February

Ino lugwalo lwabuzuba bwasunu lwaamba nzi? Kweelana ambwaakapandulula Jesu, eeci caamba kuyanda bamwi kwiinda mbotuliyanda tobeni, naa kuba aluyando lukonzya kupa Munakristo kufwida musyominyina ikuti kwayandika. Jwi lya Leza lituyiisya kuti luyando mbube buyandika kapati. Mucikozyanyo, bunji bwabantu balaayandisya kapati magwalo aaya aatobela: “Leza nduyando.” (1Joh. 4:8) “Weelede kuyanda simukobonyoko mbubonya mbuli mboliyanda omwini.” (Mt. 22:39) “Luyando lulavwumba zibi zinji kapati.” (1Pet. 4:8) “Luyando talumani.” (1Kor. 13:8) Magwalo aaya alimwi aamwi alatondezya kuti cilayandika kapati kutondezya bube oobu butaliboteli. Tulizyi oobo akaambo kakuti luyando luzwa kuli Jehova. Alimwi balikke aabo bajisi muuya wakwe akulongezyegwa anguwe mbobakonzya kuba aluyando lwini-lwini akati kabo. (1Joh. 4:7) Nkakaambo kaako Jesu wakaamba kuti balikke basikumutobela bakasimpe mbobatondezya luyando lwini-lwini. Kweelana ambwaakasinsima Jesu, bantu banji bacikonzya kubazyiba basikumutobela bakasimpe akaambo kaluyando ndobatondezyanya. w23.03 27-28 ¶5-8

Sena muyandika kuyungizya bube bwakulekelela bamwi? Mulakonzya kutalika kubala akuzinzibala kuyeeya zikozyanyo zyamu Bbaibbele izyabaabo bakalekelela bamwi kuzwa ansi amoyo alimwi abaabo ibatakacita oobo. Amubone cikozyanyo ca Jesu. Wakalyaaba kulekelela bamwi. (Lk. 7:47) Kunyina naakabikkila maano kukulubizya kwabo, pele wakabikkila maano kuzintu zibotu nzyobakali kukonzya kucita. Mukwiimpana, ba Farisi bamumazuba aa Jesu “bakali kubona bamwi kuti mbabuyo.” (Lk. 18:9) Mwamana kuzinzibala kuyeeya zikozyanyo eezyi, amulibuzye kuti: ‘Ncinzi ncondibona muli bamwi? Mbube nzi mbobajisi mbondisala kubikkila maano?’ Kuti naa cilamuyumina kulekelela muntu umwi, amulembe bube bubotu boonse mbwajisi muntu ooyo. Mwamana amulibuzye kuti: ‘Ino Jesu umubona buti muntu ooyu? Sena inga wamulekelela?’ Kuti twacita oobu, cilakonzya kutugwasya kucinca mbotuyeeya. Kumatalikilo, ambweni inga twayandika kubeleka canguzu kutegwa tumulekelele muntu wakatulubizyila. Pele kuti twazumanana kusololekesya, ciyootubila kulekelela. w22.04 23 ¶6

Mubbuku lya Ciyubunuzyo, basinkondonyina Leza balapandululwa munzila yamaambilambali. Mpoonya tulabona kujatikizya banyama banji. Mucikozyanyo, kuli ‘munyama uuzwa mulwizi.’ Ujisi “meja aali kkumi amitwe iili ciloba.” (Ciy. 13:1) Mpoonya kwakatobela ‘munyama uumbi kuzwa munyika.’ Munyama ooyo waambaula mbuli simwaaba akupa kuti “mulilo ulokele anyika kuzwa kujulu.” (Ciy. 13:​11-13) Kunze lyaboobo, tubona uumbi “munyama uusalala pyu” uutantidwe amukaintu muvwuule. Banyama aaba botatwe baiminina basinkondonyina Leza ibali kulwana Jehova Leza alimwi a Bwami bwakwe kwaciindi cilamfwu. Aboobo cilayandika kubazyiba. (Ciy. 17:​1, 3) Tweelede kumvwisya ncobaiminina banyama alimwi amukaintu muvwuule. Kutegwa tucite oobo, atulekele Bbaibbele kuti litupandulwide. Bunji bwazitondezyo zijanika mubbuku lya Ciyubunuzyo, zilipandulwidwe kale mumabbuku aamwi aamu Bbaibbele. w22.05 8-9 ¶3-4

