March
Bwabili, March 1
Mulikkomene nywebo kufwumbwa leelyo bantu nobamusula.—Lk. 6:22.
Tatulisalili buya kuti katusulaikwa. Tatukkomani kupenzyegwa akaambo kalusyomo lwesu. Aboobo nkaambo nzi ncotukonzya kukkomana ciindi notusulaikwa? Atulange-lange twaambo totatwe. Kakusaanguna, ciindi notuliyumya, tulakkomaninwa a Leza. (1Pet. 4:13, 14) Kabili, lusyomo lwesu lulayuma kapati. (1Pet. 1:7) Mpoonya katatu, tuyootambula bulumbu bulibedelede, nkokuti buumi butamani. (Rom. 2:6, 7) Kakutanainda ciindi kuzwa Jesu naakabusyigwa, baapostolo bakalubona lukkomano ndwaakaamba. Nobakamana kuumwa alimwi akwaambilwa kuleka kukambauka, bakakkomana. Nkaambo nzi? ‘Nkaambo bakajanwa kuti baleelela kusampaulwa akaambo kazina lya Jesu.’ (Mil. 5:40-42) Bakali kumuyanda kapati simalelaabo cakuti kunyina nobakayoowa kusulaikwa abasinkondonyina. Alimwi bakalutondezya luyando lwabo kwiinda mukuzumanana kwaambilizya makani mabotu “cakutaleka.” Bakwesu banji mazuba aano bazumanana kumubelekela Jehova cakusyomeka nokuba kuti balajana buyumuyumu. Balizyi kuti Jehova takonzyi kuluba milimo yabo alimwi aluyando ndobatondezya kuzina lyakwe. w21.03 25 ¶18-19.
Bwatatu, March 2
Wabikka abuumi butamani mumyoyo yabo.—Muk. 3:11.
Banakristo bananike tabazyalwi kabajisi bulangizi bwakujulu. Leza ubapa buya bulangizi oobu. Balayeeya kujatikizya bulangizi bwabo, balabupailila alimwi baliyandide kutambula bulumbu bwabo bwakujulu. Tabazyi mboinoobede mibili yabo yamuuya kujulu. (Flp. 3:20, 21; 1Joh. 3: 2) Nokuba boobo, baliyandide kapati kuyooba mu Bwami bwakujulu. Bambelele zimbi bajisi bulangizi bwakuyoopona anyika mane kukabe kutamani, icintu ncobayanda bantu boonse. Balangila ciindi nobayoogwasyilizya kusandula nyika yoonse kuba paradaiso. Balangila ciindi nobayooyaka maanda aabo, kulima myuunda yabo alimwi akukomezya bana bajisi buumi bulondokede. (Is. 65:21-23) Balangila ciindi nobayakweendeenda mumasena manji aamunyika, kubona malundu, zisaka, lwaanje alimwi akwiiya kujatikizya zintu zyoonse nzyaakalenga Jehova. Pele cibakkomanisya kapati kwiinda, nkuzyiba kuti cilongwe cabo a Jehova ciyoozumanana kuyuma. w21.01 18-19 ¶17-18
Bwane, March 3
Wakaumpa ŋanda ya Leza mwini-mwini . . . akunyonyoona zintu zyoonse ziyandisi.—2Mak. 36:19.
Bana Babuloni nobakamana kusaala akunyonyoona nyika, bantu bakaamba kuti: “Ma! Cisi eeci matongo buyo aatakwe muntu naba munyama, alimwi caabwa mumaanza aaba Kasidi.” (Jer. 32:43) Nokwakainda myaka iili 200 kuzwa ciindi nobwakazuzikizyigwa businsimi bwa Joeli, Jehova wakabelesya Jeremiya kusinsima cintu cimwi kujatikizya kulwanwa ooku. Wakaamba kuti basikusaala bakali kuyoobikkila maano kuyandaula bana Israyeli boonse ibakacita zintu zibyaabi alimwi akubajata. “‘Mpaawa lino ndiita bazubi banji,’ mbwaamba Jehova, ‘eelyo bayoobazuba. Mpoonya ndiyakwiita bavwimi banji, eelyo bayoobavwima mumalundu oonse amutulundu toonse alimwi amuŋanzi zyamyala. . . . ndiyoobapa cisubulo ceelene acinyonyoono cabo alimwi acibi cabo.’” Bana Israyeli kunyina nobakali kukonzya kubayuba basikusaala bana Babuloni, mulwaanje naa mucisaka.—Jer. 16:16, 18. w20.04 5 ¶12-13
Bwasanu, March 4
[Loti] wakacili kuwayawaya.—Matl. 19:16.
Aciindi icakali kukatazya kapati mubuumi bwakwe, Loti wakawayawaya kumvwida malailile aa Jehova. Ambweni inga twayeeya kuti Loti tanaakabikkila maano kujatikizya ncaakamwaambila kucita Jehova, naa kuti tanaakamvwida. Nokuba boobo, Jehova wakazumanana kusoleka kumufwutula. “Nkaambo Jehova wakamufwida lubomba,” bangelo bakamujata kujanza walo amukwasyi wakwe alimwi akubagwisya mumunzi. (Matl. 19:15, 16) Kuli twaambo tunji itwakapa kuti Jehova amufwide luzyalo Loti. Ambweni Loti wakali kuwayawaya kuzwa mumunzi akaambo kakuti wakali kuyoowa bantu ibakali anze aamunzi. Kwakali ntenda azimbi. Kweelede kuti Loti wakalibazyi bami bobilo ibakawida muzilindi zyataala munsi-munsi aakkuti. (Matl. 14:8-12) Mbwaanga Loti wakalikwete alimwi wakalijisi abana, kweelede kuti wakalibilika kujatikizya mukwasyi wakwe. Kuyungizya waawo, Loti wakalivwubide, aboobo kweelede kuti wakajisi ŋanda mbotu mu Sodoma. (Matl. 13:5, 6) Pele kunyina kaambo kali koonse akati katwaambo ootu ikakeelede kupa Loti kwaalilwa kumumvwida Jehova mpoonya-mpoonya. Nokuba boobo, Jehova kunyina naakabikkila maano kukulubizya kwa Loti, alimwi buya wakamubona kuti wakali “muntu uululeme.”—2Pet. 2:7, 8. w20.04 18 ¶13-14
Mujibelo, March 5
Ulijisi nkamu yabalombwana bali mbuli malosi aamume.—Int. 110:3.
