May

Naakamana kubona nkamu yakujulu, Johane wakabona “nkamu mpati.” Mukwiimpana aba 144,000, nkamu mpati taikonzyi kubalwa. Ncinzi ncotwiiya kujatikizya njiyo? Johane wakaambilwa kuti: “Aaba mbambabo bazwa mumapenzi mapati, alimwi bawasya zisani zyabo zilamfwu akuzitubya mubulowa bwa Mwanaambelele.” (Ciy. 7:14) Yaakufwutuka lyamapenzi mapati, “nkamu mpati” eeyi iyookkala aano anyika akukkomana azilongezyo zibotu kapati. (Int. 37:​9-11, 27-29; Tus. 2:​21, 22; Ciy. 7:​16, 17) Kufwumbwa naa twakasalwa kuunka kujulu naa tuyoosyaala aano anyika, sena tulasyoma kuti tulijatikizyidwe mukuzuzikizyigwa kwabusinsimi ibuli ku Ciyubunuzyo caandaano 7? Tuleelede. Eelo kaka cinooli ciindi cikkomanisya kunkamu zyoonse zyobilo zyababelesi ba Leza! Tuyookkomana kapati akaambo kakusala kugwasyilizya bweendelezi bwa Jehova. w22.05 16 ¶6-7

Kuti naa kuli nomwakali kuyanda kusala cintu iciyandika kapati, tacidoonekwi buya kuti mwakapaila kulomba busongo, alimwi eeco cakali kweelela. (Jak. 1:5) Mwami Solomoni wakalemba kuti: “Busongo ncintu ciyandika kapati.” (Tus. 4:7) Nokuba boobo, Solomoni tanaakali kwaamba kujatikizya busongo buli boonse buyo pe. Wakali kwaamba busongo buzwa kuli Jehova Leza. Pele sena busongo buzwa kuli Leza bulakonzya kutugwasya kulwana mapenzi ngotujana mazuba aano? Inzya bulakonzya. Nzila imwi iikonzya kutugwasya kuba abusongo bwini-bwini nkwiinda mukwiiya akubelesya nzyotwiiya kujatikizya baalumi bobilo ibakali basongo kapati. Wakusaanguna, ngu Solomoni. Bbaibbele lyaamba kuti, ‘Leza wakapa Solomoni busongo alimwi abupampu butaambiki.’ (1Bam. 4:29) Wabili, ngu Jesu, walo iwakali musongo kapati kwiinda muntu uuli woonse. (Mt. 12:42) Kujatikizya Jesu, kwakasinsimwa kuti: “Muuya wa Jehova uyookkala alinguwe, imuuya wabusongo awamaano.”—Is. 11:2. w22.05 20 ¶1-2

Nobaba bacembeede balakonzya kulibikkila mbaakani zyakumuuya akuzizuzikizya. Amubone cikozyanyo camucizyi Beverley uujisi myaka iili 75. Wakajisi bulwazi bupati ibwakali kumupa kuteenda. Pele wakajisi luyandisisyo lwakutola lubazu mumulimo wakutamba bantu ku Ciibalusyo. Aboobo wakalibikkila mbaakani zigaminide. Ciindi naakazizukizya mbaakani eezyo, wakakkomana kapati. Kusolekesya kwakwe kwakabakulwaizya bamwi kucita zinji mumulimo wa Jehova. Jehova ulaukkomanina mulimo ngobabeleka bakwesu abacizyi bacembeede, nokuba kuti bukkale bwabo tabubazumizyi kucita zyoonse nzyobayanda. (Int. 71:17) Amulibikkile mbaakani nzyomukonzya kuzuzikizya. Amube abube buyoomupa kuyandwa a Jehova. Amwiiye milimo iigwasya, yalo iiyoomupa kubelesyegwa kapati a Leza alimwi ambunga yakwe. Amujane nzila mbomukonzya kubelekela bakwesu abacizyi cakumaninina. Mbubwenya mbuli Timoteyo, kwiinda mukulongezyegwa a Jehova, ‘kuyaambele kwanu kuyoobonwa abantu boonse.’—1Tim. 4:15. w22.04 27 ¶18-19   

Mbuti kuti nokuba kuti mwasolekesya kusikila mpomugolela, nokuba boobo mwanaanu umwi waamba kuti tayandi kubelekela Jehova? Mutalimvwi kuti mwaalilwa mbuli muzyali. Jehova wakatupa lwaanguluko lwakulisalila toonse kulibikkilizya amwanaanu, nkokuti kusala kumubelekela naa pe. Amube abulangizi bwakuti bumwi buzuba uyoopiluka. Amuyeeye cikozyanyo camwana mutaka. (Lk. 15:​11-19, 22-24) Mwaalumi ooyu wakacita zintu zibi zinji, pele kumamanino wakapiluka. Nobazyali, mujisi coolwe caalubazu cakukomezya zyalani lipya lyabakombi ba Jehova. (Int. 78:​4-6) Mulimo ooyu tauli muuba-uba pe, alimwi tulamulumba kapati akaambo kakubeleka canguzu nkomucita kugwasya bana banu kumuyanda Jehova alimwi akubalela mululayo lwakwe. Mulakonzya kuba masimpe kuti Taateesu wakujulu uyookkomana.—Ef. 6:4. w22.05 30-31 ¶16-18

