwiibeleka milimo imwi. Ikuti kamutazyi mbomukonzya kuubeleka mulimo umwi, amulombe lugwasyo. Kunze lyaboobo, amulimvwe kwaanguluka kumulomba Taateesu wakujulu imwaabi kuti amupe “nguzu zigambya iziinda zyabantu.”—2Kor. 4:7; Lk. 11:13. w19.10 21 ¶3-4

Nyika ikulwaizya muuya wakuliyanda. Bbuku limwi lyaamba kuti mumyaka yakuma 1970 “mabbuku aapa lulayo kujatikizya kuzwidilila mubuumi akavwula kapati.” Mabbuku aambi akati kamabbuku aaya aamba kuti muntu tayelede kucinca cili coonse kujatikizya nguwe naa kuyeeya kuti kuli cintu cili coonse cilubide kweelana ambwabede. Mucikozyanyo, kaambo kamwi ikakaambwa mubbuku limwi nkakuti: ‘Koliyanda nkaambo nduwe wiinda kubota alimwi ulakkomanisya kapati kwiinda muntu uuli woonse.’ Bbuku eeli lyaamba kuti muntu weelede kulisalila mbwayelede kulilemeka, akucita kufwumbwa ncabona kuti cililuzi alimwi cilagwasya. Sena kuli nomwakacimvwide kale cili boobu? Saatani wakakulwaizya Eva kucita cintu cikozyenye aceeci. Wakaamba kuti Eva wakali ‘kuyooba mbuli Leza, kuyoozyiba bubotu abubi.’ (Matl. 3:5) Mazuba aano, bantu banji balaliyanda kapati cakuti balimvwa kuti kunyina uukonzya kubaambila ciluzi acitaluzi, naba Leza buya. Mucikozyanyo, eeci calibonya caantangalala kujatikizya bantu mbobalubona lukwatano. w19.05 23 ¶10-11

Zimwi ziindi, Mwami Davida wakali kulimvwa bubi akaambo kakutyompwa. Amuyeeye buyo kujatikizya mapenzi ngaakajana. Manjezyeezya aakwe akali kumukatazya akaambo kazibi zinji nzyaakacitide. (Int. 40:12) Mwanaakwe ngwaakali kuyanda kapati Abisalomu wakamuzangila, mpoonya kumamanino Abisalomu wakajaigwa. (2Sam. 15:13, 14; 18:33) Mulongwe wakwe umwi wakamwaaba Davida. (2Sam. 16:23–17:2; Int. 55:12-14) Intembauzyo zinji nzyaakalemba Davida zilatondezya mbwaakatyompedwe alimwi alusyomo luyumu ndwaakajisi muli Jehova. (Int. 38:5-10; 94:17-19) Mukuya kwaciindi sintembauzyo umwi wakatalika kunyonokela buumi mbobakali kupona bantu babi. Kweelede kuti wakali waluzubo lwa Asafu mu Levi alimwi wakali kubelekela “mucikombelo ca Leza cipati.” Sintembauzyo ooyu wakapenga kapati mumizeezo, calo cakapa kuti atakkomani alimwi akukkutila. Mane buya wakatalika kuzidooneka zilongezyo ziboola akaambo kakubelekela Leza.—Int. 73:2-5, 7, 12-14, 16, 17, 21. w19.06 17 ¶12-13

Saatani ubelesya zintu nzyotuyandisya kapati. Toonse tulayanda kuba aluzyibo muzintu zimwi kutegwa katucikonzya kujana nzyotuyandika alimwi anzyobayandika banamukwasyi. (1Tim. 5:8) Kanji-kanji, luzyibo oolo tulalujana kwiinda mukuunka kucikolo alimwi akuba basungu kubala. Pele tweelede kucenjela. Muzisi zinji, basicikolo tabayiisyigwi buyo zintu zigwasya, pele balayiisyigwa abusongo bwamunyika. Mucikozyanyo, basicikolo bakulwaizyigwa kudooneka kuti naa Leza nkwali alimwi akutalemeka Bbaibbele. Baambilwa kuti bantu boonse basongo basyoma kuti buumi bwakatalika kwiinda mukusanduka. (Rom. 1:21-23) Njiisyo zili boobu tazyeendelani ‘abusongo bwa Leza.’ (1Kor. 1:19-21; 3:18-20) Amube amakanze aakutazumina kucegwa “kwiinda mubusongo bwabantu alweeno” lwamunyika ya Saatani. (Kol. 2:8) Amuzumanane kuzicenjelela nzila nzyabelesya Saatani kweena bantu. (1Kor. 3:18) Mutamuzumizyi kunyonganya mizeezo yanu kujatikizya mbomumubona Jehova. Amupone kweelana azyeelelo zya Jehova zyakulilemeka izisumpukide. Kuyungizya waawo, mutalekeli Saatani kumuyunga kutabikkila maano kululayo lwa Jehova. w19.06 5 ¶13; 7 ¶17