Babelesi ba Jehova bamwi cilabayumina kuzumina ciindi bukkale bwabo nobwacinca akaambo kakucembaala naa kuciswa. Kuti naa zimwi ziindi mulatyompwa akaambo kakulezya kwanu, amulibuzye kuti, ‘Ncinzi Jehova ncayanda kulindime?’ Uyanda buyo kuti kamucita nzyomukonzya kweelana abukkale bwanu lino. Amuyeeye bukkale oobu: Mucizyi uujisi myaka yakuma 80 ulatyompwa akaambo kakuti tacicikonzyi kubeleka ciindi cinji mumulimo wamumuunda mbuli mbwaakali kubeleka kajisi myaka yakuma 40. Ulimvwa kuti nokuba kuti wabeleka kusikila mpagolela, tamukkomanisyi Jehova. Pele sena masimpe aayo? Amubone kaambo aaka. Ikuti mucizyi ooyu wakali kucita nzyakonzya naakajisi myaka yakuma 40 alimwi ucicita nzyakonzya mumyaka yakuma 80, nkokuti tanaleka kucita nzyakonzya. Ikuti naa twabeleka kusikila mpotugolela, Jehova uyootwambila kuti: “Wacita kabotu!”—(Amweezyanisye Matayo 25:​20-23.) Tulakonzya kuzumanana kuba alukkomano ikuti twabikkila buyo maano kuzintu nzyotukonzya kucita, ikutali kuzintu nzyotutakonzyi kucita. w22.04 10 ¶2; 11 ¶4-6

Ciyubunuzyo caandaano 21 cikozyanisya ba 144,000 kumunzi weebeka kapati, iwiitwa kuti “Jerusalemu Mupya.” Munzi ooyu wakajisi mabwe aantalisyo aali 12 aakalembedwe “mazina aali 12 aabaapostolo bali 12 ba Mwanaambelele.” (Ciy. 21:​10-14; Ef. 2:20) Munzi ooyu wacikozyanyo uliindene kapati aminzi iimbi. Ujisi mugwagwa mupati wamunzi wangolida yini-yini, milyango yangale iili 12, bwaanda antalisyo zyakabotezyedwe amabwe mayandisi, alimwi ambazu zyamunzi zipimidwe kabotu-kabotu. (Ciy. 21:​15-21) Pele Johane wakabona kuti kuli cintu cimwi icatakaliko! Amubone ncatwaambila: “Lino tiindakabona tempele mulinguwo, nkaambo Jehova Leza Singuzuzyoonse alimwi a Mwanaambelele ngotempele lyanguwo. Alimwi munzi ooyu tauyandiki kumunikilwa azuba naa mwezi pe, nkaambo bulemu bwa Leza bwakali kuumunikila, alimwi lambe lyanguwo lyakali Mwanaambelele.” (Ciy. 21:​22, 23) Aabo ibali cibeela ca Jerusalemu Mupya bayooba antoomwe a Jehova.—Heb. 7:27; Ciy. 22:​3, 4. w22.05 17-18 ¶14-15

Nokuba kuti Jehova Mulengi wesu, Sikutupa Mulawo, Mubetesi, pele alimwi ngu Taateesu wakujulu siluyando. (Int. 100:3; Is. 33:22) Ciindi nitwabisya alimwi akweempwa ncobeni, ulilibambilide alimwi ulayandisisya kutulekelela. (Int. 86:5) Kwiinda mumusinsimi Isaya, Jehova caluyando usyomezya kuti: “Nokuba kuti zibi zyanu zilasalala pyu, zilatubisyigwa buu mbuli caanda.” (Is. 1:18) Mbwaanga tatulondokede, toonse tulaamba akucita zintu zinyemya bamwi. (Jak. 3:2) Nokuba boobo, eeci tacaambi kuti tatukonzyi kuba acilongwe ciyumu ambabo. Tulakonzya kuba acilongwe ambabo kuti twaiya kulekelela. (Tus. 17:9; 19:11; Mt. 18:​21, 22) Ciindi nitwalubizyilana mutuntu tusyoonto-syoonto, Jehova uyanda kuti katulekelelana. Tulijisi twaambo tubotu itweelede kutupa kucita boobo. Alimwi buya, Jehova ‘ulatulekelela cakumaninina.’—Is. 55:7. w22.06 8 ¶1-2

Nokuba kuti tweelede kweeleba muuya wakulyeezyanisya abamwi, tulakonzya kugwasyigwa kwiinda mukwiiya kucikozyanyo cababelesi ba Jehova basyomeka. Atulange-lange cikozyanyo ca Jesu. Nokuba kuti wakalilondokede, tulakonzya kwiiya bube bwakwe bubotu alimwi ambwaakali kucita zintu. (1Pet. 2:21) Ciindi notusolekesya kusikila mpotugolela kutobela cikozyanyo cakwe, tulakonzya kumukkomanisya Jehova. Mu Jwi lya Leza, tulijisi zikozyanyo zinji zyabamaalumi abamakaintu basyomeka. Nokuba kuti tiibakalondokede, tulakonzya kubaiya. Amuyeeye kujatikizya Mwami Davida, ooyo Jehova ngwaakaita kuti “imwaalumi weendelana amoyo wangu.” (Mil. 13:22) Pele Davida wakacita zibi zipati. Nokuba boobo, ncikozyanyo cibotu kulindiswe. Nkaambo nzi? Nkaambo kunyina naakapa twaambo twakulitamizya. Muciindi caboobo, wakalutambula lulayo lwanguzu ndwaakapegwa alimwi akweempwa ncobeni kukulubizya nkwaakacita. Aboobo Jehova wakamulekelela.—Int. 51:​3, 4, 10-12. w22.04 13 ¶11-12   