Kutegwa kube luumuno alukamantano mumbungano, umwi aumwi wesu weelede kubeleka kusikila mpagolela. Amubone cikozyanyo ca Banakristo bamumwaanda wamyaka wakusaanguna. Bakajisi zipego amikuli yiindene-indene. (1Kor. 12:​4, 7-11) Pele eeci tiicakabapa kuba amuuya wakuzundana alimwi akwaandaana. Muciindi caboobo, Paulo wakakulwaizya umwi aumwi kucita cakali kuyandika ‘kutegwa bayake mubili wa Kristo.’ Paulo wakalembela bana Efeso kuti: “Cizo cimwi acimwi nocibeleka kabotu, eeci cipa kuti mubili ukomene mbwaanga ulaliyaka wini muluyando.” (Ef. 4:​1-3, 11, 12) Aabo bakatobela ncaakaamba Paulo bakapa kuti kube luumuno alukamantano, ibube mbotubona mumbungano mazuba aano. Amube amakanze akutalyeezyanisya abamwi. Muciindi caboobo, amumwiiye Jesu alimwi akusolekesya kwiiya bube bwakwe. Amusyome kuti Jehova “tali Leza uutaluleme pe uunga waluba milimo yanu.” (Heb. 6:10) Ulalumba kumilimo njomubeleka kuzwa ansi amoyo kutegwa mumukkomanisye. w22.04 14 ¶15-16

Eelo kaka cilakulwaizya kuzyiba kuti tauli mukuli wesu ikusala naa Jehova ulamulekelela sikubisya! Nokuba boobo, kuli cintu cimwi ncotweelede kusala. Ino ncintu nzi eeco? Zimwi ziindi, muntu ulakonzya kutucitila cibi, nociba cipati buya, pele ambweni ulakonzya kuzumina kuti wakalubizya alimwi akulomba kulekelelwa. Mpoonya zimwi ziindi, ambweni muntu ooyo takonzyi kucita oobo. Nokuba kuti takonzyi kucita oobo, swebo tulakonzya kusala kumulekelela muntu ooyo kwiinda mukutamubikkilila naa kutamunyemena. Mubwini, cilakonzya kutola ciindi naa ciyandika kubeleka canguzu, kwaambisya kuti naa cibi ncaakatucitila cakatucisa kapati. Ngazi Yamulindizi yamu September 15, 1994, yaamba kuti: “Ciindi notulekelela sikubisya, tacaambi kuti tuubya-ubya cibi ncaakacita. Munakristo uulekelela, usyoma Jehova kuti uyoobeteka cabululami. Nkaambo ngo Mubetesi mululami wabubumbo boonse alimwi uyoocita oobo cabululami aciindi ceelede.” w22.06 9 ¶6-7

Jehova wakasyomezya kuti muciindi ecino, ulayobolola bantu kuzwa kumisyobo yoonse, kumilaka yoonse alimwi akumyaambo yoonse kutegwa abakamantanye antoomwe mubukombi busalala. Mazuba aano, mbunga yabantu eeyo iilibedelede iitwa kuti “nkamu mpati.” (Ciy. 7:​9, 10) Nokuba kuti nkamu eeyi ibikkilizya bamaalumi, bamakaintu alimwi abana munyika yoonse, nkokuti mukwasyi omwe uukamantene. (Int. 133:1; Joh. 10:16) Lyoonse balilibambilide kwaambila bamwi kujatikizya bulangizi bwabo bwanyika mbotu. (Mt. 28:​19, 20; Ciy. 14:​6, 7; 22:17) Ikuti kamuli umwi wankamu eeyi, tacidoonekwi buya kuti bulangizi bwanu bwazintu zyakumbele bulayandika kapati kulindinywe. Diabolosi uyanda kutupa kuleka kuba abulangizi bwakumbele. Makanze aakwe ngakutupa kusyoma kuti Jehova takazizuzikizyi zisyomezyo zyakwe. Ikuti Saatani wazwidilila mukucita boobo, tuyootyompwa, alimwi ambweni inga twacileka kubelekela Jehova. w22.06 20-21 ¶2-3

Bulangizi bwesu buyumu bulatugwasya kubatama ciindi notwajana mapenzi nkaambo tulijisi lusyomo lwakuti zintu ziyoobota ino-ino. Mutalubi kuti Jesu wakacenjezya kuti tuyoopenzyegwa. (Joh. 15:20) Aboobo kuzinzibala kuyeeya zintu nzyaakatusyomezya Jehova kulatugwasya kuzumanana kumubelekela. Amubone bulangizi mbobwakamugwasya Jesu kuzumanana kusyomeka nokuba kuti wakalizyi kuti uyoofwa lufwu lucisa. Mubuzuba bwa Pentekoste 33 C.E., mwaapostolo Petro wakazubulula businsimi kuzwa mubbuku lya Intembauzyo ibwaamba Jesu mbwaakabateme alimwi akuba alusyomo lwakuti: “Ndinookkede kandilangila; nkaambo tokandisiyi mu Cuumbwe nokuba kulekela uusyomeka wako kuti abole. . . . Uyoondipa kukondwa kapati kumbele lyako.” (Mil. 2:​25-28; Int. 16:​8-11) Jesu wakalijisi bulangizi buyumu bwakuti Leza uyoomubusya alimwi akuti wakali kuyooba alukkomano lwakuba antoomwe alimwi a Bausyi kujulu.—Heb. 12:​2, 3. w22.10 25 ¶4-5