Kufwumbwa makani ngomuyanda kuyoobandika, amuyeeye kujatikizya bantu ibayakwaakkomanina. Amweezeezye kujatikizya mbobayoogwasyigwa kuti bazyiba cini Bbaibbele ncoliyiisya. Ciindi nomubandika ambabo, inga cabota kubaswiilila alimwi akwiilemeka mizeezo yabo. Ikuti mwacita oobo, muyoozizyiba nzyobayeeya, mpoonya abalo bayoomuswiilila. Muntu uumwi katanasala kutalika kwiiya Bbaibbele, mweelede kupilukila ziindi zinji. Nkaambo nzi? Nkaambo kakuti ambweni tatukonzyi kubajana bantu ciindi notwapilukila. Kuyungizya waawo, inga mwayandika kupilukila ziindi zinji mukamwiniŋanda katanaanguluka kwiiya Bbaibbele. Amuyeeye kuti, cisyango cilakomena kabotu ikuti kacitilailwa lyoonse. Mbubwenya buyo, luyando ndwajisi muntu kuli Jehova alimwi a Kristo lulakonzya kukomena ciindi notubandika kujatikizya Jwi lya Leza anguwe lyoonse. w19.07 14 ¶1; 15-16 ¶7-8

Ncinzi Jesu ncaakali kupandulula? Jesu tanaakali kwaamba kuti Banakristo bakali kuyookukkomanina kusulaikwa. Muciindi caboobo, wakali kutucenjezya kujatikizya icakali kuyootucitikila. Swebo tatuli banyika. Tupona kweelana anjiisyo zya Jesu alimwi akukambauka mulumbe ngwaakali kukambauka. Akaambo kaceeci, nyika ilitusulide. (Joh. 15:18-21) Pele swebo tuyanda kukkomanisya Jehova. Aboobo ikuti naa bantu kabatusulaika akaambo kakuti tulamuyanda Taateesu, nciindi cabo. Tatweelede kuyeeya kuti tunyina mpindu ikuti naa bantu kabatatuyandi. Tatuzyi ciindi bantu nobayootalika kutupenzya naa ciindi mfwulumende noziyakuulesya mulimo wesu. Nokuba boobo, tulizyi kuti tulakonzya kulibambila lino kwiinda mukuyumya cilongwe cesu a Jehova, kuba basicamba alimwi akubona ncotweelede kucita ciindi bantu nobatusulaika. Kuti twalibambila lino, ciyootugwasya kuzumanana kumubelekela Jehova kumbele. w19.07 6 ¶17-18; 7 ¶21

Ciindi notusololela ziiyo zya Bbaibbele kubantu ibakakomenena mumukwasyi mobatakali kukomba, lyoonse tweelede kubagwasya kuyumya lusyomo lwabo lwakuti Leza nkwali. Kuyungizya waawo, tweelede kubagwasya kulisyoma Bbaibbele. Kucita boobo inga kwayandika kuti katutwiinduluka twaambo tumwi ziindi zinji. Lyoonse notwiiya ambabo, ambweni inga kwayandika kubandika bumboni ibutondezya kuti Bbaibbele ndi Jwi lya Leza kwiinda mukubapandulwida mubufwaafwi kujatikizya businsimi bwamu Bbaibbele ibwakazuzikizyigwa kale, mboliluzi Bbaibbele nolyaamba makani aakaindi alimwi aasayaansi, naa mbolitugwasya Bbaibbele mubukkale bwesu bwabuzuba abuzuba. Tulabagwasya bantu kuba basikwiiya ba Kristo kwiinda mukutondezya luyando kulimbabo, tacikwe makani mbakombi naa pe. (1Kor. 13:1) Ciindi notubayiisya, makanze eesu ngakubatondezya kuti Leza ulabayanda alimwi uyanda kuti abalo kabamuyanda. Mwaka amwaka, bantu banji ibakajisi luyandisyo lusyoonto buyo naa aabo ibatakajisi luyandisyo luli loonse mumakani aabukombi, balabbapatizyigwa akaambo kakuti bakaiya kumuyanda Leza. Aboobo amuzibone munzila yeelede zintu alimwi akubabikkila maano bantu bamisyobo yoonse. Amubaswiilile. Amusoleke kubamvwisya. Kwiinda mucikozyanyo canu, amubayiisye kuba basikwiiya ba Kristo. w19.07 24 ¶16-17

Bana basimbi ba Salumu bakali akati kabaabo Jehova mbaakabelesya kutola lubazu mukuyakulula bwaanda bwa Jerusalemu. (Neh. 2:20; 3:12) Nokuba kuti bausyi bakali basilutwe, bana basimbi ba Salumu bakalilibambilide kuubeleka mulimo ooyo iwakali kukatazya alimwi iwakali kubikka buumi muntenda. (Neh. 4:15-18) Mbubwenya buyo amazuba aano, bacizyi ibalisungwide balakkomana kubeleka milimo yaalubazu iisetekene, mbuli kuyaka alimwi akubambulula mayake aabidwe kuli Jehova. Luzyibo lwabo, busungu alimwi akusyomeka zilayandika kapati kutegwa mulimo ooyu uzwidilile. Jehova wakapa Tabita “kucitila bamwi milimo mibotu minji alimwi akupa zipego zyaluse,” kwaambisya bamukabafwu. (Mil. 9:36) Akaambo kabwaabi bwakwe alimwi aluse, banji bakamulila naakafwa. Pele bakakkomana kapati ciindi mwaapostolo Petro naakamubusya. (Mil. 9:39-41) Ino ncinzi ncotwiiya kuli Tabita? Kufwumbwa naa tuli bana naa bapati, baalumi naa bakaintu, tulakonzya kubelesyegwa a Jehova kugwasya bakwesu abacizyi. w19.10 23 ¶11-12