Bbaibbele lyaamba kuti lufwu ngusinkondo. (1Kor. 15:​25, 26) Zimwi ziindi tulakonzya kuyoowa kufwa, kwaambisya kuti swebo naa bayandwa besu kabaciswa kapati. Nkaambo nzi ncotuluyoowa lufwu? Nkaambo kakuti Jehova wakatulenga aluyandisisyo lwakupona kukabe kutamani. (Muk. 3:11) Pele kuyoowa lufwu kulakonzya kutugwasya ikukwabilila buumi bwesu. Kulakonzya kutupa kuti katulya zyakulya zijisi busani buli kabotu, kunyanyaasya mubili, kulomba lugwasyo kuli bamadokota nokuyandika alimwi akweeleba kucita zintu izikonzya kubikka buumi bwesu muntenda. Saatani ulizyi kuti tulabuyanda kapati buumi bwesu. Aboobo waamba kuti tulakonzya kupa zintu zyoonse nzyotujisi kutegwa tukwabilile buumi bwesu. (Job. 2:5) Eelo kaka Saatani mubeji! Pele, mbwaanga ‘ulijisi nguzu zyakuleta lufwu,’ Saatani ubelesya kuyoowa lufwu nkotwakazyalwa ankuko kutupa kuti tumuzangile Jehova.—Heb. 2:​14, 15. w22.06 18 ¶15-16   

Ciindi mulimo wesu noulesyedwe, inga kwayandika kuti katuswaangana mutubunga tusyoonto. Aboobo cilayandika kapati kwiinda lyoonse kubamba luumuno akati kesu. Amulwane Saatani, ikutali kulwana muli canu. Mutabikkili maano kukulubizya kwabasyominyoko alimwi amusolekesye kumana mazwanga cakufwambaana. (Tus. 19:11) Amubweze ntaamu kutegwa mugwasyanye. (Tit. 3:14) Lugwasyo kabunga kamulimo kamwi ndokakapa mucizyi umwi iwakali kuyandika lugwasyo lwakabakulwaizya boonse ibakali mukabunga. Bakakamantana mbuli mukwasyi. (Int. 133:1) Bakwesu abacizyi banji balamubelekela Jehova nokuba kuti mfwulumende zilaukasya mulimo wesu. Ibamwi bali muntolongo akaambo kalusyomo lwabo. Tulakonzya kubapailila balo, mikwasyi yabo alimwi abaabo ibabikka lwaanguluko lwabo muntenda kutegwa bape bakwesu abacizyi aaba zintu nzyobayanda akubaiminina munkuta. (Kol. 4:​3, 18.) Aboobo mutazyuubyi-ubyi nguzu nzyoijisi mipailo yanu!—2Tes. 3:​1, 2; 1Tim. 2:​1, 2. w22.12 26-27 ¶15-16

Bana kanji-kanji balaiya kwiinda mukulangilila bazyali. Mubwini, kunyina muzyali uulondokede. (Rom. 3:23) Nokuba boobo, bazyali basongo beelede kusolekesya kuba cikozyanyo cibotu kubana babo. Muzyali umwi wakati: “Bana bali mbuli cisani cinywida maanzi, balamvwa zyoonse nzyotwaamba akubona nzyotucita.” Wakayungizya kuti: “Balakonzya kuzyiba kuti cikozyanyo cesu taceendelani azintu nzyotusola kubayiisya.” Aboobo kuti katuyanda kuyiisya bana besu kumuyanda Jehova, luyando ndotujisi kulinguwe lweelede kuti kaluli luyumu alimwi kalulibonya. Kuli nzila zinji zikonzya kugwasya bazyali kuyiisya bana babo ikumuyanda Jehova. Mukwesu Andrew uujisi myaka iili 17 wakaamba kuti: “Bazyali bangu lyoonse bakali kundiyiisya kujatikizya mbociyandika kapati kupaila. Lyoonse masiku, Bataata bakali kupaila andime nokuba kuti ndapaila kale. . . . Lino ndilaangulukide kubandika a Jehova mumupailo alimwi akumubona kuti ngu Taata siluyando.” Nobazyali, lyoonse kamuyeeya kuti luyando ndomujisi kuli Jehova lulakonzya kubagwasya bana banu kumuyanda Jehova. w22.05 28 ¶7-8