Aciindi cimwi, baapostolo bakwe bobilo, Jakobo a Johane bakaambila banyina kulomba Jesu kuti akabape zyuuno zyaatala mu Bwami. (Mt. 20:​20, 21) Kwiinda mukucita boobu, Jakobo a Johane bakatondezya bube bwakulisumpula akulibona kuti bakali kuyandika kapati kwiinda bamwi. (Tus. 16:18) Jakobo a Johane tabali mbabo balikke ibakatondezya bube butali kabotu aciindi aawa. Amubone mbobakacita baapostolo bambi: “Lino aaba bambi bali kkumi nobakaamvwa makani aaya, bakabanyemena ibabunyina bobilo aaba.” (Mt. 20:24) Inga tweezyeezya kuzwangana kutaambiki ikwakaliko akati ka Jakobo a Johane abaapostolonyina bambi. Ino Jesu wakabweendelezya buti bukkale oobu? Kunyina naakanyema pe. Alimwi tanaakaamba kuti ulayandaula buyo baapostolo bambi ibali kabotu, balicesya alimwi ibanooyandana lyoonse. Muciindi caboobo, Jesu wakabandika abaapostolo bakwe cakukkazika moyo nkaambo wakalizyi kuti bakali kuyanda kucita ciluzi. (Mt. 20:​25-28) Wakazumanana kubeendelezya caluyando. w23.03 28-29 ¶10-13

Nzinji zintu nzyomwacita kale. Mucikozyanyo, mwakaiya Bbaibbele cabusungu, ambweni kwamyaka minji. Nzyomwakaiya zyakamupa kusinizya kuti Bbaibbele ndi Jwi lya Leza. Pele kwiinda zyoonse, mwakamuzyiba alimwi akumuyanda Sikwaanza bbuku eeli lisetekene. Luyando ndomujisi kuli Jehova lwakakomena cakuti lino mwakalyaaba kulinguwe akubbapatizyigwa. Eelo kaka cilakkomanisya! Tacidoonekwi buya kuti lusyomo lwanu lwakasunkwa munzila zinji ciindi nomwakali kuyaambele kutegwa mubbapatizyigwe. Pele mbomuyaabukomena kumuuya, munoojana masunko mapya. Saatani uyoosola kupa kuti luyando ndomujisi kuli Jehova luceye alimwi akuti mucileke kumubelekela. (Ef. 4:14) Pele mutalekeli kuti eeco cimucitikile. Ncinzi cikonzya kumugwasya kuzumanana kusyomeka kuli Jehova alimwi akuzuzikizya cikonke canu cakulyaaba? Mweelede kuzumanana ‘kuyaambele’ kutegwa mube Banakristo basimide.—Heb. 6:1. w22.08 2 ¶1-2

Mumukwasyi, munamukwasyi uuli woonse ulijisi mukuli wakubamba maseseke aamuŋanda. Mucikozyanyo, mukaintu Munakristo inga kajisi cilengwa cimwi cimusesya mulumaakwe. Sena mulumaakwe inga watalika kwaambila bamwi akumusampuzya? Peepe. Ulamuyanda mukaintu wakwe, alimwi inga taciti cintu cili coonse cikonzya kumucisa. (Ef. 5:33) Bakubusi balayanda kulemekwa abazyali babo. Bazyali beelede kwaayeeya makani aaya. Bazyali tabeelede kubasampuzya bana babo kwiinda mukwaambila bamwi zintu nzyobalubizya bana. (Kol. 3:21) Bana beelede kwiiya kuba bapampu akutaambila bamwi makani aakonzya kusampuzya banamukwasyi bamwi. Ciindi munamukwasyi uuli woonse nabeleka canguzu kubamba maseseke aamukwasyi, cilongwe mumukwasyi cilayuma. w22.09 10 ¶9

Jehova wakabandika a Jobu, kumuyeezya busongo bwakwe butamani alimwi aluyando ndwajisi kuzilenge zyakwe. Wakaamba kujatikizya banyama banji ibagambya. (Job. 38:​1, 2; 39:​9, 13, 19, 27; 40:15; 41:​1, 2) Kuyungizya waawo, Jehova wakabelesya mwaalumi uucili mwana-mwana Elihu kumuyumya akumuumbulizya Jobu. Elihu wakasyomezya Jobu kuti Jehova lyoonse ulabalumbula bakombi bakwe akaambo kakuliyumya. Pele alimwi Jehova wakaambila Elihu ikupa Jobu lulayo lwaluyando. Elihu wakamugwasya Jobu kuti atanoolibikkili kapati maano kwiinda mukumuyeezya mbwali musyoonto kapati alyeezyanisya a Jehova Mulengi wabubumbo boonse. Kunze lyaboobo, Jehova wakapa Jobu mulimo umwi; kupailila beenzyinyina botatwe bakabisya. (Job. 42:​8-10) Mbuti Jehova mbwatugwasya mazuba aano ciindi notwajana masunko aakatazya? Jehova tabandiki andiswe mbuli mbwaakacita kuli Jobu, pele ulacita oobo kwiinda mu Jwi lyakwe, Bbaibbele.—Rom. 15:4. w22.08 11 ¶10-11