Nobakubusi, cilakonzya kutola ciindi kuli baabo ibamuzyi kuzwa kubwana kutalika kumubona kuti mwakomena. Nokuba boobo, mulakonzya kuba masimpe kuti Jehova talangi buyo mbomuboneka, ulizyi bwini mbomubede alimwi azintu nzyomukonzya kucita. (1Sam. 16:7) Amuyumye cilongwe canu a Leza. Davida wakacita oobo kwiinda mukulangilila zilenge zya Jehova. Wakali kuzinzibala kuyeeya zilenge eezyo akubona ncozyakali kumuyiisya kujatikizya Mulengi. (Int. 8:3, 4; 139:14; Rom. 1:20) Acimwi ncomukonzya kucita, nkulomba Jehova kuti amupe nguzu. Mucikozyanyo, sena basicikolonyoko balamufwubaazya akaambo kakuba umwi wa Bakamboni ba Jehova? Kuti kacili boobo, amupaile kuli Jehova kutegwa amugwasye kulizunda penzi eeli. Alimwi amulutobele lulayo lugwasya lujanika mu Jwi lyakwe, mumabbuku aapandulula Bbaibbele alimwi amumavidiyo. Ciindi nomubona Jehova mbwamugwasya kuzunda penzi limwi, muyoozumanana kumusyoma. Kuyungizya waawo, ciindi bamwi baakubona kuti mulamusyoma Jehova, andinywe bayootalika kumusyoma. w21.03 4 ¶7
Nsondo, March 6
Mupailo wabalulami ulamubotela [Jehova].—Tus. 15:8.
Balongwe beni-beni balakkomana kwaambilana nzyobayeeya alimwi ambobalimvwa. Sena oobo mbocibede akucilongwe cesu a Jehova? Inzya! Jehova ulabandika andiswe kwiinda mu Jwi lyakwe, alimwi mulindilyo ulaliyubununa kulindiswe kujatikizya nzyayeeya alimwi ambwalimvwa. Tulabandika anguwe kwiinda mumupailo, alimwi tulakonzya kumwaambila izili mumoyo alimwi abwini mbotulimvwa. Mbwali Mulongwe siluyando, Jehova taiswiilili buyo mipailo yesu, pele alimwi ulayiingula. Zimwi ziindi ulaingula cakufwambaana. Pele zimwi ziindi, inga twayandika kuzumanana kucipailila cintu eeco ncotuyanda. Nokuba boobo, tulakonzya kuba masimpe kuti uyootwiingula aciindi ceelede alimwi munzila iiluzi. Bwini mbwakuti, Leza ulakonzya kutwiingula munzila njotwatali kuyeeyela. Mucikozyanyo, muciindi cakuligusya sunko ulakonzya kutupa busongo alimwi anguzu ‘zyakuliyumya musunko eelyo.’ (1Kor. 10:13) Mbuti mbotukonzya kutondezya kulumba kucipego camupailo icitaliboteli? Nzila imwi nkwiinda mukutobela lulayo lwakuti, “amupaile cakutaleka.”—1Tes. 5:17. w20.05 27-28 ¶7-8
Muhulo, March 7
Ooyo uuliyumya kusikila kumamanino uyoofwutulwa.—Mt. 24:13.
Basikubalika mumuzundano wamusinzo mulamfwu balabikkila maano kulanga kumbele kutegwa batalebwi. Kuti bawa, balabuka akuzumanana kubalika. Babikkila maano kapati kukeengo kamamanino alimwi akubulumbu mbobalangila kupegwa, ikutali kucintu icapa kuti balebwe. Notubalika, tulakonzya kuwa ziindi zinji, kulubizya muzintu nzyotwaamba naa kucita. Naa ambweni basikubalikama balakonzya kucita zintu izikonzya kutucisa kapati. Eeci tweelede kucilangila. Toonse tatulondokede alimwi toonse tuli mukubalika munzila yomwe nsyoonto iitola kubuumi. Aboobo zimwi ziindi tulakonzya “kulebana.” (Kol. 3:13) Pele muciindi cakubikkila maano kucintu cakatupa kuwa, atubikkile maano kubulumbu ibuli kumbele lyesu akuzumanana kubalika. Ikuti naa twanyema akukaka kunyamuka, tatukasiki akeengo kamamanino akutambula bulumbu. Kuyungizya waawo, tulalangilwa kuba cilebyo kuli bamwi ibali mukusolekesya kubalika munzila eeyi nsyoonto iitola kubuumi. w20.04 26 ¶1; 28 ¶8-9
Bwabili, March 8
Bwami oobo . . . buyoopwayaula akumanizya mami aaya oonse.—Dan. 2:44.
Musinsimi Daniele waamba mulongo wamfwulumende zyabantu izilwana bantu ba Leza. Mfwulumende eezyo, zyaambwa kuti nzibeela zyacikozyanyo cipati. Mfwulumende yamamanino mumulongo ooyu yiiminina zimpata zyacikozyanyo zipangidwe abutale buvwelene abulongo. Zimpata ziiminina Bulelo Bweendelezya Nyika Yoonse bwa Anglo-America. Businsimi oobu butondezya kuti bucinooyendelezya ciindi Bwami bwa Leza bwaakunyonyoona mfwulumende zyabantu. Awalo mwaapostolo Johane waamba mulongo wamfwulumende izyeendelezya bantu ba Jehova. Mubusinsimi bwa Johane, mfwulumende eezyi ziimininwa aamunyama uujisi mitwe iili ciloba. Mutwe waciloba wamunyama ooyu wiiminina Bulelo Bweendelezya Nyika Yoonse bwa Anglo-America. Eeci cilayandika kapati nkaambo cinyama tacitondezyi kuti kuli mutwe uumbi uucimena kunze aamitwe eeyi. Mutwe waciloba wamunyama ooyu ucinoolela ciindi Kristo alimwi abangelo bakwe baakunyonyoona mutwe ooyu antoomwe amunyama woonse.—Ciy. 13:1, 2; 17:13, 14. w20.05 14 ¶11-12
Bwatatu, March 9
Leza nduyando.—1Joh. 4:8.
