October

Nzyotuyiisya alimwi anzyotusyoma zizwa mu Bbaibbele. Nokuba boobo, bantu banji mazuba aano balaukaka mulumbe wesu nkaambo tatusekeleli mapobwe amwi. Alimwi akuti nzyotuyiisya tazyeendelani amakani ngobayanda kumvwa. Ncinzi ncotweelede kucita kutegwa tutalebwi? Mwaapostolo Paulo wakaambila Banakristo ibakali kukkala mu Roma kuti: “Lusyomo lujanwa buyo lyamana kumvwugwa jwi. Alyalo jwi lilamvwugwa muntu naamba kujatikizya Kristo.” (Rom. 10:17) Aboobo tulaluyumya lusyomo lwesu kwiinda mukwiiya Magwalo, ikutali kutola lubazu mumapobwe Bbaibbele ngolyaamba kuti taaluzi, tacikwe makani naa mapobwe aayo mabotu naa alakkomanisya. Tweelede kuyumya lusyomo lwesu kweelana aluzyibo lwini-lwini nkaambo kuti “kakunyina lusyomo tacikonzyeki pe kumukkomanisya Leza.” (Heb. 11:1, 6) Aboobo, tatuyandiki citondezyo cilibedelede buya kuzwa kujulu kutegwa tusinizye kuti tujisi kasimpe. Kuziiya cakulomya njiisyo zyamu Bbaibbele iziyumya lusyomo lwesu, kulakonzya kutupa kusinizya kuti tujisi kasimpe alimwi akutupa kucileka kudooneka. w21.05 4-5 ¶11-12

Mwaapostolo Paulo wakajana buyumuyumu bunji. Wakali kuyandika lugwasyo kwaambisya ciindi naakali kuumwa, kupwaigwa mabwe alimwi akubikkwa muntolongo. (2Kor. 11:23-25) Caantangalala, Paulo wakaamba kuti zimwi ziindi wakali kulwana amizeezo iitali kabotu. (Rom. 7:18, 19, 24) Alimwi wakajisi bulwazi ibwakali mbuli “mumvwa mumubili,” bwalo mbwaakali kuyanda kuti Leza abugwisye. (2Kor. 12:7, 8) Jehova wakamuyumya Paulo kutegwa aucite mulimo wakwe nokuba kuti wakajisi buyumuyumu. Amubone nzyaakacita Paulo. Mucikozyanyo, ciindi naakaangidwe muŋanda ku Roma, wakabakambaukila cabusungu banji, kubikkilizya abasololi baba Juda alimwi abalupati-pati bamfwulumende. (Mil. 28:17; Flp. 4:21, 22) Alimwi wakakambaukila bantu banji ibakali Balindizi ba Mwami Muna Roma, akuli baabo boonse ibakali kumuswaya. (Mil. 28:30, 31; Flp. 1:13) Aciindi eeco, Leza wakamubelesya Paulo kulemba magwalo aakagwasya Banakristo bakasimpe kaindi alimwi amazuba aano. w21.05 21 ¶4-5

Kulisumpula kwakapa Mwami Uziya wa Juda kukaka lulayo alimwi akucita cintu ncaatakeelede. Uziya wakacita zintu zinji zibotu. Wakazwidilila munkondo, mumilimo yakuyaka alimwi amubulimi. “Leza mwini-mwini wakapa kuti azwidilile.” (2Mak. 26:3-7, 10) Bbaibbele lyaamba kuti: “Nokuba boobo, mbwaakabeda buyo anguzu, moyo wakwe wakalisumpula akulinyonyoona.” Jehova wakapede mulawo wakuti balikke bapaizi mbabeelede kuumpa tununkilizyo mutempele. Pele Mwami Uziya cakulisumpula wakanjila mutempele kutegwa aumpe tununkilizyo. Jehova tanaakakkomana, aboobo wakapa kuti mwaalumi ooyo iwakali kulisumpula abe acinsenda. (2Mak. 26:16-21) Sena kulisumpula kulakonzya kutupa kucegwa mukakole mbuli mbwaakacegwa Uziya? Inzya kulakonzya, ikuti katulibona kuti tulayandika kapati. Aboobo atuyeeye kuti kufwumbwa cipego ncotujisi alimwi amikuli iili yoonse njotupegwa mumbungano, zizwa kuli Jehova. (1Kor. 4:7) Ikuti katulisumpula, Jehova takatubelesyi pe. w21.06 16 ¶7-8

Jesu wakalizyi kuti talili lyoonse basikwiiya bakwe nobakali kuyoojana zyakuluula zikulwaizya kapati mumulimo wabo. Alimwi buya, tatuzyi naa bali bongaye akati kabantu aabo ibakasaanguna kuswiilila kuli basikwiiya ibakaba basyomi. Cintu icakeelede kubakkomanisya basikwiiya takuli buyo kuzwidilila kwabo, pele ciyandika kapati, nkuzyiba kuti Jehova wakali kukukkomanina kusolekesya kwabo. Ikuti naa twazumanana mumulimo wesu, tuyooba abuumi butamani. Ciindi notusolekesya kukambauka alimwi akuyiisya makani mabotu, nkokuti ‘tulasyanga kweelana amuuya’ kwiinda mukupa kuti muuya uusalala wa Leza kaubeleka kabotu mubuumi bwesu. Kufwumbwa buyo kuti ‘tiitwaleka’ naa “tiitwatyompwa,” Jehova utusyomezya kuti tuyootebula buumi butamani, tacikwe makani naa twagwasya sikwiiya mupya kulyaaba kuli Leza naa pe.—Gal. 6:7-9. w21.10 26 ¶8-9