Mbungano yaku Roma yakapangidwe a Banakristo ba Juda alimwi a Bamasi. Ciindi mulawo wa Musa nowakaleka kubeleka, bakombi ba Jehova tiibakeelede kuzumanana kutobela mulawo uujatikizya zyakulya zimwi. (Mk. 7:19) Kuzwa ciindi eeco, Banakristo ba Juda bamwi bakalaangulukide kulya musyobo uuli woonse wazyakulya. Pele Banakristo ba Juda bamwi, tiibakaangulukide kucita boobo. Makani aaya akapa kuti mbungano yaandaane. Mwaapostolo Paulo wakakulwaizya mbociyandika kubamba luumuno. Kwiinda mukucita boobu, Paulo wakagwasya basyominyina kubona kuti kukazyanya kuli boobu kwakali kukonzya kuleta lwaandaano akati kabo alimwi amumbungano yoonse. (Rom. 14:​19, 20) Alimwi awalo wakalilibambilide kucinca kutegwa atalebyi bamwi. (1Kor. 9:​19-22) Mbubwenya buyo andiswe tulakonzya kubayumya bamwi alimwi akubamba luumuno kuti katutakazyanyi mumakani aumwi ngayelede kulisalila. w22.08 22 ¶7

Kuti katuyanda kuzuzikizya mbaakani imwi mumulimo wa Jehova, tweelede kubeleka canguzu. Oobu mbocibede aciindi notusungwaala kuyanda bululami. Alimwi Jehova cakukkazika moyo uyootugwasya kuyaambele mbwaayaabuya mazuba. (Int. 84:​5, 7) Jehova caluyando utuyeezya kuti kuyanda bululami takuminyi. (1Joh. 5:3) Muciindi caboobo, ncilikwabilizyo, icintu ncotuyandika abuzuba. Amuyeeye kujatikizya zilwanyo zyakumuuya mwaapostolo Paulo nzyaakapandulula. (Ef. 6:​14-18) Ncibeela icili icakali kukwabilila moyo wasikalumamba? ‘Ncilikwabilizyo cakucamba cabululami,’ calo iciiminina zyeelelo zya Jehova zyabululami. Mbubwenya cilikwabilizyo cakucamba mbocikwabilila moyo wini, azyalo zyeelelo zya Jehova zyabululami zilakonzya kukwabilila moyo wanu wacikozyanyo, nkokuti buntu bwanu bwamukati. Nkakaambo kaako, cilayandika kuti kamujisi cilikwabilizyo cakucamba cabululami ciindi coonse.—Tus. 4:23. w22.08 29 ¶13-14

Kwamyaka minji, Jwi lya Leza lyabagwasya kapati bamaalumi abamakaintu basyomeka. Ino eeci cakonzyeka buti? Jehova wakaambila bantu kukkopolola malembe aasetekene. Nokuba kuti basikukkopolola tiibakalondokede, bakali kubikkila maano kapati. Mucikozyanyo, kujatikizya Magwalo aa Chihebrayo, syaazibwene umwi wakalemba kuti: “Tulisinizyide kuti kunyina bbuku limbi lyakaindi ilyakakkopololwa munzila iiluzi kwiinda Bbaibbele.” Tulisinizyide kuti nzyotubala mulindilyo mazuba aano zijisi mizeezo ya Sikulyaanza, Jehova. Jehova Ngokasensa ‘kacipego cibotu cili coonse alimwi acipego cilondokede cili coonse.’ (Jak. 1:17) Bbaibbele ncimwi cazipego ziinda kubota Jehova nzyaakatupa. Ikuti muntu umwi watupa cipego, cipego eeco inga citondezya mbwatuzyi, ambwazizyi kabotu zintu nzyotuyandika. Oobu mbocibede akuli Sikutupa Bbaibbele. Ciindi notucilanga-langa cipego eeci, tulaiya zinji kujatikizya Jehova. Tulaiya mbwatuzyi kabotu alimwi ambwazizyi zintu nzyotuyandika. w23.02 2-3 ¶3-4

