July

Kwaambaula ncipego kuzwa kuli Leza wesu siluyando. Nokuba boobo, cipego cakwaambaula cakanyonganizyigwa. Saatani Diabolosi wakacenga Eva, aboobo bubeji bwakwe bwakapa kuti bantu babisye alimwi akuba bantu batalondokede. (Matl. 3:​1-4) Adamu tanaakaubelesya kabotu mulaka wakwe ciindi naakatamikizya Eva alimwi buya a Jehova akaambo kakulubizya kwakwe. (Matl. 3:12) Kaini wakacenga Jehova naakamana kujaya mwanookwabo Abelo. (Matl. 4:9) Mafilimu manji mazuba aano atondezya ŋambawido iitali kabotu. Basicikolo balaimvwa ŋambawido iili boobu kucikolo, abalo bapati balaimvwa kumilimo. Ikuti tiitwacenjela, tulakonzya kuzyibila kumvwa ŋambawido mbyaabi cakuti andiswe tulakonzya kutalika kwiibelesya. Masimpe mbotuli Banakristo, tuyanda kukkomanisya Jehova, eeci cibikkilizya kweeleba ŋambawido yacisapi. Tuyanda kubelesya cipego eeci cibotu munzila iitembaula Leza wesu. w22.04 4 ¶1-3

Jesu wakali kuzibona munzila iili kabotu zintu zyakumubili. Wakali kukukkomanina kulya alimwi akunywa. (Lk. 19:​2, 6, 7) Aciindi cimwi, naakacita maleele aakwe aakusaanguna, wakapanga waini mubotu. (Joh. 2:​10, 11) Alimwi ciindi naakafwa, wakasamide cisani icidula kapati. (Joh. 19:​23, 24) Pele Jesu kunyina naakabikkila kapati maano kuzintu zyakumubili. Jesu wakayiisya kuti, ikuti twabikka Bwami mubusena bwakusaanguna, Jehova uyooba masimpe kuti tulijsi zyoonse nzyotuyandika. (Mt. 6:​31-33) Banji bagwasyigwa kwiinda mukubelesya lulayo lwabusongo kujatikizya mali. Amubone cikozyanyo camukwesu uutakwete wazina lya Daniel. Wakaamba kuti: “Nindakali mwana, ndakasala zintu zyakumuuya kuba cintu ciyandika kapati mubuumi bwangu.” Akaambo kakuti upona buumi buubauba, mukwesu ooyu wacikonzya kubelesya ciindi alimwi aluzyibo muzintu zyakumuuya. Wakayungizya kuti: “Kunyina mweelwe wamali uukonzya kweezyanisyigwa azilongezyo nzyaandipa Jehova.” w22.05 21-22 ¶6-7

Tulakonzya kutondezya kuti tulakayanda kasimpe kwiinda mukubala Bbaibbele amabbuku aamba zyamu Bbaibbele ciindi aciindi. Kufwumbwa naa twakkala ciindi cilamfwu buti mukasimpe, tweelede kuzumanana kwiiya. Kubala kuyandika kubeleka canguzu, pele kulagwasya kapati. Tobanji tatukukkomanini kubala akwiiya. Pele Jehova utwaambila kuti tweelede ‘kuzumanana kuyandaula’ alimwi ‘akuzumanana kulangaula’ kutegwa tukamvwisye kabotu kasimpe. (Tus. 2:​4-6) Ciindi notubeleka canguzu, tulagwasyigwa kapati. Kujatikizya ciiyo cakwe ca Bbaibbele, mukwesu Corey wakaamba kuti ubikkila maano kukapango komwe aciindi comwe. Wakati: “Ndilabala bupanduluzi ibuli mumajwi aayungizyidwe, Magwalo aamba makani aakozyenye aatondezyedwe mukapango aako alimwi ndilavwuntauzya. . . . tandimanizyi kumvwuntauzya makani oonse aali mukapango aciindi comwe nondibelesya nzila eeyi, pele ndilagwasyigwa kapati!” Kufwumbwa naa tubelesya nzila eeyi naa imbi, tulatondezya kulumba kukasimpe kwiinda mukubelesya ciindi alimwi anguzu kukaiya.—Int. 1:​1-3. w22.08 17 ¶13; 18 ¶15-16