Aciindi cimwi, Jesu alimwi abasikwiiya bakwe bakalikatede kapati akaambo kakuti bakakambauka kwaciindi cilamfwu. Bakali kuyandika busena bwakulyookezyela, pele nkamu yabantu mpati yakabatobela. Akaambo kakuti wakabeetelela, Jesu wakatalika kuyiisya bantu aaba “zintu zinji.” Jesu wakalibikka muciimo cabantu aabo. Wakabona mbobakapengede, mbobakali kuyandika bulangizi, aboobo wakali kuyanda kubagwasya. Ncimwi buyo amazuba aano. Bantu balijisi mapenzi alimwi bayandika bulangizi nokuba kuti balibonya kuti balikkomene alimwi akukkutila abuumi mbobapona. Bali mbuli mbelele zisweekede alimwi zitajisi mweembezi. Kujatikizya bantu aaba, mwaapostolo Paulo wakapandulula kuti banyina Leza alimwi banyina bulangizi. (Ef. 2:12) Twalanga bukkale bwakumuuya bwabantu aabo ibali mucilawo cesu, luyando alimwi alweetelelo lulatukulwaizya kubagwasya. Nzila yiinda kubota mbotukonzya kubagwasya, nkubayiisya Bbaibbele. w21.07 5 ¶8

Muntu uulisumpula ulibikkila buyo maano lwakwe mwini. Muntu uuli amunyono tayandi buyo cintu ncajisi muntu umwi, pele alimwi tayandi kuti muntu ooyo kacijisi cintu eeco. Aboobo muntu uunyonokela muntu umwi mubwini tamuyandi muntu ooyo. Kulisumpula amunyono inga zyakozyanisyigwa kudooti likonzya kunjila mumungwimba wamundeke. Ndeke ilakonzya kunyamuka pele dooti lilakonzya kusinka tupaipi mwiinda mungwimba akupa kuti ndeke iwe akaambo kakubula nguzu. Mbubwenya buyo, muntu umwi ulakonzya kumubelekela Jehova kwaciindi cili mbocibede. Pele kuti naa watalika kulisumpula alimwi akuba amunyono, ulakonzya kuwa. (Tus. 16:18) Muntu ooyo ulakonzya kucileka kubelekela Jehova, akuliletela mapenzi lwakwe mwini abamwi. Tulakonzya kulwana muuya wakulisumpula kwiinda mukuyeeya majwi amwaapostolo Paulo aakuti: “Mutaciti cintu cili coonse amuuya wakuzwangana naa cakulisumpula, pele amucite zintu zyoonse cakulicesya akubona bamwi kuti balamwiinda.”—Flp. 2:3. w21.07 15-16 ¶6-8

Bamwi bayeeya kuti cikombelo cakasimpe ceelede kwiingula mubuzyo uuli woonse, noiba mibuzyo iitajisi bwiinguzi bugaminide bwamu Bbaibbele. Sena eeci cilakonzyeka? Atulange-lange cikozyanyo ca mwaapostolo Paulo. Wakakulwaizya basyominyina kuti ‘basinizye zintu zyoonse,’ pele alimwi wakaamba kuti kuli zintu zinji nzyaatakamvwisya awalo. (1Tes. 5:21) Wakalemba kuti, “tujisi luzyibo lutazulide, tatuboni kabotu nkaambo tulanga mucimbonimboni calubulo.” (1Kor. 13:9, 12) Mbubwenya mbuli ndiswe, Paulo kunyina naakazimvwisya zintu zyoonse. Pele wakakamvwisya kasimpe kantalisyo kujatikizya makanze aa Jehova. Makani ngaakazyi akali kumupa kusinizya kuti nzyaakali kusyoma nkasimpe. Nzila imwi mbotukonzya kusinizya ncobeni kuti twakakajana kasimpe, nkwiinda mukweezyanisya nzila yabukombi njaakasiya Jesu alimwi anzyobacita Bakamboni ba Jehova mazuba aano. w21.10 18-19 ¶2-4