Eelo kaka bunooli buzuba bukkomanisya citaambiki ciindi bubuke bwaakutalika aano anyika lya Bulelo bwa Kristo bwa Myaka Iili 1,000! Boonse bakafwidwa bayandwa babo baliyandide kubabona alimwi. Awalo Jehova mbwalimvwa oobo. (Job. 14:15) Amweezyeezye buyo bantu boonse mbobayookkomana anyika ciindi bayandwa babo baakubusyigwa. “Baluleme,” aabo ibali aamazina aalembedwe mubbuku lyabuumi, ‘bayoobusyilwa kubuumi.’ (Mil. 24:15; Joh. 5:29) Ambweni bunji bwabayandwa besu banooli akati kabaabo bayoosaanguna kubusyigwa mububuke bwaanyika. Kuyungizya waawo, “bataluleme,” nkokuti aabo ibatakajisi coolwe cakumuzyiba Jehova naa kumubelekela cakusyomeka kabatanafwa, bayoobusyilwa “kububuke bwalubeta.” Boonse aabo ibayoobusyigwa bayooyandika kuyiisyigwa. (Is. 26:9; 61:11) Aboobo kuyoocitwa mulimo mupati kapati uutanacitidwe mubuumi bwabantu.—Is. 11:10. w22.09 20 ¶1-2

Jehova wakatondezya nguzu zyakwe kunkamu zyabeendelezi. Wakabalwanina bana Israyeli akubagwasya kubweza zibeela zipati zya Nyika Yakasyomezyedwe. (Jos. 11:​4-6, 20; 12:​1, 7, 24) Cakwiinduluka-induluka, Jehova wakatondezya kuti ngo Mupati Kwiinda! Ciindi Mwami Nebukadinezara wabana Babuloni naakalisumpula kujatikizya ‘nguzu zyakwe zinji alimwi abulemu bwabweendelezi bwakwe’ muciindi cakulicesya akubona kuti Jehova ngoweelela kutembaulwa, Leza wakapa kuti asondoke. Naakapona, Nebukadinezara ‘wakatembaula Mupatikampatila’ alimwi wakazyiba kuti ‘bweendelezi bwa Jehova mbweendelezi butamani.’ Wakayungizya kuti: “Kunyina naba omwe uukonzya kumukasya.” (Dan. 4:​30, 33-35) Sintembauzyo wakalemba kuti: “Cilikkomene cisi cijisi Jehova kuba Leza wancico, ibantu mbaasala kuba lukono lwakwe.” (Int. 33:12) Eelo kaka tulijisi kaambo kabotu, ikeelede kutupa kuzumanana kusyomeka kuli Jehova! w22.10 15-16 ¶13-15

Businsimi bunji bwamu Bbaibbele ibwakazuzikizyigwa kale buyumya lusyomo lwesu lwakuti zisyomezyo zya Leza zyoonse ziyoozuzikizyigwa ncobeni. Tulimvwa mbuli mbwaakalimvwa sintembauzyo iwakapaila kuli Jehova kuti: “Ndilombozya lufwutuko luzwa kulinduwe, nkaambo ndisyoma jwi lyako.” (Int. 119:81) Kwiinda mu Bbaibbele, Jehova utusyomezya “buumi bwakumbele bubotu alimwi abulangizi.” (Jer. 29:11) Jehova nguuyoopa kuti tukabe abuumi bubotu kumbele, ikutali bantu. Aboobo atuzumanane kuyumya lusyomo lwesu mu Jwi lya Leza kwiinda mukuzumanana kwiiya businsimi bwamu Bbaibbele. Kaambo kambi kapa kuti katulisyoma Bbaibbele nkubona mbolibagwasya aabo batobela lulayo lwandilyo. (Int. 119:​66, 138) Mucikozyanyo, banabukwetene bamwi ibakasyeede buyo asyoonto kuti balekane, lino balikkomene akaambo kakuti bakabelesya lulayo lwamu Bbaibbele. Abalo bana babo balikkomene akaambo kakukomezyegwa abazyali Banakristo, balo ibababikkila maano alimwi ibabayanda kapati.—Ef. 5:​22-29. w23.01 5 ¶12-13

Amuyeeye buyo mbomwagwasyigwa kale nywebo kumugama akaambo kakuzuzikizyigwa kwazisyomezyo izili mu Jwi lya Leza. Mucikozyanyo, Jesu wakasyomezya kuti Bausyi bayoomupa zintu nzyomuyandika mubuumi. (Mt. 6:​32, 33) Alimwi Jesu wakamusyomezya kuti Jehova uyoomupa muuya uusalala ciindi nomumulomba. (Lk. 11:13) Jehova wazizuzikizya zisyomezyo zyakwe. Ambweni mulakonzya kuyeeya zisyomezyo zimbi nzyaazuzikizya kujatikizya ndinywe. Mucikozyanyo, wakamusyomezya kuti unoomulekelela, kumuumbulizya, alimwi akumusanina kumuuya. (Mt. 6:14; 24:45; 2Kor. 1:3) Ciindi nomuzinzibala kuyeeya nzyaakamucitila kale Leza, muyooyumya bulangizi bwanu muzintu zyoonse nzyayoomucitila kumbele. Tuli masimpe kuti Jehova uyoozizuzikizya zisyomezyo zyakwe. Sintembauzyo wakalemba kuti: “Ulikkomene ooyo . . . uulangila Jehova Leza wakwe, . . . Ooyo uusyomeka lyoonse.”—Int. 146:​5, 6. w22.10 27 ¶15; 28 ¶17