Mbuti mbotukonzya kulebya muntu? Amweezeezye bukkale oobu: Sikwiiya Bbaibbele umwi wacikonzya kuleka kunywa bukoko cakuciindizya. Wayeeya kuti weelede kulekela limwi kunywa bukoko alimwi akubbapatizyigwa. Mpoonya Munakristo uusimide wamutamba kupobwe akumupa bukoko. Wamwaambila kuti: “Ikuti kolilesya, ulakonzya kunywa aasyoonto.” Eelo kaka inga causisya kapati kuti mukwesu mupya waluswiilila lulayo oolu lubyaabi alimwi akuba cakolwa alimwi! Miswaangano yesu ya Bunakristo ilatugwasya kwaatobela malailile ngotupedwe mulugwalo lwabuzuba bwasunu. Ilatuyeezya zintu Jehova nzyabona kuti zilayandika kapati alimwi ambotukonzya kuzibelesya zintu nzyotwiiya kutegwa tutabi amulandu uuli woonse. Alimwi miswaangano, ilatukulwaizya kuyanda Leza alimwi abakwesu. Ciindi notumuyanda Leza alimwi abakwesu kuzwa ansi aamoyo, tuyoosolekesya kutabalebya bakwesu. w19.08 10 ¶9; 11 ¶13-14

Bantu bamwi balibonya kuti balalisyoma alimwi baamba cakutainda mumbali kufwumbwa mbobalimvwa alimwi ambobayeeya, pele eeci tacaambi kuti balalisumpula. (Joh. 1:46, 47) Pele, kufwumbwa naa tulijisi nsoni naa pe, toonse tweelede kusolekesya kuba bantu balicesya ncobeni. Amubone cikozyanyo camwaapostolo Paulo. Jehova wakamubelesya kapati kutalisya mbungano zipya muminzi minji. Weelede kuti wakacita zinji mumulimo wakukambauka kwiinda baapostolo ba Jesu Kristo boonse. Nokuba boobo, Paulo kunyina naakalisumpula akati ka Banakristonyina. Cakweelela Paulo wakaamba kuti wakajisi cilongwe cibotu a Jehova akaambo buyo kakuti Jehova wakamutondezya luzyalo lwakwe, ikutali akaambo kakuti Paulo wakali muntu uulibedelede naa wakacita zintu zinji. (1Kor. 15:10) Eelo kaka Paulo wakatondezya cikozyanyo cibotu kapati kujatikizya kulicesya mulugwalo lwakwe kubana Korinto, ikapati twayeeya kuti bantu bamwi mumbungano bakali kuyanda kulitondezya kuti bakalisumpukide kwiinda nguwe!—2Kor. 10:10. w19.09 3 ¶5-6

Kaambo kamwi ncocikonzya kutukatazya kulibombya kuli Jehova nkakuti toonse twakakona cibi alimwi tatulondokede. Aboobo tujisi tumpenda twabuzangi. Ciindi ba Adamu a Eva nobatakamumvwida Leza kwiinda mukulya mucelo, bakalisalila beni cibotu alimwi acibi. (Matl. 3:22) Mazuba aano, bantu banji basala kutamvwida Jehova alimwi akulisalila cibotu acibi. Nobaba baabo ibamuzyi Jehova alimwi ibamuyanda cilakonzya kubakatazya kulibombya cakumaninina kulinguwe. Mwaapostolo Paulo wakajana buyumuyumu mbubwenya oobu. (Rom. 7:21-23) Mbubwenya mbuli Paulo, tuyanda kucita zintu ziluzi mumeso aa Jehova. Pele lyoonse tweelede kulwana kampenda kakuyanda kucita zintu zibyaabi. Kaambo akamwi ncocikonzya kukatazya kulibombya kuli Jehova nkakuti tulayungwa azilengwa alimwi amizeezo yabantu bakubusena nkotwakakomenena. Bantu banji balakonzya kutwaambila zintu ziindene anzyayanda Jehova. Aboobo tweelede kusolekesya kutaba aamizeezo njobajisi bantu aaba. w19.09 15 ¶4-6