Kutegwa tulibambile kubbapatizyigwa, cintu cakusaanguna ncotweelede kucita nkweempwa zibi zyesu kuzwa ansi aamoyo. (Mil. 2:​37, 38) Ikuti naa tweempwa kuzwa ansi aamoyo, tuyoocinca ncobeni. Sena mwakaleka kucita zintu zili zyoonse zitamukkomanisyi Jehova, mbuli kupona buumi bwakutalilemeka, kubelesya tombwe naa majwi aatali kabotu? (1Kor. 6:​9, 10; 2Kor. 7:1; Ef. 4:29) Amusolekesye kucinca. Amubandike ayooyo uumuyiisya Bbaibbele, naa amulombe lugwasyo kubaalu bambungano. Ikuti kamucili bana alimwi mukkala abazyali banu, amuzumanane kubalomba kutegwa bamugwasye kuleka zilengwa zili zyoonse zibyaabi izikonzya kupa kuti muteeleli kubbapatizyigwa. Alimwi cilayandika kapati kuba abubambe busitikide bwakucita zintu zyakumuuya. Eeci cibikkilizya kujanika kumiswaangano ya Bunakristo alimwi akutola lubazu. (Heb. 10:​24, 25) Mpoonya, ikuti naa mweelela kutalika kukambauka, amusolekesye kunoocita oobo lyoonse. w23.03 10-11 ¶14-16

Bbuku lya Matalikilo 3:​14, 15 lyaamba kujatikizya “nzoka,” “alunyungu” lwanzoka. Nzoka iini buya, niyatakamvwa cini Jehova ncaakali kwaamba mumuunda wa Edeni. Aboobo nkokuti Jehova wakali kubeteka cilenge camuuya. Ncilenge nzi? Bbuku lya Ciyubunuzyo 12:9 cakusalazya lilapandulula kuti “muzoka wakaindi” ngu Saatani Diabolosi. Ciindi Bbaibbele nolyaamba lunyungu munzila yamaambilambali, lyaamba bantu bayeeya akucita zintu mbuli usyi wamucikozyanyo. Aboobo, lunyungu lwanzoka nzilenge zyamuuya abantu, mbuli Saatani, ibakazya Jehova Leza alimwi abantu bakwe. Lunyungu lulakonzya kubikkilizya bangelo ibakasiya milimo yabo kujulu mumazuba aa Nowa, alimwi abantu babyaabi ibacita zintu mbuli Diabolosi usyi.—Matl. 6:​1, 2; Joh. 8:44; 1Joh. 5:19; Jud. 6. w22.07 14-15 ¶4-5

Mwaapostolo Paulo wakali kubayanda kapati bakwesu abacizyi nokuba kuti awalo wakalijisi buyumuyumu. Wakali kubafwida luzyalo basyominyina ciindi nobakali kusunkwa. Aciindi cimwi, Paulo wakabula mali alimwi wakeelede kujana mulimo wakuti kaligwasyilizya walo abeenzinyina. (Mil. 20:34) Mulimo wakwe wakali wakupanga matente. Ciindi naakasika ku Korinto, cakusaanguna wakabeleka abasikupanga matentenyina ba Akula a Purisila. Pele “sabata imwi aimwi” wakali kukambaukila ba Juda aba Giriki. Ciindi Sila a Timoteyo nibakasika, “Paulo wakatalika kubelesya ciindi cakwe coonse kukukambauka jwi lya Leza.” (Mil. 18:​2-5) Paulo kunyina naakaluba cintu ciyandika kapati mubuumi ikubelekela Jehova. Akaambo kakubeleka canguzu Paulo wakali kweelela kukulwaizya bakwesu abacizyi. Wakabayeezya kuti tiibakeelede kulekela makatazyo aamubuumi naa zintu ziyandika zyamukwasyi kupa kuti baleke kubikkila maano “zintu ziyandika kapati”—nkokuti milimo yoonse iijatikizya kukomba Jehova. w22.08 20 ¶3   

Mazuba aano nkuyanda kwa Leza ikuti makani mabotu aa Bwami akambaukwe munyika yoonse. (1Tim. 2:​3, 4) Mulimo ooyu nguwa Jehova, alimwi wakasala Mwanaakwe uuyandwa kuti kausololela. Aboobo tulijisi lusyomo lwakuti, mbwaanga Jesu ulatusololela, mulimo wakukambauka uyoomana kweelana ambwayanda Jehova mamanino kaatanasika. (Mt. 24:14) Ino tuzyi buti oobo? Kakusyeede buyo ciindi cisyoonto kuti aunke kujulu, Jesu wakabandika abasikumutobela basyomeka bamwi acilundu ca Galilaya. Wakabaambila kuti: “Ndapegwa nguzu zyoonse kujulu alimwi aanyika.” Amubone majwi aatobela ngaakaamba: “Aboobo kamuya mukayiisye bantu bazisi zyoonse kuti babe basikwiiya.” (Mt. 28:​18, 19) Akati kazintu nzyaakapegwa, Jesu wakapegwa nguzu zyakusololela mulimo wakukambauka. Alimwi mulimo ooyu wakukambauka wakali kuyoozumanana ansi abweendelezi bwa Jesu kusikila kumazuba eesu. w22.07 8 ¶1, 3; 9 ¶4