Sena businsimi bujatikizya kubukulusyigwa kwabukombi busalala bulabeleka amazuba aano? Inzya! Munzila nzi? Kuzwa mu 1919 C.E., bantu banji balazwa mubuzike bwa Babuloni Mupati, ibulelo bwanyika yoonse bwabukombi bwakubeja. Balasololelwa kubusena bubotu bwiinda Nyika Yakasyomezyedwe yabana Israyeli. Lino bali muparadaiso yakumuuya. (Is. 51:3; 66:8) Kuzwa mu 1919 C.E., bananike balikkomene muparadaiso yakumuuya. Mukuya kwaciindi, aabo bajisi bulangizi bwakupona aano anyika, “bambelele zimbi,” abalo bakaba acoolwe cakunjila mububambe bwakumuuya oobu alimwi akukkomana azilongezyo zya Jehova zitalivwulili. (Joh. 10:16; Is. 25:6; 65:13) Paradaiso yakumuuya mobakkala nkoili munyika yoonse. Aboobo, mazuba aano, tacikwe makani ankotukkala aano anyika, tulakonzya kuba cibeela caparadaiso yakumuuya kufwumbwa buyo kuti katubugwasyilizya bukombi bwakasimpe. w22.11 11-12 ¶12-15

Sena cilamukatazya kukamvwisya kaambo kakuti Jehova waliko ‘lyoonse alyoonse’? (Is. 40:28) Eeci tacili ceenzu pe. Elihu wakaamba boobu kujatikizya Leza: “Mweelwe wamyaka yakwe tuukonzyi kuzyibwa pe.” (Job. 36:26) Pele kutamvwisya cimwi cintu tacaambi kuti cintu eeco tacili camasimpe. Mucikozyanyo, nokuba kuti tatukonzyi kumvwisya mboubeleka mumuni, sena eeci caamba kuti mumuni tuuko? Peepe. Mbubwenya buyo, swebo tobantu tatukonzyi kumvwisya mbocikonzyeka kuti Jehova waliko lyoonse alimwi akuti unooliko lyoonse. Pele eeci tacaambi kuti Leza taponi lyoonse mane kukabe kutamani. Kasimpe kajatikizya Mulengi takayeeme aakuti naa swebo tulamvwisya naa pe. (Rom. 11:​33-36) Alimwi buya wakaliko bubumbo kabutanabako, kubikkilizya zuba anyenyeezi. Inzya, wakaliko ‘katanatandabula majulu.’—Jer. 51:15. w22.12 2-3 ¶3-4

Zimwi ziindi, tulakonzya kulombwa kwiiminina bamwi mumupailo. Mucikozyanyo, mucizyi uuyanda kusololela ciiyo ca Bbaibbele ulakonzya kulomba mucizyi ngobabeleka limwi kuti apaile. Pele mucizyi ooyo ambweni tamuzyi kabotu sikwiiya, aboobo ambweni inga walombozya kupa mupailo wamamanino. Munzila eeyo, cilakonzya kumugwasya kwaamba nzyayandika sikwiiya mumupailo wakwe. Mukwesu ulakonzya kulombwa kupaila lyamuswaangano wakulibambila mulimo wamumuunda naa lyamuswaangano wambungano. Bakwesu bapedwe coolwe eeci beelede kuyeeya makanze aamuswaangano. Ciindi cakupaila taceelede kubelesyegwa kupa lulayo kumbungano naa zyakwambilizya. Lyamuswaangano wambungano, lwiimbo amupailo wakujalula zyeelede kupegwa mumaminiti osanwe, aboobo mukwesu uupaila tayelede kubelesya “majwi manji,” ikapati kumatalikilo aamuswaangano.—Mt. 6:7. w22.07 24 ¶17-18

Jesu wakasinsima kuti kumazuba aamamanino, kuyooba zilwazi, “mumasena aaindene-indene.” (Lk. 21:11) Mbuti kuzyiba makani aaya mbokuleta luumuno? Tatugambwi ciindi nokwabbuka bulwazi. Tulizyi kuti zintu eezyi zyeelede kucitika kweelana ambwaakaamba Jesu. Ani tulijisi kaambo kalimvwisya ikeelede kutupa kutobela malailile Jesu ngaakapa baabo bapona muciindi camamanino aakuti: “Nywebo mutakayoowi pe.” Kuti kwabbuka bulwazi, inga tiimwacikonzya kunoocita zintu nzyomwazyibide, pesi mutacilekeli kunyonganya bubambe bwakucita ciiyo canu naa kujanika kumuswaangano. Zyakuluula zijanika mumabbuku amavidiyo eesu zilakonzya kumugwasya kubona bakwesu abacizyi mbobazumanana kusyomeka ciindi nobajana buyumu-yumu bukozyenye. w22.12 17 ¶4, 6