Tweelede kuzilanga munzila yeelede zintu. Aumwi nguzu nzyajisi kuli mpozigolela. Aboobo tweelede kubikkila maano kujatikizya zintu nzyotucita. Mucikozyanyo, tulakonzya kunyonyoona nguzu zyesu kujana lubono. Amubone Jesu ncaakamwaambila mulombwana muvwubi iwakamubuzya kuti: “Ino ncinzi ncondeelede kucita kutegwa ndikajane buumi butamani?” Mulombwana ooyu wakali kuutobela Mulawo. Weelede kuti wakali muntu uuli kabotu akaambo kakuti Makani Mabotu aa Marko cacigaminina aamba kuti Jesu ‘wakamuyanda.’ Jesu wakatamba muleli mulombwana ooyu kwiinda mukumwaambila majwi aali atala aawa. Mulombwana ooyu wakausa, pele kulibonya kuti wakaalilwa kusiya “lubono lunji” ndwaakajisi. (Mk. 10:17-22) Aboobo mulombwana ooyu wakalikaka joko eelyo Jesu ndyaakamupa alimwi wakazumanana kubelekela “Lubono.” (Mt. 6:24) Ino nywebo nomwakasala nzi? Ciindi aciindi, cilayandika kuyeeya kujatikizya zintu nzyotubikka mubusena bwakusaanguna mubuumi bwesu. Nkaambo nzi? Kutegwa tube masimpe kuti nguzu zyesu tuzibelesya cabusongo. w19.09 24 ¶17-18

Mulimo wesu wakwaambilizya Bwami uyoozumanana kusikila mane Jehova akaambe kuti kwamana. Ncinji buti ciindi casyaala kuti bantu bamuzyibe Jehova Leza alimwi a Jesu Kristo? (Joh. 17:3) Tatuzyi pe. Pele ncotuzyi ncakuti kusikila mapenzi mapati akatalike, kufwumbwa ooyo ‘uulibambilide kutambula buumi butamani’ ulakonzya kuuzumina mulumbe wamakani mabotu alimwi akusala kubelekela Jehova. (Mil. 13:48) Mbuti mbotukonzya kubagwasya bantu aaba ciindi nocitanamana? Kwiinda mumbunga yakwe, Jehova ulatupa zyoonse nzyotuyandika kutegwa tuyiisye bantu kasimpe. Mucikozyanyo, nsondo ansondo tulatambula lwiiyo kumuswaangano wamukati kansondo. Muswaangano ooyu ulatugwasya kuzyiba ncotweelede kwaamba munyendo zyakusaanguna alimwi amunyendo zyakupilukila. Alimwi ikuti naa nomwamana kuba amubandi uukulwaizya amuntu uujisi luyandisisyo, mwamupa katulakiti naa magazini, ulakonzya kuzumanana kubala kusikila mukamuswaye alimwi. Mukuli wesu kutugama kujata bubi kukambauka kusikila mpotugolela mwezi amwezi. w19.10 9 ¶7; 10 ¶9-10

Jehova wakasyomezya Simeoni, imwaalumi uucembeede alimwi uusyomeka iwakali kukkala mu Jerusalemu, kuti tanaakali kuyoofwa katanamubona Mesiya. Kweelede kuti cisyomezyo eeco cakamukulwaizya kapati Simeoni, mbwaanga wakali kulindila Mesiya kwamyaka minji. Jehova wakamulumbula Simeoni akaambo kalusyomo lwakwe alimwi akuliyumya. Bumwi buzuba, “kasololelwa amuuya,” wakanjila mutempele. Omuya wakabona mwana muvwanda Jesu, alimwi Jehova wakamubelesya Simeoni kusinsima kujatikizya mwana ooyu iwakali kuyooba Kristo. (Lk. 2:25-35) Nokuba kuti Simeoni ulangilwa kuti wakafwa Jesu katanatalika mulimo wakwe, wakalumba kapati kuti Jehova wakamubelesya munzila eeyi. Alimwi uyookkomana azintu zinji zibotu kumbele. Munyika mpya, mwaalumi ooyu uusyomeka uyoolibonena zilongezyo nzyobuyooleta bulelo bwa Jesu kumikwasyi yoonse anyika. (Matl. 22:18) Andiswe tulakonzya kukkomana akaambo kacoolwe cili coonse ncatupede Jehova mumulimo wakwe. w19.10 22 ¶7; 23 ¶12

Kufwumbwa naa tulijisi zintu zinji zyakumubili naa pe, tweelede kuukwabilila moyo wesu. Mbuti mbotukonzya kucita oobo? Mutabi aamuuya wakuyandisisya mali. Kuyungizya waawo, mutalekeli mulimo wanu wakumubili kuba mubusena bwakusaanguna muciindi camulimo wanu kuli Jehova. Mbuti mbomukonzya kuzyiba kuti naa muli mubukkale buli boobu? Njeeyi mibuzyo imwi njomukonzya kulibuzya: ‘Sena kanji-kanji ndiyeeya buyo mulimo wangu wakumubili ciindi nondili kumiswaangano naa mumulimo wamumuunda? Sena lyoonse ndilalibilika ikuti naa ndilijisi mali manji aayoondigwasya kumbele? Sena makani aamali alimwi alubono zileta mapenzi mulukwatano lwesu? Sena inga ndabeleka mulimo wakumubili ooyo bamwi ngobabona kuti ngwaansi kapati kufwumbwa buyo kuti kaundipa ciindi cinji cakubelekela Jehova?’ (1Tim. 6:9-12) Ciindi notulanga-langa mibuzyo eeyi, atuyeeye kuti Jehova ulatuyanda alimwi upa cisyomezyo eeci kuli baabo ibalyaabide kulinguwe: “Ziyume zitete, tandikakusiyi pe alimwi tandikakulekelezyi pe.” Nkakaambo kaako mwaapostolo Paulo ncaakalembela kuti: “Ibukkale bwanu butabi bwakuyandisya mali pe.”—Heb. 13:5, 6. w19.10 29 ¶10