Ciindi Jesu naakali anyika, wakabelesya zilenge kuyiisya basikwiiya bakwe kujatikizya Bausyi. Amubone cintu cimwi ncaakayiisya. Jehova ulatondezya luyando kubantu boonse. Mu Mulumbe wakwe Waacilundu, Jesu wakabandika abasikwiiya bakwe kujatikizya zuba amvwula, izintu bantu banji nzyobatabikkili maano kapati. Zintu eezyi zyoonse zyobilo zilayandika kapati kutegwa tuzumanane kupona. Ikuti Jehova naali kuyanda, nokunga tabapi aabo batamubelekeli. Pele caluyando, ulapa zuba amvwula kubantu boonse. (Mt. 5:​43-45) Jesu wakabelesya ciiyo eeci kuyiisya basikwiiya bakwe kuti Jehova uyanda kuti katutondezya luyando kubantu boonse. Kufwumbwa leelyo notwabona mboliboneka kabotu zuba ciindi nolibbila naa mvwula iisunsumuna, tweelede kuyeeya luyando ndwajisi Jehova kubantu boonse. Cikozyanyo cakwe ceelede kutukulwaizya kutondezya luyando luli boobu kwiinda mukukambaukila bantu boonse. w23.03 17 ¶9-10

Ino ncinzi cakagambya mwaapostolo Johane? Mukaintu iwakatantide aamunyama uusalala pyu. Mukaintu ooyo, waambwa kuti “muvwuule mupati” alimwi wiitwa kuti “Babuloni Mupati.” Ulacita “buvwuule abami bamunyika.” (Ciy. 17:​1-5) Ino “Babuloni Mupati” nguni? Mukaintu ooyu takonzyi kwiiminina mbunga zyamunyika zyamapolitikisi nkaambo waambwa kuti ucita bwaamu abami bamunyika. (Ciy. 18:9) Alimwi buya, akaambo kakuti utantide amunyama citondezya kuti usola kubeendelezya. Kuyungizya waawo, mukaintu ooyu takonzyi kwiiminina zibeela zyamakwebo zyabusyaacivwulemwangu zyamunyika ya Saatani. Zibeela eezyi, zilaambidwe mutupango tumbi mubbuku lya Ciyubunuzyo oomo moziitwa kuti “basambazi bamunyika.” (Ciy. 18:​11, 15, 16) Mu Babuloni yansiku momwakali kucitilwa bukombi bwakubeja. Aboobo kweelede kuti, Babuloni Mupati wiiminina misyobo yoonse yabukombi bwakubeja. Alimwi buya, mukaintu ooyu mbulelo bwanyika yoonse bwabukombi bwakubeja.—Ciy. 17:​5, 18. w22.05 11 ¶14-16

Ncakuzyalwa ancico buya kuli bamakaintu Banakristo ikweezyeezya naa bana babo bayoosala kumubelekela Jehova. Amana buya, bazyali banji balizyi mbocikatazya kukomezya bana munyika ya Saatani. Kuyungizya waawo, bazyali banji balajana buyumuyumu kukomezya bana babo kuti kakunyina lugwasyo lwamulumi naa kuti kabakwetwe kumulumi uutali mukombi wa Jehova. Bamakaintu Banakristo ibakwetwe kubantu batali Bakamboni balajana buyumuyumu bwakukomezya bana kumuyanda Jehova. Nociba ciindi bazyali boonse bobilo nobali mukasimpe, cilakonzya kubayumina kuyiisya bana babo kuba babelesi ba Jehova Leza basyomeka. Nokuba boobo, mutaciindizyi kulibilika pe. Jehova uyoomugwasya. Mulakonzya kubuzya bazyali bali aluzyibo kutegwa bamwaambile mbobazibelesya zibelesyo eezyi ciindi nobakomba mumukwasyi. (Tus. 11:14) Kuyungizya waawo, Jehova uyoomugwasya kucizyiba kubandika abana banu. Amumulombe kutegwa amugwasye kuzyiba zili mumyoyo yabana banu.—Tus. 20:5. w22.04 17 ¶4, 7; 18 ¶9