Majwi aaya atuyeezya kaambo kamasimpe kakuti: Leza, Ikasensa kabuumi, alimwi Ngokasensa kaluyando. Jehova ulatuyanda. Luyando lwakwe lutupa kulimvwa kukwabililwa, kukkomana, alimwi akukkutila. Kubanakristo, kutondezya luyando taali makani aakulisalila buya pe. Pele mulawo buya. (Mt. 22:37-40) Ikuti twamuzyiba kabotu Jehova, ciyootuubaubila kuutobela mulawo wakusaanguna. Amana buya, Jehova ulilondokede, ulatubikkila maano alimwi ulatweendelezya kabotu. Pele cilakonzya kutuyumina kuutobela mulawo wabili. Nkaambo nzi? Nkaambo kakuti bakwesu abacizyi, aabo mbotuyanzana limwi kapati, tabalondokede. Aboobo, zimwi ziindi balakonzya kutucitila zintu zitondezya kubula luyando naa kutabikkilwa maano. Jehova wakalizyi kuti ciyootuyumina kuutobela mulawo wabili, nkakaambo kaako wakabelesya bantu ibakalemba Bbaibbele, kutuyiisya kaambo ncotweelede kutondezya luyando kuli umwi aumwi alimwi ambotukonzya kulutondezya. Umwi wabasikulemba Bbaibbele aaba mwaapostolo Johane.—1Joh. 3:11, 12. w21.01 8 ¶1-2
Bwane, March 10
Mutazundwi a Saatani.—2Kor. 2:11.
Kufwumbwa naa twakatalika caino-ino kubelekela Jehova naa twamubelekela kwamyaka minji, tweelede kulibuzya kuti, ‘Sena ndilasolekesya kutalekela Saatani kundipa kuba aamyoyo yobilo?’ Mucikozyanyo, ikuti mwabona cifwoto icikonzya kuletela muzeezo wakoonana a TV naa a Intaneti, ino mucita buti? Ncuubauba kuyeeya kuti cifwoto eeci naa filimu eeyi taileteli muzeezo wakoonana. Pele sena ncibelesyo ncabelesya Saatani kumupa kuba aamyoyo yobilo? Cifwoto eeco cilakonzya kukozyanisyigwa kucisamu cipati ncagonka muntu. Agonka ciindi cakusaanguna keembe kayasa buyo aasyoonto. Mpoonya mbwayaabugonkela, cisamu cilakosoka. Zifwoto zilakonzya kutunyonganya mbubwenya mbuli keembe mbokakonzya kukosola cisamu cipati. Zintu eezyi izilibonya mbuli kuti tazikonzyi kutunyonganya zilakonzya kupa muntu kuba amyoyo yobilo calo icikonzya kumusololela kukucita cibi alimwi akupa kuti aleke kusyomeka. Aboobo amucikasye cintu cili coonse icitali kabotu kunjila mumoyo wanu! Amuzumanane kuba aamoyo omwe kutegwa kamuyoowa zina lya Jehova! w20.06 11-12 ¶14-15
Bwasanu, March 11
Amubagwasye aabo batali bayumu ibalezya.—Rom. 15:1.
Tatweelede kuleka kubagwasyilizya aabo ibatacisungweede. Mbubwenya mbuli cikozyanyo ca Jesu camwana mutaka, cilakonzya kutola ciindi cilamfwu kuti bantu aaba bapilukile kuli Jehova. (Lk. 15:17-24) Alimwi ambweni inga kabatali bayumu kumuuya akaambo kakuti bakali kuyanzana anyika ya Saatani. Tweelede kubagwasya kuyumya lusyomo lwabo muli Jehova. Mucikozyanyo cambelele iyakasweekede, Jesu wakatondezya mweembezi mbwaakabikka mbelele agwezyo akwiipilusya kubutanga. Mweembezi wakalibelekede kale canguzu kuyandaula mbelele eeyo. Pele wakabona kuti wakeelede kwiinyamuna akwiipilusya kubutanga nkaambo tiiyakajisi nguzu zyakweenda. (Lk. 15:4, 5) Tuyandika kubelesya ciindi alimwi anguzu kutegwa tubagwasye aabo ibatacisungweede kuzunda mapenzi aabanyonganya kuti batalike alimwi kubelekela Jehova. Alimwi kwiinda mulugwasyo lwamuuya wa Jehova, Ijwi lyakwe alimwi amabbuku ngotutambula kuzwa kumbunga, tulakonzya kubagwasya kuyuma alimwi kumuuya. Aboobo ikuti mwalombwa kuyiisya muntu uutacisungweede, mweelede kucibona kuba coolwe cipati. w20.06 28 ¶14-15
Mujibelo, March 12
Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.—Joh. 13:35.
Umwi aumwi wesu weelede kutondezya luyando, icitondezyo ca Banakristo bakasimpe. Pele alimwi tuyandika kuba “aluzyibo lwini-lwini alimwi akumvwisya koonse.” (Flp. 1:9) Buyo-buyo, tulakonzya koongolezyegwa “amuwo uuli woonse wanjiisyo zyabantu ziindene-indene kwiinda mulweeno lwabo,” kubikkilizya abasiluleyo. (Ef. 4:14) Ciindi basikwiiya banji mumwaanda wamyaka wakusaanguna C.E., nobakaleka kumutobela Jesu, mwaapostolo Petro wakatondezya lusyomo luyumu lwakuti Jesu wakajisi “majwi aapa buumi butamani.” (Joh. 6:67, 68) Nokuba kuti aciindi eeco Petro tanaakazyi zyoonse zyakajatikizyidwe mumajwi aayo, wakazumanana kusyomeka nkaambo wakakamvwisya kasimpe ikajatikizya Kristo. Andinywe mulakonzya kuluyumya lusyomo lwanu muzintu nzyoliyiisya Bbaibbele. Ikuti naa mwacita oobo, lusyomo lwanu luyoozumanana kuyuma tacikwe makani azintu zikonzya kucitika, alimwi muyooyumya lusyomo lwabamwi.—2Joh. 1, 2. w20.07 8 ¶2; 13 ¶18
Nsondo, March 13
Nobana bangu bayandwa, luyando lwesu lutabi lwamajwi buyo naa lwaamulomo pe, pele alube lwamumilimo amukasimpe.—1Joh. 3:18.