Kuti twabeleka antoomwe abasyomima akulibonena bube bubotu mbobajisi, tulabaiya, aboobo cilongwe cesu ambabo cilayuma. Mucikozyanyo, ino mulimvwa buti ciindi nomuli mumulimo wakukambauka, mpoonya mwamvwa mulongwe wanu kaamba cabusicamba kujatikizya lusyomo lwakwe, naa kaamba kuzwa ansi aamoyo nzyasyoma kujatikizya Jehova alimwi amakanze aakwe? Cakutadooneka, cilongwe canu amuntu ooyo cilayuma kapati. Adeline, mucizyi uujisi myaka iili 23, wakalomba mulongwe wakwe Candice kuti kabaunka kuyookambaukila mucilawo mutavwuli kukambaukilwa. Adeline wakati: “Twakali kuyanda kukambauka cabusungu alimwi akuyungizya lukkomano lwesu mumulimo wakukambauka. Toonse twakali kuyandika kukulwaizyigwa kutegwa tuzumanane kupa Jehova zintu ziinda kubota.” Mbuti mbobakagwasyigwa kwiinda mukubeleka antoomwe? Adeline wakaamba kuti: “Kumamanino aabuzuba bumwi abumwi, twakali kubandika mbotwakali kulimvwa, icakali kutukulwaizya kapati mumibandi njotwakali kuba anjiyo abantu alimwi ambotwakali kububona busolozi bwa Jehova mumulimo wesu. Toonse twakaikkomanina mibandi eeyi alimwi twakazyibana kabotu.” w19.11 5 ¶10-11

Kaindi, sikalumamba wakali kufwa nsoni ikuti wapiluka kuŋanda katajisi ntobo. Syaazibwene mumakani aakaindi muna Roma wazina lyakuti Tacitus wakalemba kuti: “Ikuti sikalumamba waisiya ntobo yakwe kunkondo, akali masampu aataambiki.” Nkakaambo kaako basikalumamba bakali kubikkila maano kuzijatisya kapati ntobo zyabo. Tulazumanana kwiijatisya ntobo yalusyomo lwesu kwiinda mukujanika lyoonse kumiswaangano ya Bunakristo alimwi akwaambilizya zina lya Jehova a Bwami bwakwe kubantu. (Heb. 10:23-25) Kuyungizya waawo, tulapaila akubala Jwi lya Leza buzuba abuzuba alimwi akulutobela lulayo abusolozi ibujanika mulindilyo muzintu zyoonse nzyotucita. (2Tim. 3:16, 17) Twacita boobo, kunyina cilwanyo cili coonse ncakonzya kubelesya Saatani kulindiswe icikonzya kutunyonyweeda limwi. (Is. 54:17) “Ntobo mpati yalusyomo” lwesu iyootukwabilila. Tuyakwiima nji alimwi akubeleka calukamantano antoomwe abakwesu abacizyi. Tuyoozunda munkondo njotulwana buzuba abuzuba kutegwa lusyomo lwesu luzumanane kuyuma. Mpoonya kwiinda zyoonse, tuyooba acoolwe cakuba kulubazu lwa Jesu ciindi aakumuzunda Saatani alimwi abasikumutobela.—Ciy. 17:14; 20:10. w19.11 19 ¶18-19

Ikuti mwazilemba zintu nzyomuyanda kucita, inga camuubila kuzicita. (1Kor. 14:40) Mucikozyanyo, kabunga kabaalu kalaililwa kusala mwaalu omwe kulemba zintu zyoonse nzyobasala kucita, mpoonya akusala baabo ibeelede kuzicita zintu eezyo nzyobasala alimwi anobeelede kumanizya kuzicita. Ikuti baalu bapanga mulongo uuli boobu, cilakonzya kubaubila kucita kweelana ancobakasala. Andinywe mulakonzya kusola kucita mbubwenya oobu muzintu nzyomucita mubuumi bwanu buzuba abuzuba. Mucikozyanyo, mulakonzya kulemba mulongo wazintu nzyomuyanda kucita buzuba bumwi abumwi alimwi akuzilemba kweelana ambomuyanda kuti zicitwe. Ikuti mwacita oobo, cilakonzya kumuubila kumanizya mulimo ngomwatalika kucita alimwi buya akucita zintu zinji muciindi buyo cisyoonto. Pele muyandika kubeleka canguzu. Kuyandika kubeleka canguzu kutegwa muutobele mulongo wanu akuumanizya mulimo ngomwakatalika. (Rom. 12:11) Mwaapostolo Paulo wakaambila Timoteyo kuti ‘azumanane kulitakata’ alimwi ‘akukakatila’ kutegwa abe mwiiyi mubotu. Lulayo oolu lulabeleka akumbaakani zimwi zyakumuuya nzyotusala.—1Tim. 4:13, 16. w19.11 29-30 ¶15-16