Nobacembeede, tacikwe makani muli mumulimo waciindi coonse naa tamunatalika, mulakonzya kucita zinji kutegwa mugwasye bamwi. Mbuti mbomukonzya kucita boobo? Amwiiye kuukkomanina mulimo wanu mupya, amulibikkile mbaakani zipya alimwi akubikkila maano kuzintu nzyomukonzya kucita muciindi cakubikkila maano kuzintu nzyomutakonzyi kucita. Mwami Davida wakaliyandide kuyaka ŋanda ya Jehova. Pele ciindi Jehova naakamwaambila kuti coolwe eeci ciyoopegwa kumwana Solomoni, Davida wakakulemeka kusala kwa Jehova alimwi wakagwasyilizya mumulimo ooyu kuzwa ansi aamoyo. (1Mak. 17:4; 22:5) Davida kunyina naakalimvwa kuti walo inga waucita kabotu mulimo ooyu nkaambo Solomoni wakacili ‘muniini, uutajisi luzyibo.’ (1Mak. 29:1) Davida wakalizyi kuti tempele lyakali kuyooyakwa akaambo kakuti Jehova wakali kuulongezya mulimo, ikutali akaambo kaciimo naa luzyibo lwabaabo ibakali kuusololela. Kwiinda mukwiiya Davida, mazuba aano bacembeede bazumanana kubeleka canguzu mumulimo wa Jehova, nokuba kuti milimo yabo ilacinca-cinca. Alimwi balizyi kuti Jehova unoobalongezya aabo ibacili bana-bana ibabeleka milimo njobakali kubeleka. w21.09 9 ¶4; 10 ¶5, 8

Ciindi notujisi mbaakani mumulimo wa Jehova, buumi bwesu bulakkomanisya akuba ampindu. Nokuba boobo, cintu ciyandika kapati, nkulibikkila mbaakani nzyotukonzya kuzuzikizya kweelana anguzu alimwi abukkale bwesu, ikutali kulyeezyanisya abamwi. Ikuti naa twalyeezyanisya abamwi tulakonzya kutyompwa. (Lk. 14:28) Mbomuli mubelesi wa Jehova mulilibedelede, alimwi mulayandika kapati mumukwasyi wa Jehova. Jehova tanaakamukwela kulinguwe akaambo kakuti mulabainda bamwi. Pele wakamukwela akaambo kakuti wakabona kuti mulalicesya alimwi mulilisungwide kwiiya kulinguwe akucinca. Amusyome kuti ulakkomana kapati ciindi nomumubelekela kusikila mpomugolela. Kuliyumya alimwi akusyomeka kwanu zitondezya kuti mulijisi “moyo uululeme.” (Lk. 8:15) Aboobo amuzumanane kumubelekela Jehova kusikila mpomugolela. Mpoonya muyoojana kaambo “kamupa kukondwa lwanu nobeni.”—Gal. 6:4. w21.07 24 ¶15; 25 ¶20

Kanji-kanji tuyandika kukkazika moyo ciindi notulindila kuti bululami bucitwe. Mucikozyanyo, ciindi baalu nobazyiba kuti umwi mumbungano wakacita cibi cipati, balapaila kulomba “busongo buzwa kujulu” kutegwa baalanganye makani munzila ya Jehova. (Jak. 3:17) Makanze aabo ngakugwasya sizibi kuti bamujole “kuzwa kunzila yakwe iilubide” ikuti kacikonzyeka. (Jak. 5:19, 20) Alimwi balasoleka kucita zyoonse nzyobakonzya kutegwa bakwabilile mbungano alimwi akuumbulizya baabo ibajatikizyidwe. (2Kor. 1:3, 4) Alimwi ciindi baalu nobazyiba kuti kuli cibi cipati cakacitwa, beelede kusaanguna kuzyiba twaambo toonse tujatikizyidwe calo icikonzya kutola ciindi. Balapaila akupa lulayo “cansaizi” iluzwa mu Magwalo akululamika yooyo wakacita cibi. (Jer. 30:11) Baalu tabeelede kufwambaana kapati kwaakosola makani. Ciindi baalu nobatobela busolozi bwa Jehova, basimbungano bayoobubona bubotu buzwa mpawo. w21.08 11 ¶12-13

Akaambo kanzala mu Israyeli, Naomi, mulumaakwe, alimwi abana bakwe bobilo bakalongela ku Moabu. Nobakali kooko, mulumi wa Naomi wakafwa. Bana ba Naomi bakakwata, pele cuusisya ncakuti, abalo bakazoofwa. (Rut. 1:3-5) Eezyi zintu zyuusisya zyakapa kuti Naomi atyompwe citaambiki. Wakatyompwa kapati cakuti wakatalika kuyeeya mbuli kuti Jehova ulamulwana. Lino amubone ncaakaamba kujatikizya Leza: “Janza lya Jehova lyandibukila.” “Singuzuzyoonse walekela kuti buumi bundiyumine kapati.” Wakayungizya kuti: “Ngu Jehova wandilwana alimwi Singuzuzyoonse nguwandiletela mapenzi.” (Rut. 1:13, 20, 21) Jehova ulizyi kuti, “mapenzi alakonzya kumusondosya musongo.” (Muk. 7:7) Wakasungula moyo wa Rute kuti amutondezye luyando lutamani Naomi. Rute wakali kuyanda kutondezya luyando kuli Naomi akumugwasya kutegwa atatyompwi akuti azyibe kuti Jehova wakacili kumuyanda. w21.11 9 ¶9; 10 ¶10, 13