Kutegwa tubagwasye bakwesu abacizyi kuzumanana kweenda mukasimpe, tweelede kutondezya luzyalo. (1Joh. 3:10, 11, 16, 17) Tweelede kuyandana umwi amweenzinyina kutali buyo ciindi zintu nozili kabotu, pele aciindi nokwaba mapenzi. Mucikozyanyo, sena kuli muntu umwi ngomuzyi iwakafwidwa muyandwa alimwi uuyandika luumbulizyo naa kugwasyigwa buya cacigaminina? Sena mwakamvwa kuti kuli basyomima ibakasweekelwa zintu akaambo kantenda izilicitikila alimwi akuti bayandika kugwasyigwa kuyakulula Maanda aabo aa Bwami naa maanda aakukkala? Tulatondezya luyando lupati alimwi aluzyalo kubakwesu abacizyi kutali buyo mumajwi, pele ikapati kwiinda muzintu nzyotucita. Tulamwiiya Taateesu wakujulu siluyando ciindi notutondezya luyando kuli umwi amweenzinyina. (1Joh. 4:7, 8) Nzila iiyandika kapati mbotutondezya luyando nkwiinda mukulekelelana. Mucikozyanyo, muntu umwi ulakonzya kutunyemya mpoonya walilekelela. Tulatondezya luyando kwiinda mukumulekelela alimwi akuziluba zintu nzyaakatulubizyila.—Kol. 3:13. w20.07 24 ¶14-15
Muhulo, March 14
Kuyooba bubuke bwabantu baluleme abataluleme.—Mil. 24:15.
Sena aabo bayoobusyigwa banooyiisyigwa aumwi alikke mbubwenya mbotusololela ziiyo zya Bbaibbele mazuba aano? Sena aabo ibayoobusyigwa bayakwaambilwa mbungano nkobanooswaangana akuyiisyigwa kutegwa abalo bakayiisye baabo ibayoobusyigwa musyule lyabo? Atulindile kutegwa tukabone mbociyooba. Ncotuzyi ncakuti, kumamanino aa Bulelo bwa Kristo bwa Myaka Iili 1,000, “nyika iyoozula luzyibo lwa Jehova.” (Is. 11:9) Eelo kaka tunoojisi bubi, pele tunookkomene mumyaka eeyo! Lya Bulelo bwa Kristo bwa Myaka Iili 1,000, bana ba Jehova boonse baanyika bayooyandika kuzumanana kucinca bukkale bwabo kutegwa bakamukkomanisye Jehova. Boonse banoojisi lweetelelo lwini-lwini ciindi nobanoogwasya baabo bayoobusyigwa kutegwa bacince bukkale bwabo akutalika kupona kweelana azyeelelo zya Jehova. (1Pet. 3:8) Aabo bayoobusyigwa bayoobona kuti bantu ba Jehova balalicesya akuti baciyandika kucinca kutegwa bamukkomanisye Jehova alimwi bayooyanda kuti bamukombe antoomwe ambabo.—Flp. 2:12. w20.08 16 ¶6-7
Bwabili, March 15
Umwi aumwi alingule nzyacita lwakwe mwini, . . . ikutali akaambo kakulyeezyanya amuntu uumbi.—Gal. 6:4.
Ikuti twalutobela lulayo lwa mwaapostolo Paulo ilwakasololelwa amuuya alimwi akulingula milimo yesu, tuyoobona kuti tulijisi zipego zilibedelede alimwi tulakonzya kucita zintu zimwi. Mucikozyanyo, mwaalu ulakonzya katajisi cipego cakuyiisya ciindi nali acibumbili, pele ulakonzya kuti kacita kabotu mumulimo wakugwasya bantu kuba basikwiiya. Naa ambweni taciti zintu munzila yabulondo mbuli baalu bamwi mumbungano, pele ulakonzya kazyibidwe kuti mweembezi siluyando ooyo basikumwaya ngobaangulukide kulomba lulayo lwamu Magwalo. Ambweni ulakonzya kuti kajisi cikozyanyo cibotu kujatikizya kusamausya. (Heb. 13:2, 16) Ciindi notubona mbotucikonzya kucita zintu alimwi azipego nzyotujisi, tuyooba atwaambo tubotu tuyootupa kulimvwa kabotu alimwi akugwasya mbungano. Alimwi tatukabafwidi munyono bakwesu ibajisi zipego ziindene anzyotujisi. Kufwumbwa naa tujisi busena buli buti mumbungano, toonse tweelede kuba amakanze aakuyaambele mumulimo wesu alimwi akuba mwiiyi uucibwene. w20.08 24 ¶16-18
Bwatatu, March 16
Ndakabona nkamu mpati yabantu batakonzyi kubalwa amuntu uuli woonse.—Ciy. 7:9.