Tulakonzya kuyungizya luyando lwesu kuli Jehova kwiinda mukumuzyiba kabotu Mwanaakwe, walo uubutondezya bube bwa Bausyi cakulondoka. (Heb. 1:3) Nzila iinda kubota mbotukonzya kumuzyiba Jesu, nkubala mabbuku one aa Makani Mabotu. Ikuti naa tamujisi cilengwa cakubala Bbaibbele abuzuba, sena inga tiimwatalika lino? Ciindi nomubala zibalo eezyi zyaamba Jesu, amubikkile maano kapati kubube bwakwe. Wakali kusikilika; wakabafwukatila bana basyoonto caluyando. (Mk. 10:​13-16) Basikwiiya bakwe bakali kulikwaya kuba anguwe; bakali kwaanguluka kumwaambila mbobayeeya. (Mt. 16:22) Munzila eeyi, Jesu wakaiya Bausyi bakujulu. Awalo Jehova ulasikilika kapati. Kayi, tulakonzya kupaila kulinguwe. Alimwi ciindi notupaila tulakonzya kwaamba zili mumoyo wesu. Tulijisi lusyomo lwakuti takonzyi kutubeteka. Ulatuyanda; alimwi ulatubikkila maano.—1Pet. 5:7. w22.08 3 ¶4-5

Mbwaanga Mulengi wesu, Jehova ulizyi zintu zyoonse kujatikizya ndiswe. Amuyeeye buyo kaambo aaka! Ulizyi zintu zyoonse kujatikizya bantu boonse ibali anyika. (Int. 139:​15-17) Aboobo ulakubona kutalondoka koonse nkotwakakona kubazyali besu. Alimwi buya, ulizyi zintu zyoonse zyakatucitikila mubuumi izyakapa kuti katujisi bube bumwi. Ino luzyibo oolu lumupa kucita nzi? Lumupa kutufwida luse. (Int. 78:39; 103:​13, 14) Jehova wakatondezya kuti ulayanda kapati kulekelela. Ulizyi kuti, akaambo kamicito yamwaalumi wakusaanguna Adamu, toonse twakasinganizyigwa kucibi alimwi alufwu. (Rom. 5:12) Kunyina mbotwakali kukonzya kulyaangununa naa kwaangununa muntu uumbi kukusinganizyigwa ooko. (Int. 49:​7-9) Nokuba boobo, Leza wesu siluyando wakatondezya lweetelelo alimwi akubikka bubambe bwakutwaangununa kukusinganizyigwa ooko. Johane 3:16 yaamba kuti, Jehova wakatuma Mwanaakwe simuzyalwaalikke kuzootufwida.—Mt. 20:28; Rom. 5:19. w22.06 3 ¶5-6

Jehova wakakasalazya kaambo kakuti aabo balekelela bamwi abalo bayoolekelelwa kumajwi ngaakaambila Jobu. Mwaalumi ooyu uusyomeka, wakalityompedwe kapati akaambo kamajwi aacisizya moyo ngaakaambilwa abaalumi botatwe, Elifazi, Bilidadi alimwi a Zofari. Jehova wakalailila Jobu kuti abapailile. Naakamana kubapailila, Jehova wakamuleleka. (Job. 42:​8-10) Kubikkilila kuletela mapenzi. Jehova uyanda kuti katukkomana abubotu buboola akaambo kakutabikkilila bamwi. (Ef. 4:​31, 32) Utukulwaizya kuti, “koleka kunyema abukali.” (Int. 37:8) Tulagwasyigwa ciindi notutobela lulayo oolu lwabusongo. Kubikkilila kuleta mapenzi aakumubili alimwi amumizeezo. (Tus. 14:30) Kuti twazumanana kumubikkilila muntu umwi, walo tacimujatikizyi pe, mbubwenya buyo, kuti twanywa musamu uukola, ndiswe tutifwe ikutali nguwe. Pele ciindi notulekelela bamwi, ndiswe tugwasyigwa. Tulaba aluumuno lwamumizeezo amumoyo, alimwi akuzumanana kubelekela Jehova. w22.06 10 ¶9-10