Sena kubikkila maano kumikuli njotujisi lino caamba kuti tweelede kucileka kuyandaula nzila zyakuyungizya mulimo wesu kuli Jehova? Peepe! Tulakonzya kucita oobo alimwi tweelede kulibikkila mbaakani zyakumuuya izikonzya kutugwasya kuzumanana kusolekesya kuyaambele mumulimo wesu akugwasya bakwesu abacizyi. Tulazwidilila ciindi cabusongo alimwi acakulibombya notubikkila maano kubelekela bamwi muciindi cakulibikkila buyo maano lwesu. (Tus. 11:2; Mil. 20:35) Nimbaakani nzi nzyomukonzya kulibikkila? Amumulombe Jehova kutegwa amugwasye kuzyiba mbaakani nzyomukonzya kuzuzikizya. (Tus. 16:3) Sena inga mwacikonzya kuzuzikizya mbaakani yakuba mupainiya wakugwasyilizya naa waciindi coonse, kubelekela ku Beteli, naa kutola lubazu mukuyaka masena mucitilwa milimo ya Bwami? Naa ambweni inga mwacikonzya kwiiya mwaambo mupya kutegwa mwaambilizye makani mabotu nokuba kuyookambaukila bantu bakkala mucilawo cimbi. w21.08 23 ¶14-15

Jehova ulaluyandisya kapati luyando lutamani. (Hos. 6:6) Kwiinda mumusinsimi Mika, Leza wesu utwaambila “ikuyanda luyando lutamani.” (Mik. 6:8, bupanduluzi buyungizyidwe) Pele katutanacita oobo, tweelede kuzyiba ncolwaamba luyando lutamani. Ino luyando lutamani ninzi? Bbala lyakuti “luyando lutamani” lilajanika ziindi izili 100 mu Bbaibbele lya Busanduluzi Bwanyika Mpya lyamu Chitonga. Ino lwaamba nzi? Kweelana a “Bupanduluzi Bwamabala Aamu Bbaibbele” ibujanika mubusanduluzi bwa Bbaibbele eeli, lwaamba “luyando luboola akaambo kakulyaaba, kusyomeka alimwi akukakatila. Kanji-kanji lilabelesyegwa kwaamba luyando Leza ndwajisi kubantu, alimwi aluyando ndobatondezyanya bantu.” Jehova ncikozyanyo ciinda kubota mukutondezya luyando lutamani. Nkakaambo kaako Mwami avida ncaakakulwaizyigwa kwaamba kuti: “O Jehova, luyando lwako lutamani lulisikide kujulu . . . Eelo kaka taluliboteli luyando lwako lutamani, O Leza!” (Int. 36:5, 7) Mbubwenya mbuli Davida, sena tulalumba kapati kuluyando lwa Leza lutamani? w21.11 2 ¶1-2; 3 ¶4

Mukwasyi wabakombi ba Jehova ubikkilizya Jesu, “imutaanzi kuzyalwa kuzilenge zyoonse,” alimwi abangelo banji kapati. (Kol. 1:15; Int. 103:20) Ciindi Jesu naakali anyika, wakatondezya kuti bantu basyomeka balakonzya kubona Jehova kuti Mbaausyi. Naakali kubandika abasikwiiya bakwe, Jesu wakaamba Jehova kuti “Taata alimwi a Bauso.” (Joh. 20:17) Alimwi ciindi notwalyaaba kuli Jehova akubbapatizyigwa, tuba cibeela camukwasyi wabakwesu abacizyi basiluyando. (Mk. 10:29, 30) Jehova ngu Taata siluyando. Jesu uyanda kuti katubona Jehova kuti muzyali siluzyalo alimwi siluyando ngotukonzya kubandika limwi ciindi cili coonse, kutali yooyo uutwaambila buyo cakucita. Wakatalika mupailo wakwe wacikozyanyo amajwi aakuti: “Taateesu.” Jesu naakatwaambila kwiita Jehova kuti “Singuzuzyoonse,” “Mulengi,” naa “Mwami walyoonse alyoonse,” mazina woonse aayelela alimwi aamu Magwalo. (Matl. 49:25; Is. 40:28; 1Tim. 1:17) Muciindi caboobo, Jesu wakabelesya bbala lyaluyando lyakuti “Taata.” w21.09 20 ¶1, 3

Mwami Manase tanaakabikkila maano kukucenjezya Jehova nkwaakamupa kwiinda mubasinsimi bakwe. Mpoonya, ‘Jehova wakaletela Juda basilutwe bampi zyabasikalumamba zyamwami wa Asuri, eelyo bakamujata Manase angobyo akumwaanga nketani zyamukuba kumane bakamutola ku Babuloni.’ Naakali muntolongo ku Babuloni, kuboneka kuti Manase wakazinzibala kuyeeya kujatikizya zintu nzyaakacita. “Wakazumanana kulibombya kapati kubusyu bwa Leza wabamausyi.” Wakacita azimwi zinji. “Wakakombelezya Jehova Leza wakwe kuti amufwide luzyalo.” Mane buya, Manase “wakazumanana kupaila kuli Leza.” (2Mak. 33:10-12) Mukuya kwaciindi, Jehova wakayiingula mipailo ya Manase. Wakabona kuti Manase wacinca ncobeni kweelana azintu nzyaakaamba mumipailo yakwe. Jehova wakakumvwa kulomba kwa Manase alimwi wakamupilusya kuba mwami. Manase wakabeleka canguzu kutegwa atondezye kuti wakeempwa ncobeni. w21.10 4 ¶10-11