Makani aatalubiki aakajisi mutwe wakuti, “Nkamu Mpati” akapegwa amukwesu J. F. Rutherford mu 1935 kumuswaangano wacooko ku Washington, D.C., U.S.A. Mumakani aakwe, Mukwesu Rutherford wakapandulula kujatikizya baabo ibakali kupanga “nkamu mpati” iyaambidwe kulugwalo lwa Ciyubunuzyo 7:9. Kusikila kuciindi eeco, Basikwiiya Bbaibbele bakali kuyeeya kuti nkamu mpati yakali nkamu yabantu ibakali kuyoounka kujulu, pele ibatakajisi lusyomo luyumu mbuli bananike. Mukwesu Rutherford wakabelesya Magwalo kupandulula kuti bankamu mpati tabasalidwe kuyoopona kujulu, pele mbambelele zimbi zya Kristo ibayoofwutuka “mapenzi mapati” alimwi akuyoopona anyika kukabe kutamani. (Ciy. 7:14) Jesu wakaamba kuti: “Ndilijisi mbelele zimbi izitali zyamucaanda eeci; azyalo eezyo ndeelede kuzileta alimwi ziyooswiilila jwi lyangu, eelyo ziyooba tanga lyomwe alimwi zinooli amweembezi omwe.” (Joh. 10:16) Bantu aaba ibali mbuli mbelele ninkamu ya Bakamboni ba Jehova basyomeka, ibajisi bulangizi bwakuyoopona kukabe kutamani mu Paradaiso anyika.—Mt. 25:31-33, 46. w21.01 14 ¶1-2
Bwane, March 17
Muyoosulwa abantu boonse akaambo kazina lyangu, pele ooyo uuliyumya kusikila kumamanino uyoofwutulwa.—Mt. 10:22.
Tuyandika kulyeendelezya kutegwa tuliyumye akumanizya mulimo wesu wakukambauka. (Mt. 28:19, 20) Bube bwakulyeendelezya tabuli bwakukona buya. Mukwiimpana, kanji-kanji ncilengwa buya kuyandisya kucita zintu nzyotukkomanina. Aboobo kuyandika kubeleka canguzu kutegwa katulyeendelezya. Eeci caamba kuti, tuyandika lugwasyo kutegwa twiiye kucita zintu eezyo izikonzya kutuyumina. Jehova ulatupa lugwasyo oolo kwiinda mumuuya wakwe uusalala. (Gal. 5:22, 23) Mwaapostolo Paulo wakali kulyeendelezya. Pele wakaamba kuti wakeelede ‘kuundinkaula’ mubili wakwe kutegwa acite ciluzi. (1Kor. 9:25-27) Wakakulwaizya bamwi kulyeendelezya akucita zintu “kabotu-kabotu alimwi kweelana abubambe.” (1Kor. 14:40) Tweelede kulyeendelezya kutegwa tuzumanane kucita zintu zyakumuuya, nkokuti kutola lubazu lyoonse mumulimo wesu wakukambauka.—Mil. 2:46. w20.09 6-7 ¶15-17
Bwasanu, March 18
Mumasi oonse, makani mabotu aleelede kukambaukwa.—Mk. 13:10.
Mumasi manji mazuba aano, tulakambauka kakunyina kunyonganizyigwa. Sena mukkala mucisi imuli lwaanguluko lwakukomba? Ikuti kacili boobo, amulibuzye kuti, ‘Ino ndilubelesya buti lwaanguluko oolu?’ Muziindi eezyi zikkomanisya, mbunga ya Jehova iluujisi kusumpula mulimo mupati wakukambauka alimwi akuyiisya bantu uuli mukucitwa nyika yoonse. Eelo kaka zinji nzyotukonzya kucita mumulimo ooyu! Ino mbuti mbomukonzya kucibelesya ciindi caluumuno? (2Tim. 4:2) Amulange-lange bukkale bwanu akubona naa nywebo naa munamukwasyi umwi inga wayungizya ciindi mumulimo wakukambauka naa ambweni kubeleka kali mupainiya. Ecino tacili ciindi cakuyandisya kuba azintu zyakumubili zinji, izintu nzyotutakafwutuki anzizyo lyamapenzi mapati. (Tus. 11:4; Mt. 6:31-33; 1Joh. 2:15-17) Basikumwaya banji baiya mwaambo mupya kutegwa kabakambauka alimwi akuyiisya. Mbunga ya Leza ilabagwasya kwiinda mukumwaya mabbuku amavidiyo aabandika zyamu Bbaibbele mumyaambo iili 1,000. w20.09 16 ¶9-11
Mujibelo, March 19
Amuzumanane kulwana nkondo mbotu.—1Tim. 1:18.
Sikalumamba mubotu ulasyomeka. Ulabeleka canguzu kukwabilila muntu ngwayanda naa cintu ncayandisya. Paulo wakakulwaizya Timoteyo kuba abube bwakubelekela Leza cakulyaaba, nkokuti kukakatila kuli Leza cakusyomeka. (1Tim. 4:7) Kuti twamuyanda kapati Jehova, alwalo luyandisisyo lwesu lwakukakatila kulinguwe luyookomena. (1Tim. 4:8-10; 6:6) Alimwi sikalumamba mubotu weelede kubeleka canguzu kutegwa lyoonse kalibambilide kulwana nkondo. Timoteyo wakazumanana kuyuma kumuuya akaambo kakuti wakaatobela malailile aa Paulo aakasololelwa amuuya aakutija zisusi zibyaabi, kuba abube bwabuna Leza alimwi akuyanzana abakombinyina. (2Tim. 2:22) Kucita boobu kuyandika kulyeendelezya. Tuyandika kulyeendelezya kutegwa tuzunde munkondo njotulwana zisusi zyesu zyanyama. (Rom. 7:21-25) Kuyungizya waawo, tuyandika kulyeendelezya kutegwa tuzumanane kusamununa buntu bwesu bwakaindi akusama bupya. (Ef. 4:22, 24) Alimwi ciindi notwakatala kumamanino aabuzuba, inga twayandika kulisinikizya kuunka kumuswaangano.—Heb. 10:24, 25. w20.09 28 ¶9-11
Nsondo, March 20
Mumoyo wangu ndikanzide kutobela malailile aako ciindi coonse, kusikila kumamanino.—Int. 119:112.