Balulami ibakacita zintu zibotu kabatanafwa, bayootambula “bubuke bwabuumi” nkaambo mazina aabo anoolembedwe kale mubbuku lyabuumi. Eeci caamba kuti bubuke bwabaabo “ibakacita zintu zibotu” ibwaambidwe ku Johane 5:29 bulikozyenye abubuke ‘bwabaluleme’ ibwaambidwe ku Milimo 24:15. Bupanduluzi oobu buleendelana amajwi aali ku Baroma 6:​7, aamba kuti: “Muntu ooyo iwafwa waangununwa kucibi cakwe.” Zibi nzyobakacita bantu aaba ibaluleme zyakamwaigwa nobakafwa, pele milimo yabo yalusyomo ilazumanana kuyeeyegwa. (Heb. 6:10) Pele masimpe ngakuti, baluleme aaba ibayoobusyigwa bayooyandika kuzumanana kusyomeka kutegwa mazina aabo kaaliko mubbuku lyabuumi. w22.09 18 ¶13, 15

Musinsimi Daniele ncikozyanyo cibotu camuntu iwakali kusyomeka. Nokuba kuti wakatolwa mubuzike abana Babuloni, tiilyakalampa wakaba ampuwo yakusyomeka. Mpuwo yakusyomeka yakasakana kapati, kwaambisya ciindi naakagwasyigwa a Jehova ikupandulula ziloto zya Mwami wabana Babuloni Nebukadinezara. (Dan. 4:​20-22, 25) Nikwakainda myaka minji, Daniele wakatondezya kuti wakali kusyomeka ciindi naakapandulula milumbe iiyoosya iyakalibonya abwaanda muŋanda yamwami mu Babuloni. (Dan. 5:​5, 25-29) Mpoonya kumbele, Dariyo mu Medi abalupati-pati bakwe abalo bakabona kuti Daniele “wakajisi muuya uugambya.” Bakazyiba kuti Daniele “taakwe kampenda naa bubi buli boonse mbobakajana mulinguwe.” (Dan. 6:​3, 4) Tweelede kulibuzya mubuzyo mbuli wakuti: ‘Sena ndizyibidwe kuba muntu uusyomeka?’ Nkaambo ciindi notusyomeka tupa kuti Jehova atembaulwe. w22.09 8-9 ¶2-4

Tulagwasyigwa kwiinda mukutobela zyeelelo zya Jehova zijatikizya ciluzi acitaluzi. Sena mwakabona kaambo? Amweezyeezye buyo cikonzya kucitika kuti bbanki iili yoonse kailibikkila zyeelelo zyakuzyiba nguzu nzyaajisi mali naa kkampani iili yoonse yamayake kailibikkila zyeelelo zijatikizya zipimyo. Eelo kaka zintu inga zyanyongana citaambiki! Alimwi kuti bamanesi abamadokota kabatatobeli malailile aagaminide aajatikizya mbobakonzya kusilika bantu, eeci cilakonzya kubajazya balwazi bamwi. Aboobo calibonya kuti kutobela zyeelelo zisyomeka kulakwabilila. Mbubwenya buyo, zyeelelo zya Leza izijatikizya ciluzi acitaluzi zilatukwabilila. Jehova ulabalongezya aabo basolekesya kupona kweelana azyeelelo zyakwe. Usyomezya kuti: “Balulami bayookona nyika, alimwi bayookkala alinjiyo lyoonse mane kukabe kutamani.” (Int. 37:29) Amweezyeezye buyo mbokunooli lukamantano, luumuno alimwi alukkomano ciindi bantu boonse baakutobela zyeelelo zya Jehova! Oobo mbombubo Jehova mbwayanda kuti katupona. Eelo kaka umwi aumwi wesu ulijisi kaambo kalimvwisya ikatondezya ncotweelede kubuyanda bululami! w22.08 27-28 ¶6-8

Ciindi notwacitikilwa mapenzi, kusyomeka kwesu kuli Jehova alimwi ambunga yakwe kulakonzya kusunkwa. Mbuti mbotukonzya kubuzunda buyumuyumu oobo? Tweelede kubatama alimwi akupakamana, ‘akwiima nji mulusyomo.’ Tulatondezya kubatama kwiinda mukukkazika moyo, kuyeeya kabotu-kabotu alimwi akusolekesya kubona zintu mbubonya mbwazibona Jehova. Ciindi notucita boobo, mizeezo yesu kunyina noiyakunyonganizyigwa ambotulimvwa. Notulimvwa kuti tiitweendelezyegwa kabotu a Munakristoma, ambweni ooyo uujisi mikuli mumbungano, tweelede kuyeeya kuti kweelede kuti tanaakacitila caali kutegwa nywebo cimucise. (Rom. 3:23; Jak. 3:2) Nokuba boobo, nzyaakacita ambweni zyakamunyemya. Kweelede kuti mwakalibuzya kuti, ‘Ikuti naa mukwesu kakonzya kucita boobu, mwati mubwini eeyi nimbunga ya Leza?’ Oobu mbombubo Saatani mbwayanda kuti kamuyeeya. (2Kor. 2:11) Kuyeeya munzila iitali kabotu kuli boobu kulakonzya kutupa kulyaandaanya kuli Jehova ambunga yakwe. Aboobo tweelede kucenjela kutegwa tutabi amfwundiilili. w22.11 20 ¶1, 3; 21 ¶4