Bulangizi bwesu buli mbuli cimpoompo cacikozyanyo icikwabilila mizeezo yesu alimwi akutugwasya kutabikkila buyo maano kuzintu nzyotuyandika swebo tobeni, zyalo izikonzya kunyonganya cilongwe cesu a Jehova. (1Kor. 15:​33, 34) Bulangizi bwesu alimwi bulakonzya kutukwabilila kukuyeeya kuti tatukonzyi kumukkomanisya Jehova. Amuyeeye sikuumbulizya Jobu wakubeja Elifazi mbwaakakubelesya kuyeeya kuli boobu kuli Jobu. Elifazi wakaamba kuti: “Ino muntu ngwani kuti asalale?” Mpoonya wakaamba boobu kujatikizya Leza: “Bona! Bangelo bakwe kunyina nabasyoma pe, alimwi naaba majulu taasalede pe mumeso aakwe.” (Job. 15:​14, 15) Eelo kaka oobu mbubeji! Kamuyeeya kuti Saatani nguupa kuyeeya kuli boobu. Ulizyi kuti ikuti twazumanana kuyeeya munzila iili boobu, bulangizi bwesu bulatalika kuceya aasyoonto-syoonto. Aboobo amubukake bubeji oobu. Mutadooneki kuti Jehova uyanda kuti mukapone kukabe kutamani alimwi akuti uyoomugwasya kwiizuzikizya mbaakani eeyo.—1Tim. 2:​3, 4. w22.10 25-26 ¶8-10

Saatani wakali kuyanda kupa Jobu kusyoma kuti wakali kupenga akaambo kakuti Jehova tanaakali kumukkomanina. Mucikozyanyo, Saatani wakabelesya guwo kunyonyoona ŋanda mobakabede bana ba Jobu boonse bali kkumi nobakali kulya antoomwe. (Job. 1:​18, 19) Wakapa kuti mulilo uloke kuzwa kujulu, akunyonyoona zivwubwa zya Jobu alimwi ababelesi bakwe ibakali kuzilanganya. (Job. 1:16) Mbwaanga guwo alimwi amulilo zyakazwa kujulu; Jobu wakayeeya kuti zyakazwa kuli Jehova Leza. Akaambo kaceeci, Jobu wakasyoma kuti ambweni wakamunyemya Jehova. Nokuba boobo, Jobu wakakaka kumutukila Usyi wakujulu. Jobu wazikuzyiba kuti myaka yoonse wakali kupegwa zintu zinji zibotu kuzwa kuli Jehova. Aboobo wakayeeya kuti ikuti naa wakali kupegwa zintu zibotu kuzwa kuli Leza, nkokuti wakeelede kulyaaba akutambula zintu zibyaabi. Wakaamba kuti: “Alizumanane kutembaulwa izina lya Jehova.”—Job. 1:​20, 21. w22.06 21 ¶7

Jesu wakaambila basikwiiya bakwe kucenjezya kukonzyenye akooku kulembedwe kulugwalo lwa Joh. 17:14. Masimpe twakubona kuzuzikizyigwa kwabusinsimi oobu, kwaambisya myaka iili 100 yainda. Mubuti? Ciindi cisyoonto buyo kuzwa Jesu naakabikkwa kuba Mwami wabu Mesiya mu 1914, Saatani wakatandwa kujulu. Lino uli waano ansi, kulindila lunyonyooko. (Ciy. 12:​9, 12) Pele takkede buyo pe. Saatani ulinyemede alimwi ulabalwana bantu ba Leza. (Ciy. 12:​13, 17) Akaambo kaceeci, nyika yaindila buya kubasula bantu ba Leza. Nokuba boobo, tatweelede kumuyoowa Saatani abasikumutobela. Muciindi caboobo, tweelede kuba alusyomo mbuli ndwaakajisi mwaapostolo Paulo, iwakalemba kuti: “Ikuti Leza kalaandiswe, ino nguni uukonzya kutulwana?” (Rom. 8:31) Tweelede kumusyoma Jehova cakumaninina. w22.07 18 ¶14-15