Tweelede kukkazika moyo ciindi notugwasya sikwiiya kutegwa alyaabe alimwi akubbapatizyigwa. Pele alimwi tweelede kuzyiba kuti naa ulayanda kubelekela Jehova Leza. Sena sikwiiya ulatondezya kuti ulasola kwaatobela malailile aa Jesu? Naa uyanda buyo kuba aluzyibo lwamu Bbaibbele? Ciindi aciindi amukulange-lange kuyaambele kwasikwiiya. Mucikozyanyo, sena ulatondezya kuti ulamuyanda Jehova? Sena ulapaila kuli Jehova? (Int. 116:1, 2) Sena ulakukkomanina kubala Bbaibbele? (Int. 119:97) Sena ulajanika kumiswaangano lyoonse? (Int. 22:22) Sena kuli kucinca kuli koonse nkwacitide mubukkale bwakwe? Sena wakatalika kubaambila banamukwasyi naa balongwe zintu nzyaiya? (Int. 9:1) Kwiinda zyoonse, sena ulayanda kuba Kamboni wa Jehova? (Int. 40:8) Ikuti sikwiiya katayaambele mumbazu eezyi, cabupampu amusoleke kuzyiba kaambo ncocili boobo, alimwi akubandika anguwe caluzyalo pele cakutamwiinda mumbali. w20.10 18 ¶14-15
Muhulo, March 21
Ooyo wakandituma ulaandime; kunyina naakandilekelezya nkaambo lyoonse ndicita zimukkomanisya.—Joh. 8:29.
Bausyi Jesu bakujulu lyoonse basala kabotu, alimwi abalo bazyali bakwe baanyika bakali kusala cabusongo. Nokuba boobo, ciindi Jesu naakali kuyaabukomena, wakeelede kulisalila zintu zyakucita. (Gal. 6:5) Mbubwenya mbuli ndiswe, Jesu wakajisi nguzu zyakulisalila cakucita. Amana buya, naakali kuyanda naakasala kucita zintu nzyakkomanina, muciindi cakucita kuyanda kwa Leza. Nokuba boobo, wakasala kuba acilongwe cibotu a Jehova. Ciindi Jesu naakazyiba kujatikizya mulimo wakwe mumakanze aa Jehova, wakasala kuucita. (Joh. 6:38) Wakalizyi kuti bantu banji bakali kuyoomusulaika. Nokuba kuti tanaakali kuciyanda eeco, wakasala kumvwida Jehova. Ciindi naakabbapatizyigwa mu 29 C.E., ncaakali kubikkila maano kapati mubuumi nkucita kuyanda kwa Jehova. (Heb. 10:5-7) Nociba ciindi naakafwa acisamu cakupenzyenzya, Jesu wakalikanzide kuzumanana kucita kuyanda kwa Bausyi.—Joh. 19:30. w20.10 29 ¶12; 30 ¶15
Bwabili, March 22
Ziyume zitete, tandikakusiyi pe alimwi tandikakulekelezyi pe.—Heb. 13:5.
Sena kuli bakwesu naa bacizyi mumbungano yanu ibapenga akaambo kakuciswa naa ibajisi mapenzi aambi buyo? Ambweni bakafwidwa bayandwa babo. Ikuti twazyiba kuti kuli muntu umwi uuyandika lugwasyo, tulakonzya kumulomba Jehova kuti atugwasye kwaamba naa kucita cimwi cintu caluzyalo. Majwi eesu alimwi azintu nzyotukonzya kumucitila mukwesu naa mucizyi ooyo ambweni nzyezikonzya kumukulwaizya. (1Pet 4:10) Tulakonzya kuyumizyigwa nkaambo Jehova ulaandiswe. Ulatupa lugwasyo kwiinda muli Jesu abangelo. Alimwi kuti kaceendelana amakanze aakwe, Jehova ulakonzya kutugwasya kwiinda mukubelesya bantu bali mubweendelezi. Mbubwenya bunji bwesu mbotwakalibonena kale, Jehova ulaubelesya muuya wakwe uusalala kukulwaizya myoyo yababelesi bakwe kugwasya Banakristonyina. Aboobo mbubwenya mbuli mwaapostolo Paulo, tulijisi twaambo itweelede kutupa kwaamba kuti: “Jehova ngomugwasyi wangu; tandikooyoowa pe. Ino muntu inga wandityani?”—Heb. 13:6. w20.11 17 ¶19-20
Bwatatu, March 23
Mulaba anguzu kufwumbwa buyo kuti mubatame akuba alusyomo.—Is. 30:15.
Baapostolo bakalisinizyide kuti Jehova wakali aambabo. Wakalibapede nguzu zyakucita maleele. (Mil. 5:12-16; 6:8) Oobo tabusyi mbocibede kulindiswe mazuba aano. Nokuba boobo, kwiinda mu Jwi lyakwe, caluyando Jehova ulatusyomezya kuti ciindi notwapenga akaambo kabululami, ulatukkomanina alimwi muuya wakwe ulaandiswe. (1Pet. 3:14; 4:14) Aboobo tatweelede kulibilika kapati kujatikizya ncotuyoocita ciindi twaakupenzyegwa kumbele. Muciindi caboobo, tweelede kubeleka canguzu lino kuyumya lusyomo lwesu lwakuti Jehova ulakonzya kutugwasya alimwi akutufwutula. Tweelede kucisyoma cisyomezyo ca Jesu cakuti: “Ndiyoomupa majwi abusongo, eezyo basikumukazya boonse nzyobatakakonzyi kukaka naa kukazya.” Tulijisi lusyomo lwakuti: “Kwiinda mukuliyumya kwanu, muyoofwutula buumi bwanu.” (Lk. 21:12-19) Alimwi mutalubi kuti Jehova ulaayeeya makani oonse aajatikizya babelesi bakwe basyomeka ibakafwa. Akaambo kamakani aayo, uyoobabusya. w21.01 4 ¶12
Bwane, March 24
Ndilijisi bulangizi kuli Leza, . . . bwakuti kuyooba bubuke bwabantu baluleme abataluleme.—Mil. 24:15.