Jakobo wakatondezya caantangalala kuti wakali kumuyanda kapati mwanaakwe Josefa. (Matl. 37:​3, 4) Akaambo kaceeci, bana ba Jakobo bapati bakatalika kumufwida munyono Josefa. Mpoonya nobakajana coolwe, bakamusambala Josefa kuli basimakwebo bana Midiyani. Basimakwebo aaba bakatola Josefa ku Egepita kwakali kulamfwu kapati, kwalo nkobakamusambala alimwi kuli Potifara, silutwe wabalindizi ba Farao. Eelo kaka buumi bwa Josefa bwakacinca cakutayeeyela, imwana wakali kuyandwa kapati abausyi lino wakaba muzike mu Egepita! (Matl. 39:1) Zimwi ziindi tulasikilwa mapenzi ‘aabacitikila abamwi.’ (1Kor. 10:13) Pele zimwi ziindi tulakonzya kupenga akaambo buyo kakuti tuli basikwiiya ba Jesu. Mucikozyanyo, tulakonzya kufwubaazyigwa, kukazyigwa naa ambweni buya kupenzyegwa akaambo kalusyomo lwesu. (2Tim. 3:12) Kufwumbwa mapenzi ngomukonzya kujana, Jehova ulakonzya kumugwasya kuzwidilila. w23.01 14-15 ¶3-4   

Zimwi ziindi tulakonzya kulimvwa kuti tuyandika kubandika amusyomima umwi watunyemya. Pele inga cabota kusaanguna kulibuzya mibuzyo mbuli yakuti: ‘Sena ndilicizyi cini cakacitika?’ (Tus. 18:13) ‘Sena mubwini wakacita caali kutegwa andinyemye?’ (Muk. 7:20) ‘Sena andime kuli nondakacitide kale cintu cili boobu?’ (Muk. 7:​21, 22) ‘Sena kubandika amuntu ooyu inga kwapa kuti penzi liindile buya?’ Kuzinzibala kuyeeya mibuzyo iili boobu, kulakonzya kutugwasya kusala kuciluba buyo cintu eeco cakacitika akaambo kaluyando ndotujisi kumusyomima. Umwi aumwi wesu ulatondezya kuti ngusikutobela Jesu wakasimpe ciindi natondezya luyando lwini-lwini kubakwesu abacizyi nokuba kuti balalubizya. Kwiinda mukucita boobo, tulakonzya kugwasya bamwi kucizyiba cikombelo cakasimpe akutusangana mukukomba Jehova. Aboobo aabe makanze eesu aakuzumanana kutondezya luyando lwalo ilutuzyibya kuti tuli Banakristo bakasimpe. w23.03 31 ¶18-19

Bbaibbele litondezya kuti bube bulibonya kapati mbwajisi Jehova nduyando. Akaambo kakuti ulatuyanda, tanaakabikkilizya makani manji mu Bbaibbele alo ngotutakonzyi kumvwisya. (Joh. 21:25) Jehova alimwi wakatondezya kuti ulatuyanda kwiinda munzila njaakabelesya kubandika andiswe. Mu Bbaibbele, tanaakatupa milongo yamilawo muzintu zyoonse, kutwaambila zyoonse nzyotuteelede kucita alimwi anzyotweelede kucita. Muciindi caboobo, wakabelesya makani aakacitika ncobeni, businsimi bukkomanisya alimwi alulayo lukonzya kutugwasya kusala kabotu. Kwiinda munzila eezyi, Ijwi lya Leza lilatugwasya kumuyanda alimwi akumumvwida kuzwa ansi aamoyo. Bbaibbele litondezya kuti Jehova ulatubikkila maano kapati. Munzila nzi? Ijwi lyakwe lilizwide zibalo zitondezya bantunsi mbobalimvwa. Tulakonzya kumvwisya mbobakali kulimvwa bantu baambidwe mu Bbaibbele nkaambo mbantu bakali “kulimvwa mbubonya mbotulimvwa aswebo.” (Jak. 5:17) Kwiinda zyoonse, ciindi notubona mbwaakali kubeendelezya bantu bakali mbuli ndiswe, tulazyiba kuti “Jehova ulaalubomba kapati aluse.”—Jak. 5:11. w23.02 6 ¶13-15

Bbuku lyamamanino mu Bbaibbele lilatalika amajwi aakuti: “Ciyubunuzyo cakapegwa a Jesu Kristo, eeco Leza ncaakamupa kuti atondezye bazike bakwe izintu zyeelede kucitika lino-lino.” (Ciy. 1:1) Aboobo, tulayandisisya kubona zintu zicitika munyika mazuba aano mbozizuzikizya businsimi bwamu Bbaibbele. Alimwi ambweni inga twayanda kutalika kubandika abamwi kujatikizya zintu eezyo. Nokuba boobo, ciindi notubandika businsimi bwamu Bbaibbele, tatweelede kwaamba zintu nzyotuyeeyela buyo kuti ziyoocitika. Nkaambo nzi? Nkaambo kucita boobo kulakonzya kunyonganya lukamantano mumbungano. Mucikozyanyo, tulakonzya kumvwa beendelezi bamunyika kabaamba mbobakonzya kwaamana mazwanga aamwi akuleta luumuno akuliiba. Pele muciindi cakuyeeyela buyo kuti makani aayo azuzikizya businsimi buli ku 1 Batesalonika 5:​3, tweelede kuzyiba makani aakamwaigwa caino-ino kujatikizya kaambo aako. Aboobo, kuti twaambo ntotwaamba katuzwa mumakani aakamwaigwa ambunga ya Jehova, tupa kuti mbungano izumanane kukamantana akuba “amuzeezo omwe.”—1Kor. 1:10; 4:6. w23.02 16 ¶4-5