Ciindi Jehova naakaambila Musa kusololela bana Israyeli kuzwa mubuzike ku Egepita, Musa wakali kulitenga alimwi cakwiinduluka-induluka wakaambila Jehova kuti wakali kulimvwa kuti teeleli. Leza wakamwiingula caluzyalo Musa, alimwi wakamugwasya. (Kul. 4:10-16) Aboobo Musa wakacikonzya kwaamba milumbe yanguzu iijatikizya lubeta kuli Farao. Mpoonya Musa wakabona Jehova kabelesya nguzu zyakwe ciindi naakafwutula bana Israyeli akunyonyoona Farao alimwi abasikalumamba bakwe mu Lwizi Lusalala. (Kul. 14:26-31; Int. 136:15) Ciindi Musa naakamana kubasololela bana Israyeli kuzwa mu Egepita, ziindi zinji bakali kujana twaambo twakutongooka. Nokuba boobo, Musa wakakubona kukkazika moyo kwa Jehova ciindi naakali kweendelezya bantu mbaakaangununa mubuzike. (Int. 78:40-43) Alimwi Musa wakabona Jehova katondezya kulicesya kapati akutabanyonyoona bana Israyeli ciindi Musa naakamana kumulomba kuti ataciti oobo. (Kul. 32:9-14) Ciindi bana Israyeli nobakazwa mu Egepita, cilongwe ca Musa a Jehova cakayuma kapati cakuti cakali mbuli kuti wakali kumubona Usyi wakujulu.—Heb. 11:27. w19.12 17 ¶7-9

Basikwiiya ba Jesu banji bakali bana Galilaya. Aboobo cakali cuuba-uba kuba amuswaangano abantu banji kucilundu ku Galilaya ikutali muŋanda yamuntu ku Jerusalemu. Alimwi, Jesu iwakabusyigwa wakaliswaangene kale abaapostolo bakwe ibali 11 muŋanda ku Jerusalemu. Ikuti Jesu naakali kuyanda kupa malailile aajatikizya kukambauka alimwi akugwasya bantu kuba basikwiiya kubaapostolo balikke, naakacita oobo ku Jerusalemu muciindi cakubalomba balo, bamakaintu aabo alimwi abantu bambi buyo kuti bakaswaangane anguwe ku Galilaya. (Lk. 24:33, 36) Mulawo wa Jesu wakugwasya bantu kuba basikwiiya tiiwakapegwa buyo ku Banakristo ibakali kupona mumwaanda wamyaka wakusaanguna. Ino tuzyi buti oobo? Jesu wakamanizya kupa malailile kuli basikumutobela kwiinda mukwaamba majwi aakuti: “Ndilaandinywe mazuba oonse mane kusikila kumamanino aabweende bwazintu.” (Mt. 28:19, 20) Mazuba aano bali mukutola lubazu mumulimo wakugwasya bantu kuba basikwiiya. Amuciyeeyele buyo! Bantu batandila ku 300,000 mwaka amwaka balabbapatizyigwa kuba Bakamboni ba Jehova alimwi akuba basikwiiya ba Jesu Kristo. w20.01 2 ¶1; 3 ¶5-6

Mucili mwana-mwana pele mwajanwa abulwazi bupati. Muyaabucembaala alimwi mwaalilwa kujana mulimo uumbi. Akaambo kakucembaala, tamucibeleki mbuli mbomwakali kubeleka musyule mumulimo wa Jehova. Ikuti naa andinywe muli mubukkale oobu, ambweni mulakonzya kulimvwa kuti tamuciyandiki. Bukkale oobu bulakonzya kumumanina lukkomano, kumupa kulimvwa kuti munyina mpindu, alimwi akumupa kutaanguluka kuba azilongwe abamwi. Nyika eeyi itondezya mbwabubona buumi bwabantu Saatani. Lyoonse ubona mbuli kuti bantu banyina mpindu. Nokuba kuti Saatani wakalizyi kabotu-kabotu kuti kutamvwida Leza kwakali kuyoosololela kulufwu, calunya wakaambila Eva kuti wakali kuyooba alwaanguluko ikuti wasala kutamvwida Leza. Saatani ngonguwe weendelezya nyika eeyi. Aboobo tacigambyi kuti basololi banji batondezya muuya ngwajisi wakutalemeka buumi bwabantu. Nokuba boobo, mukwiimpana a Saatani, Jehova uyanda kuti tuzyibe kuti tulayandika kapati, alimwi ulatugwasya ciindi notulijana mubukkale ibukonzya kutupa kulimvwa kubula mpindu.—Rom. 12:3. w20.01 14 ¶1-4