Mwaapostolo Paulo tanaakali wakusaanguna kwaamba makani aajatikizya bulangizi bwabubuke. Awalo sikale Jobu wakaamba zyabulangizi oobu. Wakalisinizyide kuti Leza uyoomuyeeya alimwi akumubusya. (Job. 14:7-10, 12-15) “Bubuke bwabafwide” ncibeela ‘cantalisyo’ naa “njiisyo zyantalisyo” nzyobasyoma Banakristo. (Heb. 6:1, 2) Makani ngaakaamba Paulo kujatikizya bubuke alilembedwe mulugwalo lwa 1 Bakorinto caandaano 15. Kweelede kuti nzyaakalemba zyakabakulwaizya Banakristo bamumwaanda wamyaka wakusaanguna. Caandaano eeci andiswe cilakonzya kutukulwaizya alimwi akuyumya bulangizi bwesu bwabubuke. Bubuke bwa Jesu Kristo mpaayeeme bulangizi mbotujisi kujatikizya bayandwa besu bafwide. Alimwi bwakali cibeela ‘camakani mabotu’ ngaakaambilizya Paulo kubana Korinto. (1Kor. 15:1, 2) Mane buya wakaamba kuti, ikuti Munakristo katajisi bulangizi bwabubuke, lusyomo lwakwe ndwabuyo.—1Kor. 15:17. w20.12 2 ¶2-4
Bwasanu, March 25
Petro wakaayeeya majwi ngaakaamba Jesu . . . Eelyo wakaunka anze akulila kapati.—Mt. 26:75.
Ino ncinzi cakamugwasya mwaapostolo Petro kubukuluka? Wakayeeya kuti Jesu musyule wakapaila kuti lusyomo lwakwe lutamani. Jehova wakawiingula mupailo ooyo uuzwa ansi aamoyo. Mpoonya Jesu wakalibonya cacigaminina kuli Petro, cakutadooneka kutegwa amuyumye-yumye. (Lk. 22:32; 24:33, 34; 1Kor. 15:5) Alimwi Jesu wakalibonya kubaapostolo boonse ciindi nobakazuba nswi busiku boonse pele kakunyina ncobakajaya. Aciindi eeco, Jesu wakapa Petro coolwe cakutondezya luyando ndwaakajisi kulinguwe. Jesu wakamulekelela mulongwe wakwe alimwi akumupa milimo minji. (Joh. 21:15-17) Nzila Jesu mbwaakamweendelezya Petro cilatondezya kuti Jesu ngusiluse kapati mbubwenya mbuli Bausyi. Aboobo ciindi notwalubizya, tatweelede kuyeeya kuti tuli babi kapati cakuti Jehova kunyina nakonzya kutulekelela. Amuyeeye kuti Saatani uyanda kuti katuyeeya munzila iili boobo. Muciindi caboobo, tweelede kuyeeya mbwatuyanda Jehova akuti ulikuzyi kulezya kwesu, alimwi ulayanda kutulekelela. Aboobo tweelede kumwiiya ciindi bamwi nobatulubizyila.—Int. 103:13, 14. w20.12 20-21 ¶17-19
Mujibelo, March 26
Ndilazumanana kuba sicamba.—Int. 27:3.
Tulakonzya kwiiya kuli zyeezyo izyakabacitikila aabo ibakaalilwa kuzumanana kubatama akusyoma Jehova. Kubala zikozyanyo eezyo zibyaabi inga kwatugwasya kutegwa tutalubizyi mbuli mbobakacita balo. Mucikozyanyo, kumatalikilo aabulelo bwakwe, Mwami Asa wakasyoma Jehova ciindi naakajisi mapenzi. Pele kumbele wakaalilwa kusyoma Jehova kuti amugwasye, aboobo wakayanda kwaalwana mapenzi munguzu zyakwe. (2Mak. 16:1-3, 12) Kumatalikilo, makanze aa Asa aakulomba bana Siriya kuti bamugwasye kulwana bana Israyeli akali kulibonya mbuli kuti alazwidilila. Pele kuzwidilila kwakwe kwakali kwakaindi kaniini buyo. Jehova kwiinda mumusinsimi wakamwaambila kuti: “Akaambo kakuti wakasyoma mwami wa Siriya muciindi cakusyoma Jehova Leza wako, impi yabasikalumamba yamwami wa Siriya yaloboka mumaanza aako.” (2Mak. 16:7) Aboobo tweelede kucenjela akutayeeya kuti tulakonzya kwaamana mapenzi eesu kakunyina kulomba Jehova kuti atusololele kwiinda mu Jwi lyakwe. Nociba ciindi notweelede kusala cakufwambaana, tweelede kukkazika moyo akusyoma Jehova, mpoonya uyootugwasya kusala cabusongo. w21.01 6 ¶13-15
Nsondo, March 27
Kunyina nobayoofwa limbi nzala.—Ciy. 7:16.
Aciindi cino, bantu ba Jehova bamwi balaanzala akaambo kakubula mali aakuula cakulya ncobayandika naa balajana mapenzi aaboola akaambo kamanyongwe ankondo. Bamwi balaangidwe akaambo kalusyomo lwabo. Nokuba boobo, bankamu mpati balikkomene kapati kuzyiba kuti baakufwutuka kulunyonyooko lwabweende bwazintu oobu bubyaabi, lyoonse banoojisi cakulya cakumuuya alimwi acakumubili cinji kapati. Ciindi lunyonyooko lwaakusikila bweende bwazintu bwa Saatani, bankamu mpati bayookwabililwa ‘kukutentwa akupya’ kwabukali bwa Jehova oobo mbwayootila kumasi. Aakwiinda mapenzi mapati, Jesu uyoobasololela bantu aaba ibayoofwutuka ‘kumaanzi aabuumi butamani.’ (Ciy. 7:17) Amuciyeeyele buyo: Bankamu mpati bajisi bulangizi bulibedelede. Akati kamabbiliyoni aabantu boonse ibakaponede, balo kunyina nobayoofwa! (Joh. 11:26) Bambelele zimbi balijisi bulangizi bukkomanisya kapati alimwi balamulumba Jehova a Jesu! w21.01 16-17 ¶11-12
Muhulo, March 28
Mwami ulasyomeka, eelyo uyoomuyumya akumukwabilila.—2Tes. 3:3.