Jesu kunyina naakalibilikide kuti basimulimo bayooceya kumamanino aabweende bwazintu. Wakalizyi kuti majwi aabusinsimi aasintembauzyo akali kuyoozuzikizyigwa aakuti: “Bantu bako bayoolyaaba cakuliyandila mubuzuba bwampi yako yabasikalumamba.” (Int. 110:3) Ikuti naa mulatola lubazu mumulimo wakukambauka, nkokuti mugwasyilizya Jesu alimwi amuzike uusyomeka alimwi mulagwasyilizya kuzuzikizya businsimi oobu. Mulimo uyaabuyaambele, pele kuli buyumuyumu. Buyumuyumu bumwi mbobajana bakambausi ba Bwami nkukazyigwa. Basiluleyo, basololi bazikombelo abasimapolitikisi baambila bantu banji makani aakubeja kujatikizya mulimo wesu. Ikuti banamukwasyi, balongwe ababelesima bakeenwa abantu bali boobu, balakonzya kutusinikizya kuleka kubelekela Jehova akuleka kukambauka. Mumasi aamwi, bakwesu abacizyi balakazyigwa kwiinda mukukongwa, kwaangwa alimwi buya akutolwa muntolongo. w22.07 8 ¶1; 9 ¶5-6

Jehova uyanda kuti katujana ciindi cakubala Bbaibbele abuzuba alimwi akuzinzibala kuyeeya kujatikizya nzyotubala. Ciindi notuzibelesya nzyotwiiya, lusyomo lwesu lulayuma alimwi tulaba acilongwe ciyumu kapati a Taateesu wakujulu. Ikuti twacita oobo, tulaba anguzu zyakuliyumya mumasunko. Kunze lyaboobo, Jehova ulabapa muuya wakwe uusalala aabo ibalisyoma Jwi lyakwe. Alimwi muuya ooyu ulatupa “nguzu zigambya iziinda zyabantu” kutegwa tuliyumye kusunko lili lyoonse. (2Kor. 4:​7-10) Kwiinda mukugwasyigwa a Jehova, “muzike uusyomeka alimwi uucenjede” ulamwaya zibalo zinji, mavidiyo alimwi anyimbo zikonzya kuyumya lusyomo lwesu akutupa kuzumanana kupakamana kumuuya. (Mt. 24:45) Jehova wabayiisya bantu bakwe kuyandana alimwi akuumbulizyanya muziindi eezyi zyamapenzi. (2Kor. 1:​3, 4; 1Tes. 4:9) Bakwesu alimwi abacizyi balilibambilide kutugwasya kuzumanana kusyomeka ciindi notujana buyumuyumu. w22.08 12 ¶12-14

Kwiinda mukuba acilengwa cakwaamba bube bubotu bwabakwesu abacizyi, tukulwaizya cilongwe akati kabo calo iciyaka mbungano muluyando. Zimwi ziindi, nobaba Banakristo basimide balakonzya kuzwangana. Eeci cakacitika kuli mwaapostolo Paulo amulongwe wakwe Barnaba. Baalumi aaba tiibakazuminana kuti naa bakeelede kuunka a Marko mulweendo lwabo lwabumisyinali ilwakali kutobela. Kwakaba ‘kuzwangana kapati’ akati kabo, mpoonya bakaandaana. (Mil. 15:​37-39) Pele Paulo, Barnaba alimwi a Marko bakabamba luumuno. Kumbele Paulo wakaamba zintu zibotu kujatikizya Barnaba a Marko. (1Kor. 9:6; Kol. 4:10) Andiswe tulakonzya kubamba luumuno abamwi mumbungano akuzumanana kubikkila maano kubube bubotu mbobajisi. Munzila eeyo, tuyookulwaizya luumuno alukamantano. w22.08 23 ¶10-11

Notusolekesya kupona kweelana azyeelelo zya Jehova zyabululami, tweelede kutantamuka cilengwa cakubeteka bamwi akulipa kaleza-leza. Tweelede kuyeeya kuti Jehova ngo “Mubetesi wanyika yoonse.” (Matl. 18:25) Jehova tanaakatupa nguzu zyakubeteka bamwi. Amuyeeye cikozyanyo camwaalumi mululami Josefa. Tanaakababeteka bamwi, nobaba baabo ibakamweendelezya munzila mbyaabi. Banabokwabo bakamucitila calunya, bakamusambala mubuzike akwaambila bausyi kuti Josefa ulifwide. Kumbele, Josefa wakakamantana alimwi amukwasyi wakwe. Lino kali mweendelezi uulaanguzu, Josefa naakababeteka calunya banabokwabo akubapilusizya cibi. Banabokwabo Josefa bakalilibilikide kuti ambweni ulacita mbubwenya oobo, nokuba kuti bakaluuside kapati kuzintu nzyobakacita. Pele Josefa wakabaambila kuti: “Mutayoowi pe. Sena mebo ndili mubusena bwa Leza?” (Matl. 37:​18-20, 27, 28, 31-35; 50:​15-21) Cakulicesya, Josefa wakalekela Jehova kubeteka. w22.08 30 ¶18-19