Kwamyaka yiinda ku 40, Jeremiya wakali kukkala akati kabantu batasyomeki, nkokuti basimukobonyina ambweni abanamukwasyi bamwi mumunzi wa Anatoti. (Jer. 12:6) Nokuba boobo, kunyina naakalizandula pe. Mane buya, wakaamba mbwaakali kulimvwa kumulembi wakwe uusyomeka Baruki alimwi akulindiswe. (Jer. 8:21; 9:1; 20:14-18; 45:1) Baruki a Jeremiya bakaiya kuyandana alimwi akulemekana kapati, eelyo Baruki wakazilemba zyoonse izyakamucitikila Jeremiya. (Jer. 20:1, 2; 26:7-11) Kwamyaka minji, cabusicamba Jeremiya wakabacenjezya bana Israyeli kujatikizya icakali kuyoocitikila Jerusalemu. (Jer. 25:3) Jehova naakasola alimwi kukulwaizya bantu kuti beempwe, wakaambila Jeremiya kulemba milumbe yakwe yakucenjezya mubbuku lyakuvwunga. (Jer. 36:1-4) Ciindi Jeremiya a Baruki nobakali kubeleka antoomwe mumulimo ooyu ngobakapegwa a Leza uulangilwa kuti wakatola myezi minji, tacidoonekwi buya kuti bakajisi mibandi iyakayumya lusyomo lwabo. w19.11 2-3 ¶3-4

Ino tweelede kubabona buti bakwesu alimwi abacizyi bananike? Inga tiicaba kabotu kuyandisya muntu nokuba kuti mwanookwabo Kristo uunanikidwe. (Mt. 23:8-11) Ciindi Bbaibbele nolyaamba kujatikizya baalu, litukulwaizya “kwiiya lusyomo lwabo,” pele talitwaambili kubona muntu uuli woonse kuti musololi wesu. (Heb. 13:7) Masimpe kuti Bbaibbele lyaamba kuti bamwi “baleelela kupegwa bulemu kapati.” Tweelede kucita oobo akaambo kakuti “beendelezya kabotu” alimwi ‘balabeleka canguzu mukukanana akuyiisya,’ ikutali akaambo kakuti mbananike. (1Tim. 5:17) Ikuti twaciindizya kubalumbaizya alimwi akubabikkila maano kapati bananike, inga twabapa kumvwa nsoni. Ciinda kubija ncakuti, ambweni inga twapa kuti batalike kulisumpula. (Rom. 12:3) Kunyina uunga wayanda kuti acite cintu cili coonse icikonzya kupa umwi wabanabokwabo Kristo kuti alubizye munzila eeyi!—Lk. 17:2. w20.01 29 ¶8

Mwaapostolo Paulo wakalijisi twaambo tunji itwakamupa kulibilika. Mapenzi aabakwesu abacizyi, akamupa kulibilika kapati. (2Kor. 2:4) Basikumukazya bakamuuma alimwi akumubikka muntolongo. Kunze lyaboobo, wakaliyumya kumapenzi aambi mbuli “kubulilwa zyakulya.” (Flp. 4:12) Alimwi akaambo kakuti ziindi zyotatwe bwato mbwaakatantide bwakanyonyooka, kweelede kuti Paulo wakalibilika kapati. (2Kor. 11:23-27) Ino ncinzi cakamugwasya kuliyumya Paulo ciindi naakalibilikide? Nokuba kuti Paulo wakali kulibilika kapati akaambo kamapenzi ngobakajisi bakwesu alimwi abacizyi, kunyina naakasola kwaalwana mapenzi aayo alikke. Paulo wakali kulibombya. Aboobo wakabikka bubambe bwakuti bamwi bamugwasyilizye kulanganya mbungano mbuli Timoteyo a Tito balo ibakali kusyomeka. Cakutadooneka, eeci cakacesya kulibilika kwa Paulo.—Flp. 2:19, 20; Tit. 1:1, 4, 5. w20.02 23 ¶11-12

Jehova uyanda kuti andiswe katumumvwida. Cileelela kuti katumumvwida nkaambo Mulengi wesu, Nguutupa buumi alimwi muzyali iwiinda kubota. Nokuba boobo, kaambo kapati ikatupa kumumvwida Jehova nkakuti tulamuyanda. (1Joh. 5:3) Nokuba kuti kuli twaambo tunji itweelede kutupa kumumvwida Jehova, walo kunyina natusinikizya kuti katumumvwida. Wakatupa nguzu zyakulisalila, aboobo ciindi notusala kumumvwida akaambo kakuti tulamuyanda, ulakkomana. Bazyali bayanda kuti bana babo kabakwabilidwe. Nkakaambo kaako balabikka milawo iikwabilila. Ciindi bana nobaitobela milawo eeyo, batondezya kuti balabasyoma alimwi akubalemeka bazyali babo. Aboobo cilayandika kapati kwiizyiba milawo njatupede Taateesu wakujulu alimwi akwiitobela. Ciindi notucita boobo, tutondezya kuti tulamuyanda akumulemeka Jehova alimwi tulagwasyigwa. (Is. 48:17, 18) Mukwiimpana, aabo ibamukaka Jehova alimwi ibatatobeli milawo yakwe balapenga.—Gal. 6:7, 8. w20.02 9-10 ¶8-9