Jehova wakatupa bulangizi bubotu kapati bwabuumi butamani. Bamwi bajisi bulangizi bwakuyoopona kukabe kutamani kujulu kabali zilenge zyamuuya zitafwi. (1Kor. 15: 50, 53) Pele bunji bwesu, tujisi bulangizi bwakuyoopona anyika mane kukabe kutamani katujisi buumi bubotu alimwi alukkomano. (Ciy. 21:​3, 4) Kufwumbwa naa tulangila buumi butamani kujulu naa anyika, bulangizi bwesu bulayandika kapati kulindiswe. Bulangizi bwesu bulisinizyide nkaambo buzwa kuli Jehova. (Rom. 15:13) Tulizyi ncaakasyomezya, alimwi tulizyi kuti lyoonse ulazuzikizya zisyomezyo zyakwe. (My. 23:19) Tulisinizyide kuti Jehova ulijisi makanze mabotu alimwi anguzu zyakuzuzikizya zintu zyoonse nzyaamba kuti uyoozicita. Taateesu wakujulu ulatuyanda, alimwi uyanda kuti katumusyoma. Kuti bulangizi bwesu muli Jehova kabuli buyumu, tuyoocikonzya kuliyumya kumasunko alimwi tunooli basicamba akuba alukkomano, tacikwe makani azikonzya kutucitikila. w22.10 24 ¶1-3

Mbwaanga bakakaka kuswiilila, Isaya wakasinsima kuti Jehova uyoozumizya kuti bapenge. (Is. 30:​5, 17; Jer. 25:​8-11) Alimwi buya, bakatolwa mubuzike abana Babuloni. Nokuba boobo, kuli bamwi ibakali kusyomeka akati kaba Juda, alimwi Isaya wakabaambila kuti bumwi buzuba Jehova wakali kuyoobazumizya kupiluka akuyookkala mu Jerusalemu alimwi. (Is. 30:​18, 19) Alimwi eeci ncicakacitika. Jehova wakabaangulula kuzwa mubuzike. Nokuba boobo, kwakainda myaka minji kutegwa Jehova abaangulule. Majwi aakuti “Jehova ulalindila kakkazikide moyo kuti amufwide luzyalo” akali kutondezya kuti kwakali kuyooinda ciindi cili mbocibede kutegwa aabo basyomeka bafwutulwe. Mubwini, bana Israyeli bakakkala myaka iili 70 kabali mubuzike mu Babuloni ibakasyeede kabatanazumizyigwa kupiluka ku Jerusalemu. (Is. 10:21; Jer. 29:10) Ciindi bana Israyeli nobakali ku Babuloni bakali kulila akaambo kamapenzi, pele nobakapiluka kumunzi wabo, bakalila akaambo kakukkomana. w22.11 9 ¶4

Mazuba aano, mumasi manji, bakwesu abacizyi balapenzyegwa mbubwenya mbuli baapostolo mbobakapenzyegwa mumwaanda wamyaka wakusaanguna ciindi nobakali kukambauka kujatikizya Jesu. Cakwiinduluka-induluka, babetesi bamunkuta mpati yaba Juda bakali “kubalailila kuti baleke kwaamba muzina lya Jesu.” (Mil. 4:​18-20; 5:​27, 28, 40) Bakalizyi kuti muntu umwi uujisi nguzu kwiinda boonse ‘wakabalailila kukambaukila bantu akupa bumboni cakulomya’ kujatikizya Kristo. (Mil. 10:42) Aboobo baiminizi babo, Petro alimwi a Johane, cabusicamba bakaamba kuti beelede kumvwida Leza ikutali babetesi aabo, alimwi bakaamba kuti tabakooleka kwaamba kujatikizya Jesu. (Mil. 5:29) Nobakamana kuumwa akaambo kakusyomeka, baapostolo bakazwa munkuta mpati yaba Juda, ‘kabakkomene nkaambo bakajanwa kuti baleelela kusampaulwa akaambo kazina lya Jesu,’ alimwi bakazumanana kukambauka!—Mil. 5:​41, 42. w22.10 12-13 ¶2-4

Ciindi notwatalika kwiiya kujatikizya Jehova, inga twiiya buyo njiisyo zyamu Bbaibbele zyantalisyo. Mulugwalo ndwaakalembela bana Hebrayo, mwaapostolo Paulo wakaamba njiisyo eezyi kuti ‘ninjiisyo zyantalisyo,’ alimwi wakazikozyanisya kumukupa wamwana. (Heb. 5:12; 6:1) Aboobo wakakulwaizya Banakristo boonse kuzumanana kwiiya ikutali buyo njiisyo zyantalisyo pele akasimpe kayandika kapati kali mu Jwi lya Leza. Sena mulaaluyandisisyo lwakwiiya njiisyo ziyandika kapati zyamu Bbaibbele? Sena mulayanda kuzumanana kuyaambele, kuzumanana kwiiya kujatikizya Jehova alimwi amakanze aakwe? Bunji bwesu, cilatukatazya kwiiya. Ino nywebo, mulimvwa buti kujatikizya makani aakwiiya? Nomwakali kucikolo, sena mwakayiya mbomukonzya kubala kabotu akwiiya? Sena mwakali kukukkomanina akulimvwa kuti kulagwasya? Naa mwakalimvwa kuti inga tiimwacikonzya kwiiya kubelesya mabbuku? Kuti kacili boobo, tamuli nyolikke pe. Jehova ulakonzya kumugwasya. Ulilondokede alimwi ngo Mwiiyi wiinda kubota. w23.03 9-10 ¶8-10