Nkaambo nzi ncomumuyanda Jesu Kristo? Jesu ulabuyanda bululami, kulicesya alimwi akasimpe. Ikuti naa mulakayanda kasimpe alimwi abululami, inga ceelela kwaamba kuti mulamuyanda awalo Jesu Kristo. Amuyeeye buyo Jesu mbwaakakaiminina kasimpe abululami cabusicamba. (Joh. 18:37) Pele ino Jesu utuyiisya buti kuba bantu balicesya? Jesu ulatuyiisya kuba bantu balicesya kwiinda mucikozyanyo cakwe. Mucikozyanyo, bulemu boonse ubupa kuli Bausyi, kutali kulinguwe. (Mk. 10:​17, 18; Joh. 5:19) Ino kulicesya kwa Jesu ooku kumupa kulimvwa buti nywebo? Cakutadooneka kumupa kumuyanda Mwana wa Leza alimwi akumutobela. Nkaambo nzi Jesu ncalicesya? Nkaambo kakuti ulabayanda Bausyi alimwi wiiya kulicesya kwabo. (Int. 18:35; Heb. 1:3) Sena inga tiimwayanda kumwiiya Jesu, walo uubutondezya munzila iilondokede bube bwa Jehova? w23.03 3-4 ¶6-7

Bbaibbele lyaamba nkamu zyobilo zyabantu ibayoobusyigwa kabajisi bulangizi bwakupona kukabe kutamani anyika, nkokuti “baluleme” alimwi “abataluleme.” “Baluleme” mbabaabo ibakamubelekela Jehova cakusyomeka nobakacili kupona. Mpoonya “bataluleme” tiibakamubelekela. Mbwaanga nkamu zyobilo eezyi ziyoobusyigwa, sena inga twaamba kuti mazina aabo alilembedwe mubbuku lyabuumi? Kabatanafwa, “baluleme” mazina aabo akalembwa mubbuku lyabuumi. Sena mazina aabo akagwisyigwa mubbuku ciindi nobakafwa? Peepe, nkaambo bacili “baumi” mumizeezo ya Jehova. Jehova “tali Leza wabafwu, pele ngwabaumi, nkaambo boonse mbaumi kulinguwe.” (Lk. 20:38) Eeci caamba kuti ciindi baluleme baakubusyigwa anyika, mazina aabo ayoojanika alilembedwe mubbuku lyabuumi, nokuba kuti kumatalikilo anoolembedwe “apenso.”—Lk. 14:14. w22.09 16 ¶9-10

Jehova wakali kuyanda kuti Adamu kajana lukkomano kwiinda mukulangilila zilenge. Aboobo ciindi naakamulenga, wakamupa munzi waparadaiso weebeka kuti kakkala mumo alimwi wakamupa amulimo wakucita. (Matl. 2:​8, 9) Amweezeezye buyo mbwaakali kukkomana Adamu kulangilila mbuto kazimena amaluba kaafwulula. Eelo kaka Adamu wakajisi coolwe citaliboteli cakulanganya muunda wa Edeni! Kunze lyaboobo, Jehova wakaambila Adamu kubaulika mazina banyama bayindene-indene. (Matl. 2:​19, 20) Jehova wakali kukonzya kumuulika zina munyama umwi aumwi, pele wakasala kupa Adamu mulimo ooyu. Tacidoonekwi buya kuti katanasala kubaulika mazina banyama, Adamu wakali kusaanguna kubalangilila mbobakali kuboneka ambobakali kucita zintu. Alimwi kweelede kuti eeci cakali kumukkomanisya kapati. Tacidoonekwi kuti cakali kumupa coolwe cakubona mbwali musongo Jehova alimwi ambozili zibotu zilenge zyakwe. w23.03 15 ¶3

Bweendelezi bwa Anglo-America ibwiimininwa acibumbwa cipati kapati, mbobweendelezi bwamamanino ibwakasinsimwa mu Bbaibbele. (Dan. 2:​31-33) Tabukanjililwi mubusena abweendelezi bumbi. Muciindi caboobo, buyoonyonyoonwa lya Amagedoni ciindi Bwami bwa Leza bwaakubunyonyoona antoomwe amfwulumende zimbi zyabantunsi. (Ciy. 16:​13, 14, 16; 19:​19, 20) Mbuti mbotukonzya kugwasyigwa abusinsimi oobu? Businsimi bwa Daniele bupa bumboni abumbi bwakuti tupona muciindi camamanino. Myaka iinda ku 2,500, Daniele wakasinsima kuti bwaakunyonyoonwa bweendelezi bwa Babuloni, bweendelezi bumbi bwanyika yoonse bone bwakali kuyoobadyaaminina kapati bantu ba Leza. Kuyungizya waawo, wakaamba kuti bweendelezi bwa Anglo-America, mbobunooli bwamamanino. Eeci citupa luumbulizyo alimwi abulangizi bwakuti lino-lino Bwami bwa Leza buyoobunyonyoona bweendelezi bwabantu alimwi bwalo mbobunooyendelezya munyika yoonse. w22.07 4 ¶9; 5 ¶11-12