Akula a Purisila bakeelede kuzwa kubusena nkobakazyibide, kujana ŋanda mpya akutalika mulimo wabo wakusuma matente mubusena bupya. Muŋanda yabo mpya ku Korinto, Akula a Purisila bakatalika kugwasya mbungano yakubusena oobo alimwi akubelekela antoomwe amwaapostolo Paulo kuyumya bakwesu ooko. Kumbele, bakalongela kuminzi iimbi ooko ikwakali kuyandika bakambausi banji. (Mil. 18:18-21; Rom. 16:3-5) Eelo kaka bakaba abuumi bulaampindu kapati antoomwe! Banabukwetene mazuba aano balakonzya kumwiiya Purisila a Akula kwiinda mukubikka ziyandika zya Bwami mubusena bwakusaanguna. Ciindi cibotu kapati bantu bobilo nobeelede kubandika mbaakani zyabo mubuumi ndileelyo nobeebana. Ciindi banabukwetene nobalibikkila mbaakani mumulimo wa Jehova alimwi akubeleka canguzu kutegwa bazizuzikizye mbaakani eezyo, balaba azyoolwe zinji zyakubona Jehova mbwabagwasya mubuumi bwabo.—Muk. 4:12. w21.11 17 ¶11-12

Cilisalede kuti, tweelede kwaabikkila maano malailile aa Leza aajatikizya kulemeka bazyali. Alimwi mutalubi kuti malailile ngotujana ku Levitiko 19:3 aakulemeka bazyali, atobelana amajwi aakuti: “Mweelede kusalala nkaambo mebo nde Jehova Leza wanu ndilasalala.” (Lev. 19:2) Kweelana amalailile aa Jehova aajatikizya kulemeka bazyali, tweelede kulibuzya kuti, ‘Sena ndilabalemeka bazyali bangu?’ Kuti kamulimvwa kuti tiimwakali kucita kabotu kulubazu oolu, ecino nceciindi cakubambulula. Tamukonzyi kucinca zintu zyakacitika kale, pele mulakonzya kucita kufwumbwa nzyomukonzya lino kujana ciindi cakuba abazyali banu alimwi akubagwasya. Ambweni mulakonzya kubikka bubambe bwakunoobaswaya-swaya. Naa ambweni kuli mbomukonzya kubagwasya kuula nzyobayandika, ikubagwasya kuyumya cilongwe cabo Jehova, kubakulwaizya alimwi akubaumbulizya. Kucita boobu kuleendelana ancolyaamba bbuku lya Levitiko 19:3. w21.12 4-5 ¶10-12

Mwami Davida, muntu iwakacita zibi zipati. Mucikozyanyo, wakacita bumambe a Bati-seba, alimwi buya wakapa kuti mulumaakwe ajaigwe. (2Sam. 11:2-4, 14, 15, 24) Akaambo kaceeci, Davida wakaliletela mapenzi walo amukwasyi wakwe, kubikkilizya abamakaintu bakwe bambi. (2Sam. 12:10, 11) Aciindi cimbi, Davida wakaalilwa kumusyoma cakumaninina Jehova, ciindi Davida naakapa malailile aakuti basikalumamba bana Israyeli babalwe kakunyina kuzumizyigwa a Jehova. Ino ncinzi cakacitika? Bana Israyeli ibatandila ku 70,000 bakafwa acilwazi! (2Sam. 24:1-4, 10-15) Sena Davida inga mwamubeteka kuti teeleli kulekelelwa a Jehova? Pele Jehova kunyina naakayeeya boobo. Wakabikkila maano kukusyomeka kwa Davida mubuumi bwakwe boonse alimwi akuti wakeempwa kuzwa ansi amoyo. Aboobo Jehova wakamulekelela Davida kuzibi zipati eezyi. Jehova wakalizyi kuti Davida wakali kumuyanda kapati alimwi wakali kuyanda kucita ciluzi. Sena tamulumbi kuti Leza wesu ubikkila maano kuzintu zibotu nzyotucita?—1Bam. 9:4; 1Mak. 29:10, 17. w21.12 19 ¶11-13

Jesu wakatondezya lweetelelo kubalema. Amuyeeye mulumbe ngwaakatuma kuli Johane Mubbapatizi wakuti: ‘Boofwu lino balabona, balema baleenda, basicinsenda balasalazyigwa, basinkematwi balamvwa, alimwi abafwide balabusyigwa.’ Nobakamana kubona maleele aa Jesu, ‘bantu boonse bakatembaula Leza.’ (Lk. 7:20-22) Banakristo balayanda kumwiiya Jesu kwiinda mukutondezya lweetelelo kubalema. Tulatondezya luzyalo alimwi akubakkazikila moyo bantu bali boobo. Nokuba boobo, Jehova tatupede nguzu zyakucita maleele mbuli Jesu. Pele tulijisi coolwe cakwaambila boofwu kumubili naa kumuuya makani mabotu aajatikizya paradaiso, mwalo bantu mobayooponesyegwa cakumaninina kumuuya alimwi akumubili. (Lk. 4:18) Makani mabotu aaya ali mukubagwasya kale banji kutembaula Leza. w21.12 9 ¶5