Sena mulizyi kuti Jehova ulakonzya kumubelesya kwiingula mupailo uuzwa ansi amoyo wamuntu umwi? Mulakonzya kugwasya kufwumbwa naa muli mwaalu, mukutausi, mupainiya waciindi coonse naa sikumwaya mumbungano. Mulakonzya kugwasya tacikwe makani muli mwana, mupati, muli mukwesu naa mucizyi. Ciindi muntu uumuyanda Jehova nalomba lugwasyo kulinguwe, kanji-kanji Leza wesu ubelesya baalu alimwi ababelesi basyomeka bamwi kutegwa ‘bamuumbulizye kapati’ muntu ooyo. (Kol. 4:11) Eelo kaka tulikkomene kapati kubelekela Jehova alimwi abakwesu munzila eeyi! Tulakonzya kubagwasya alimwi akubaumbulizya bakwesu ciindi nokwabbuka bulwazi, nokwacitika ntenda naa nokwaba kupenzyegwa. Inga katuyanda kubatamba aabo ibajisi penzi lyamali kuti batusangane kucakulya, pele acalo eeci inga kacitakonzyeki. Inga katuyanda kubagwasya bamwi, pele eeco cilakonzya kutukatazya ikuti bamukwasyi wesu kabaciswa. Nokuba boobo, tuyanda kubagwasya bakwesu alimwi Jehova ulakkomana ciindi notubacitila kufwumbwa ncotukonzya.—Tus.19:17. w22.12 22 ¶1-2   

Luyando nentalisyo yakusyomeka. Jesu wakaamba kuti milawo mipati yobilo nkuyanda Jehova asimukoboma. (Mt. 22:​37-39) Kuyanda Jehova kweelede kutukulwaizya kwiiya cikozyanyo cakwe cakusyomeka, cilondokede. Mucikozyanyo, kuyanda bakwesu abacizyi kweelede kutukulwaizya kubamba maseseke aabo. Tatuyandi kuyubununa makani aakonzya kubacisizya moyo naa kubajazya nsoni. Kulicesya alimwi kuyootugwasya kusyomeka. Munakristo uulicesya tayandi kukkomanisya bamwi kwiinda mukuyanda kuba wakusaanguna kubaambila makani amwi. (Flp. 2:3) Kunyina nalitondezya kuti ulayandika kapati akuti kuli makani ngazyi alo ngatazumizyidwe kuyubununa. Kulicesya kuyootugwasya kutamwaya makani aakuyeeyela buyo, alo aataambidwe mu Bbaibbele naa mumabbuku aamba zyamu Bbaibbele. w22.09 12 ¶12-13   

Mungelo wakaambila Daniele kuti bantu ba Leza bayakwaamvwisya majwi aabusinsimi aali mubbuku lyakwe, pele ‘aabo babi kunyina naba omwe uuyoomvwisya.’ (Dan. 12:10) Ecino nceciindi cakutondezya kwiinda mumilimo yesu kuti tatuli kulubazu lwabantu babi. (Malk. 3:​16-18) Jehova ulimukubunganya baabo mbabona kuti ‘ndubono luyandisi,’ nkokuti aabo bayandika kapati kulinguwe. Masimpe tulayanda kuba akati kabo. Mubwini, tupona muziindi zikkomanisya. Pele kuli zintu zikkomanisya kapati izili afwaafwi kucitika. Lino-lino tuyoobona kunyonyoonwa kwabasizibi boonse. Kuzwa waawo, tuyoobona kuzuzikizyigwa kwacisyomezyo ca Jehova kuli Daniele cakuti: “Uyakwiimikila kutegwa ukabweze caabilo cako kumamanino aamazuba.” (Dan. 12:13) Sena mulabulangila buzuba oobo ciindi Daniele, antoomwe abayandwa banu, ‘nobayakwiimikila’ alimwi? Ikuti kacili boobo, amusolekesye kusyomeka lino, mpoonya mulakonzya kuba masimpe kuti zina lyanu liyoozumanana kalilembedwe mubbuku lyabuumi lya Jehova. w22.09 24 ¶17; 25 ¶19-20   