Mubusiku bwamamanino aabuumi bwakwe anyika, Jesu wakali kuyeeya kujatikizya mapenzi ngobakali kuyoojana basikwiiya bakwe. Akaambo kakuti wakali kubayanda basikwiiya bakwe, Jesu wakalomba Usyi kuti ‘abakwabilile akaambo kamubi.’ (Joh. 17:14, 15) Jesu wakalizyi kuti aakuunka kujulu, Saatani Diabolosi uyoozumanana kumulwana muntu uuli woonse uyanda kubelekela Jehova. Aboobo bantu ba Jehova bakali kuyandika kukwabililwa. Mazuba aano tuyandika kukwabililwa a Jehova kwiinda kaindi. Nkaambo Saatani wakatandwa kujulu, “abukali bupati.” (Ciy. 12:12) Wapa bantu kuyeeya kuti ciindi nobatupenzya, “bacitila Leza mulimo uusetekene.” (Joh. 16:2) Aabo batasyomi muli Leza, balatupenzya nkaambo tuliindene abantu bamunyika. Kufwumbwa mbocibede, tatweelede kuyoowa. Nkaambo nzi? Bwiinguzi bulajanika mulugwalo lwabuzuba bwasunu. w21.03 26 ¶1, 3
Bwabili, March 29
[Kunyina cintu] cikonzya kutwaandaanya kuluyando lwa Leza luli muli Kristo Jesu Mwami wesu.—Rom. 8:39.
Zyoonse Jehova nzyacita ulazicita akaambo kaluyando. Caluyando, ulatupa zintu zyoonse nzyotuyandika. Akaambo kaluyando, Jehova wakatupangila bubambe bwacinunuzyo. Awalo Jesu, ulatuyanda kapati cakuti wakaaba buumi bwakwe akaambo kandiswe. (Joh. 3:16; 15:13) Kunyina cikonzya kulesya Jehova alimwi a Jesu kuyanda baabo basyomeka. (Joh. 13:1; Rom. 8:35) Mbubwenya buyo, zyoonse nzyacita silutwe wamukwasyi weelede kuzicita akaambo kaluyando. Nkaambo nzi eeci ncociyandika? Mwaapostolo Johane wakaingula kuti: ‘Nkaambo ooyo uutayandi munyina naa mukwasyi wakwe, ngwabwene, takonzyi pe kuyanda Leza ngwatanabona.’ (1Joh. 4:11, 20) Aboobo, mwaalumi uuyanda mukwasyi wakwe alimwi uuyanda kwiiya Jehova a Jesu uyakuugwasya mukwasyi wakwe kuba acilongwe cibotu a Jehova, kuupa kulimvwa kukwabililwa alimwi akuulanganya kumubili. (1Tim. 5:8) Uyoobayiisya alimwi akubapa lulayo bana bakwe. Alimwi uyoozumanana kwiiya kusala zintu zilemeka Jehova alimwi akugwasya mukwasyi wakwe. w21.02 5 ¶12-13
Bwabili, March 30
Kowaala mukuli wako uuminya mumaanza aa Jehova, eelyo walo uyookulanganya.—Int. 55:22.
Taateesu wakujulu siluyando, ulizyi kuti zintu zibyaabi izyakatucitikila musyule zilakonzya kutupa kulimvwa kubula mpindu. Pele alimwi ulabona bubotu ibuli mumyoyo yesu, nkokuti bube mbotutakonzyi kubona kuti tulibujisi. (1Joh. 3:19, 20) Muntu umwi inga kasolekesya kuyanda kuleka cilengwa cimwi citali kabotu. Pele ulakonzya kuciinduluka cilengwa eeco, calo cikonzya kumutyompya. Toonse buyo tulalimvwa bubi ciindi nitwalubizya. (2Kor. 7:10) Pele tatweelede kuciindizya kulipa mulandu akaambo kakulubizya nkotwakacita akutalika kuyeeya kuti: ‘Tandikwe mpindu. Jehova takonzyi kundilekelela.’ Kuyeeya kuli boobu takuyeeme akasimpe alimwi kulakonzya kutupa kucileka kubelekela Jehova. Muciindi caboobo, ‘atubambe twaambo’ a Jehova kwiinda mukupaila kulinguwe alimwi akulomba kuti atulekelele. (Is. 1:18) Kuti Jehova wabona kuti mweempwa ncobeni alimwi akuti mulabeleka canguzu kutegwa mucince, uyoomulekelela. Kuyungizya waawo, amulombe lugwasyo kubaalu. Cakukkazika moyo, bayoomugwasya kuti mupone kumuuya alimwi.—Jak. 5:14, 15. w20.12 23 ¶5-6
Bwane, March 31
[Koyendelezya] bamakaintu bapati mbuli banyoko, basimbi mbuli bacizyi bako.—1Tim. 5:2.
Jesu wakali kubalemeka bamakaintu. Kunyina naakaiya ba Farisi, balo ibakali kuyeeya kuti bamakaintu tabakwe mulimo. Tiibakali kwaambaula abamakaintu mubuleya alimwi tiibakali kubandika ambabo zyamu Magwalo. Muciindi caboobo, Jesu wakali kubabikkilizya bamakaintu mumibandi yakumuuya njaakali kuba aanjiyo abasikwiiya bakwe bamwi. (Lk. 10:38, 39, 42) Wakabazumizya kuunka anguwe munyendo zyakwe zyakukambauka. (Lk. 8:1-3) Alimwi Jesu wakabapa coolwe cakwaambila baapostolo kuti wabusyigwa kuzwa kubafwu. (Joh. 20:16-18) Mwaapostolo Paulo wakayeezya Timoteyo kubalemeka bamakaintu. Paulo wakalizyi kuti banyina Timoteyo alimwi abakaapanyina mbabakasaanguna kumuyiisya “malembe aasalala.” (2Tim. 1:5; 3:14, 15) Cacigaminina Paulo wakabaanzya bacizyi kwiinda mukubaamba mazina mulugwalo ndwaakalembela bana Roma. Paulo wakali kubona nzyobakali kucita bacizyi aaba alimwi wakaamba kuti wakali kulumba kapati kumilimo njobakali kucita.—Rom. 16:1-4, 6, 12; Flp. 4:3. w21.02 15 ¶5-6