Mbubwenya mbuli Abigayeli, tweelede kuba abusicamba bwakwaambaula ikuti twabona muntu umwi kacita cintu icikonzya kumupa kucita cibi cipati. (Int. 141:5) Tweelede kutondezya bulemu, pele alimwi tweelede kuba basicamba. Ikuti caluyando twamupa muntu lulayo ndwayandika, tutondezya kuti tuli balongwe beni-beni. (Tus. 27:17) Cilayandika kapati, kwaambisya kubaalu ikuba abusicamba bwakwaambaula kuli baabo ibaleya mumbungano. (Gal. 6:1) Cakulicesya baalu balayeeya kuti abalo tabalondokede alimwi akuti bumwi buzuba abalo bayooyandika kupegwa lulayo. Pele kuyeeya kuli boobo takubalesyi kubasinsa aabo ibayandika kululamikwa. (2Tim. 4:2; Tit. 1:9) Ciindi nobapa muntu lulayo, baalu balasoleka kucibelesya kabotu cipego cabo cakwaambaula kutegwa bamuyiisye kabotu alimwi akumukkazikila moyo. Balamuyanda muntu ooyo, aboobo luyando oolo ndolubakulwaizya kuti bamugwasye. (Tus. 13:24) Pele ncobabikkila kapati maano, nkulemeka Jehova kwiinda mukutobela zyeelelo zyakwe alimwi akukwabilila mbungano kuntenda.—Mil. 20:28. w20.03 20 ¶8-9

Jehova wakapa Musa kuba mufwutuli wabana Israyeli. Pele ino ndiilili Jehova naakacita boobo? Sena ndileelyo Musa naakalimvwa kuti uleelela akaambo kakuti “wakayiisyigwa busongo boonse bwabana Egepita”? (Mil. 7:22-25) Peepe, wakamubelesya ciindi naakamana kumuyiisya kuba muntu uulicesya alimwi mubombe moyo. (Mil. 7:30, 34-36) Jehova wakapa Musa busicamba bwakwaambaula kumbele lyamweendelezi mupati mu Egepita. (Kul. 9:13-19) Ino ncinzi ncotukonzya kwiiya munzila Jehova mbwaakamubelesya Musa alimwi aciindi naakacita boobo? Jehova ulababelesya aabo batondezya bube mbwajisi alimwi ibasyoma nguwe kuti abagwasye. Kuzwa kaindi, Jehova wali kupa babelesi bakwe kuti bazuzikizye milimo yiindene-indene. Ino Jehova uyoomupa kuti mube buti? Zyoonse ziyeeme aambomulyaabide kubeleka canguzu. (Kol. 1:29) Ikuti mwalyaaba kubelesyegwa, Jehova ulakonzya kumupa kuba mukambausi musungu, mwiiyi uucibwene, sikuumbulizya uucibwene, mubelesi uucibwene, mulongwe uugwasya naa kumupa kuba kufwumbwa mbwayanda kutegwa azuzikizye makanze aakwe. w19.10 21 ¶5; 25 ¶14

Balongwe bali kabotu bayoopa kuti tuzumanane kusyomeka kuli Jehova. Alimwi nzila mbotu kapati yakujana balongwe bali kabotu nkuba mulongwe uuli kabotu. (Mt. 7:12) Mucikozyanyo, Bbaibbele litukulwaizya kubelesya ciindi alimwi anguzu zyesu mukugwasya bamwi, kwaambisya aabo ‘ibabulide.’ (Ef. 4:28) Ciindi notubikkila maano kugwasya bamwi, tulalangilwa kukkomana kapati. (Mil. 20:35) Balongwe besu bayootugwasya ciindi twaakujana masunko, bayootugwasya kuzumanana kuba aluumuno lwamumizeezo. Mbubwenya mbuli Elihu mbwaakaswiilila ciindi Jobu naakali kwaamba kujatikizya masunko aakwe, balongwe besu balatugwasya kwiinda mukuswiilila cakukkazika moyo ciindi notubaambila mbotulimvwa. (Job. 32:4) Tatweelede kulangila kuti balongwe besu batusalile zyakucita, pele ncabusongo ikuti twaswiilila kululayo lwabo luzwa mu Bbaibbele. (Tus. 15:22) Alimwi mbubwenya mbuli Mwami Davida cakulicesya mbwaakatambula lugwasyo kuzwa kubalongwe bakwe, tatweelede kukaka kutambula lugwasyo ndobayootupa balongwe besu ciindi twaakuyandika kugwasyigwa. (2Sam. 17:27-29) Masimpe, balongwe bali kabotu boobu ncipego kuzwa kuli Jehova.—Jak. 1:17. w19.04 11 ¶12; 12 ¶14-15