Kuti katulibombya tuyoolekela Jwi lya Leza kutucinca. Lilikke buyo kuti twabutantamuka bube bwakulisumpula, ndendilyo notuyoogwasyigwa kapati aziiyo zyamu Bbaibbele zijatikizya kutondezya luse, lubomba alimwi aluyando. Mbotubeendelezya bamwi inga catondezya kuti naa tulekela Jwi lya Leza kutucinca. Akaambo kakuti ba Farisi tiibakalekela Jwi lya Leza kubacinca, bakatalika ‘kubeteka bantu batakwe mulandu.’ (Mt. 12:7) Mbubwenya buyo, mbotubabona bamwi alimwi akubeendelezya kulakonzya kutondezya naa tulekela Jwi lya Leza kutucinca naa pe. Mucikozyanyo, sena tubikkila buyo maano kububotu mbobajisi bamwi, naa tubikkila buyo maano kukulubizya kwabo? Sena tulatondezya luse akuba bantu balibambilide kulekelela bamwi naa tujisi cilengwa cakutongooka akubikkilila? Bwiinguzi bwesu kumibuzyo eeyi, bulakonzya kutondezya naa tulekela Jwi lya Leza kucinca mizeezo yesu, mbotulimvwa alimwi amicito yesu.—1Tim. 4:​12, 15; Heb. 4:12. w23.02 12 ¶13-14

Amuyeeye kujatikizya Josefa waku Aremateya. Muntu ooyu wakali kulemekwa kapati aba Juda. Alimwi wakali wamu Nkuta Mpati Yaba Juda. Pele ciindi Jesu naakali kucita mulimo wakwe waanyika, Josefa tanaakali muntu sicamba pe. Johane wakaamba kuti wakali “sikwiiya wa Jesu iwakali kulisisa akaambo kakuyoowa ba Juda.” (Joh. 19:38) Nokuba kuti Josefa wakali kuukkomanina mulumbe wa Bwami, wakalisisa kuli bamwi kuti wakali kumusyoma Jesu. Kweelede kuti wakali kuyoowa kuti bantu balaleka kumulemeka kuti naa bazyiba kuti ngusikwiiya wa Jesu. Kufwumbwa mbocakabede, Bbaibbele litwaambila kuti naakafwa Jesu, Josefa “wakalisungula kuunka kuli Pilato akuyoolomba mubili wa Jesu.” (Mk. 15:​42, 43) Lino tanaakacili kulisisa kuti wakali sikwiiya wa Jesu. Sena andinywe kuli nomuyoowa bantu mbuli mbwaakacita Josefa? w23.01 30 ¶13-14   

Makani aajatikizya luumuno alimwi akuzwidilila kwabana Israyeli mubulelo bwa Solomoni akasika kumwami mukaintu waku Sheba. Ooyu mukaintu uulemekwa wakeenda musinzo mulamfwu kuboola ku Jerusalemu kutegwa alibonene bukkale mbobwakabede. (1Bam. 10:1) Naakamana kulanga-langa bwami bwa Solomoni, wakaamba majwi aali atala aawa. Pele bukkale mubulelo bwa Solomoni cakali citondezyo buyo cazintu Jehova nzyayoocita mubulelo bwa Mwanaakwe, Jesu. Jesu ulisumpukide kapati kwiinda Solomoni. Solomoni tanaakalondokede alimwi tanaakasala kabotu munzila zinji calo kumbele cakaleta mapenzi kubantu ba Leza. Kulubazu lumwi, Jesu Muleli uulondokede uutakonzyi kulubizya. (Lk. 1:32; Heb. 4:​14, 15) Kristo wakatondezya kuti kunyina nayoobisya naa kucita cintu cikonzya kupenzya balelwa bakwe. Eelo kaka ncoolwe cilibedelede kuba a Mwami uuli mbuli nguwe! w22.12 11 ¶9-10