Jakobo wakabelesya Magwalo ciindi naakali kuyiisya. Wakabelesya Jwi lya Leza kugwasya baswiilizi bakwe kubona kuti lyoonse Jehova ulabalumbula aabo, mbuli Jobu, ibasyomeka kulinguwe. Jakobo wakali kuyiisya kwiinda mukubelesya mabala mauba-uba alimwi amunzila iitobeleka. Kwiinda mukucita boobo, kunyina naakali kuyanda kulipangila mpuwo, pele wakali kupa Jehova bulemu. Ncotwiiya: Atwaambe mulumbe uutakatazyi alimwi akuyiisya kuzwa mu Jwi lya Leza. Ciindi notuyiisya bamwi, makanze eesu taali aakutondezya luzyibo ndotujisi, pele tweelede kubatondezya luzyibo ndwajisi Jehova alimwi ambwabalanganya. (Rom. 11:33) Tulakonzya kwaazuzikizya makanze aaya kwiinda mukubelesya Magwalo lyoonse. Mucikozyanyo, muciindi cakwaambila basikwiiya Bbaibbele ncotunga twacita ikuti notwali mubukkale bwabo, tweelede kubagwasya kuyeeya zikozyanyo zyamu Bbaibbele alimwi akubona Jehova mbwayeeya ambwalimvwa. Mpoonya bayooba aluyandisisyo lwakukkomanisya Jehova, ikutali ndiswe. w22.01 11 ¶9-10

Leza uyanda kuti katucita zinji kunze buyo lyakutabacitila zintu zibyaabi bantuma. Kucita boobo kulayandika kapati ku Munakristo uuyanda kukkomanisya Leza. Amubone Jesu mbwaakakankaizya mbouyandika kapati mulawo uuli ku Levitiko 19:18. Mu Farisi wakabuzya Jesu kuti: “Ino nguuli mulawo mupati mu Mulawo?” Jesu wakaingula kuti, ‘mulawo mupati alimwi wakusaanguna’ ngwakuyanda Jehova amoyo wako woonse, abuumi bwako boonse alimwi amizeezo yako yoonse. Mpoonya Jesu wakazubulula Levitiko 19:18 naakati: “Alimwi ngooyu wabili uuli mbuli yooyu: ‘Weelede kuyanda mweenzinyoko mbubonya mbuli mboliyanda omwini.’” (Mt. 22:35-40) Kuli nzila zinji kapati motukonzya kutondezya luyando kuli bamwi. Nzila imwi nkwiinda mukutobela lulayo iluli ku Levitiko 19:18. Lwaamba kuti: “Utapilusizyi muntu cibi nokuba kuba amfwundiilili.” w21.12 10-11 ¶11-13

Jesu wakatandabika janza lyakwe akumuvwuna mwaapostolo Petro. Cilayandika kapati kuyeeya kuti Petro wakacikonzya kweenda atala amaanzi lilikke buyo eelyo naakalangide kuli Jesu. Pele Petro naakalanga guwo, wakayoowa kapati akudooneka; mpoonya wakatalika kubbila. (Mt. 14:24-31) Tulakonzya kwiiya kucikozyanyo ca Petro. Ciindi Petro naakazwa mubwato akweenda atala aamaanzi, tanaakali kulangila kuti ulanyonganizyigwa akutalika kubbila. Wakali kuyanda kuzumanana kweenda atala aamaanzi kusikila nkwaakabede Simalelaakwe. Pele wakaalilwa kuzumanana kubikkila maano kumbaakani eeyo. Masimpe kuti tatukonzyi kweenda atala aamaanzi, pele tulajana zintu zisunka lusyomo lwesu. Ikuti naa twacileka kubikkila maano kuli Jehova akuzisyomezyo zyakwe, tulatalika kubbila kumuuya. Aboobo nokuba kuti twajana mapenzi aakatazya mubuumi bwesu, tweelede kuzumanana kugamika mizeezo yesu kuli Jehova alimwi akunguzu nzyajisi zyakutugwasya. w21.12 17-18 ¶6-7

Kupaila, kwiiya alimwi akuzinzibala kuyeeya nzibeela zyabukombi bwesu. Ciindi notupaila, tubandika a Taateesu wakujulu, walo uutuyanda kapati. Ciindi notwiiya Bbaibbele, ‘tujana luzyibo lwa Leza,’ walo uuli ngo Kasensa kabusongo boonse. (Tus. 2:1-5) Ciindi notuzinzibala kuyeeya, tulanga-langa bube bwa Jehova bubotu amakanze aakwe aagambya aali muzilenge akubona mbotujatikizyidwe mumakanze aayo. Sena tulakonzya kuyeeya nzila mbotu mbotukonzya kucibelesya kabotu ciindi cesu? Pele ncinzi cikonzya kutugwasya kucita boobu? Kuti kacikonzyeka, amusale busena buumwine. Amubone cikozyanyo ca Jesu. Katanatalika mulimo wakwe waanyika, wakatola mazuba aali 40 munkanda. (Lk. 4:1, 2) Mubusena oobu buumwine, Jesu wakali kupaila kuli Jehova alimwi akuzinzibala kuyeeya kujatikizya kuyanda kwa Bausyi. Cakutadooneka, kucita boobu kwakamugwasya kulibambila masunko ngaakali kulangila kujana. w22.01 27-28 ¶7-8