Ncinzi ncotweelede kucita kuti kwabbuka bulwazi buyambukila mucilawo motukkala? Tweelede kutobela malailile ngotupegwa amfwulumende mbuli aajatikizya kusamba kumaanza, kutantamukana, kusama mamasikki alimwi akulizandula. Kwiinda mukucita boobu, tutondezya kuti tulalumba kapati akaambo kacipego ca Leza cabuumi. Ciindi nokwacitika ntenda, zimwi ziindi tulakonzya kumvwa makani aatali aamasimpe kuzwa kubalongwe, kuli basimukoboma naa anyuuzi. Pele muciindi cakwaasyoma “makani oonse” ngotumvwa, tweelede kubikkila maano kumakani aamasimpe aazwa kumfwulumende alimwi akuli bamadokota. (Tus. 14:15) Ba Kabunga Keendelezya alimwi amaofesi aamitabi balasolekesya ikujana makani aamasimpe kabatanapa malailile kujatikizya miswaangano yambungano alimwi amulimo wakukambauka. Kwiinda mukwaatobela malailile ngobatupa, tulalikwabilila tobeni alimwi abamwi. Kuyungizya waawo, tulakonzya kupa kuti bantu bamucilawo kababalemeka Bakamboni ba Jehova.—1Pet. 2:12. w23.02 23 ¶11-12

Ciindi bana Israyeli nobakanjila Munyika Yakasyomezyedwe, bakakkala mumasena aayindene-indene. Bana Israyeli ibakali kukkala kubusena bumbi bakali kukonzya kuleka kubabikkila maano bana Israyelinyina ibakali kukkala kubusena bumbi bwacisi. Aboobo Jehova wakabikka bubambe bwakuti kabaswaangana antoomwe ziindi ziindene-indene kutegwa kabaswiilila Jwi lya Leza nolyakali kubalwa akupandululwa. (Dt. 31:​10-12; Neh. 8:​2, 8, 18) Amweezeezye buyo muna Israyeli uusyomeka mbwaakali kulimvwa ciindi naakali kusika ku Jerusalemu, ambweni akubona mamiliyoni abakombinyina ibakali kuzwa mumasena aayindene-indene aamucisi! Kwiinda mububambe oobu, Jehova wakabagwasya bantu bakwe kukamantana. Ciindi mbungano ya Bunakristo noyakatalika, yakajisi bamaalumi abamakaintu bakali kwaambaula myaambo minji yiindene-indene, alimwi ibakali kuzwa mubukkale bwiindene-indene. Pele bakalikamantene mukukomba Leza wakasimpe. Aabo ibakaba basyomi, bakali kukonzya kulimvwisya Jwi lya Leza kwiinda mukugwasyigwa abakombinyina alimwi akuswaangana aantoomwe ambabo.—Mil. 2:42; 8:​30, 31. w23.02 3 ¶7

Jehova usyomezya kuti aabo bamumvwida bayooba ‘abuumi butamani.’ (Rom. 6:23) Ciindi notuzinzibala kuyeeya ncaakatusyomezya Jehova, luyando ndotujisi kulinguwe lulayuma kapati. Amukayeeye buyo kaambo aaka: Taateesu wakujulu ulatuyanda kapati cakuti kunyina notuyakwaandaanizyigwa kulinguwe. Cisyomezyo ca Leza cabuumi butamani citugwasya kuliyumya mumasunko aatulwana lino. Nokuba kuti basinkondoma inga batukonga kutujaya, tatukaleki kubelekela Jehova. Nkaambo nzi? Kaambo kamwi nkakuti, tulizyi kuti nokuba kuti twafwa katusyomeka kuli Jehova, uyootubusya akutupa bulangizi bwakutafwa alimwi. (Joh. 5:​28, 29; 1Kor. 15:​55-58; Heb. 2:15) Tulizyi kuti Jehova ulakonzya kutubamba katuli baumi mane kukabe kutamani nkaambo ngo Kasensa kabuumi alimwi ulapona lyoonse. (Int. 36:9) Bbaibbele litondezya kuti Jehova waliko lyoonse alimwi unooliko lyoonse.—Int. 90:2; 102:​12, 24, 27. w22.12 2 ¶1-3

Mbotuli babelesi ba Jehova, tatugambwi ciindi notwasikilwa mapenzi. Nkaambo tulizyi kuti Bbaibbele lyaamba kuti, “tweelede kwiinda mumapenzi manji kutegwa tukanjile mu Bwami bwa Leza.” (Mil. 14:22) Alimwi tulizyi kuti mapenzi aamwi ngotujisi taakonzyi kumana lino mane kusikila tukanjile munyika mpya ya Leza, mwalo ‘lufwu molutakabi limbi, akwalo koomoka, kulila nokuba kucisa mozitakabi limbi.’ (Ciy. 21:4) Jehova kunyina nalesya mapenzi kutucitikila. Pele ulatugwasya kuliyumya. Amubone Mwaapostolo Paulo ncaakaambila Banakristo bakali kukkala mu Roma. Cakusaanguna wakaamba mapenzi aayindene-indene ngaakajana walo a Banakristonyina. Mpoonya wakalemba kuti: “Tulazunda cakumaninina kwiinda muliyooyo wakatuyanda.” (Rom. 8:​36, 37) Eeci citondezya kuti Jehova ulakonzya kumugwasya kuti muzwidilile nociba ciindi nomuli mubukkale bukatazya. w23.01 14 ¶1-2