Mwaalu naa mukwesu umwi uusimide ulakonzya kwaamba cintu cimwi ncotweelede kubelekelawo. Kuti muntu umwi uutuyanda kapati watupa lulayo lwamu Bbaibbele, tweelede kulutambula alimwi akulubelesya. Mubwini, cilakonzya kutukatazya kapati kutambula lulayo, kwaambisya lulayo lwacigaminina. Ambweni tulakonzya akunyema buya. Nkaambo nzi? Nokuba kuti tulazumina kuti tatulondokede, cilakonzya kutukatazya kutambula lulayo ciindi muntu umwi naatwaambila cacigaminina bulubizi mbotwacita. (Muk. 7:9) Zimwi ziindi tulakonzya kupa twaambo twakulitamizya, kwaadooneka makanze aasikutupa lulayo naa kunyema kweelana anzila mbwaatupa lulayo. Ambweni buya tulakonzya kumujanina twaambo, katuyeeya kuti: ‘Ino ujisi nguzu nzi zyakundipa lulayo? Tee awalo ulalubizya!’ Alimwi kuti lulayo tiitwalukkomanina, tulakonzya kutalubikkila maano naa kulomba muntu uumwi kutegwa atupe lulayo ndotukonzya kukkomanina. w22.02 8-9 ¶2-4

Sena munyika mpya ya Leza tuyooba abuyumuyumu bwakusyoma nzila ya Jehova yakucita zintu? Mucikozyanyo, amubone cakacitika ciindi cisyoonto buyo bana Israyeli nobakazwa mubuzike mu Egepita. Bantu bamwi bakatalika kutongooka akaambo kakuyeeya zyakulya zibotu nzyobakali kukkomanina okuya, alimwi bakatalika kutongooka mana, cipego icakali kuzwa kuli Jehova. (My. 11:4-6; 21:5) Sena andiswe tunoojisi mizeezo iikozyenye aakwiinda mapenzi mapati? Tatuzyi naa kunooli mulimo mupati buti wakugwisya zintu izyakanyonyooka alimwi asyoonto-syoonto kubambulula nyika kuba paradaiso. Kulangilwa kuti, kumatalikilo kunooli mulimo mupati alimwi buumi tabunooli buuba-uba pe. Sena tuyootongooka akaambo kazintu Jehova nzyayootupa aciindi eeco? Kuti katulumba lino, tuyoolumba kapati zintu nzyayootupa ciindi eeco. w22.02 7 ¶18-19

Mubusinsimi ibujanika kulugwalo lwa Zekariya 8:23, mabala aakuti “mu Juda” alimwi aakuti “Leza ulaandinywe” aamba nkamu yomwe, nkokuti bananike basyeede. (Rom. 2:28, 29) Mpoonya “bantu bali kkumi bazwa mumyaambo yoonse yamasi” baiminina bambelele zimbi. ‘Balajatisya’ nkokuti cakusyomeka balakakatila kubananike, kubasangana mubukombi busalala. Mbubwenya buyo, ikuzuzikizya businsimi ibuli kuli Ezekieli 37:15-19, 24, 25, Jehova wakapa bananike alimwi abambelele zimbi kubeleka antoomwe calukamantano. Businsimi bwaamba zyatusamu tobilo. Aabo bajisi bulangizi bwakujulu bali mbuli kasamu “ka Juda” (musyobo bami ba Israyeli mobakasalwa), mpoonya aabo bajisi bulangizi bwaanyika bali mbuli kasamu “ka Efraimu.” Jehova wakali kuyookamantanya nkamu zyobilo eezyi kutegwa zibe “kasamu komwe.” Eeci caamba kuti balabeleka calukamantano kabeendelezyegwa a Mwami wabo omwe, Kristo Jesu.—Joh. 10:16. w22.01 22 ¶9-10

Jesu wakaamba kujatikizya baabo ibakali kupa zipego zyaluse kubacete pele ibakali kuyanda kuti bamwi bazyibe akubalumbaizya. Nokuba kuti milimo eeyi yakali mibotu, Jehova tanaakabakkomanina. (Mt. 6:2-4) Tulakonzya kuba bantu bali kabotu ncobeni lilikke buyo kuti katucita cintu ciluzi amakanze mabotu. Aboobo mulakonzya kulibuzya kuti: ‘Kunze buyo lyakuzyiba cintu ciluzi sena ndilacicita? Makanze nzi ngondijisi nondicita zintu zibotu?’ Jehova ngusimilimo, alimwi muuya wakwe ninguzu zibeleka. (Matl. 1:2) Aboobo cibeela cimwi acimwi camucelo wamuuya cilakonzya kutukulwaizya kubweza ntaamu. Mucikozyanyo, sikwiiya Jakobo wakalemba kuti: “Lusyomo lunyina milimo lulifwide.” (Jak. 2:26) Oobo mbocibede akuzibeela zimbi zyamucelo wamuuya wa Leza. Aboobo lyoonse notuzitondezya zibeela eezyi, tupa bumboni bwakuti muuya wa Leza ulabeleka mulindiswe. w22.03 11-12 ¶14-16

Nokuba kuti tulacita milimo yakumuuya iindene-indene alimwi akucitila bamwi zintu zibotu, mwaapostolo Petro wakaamba cintu cimwi ciyandika kapati. Katanatukulwaizya kuba bantu basalala mubukkale bwesu, Petro wakaamba kuti: “Mumizeezo yanu amulibambile kucita milimo canguzu.” (1Pet. 1:13) Ino eeci cibikkilizya nzi? Petro wakaamba kuti banabokwabo Kristo bananike bakali ‘kuyakwaambilizya koonse-koonse bulemu bwayooyo’ iwakabaita. (1Pet. 2:9) Alimwi buya, Banakristo boonse mazuba aano balijisi coolwe cakucita mulimo ooyu uuyandika kapati, mulimo uugwasya bantu banji kwiinda mulimo uumbi uuli woonse ngotukonzya kucita. Eelo kaka eeci ncoolwe cilibedelede kubantu ba Leza basalala kukambauka alimwi akuyiisya cabusungu! (Mk. 13:10) Ciindi notusolekesya kucita boobu, tutondezya kuti tulamuyanda Leza alimwi abamwi. Alimwi tulatondezya kuti tuyanda kuba bantu “basalala” mubukkale bwesu boonse. w21.12 13 ¶18

Mwaapostolo Paulo wakali kubabona munzila yeelede bakwesu abacizyi. Paulo wakalizyi kuti ikuti muntu walubizya, tacaambi kuti muntu ooyo mubi. Wakali kubayanda bakwesu abacizyi alimwi wakali kubikkila buyo maano kubube bwabo bubotu. Ciindi nobakali kukatazyigwa kucita ciluzi, wakalizyi kuti bakalijisi makanze mabotu, pele bayandika buyo lugwasyo. Amubone Paulo mbwaakagwasya bacizyi bobilo bamumbungano yaku Filipi. (Flp. 4:1-3) Kuboneka kuti Yuwodiya a Sintike bakaimpana akuleka kumvwana. Paulo kunyina naakabanyemena naa kubabona munzila iitaluzi, pele wakabikkila maano kubube bwabo bubotu. Bacizyi aaba basyomeka bakamubelekela Jehova kwaciindi cilamfwu. Paulo wakalizyi kuti Jehova ulabayanda. Akaambo kakuti Paulo wakababona munzila iiluzi bacizyi aaba, wakabakulwaizya kuti babambe luumuno. Akaambo kakuti Paulo wakali kubikkila maano kubube bubotu bwabamwi, wakazumanana kuba alukkomano alimwi akuba azilongwe ziyumu abaabo ibakali mumbungano yaku Filipi. w22.03 30 ¶16-18

Luumuno ndwapa Jehova luyootupa kukkalwa moyo alimwi akutugwasya kuyeeya kabotu. Eeci ncecakacitikila mucizyi wazina lya Luz. Wakaamba kuti: “Ndilimvwa kulendelelwa. Zimwi ziindi, kulimvwa boobo kundipa kuyeeya kuti Jehova tandiyandi. Pele ikuti naa ndatalika kulimvwa boobo, ndilamwaambila Jehova mpoonya-mpoonya mbondilimvwa. Mupailo undipa kulimvwa kabotu.” Kweelana amajwi aamucizyi ooyu, tulakonzya kujana luumuno kwiinda mumupailo. (Flp. 4:6, 7) Tulizyi kuti Jehova a Jesu bayootugwasyilizya twaakufwidwa muyandwa wesu. Tulakulwaizyigwa kukambauka alimwi akuyiisya calubomba nkaambo Jehova Leza a Jesu Kristo balabutondezya bube oobu. Alimwi tulaumbulizyigwa kuzyiba kuti Jehova a Mwanaakwe uuyandwa balatweetelela mukulezya kwesu alimwi bayanda kutugwasya kuti tuzumanane kuliyumya. Tulangila buzuba Jehova mbwayoocizuzikizya cisyomezyo eeci cikkomanisya ‘cakusindula misozi yoonse kumeso eesu’!—Ciy. 21:4. w22.01 15 ¶7; 19 ¶19-20

Jesu wakaamba milyango yobilo iindene iisololela kunzila zyobilo ziindene, nzila “mpati” alimwi anzila “nsyoonto.” (Mt. 7:14) Kunyina nzila yatatu. Tweelede kulisalila nzila njotuyanda kweendela mumo. Eeci ncakusala cipati, nkaambo ninzila buyo yomwe iisololela kubuumi butamani. Bantu banji bali munzila “mpati” nkaambo tacikatazyi kweenda mulinjiyo. Cuusisya ncakuti, banji basala kuzumanana kweendela munzila eeyi alimwi akucita mbubwenya bantu boonse beendela mulinjiyo mbobacita. Balaalilwa kuzyiba kuti Saatani Diabolosi nguukulwaizya bantu kweendela munzila eeyi, alimwi nzila yakwe isololela kulufwu. (1Kor. 6:9, 10; 1Joh. 5:19) Mukwiimpana anzila “mpati,” nzila imwi “ninsyoonto,” alimwi Jesu wakaamba kuti mbasyoonto baijana. Nkaambo nzi? Amubone kuti, mukapango katobela, Jesu ucenjezya basikumutobela kujatikizya basinsimi bakubeja.—Mt. 7:15. w21.12 22-23 ¶3-5