Kweelede kuti majwi aaya akamuyumya Ezekieli. Nkaambo nzi? Cakutadooneka wakayeeya kuti Jehova wakabelesya majwi aakozyenye ciindi naakasala Musa a Isaya kuti babe basinsimi bakwe. (Kul. 3:10; Is. 6:8) Alimwi Ezekieli wakalizyi Jehova mbwaakabagwasya basinsimi aabo bobilo kuzunda buyumuyumu. Aboobo ciindi Jehova naakaambila Ezekieli ziindi zyobilo kuti: “Ndikutuma kubana Israyeli,” musinsimi ooyu wakalijisi twaambo tubotu itwakeelede kumupa kusyoma kuti Jehova uyoomugwasya. Kuyungizya waawo, mubbuku lya Ezekieli, tujana kaambo aaka ziindi zinji kakuti: “Ijwi lya Jehova lyakandisikila.” (Ezk. 3:16) Alimwi ziindi zinji, wakalemba kuti: “Ijwi lya Jehova lyakandisikila alimwi.” (Ezk. 6:1) Masimpe, Ezekieli wakalisinizyide kuti wakatumwa a Jehova. Alimwi mbwaanga wakali mwana wamupaizi, kweelede kuti Ezekieli wakayiisyigwa abausyi kuti kuzwa kaindi Jehova wakabasyomezya basinsimi bakwe kuti wakali kuyoobagwasya. Mucikozyanyo, Jehova wakaambila Izaka, Jakobo a Jeremiya kuti: “Ndili anduwe.”—Matl. 26:24; 28:15; Jer. 1:8. w22.11 2 ¶3

Nokuba kuti Adamu a Eva bakabisya akuletela bana babo lufwu, Jehova kunyina naakacinca mizeezo yakwe kujatikizya makanze aakwe. (Is. 55:11) Makanze aakwe acili aakupa bantu basyomeka coolwe cakupona kukabe kutamani. Atubone zintu Jehova nzyaakaamba akucita kutegwa azuzikizye makanze aakwe. Jehova wakasyomezya kuti uyoobabusya bafwide alimwi akubapa coolwe cakupona kukabe kutamani. (Mil. 24:15; Tit. 1:​1, 2) Mwaalumi uusyomeka Jobu wakalisinizyide kuti Jehova ulayandisisya kuyoobabusya bafwide. (Job. 14:​14, 15) Musinsimi Daniele wakalizyi kuti bantu bajisi bulangizi bwakuyoobusyigwa kabajisi coolwe cakupona kukabe kutamani. (Int. 37:29; Dan. 12:​2, 13) Abalo ba Juda kuciindi ca Jesu bakalizyi kuti Jehova ulakonzya kupa babelesi bakwe basyomeka “buumi butamani.” (Lk. 10:25; 18:18) Cakwiinduluka-induluka Jesu wakacaamba cisyomezyo eeci, alimwi walo kumugama wakabusyigwa a Bausyi.—Mt. 19:29; 22:​31, 32; Lk. 18:30; Joh. 11:25. w22.12 4-5 ¶8-9

Jehova ututamba kuti tube balongwe bakwe. (Jak. 4:8) Uyanda kuti abe Leza wesu, Taateesu, alimwi a Mulongwe wesu. Ulaingula mipailo yesu alimwi ulatugwasya notuli mumapenzi. Alimwi ubelesya mbunga yakwe kutuyiisya akutukwabilila. Tulakonzya kuba mulongwe wa Jehova kwiinda mukupaila, kubala Jwi lyakwe akuzinzibala kuyeeya nzyotubala. Notucita boobo, citupa kumuyanda alimwi akumulumba. Tulakulwaizyigwa kumumvwida alimwi akumutembaula kweelana ambwayanda. (Ciy. 4:11) Ciindi notuyaabuyungizya luzyibo lwesu kujatikizya Jehova, lusyomo lwesu mulinguwe alimwi amumbunga njabelesya kutugwasya luyooyuma. Nokuba boobo, Diabolosi, ulasolekesya asyoonto-syoonto kutupa kuleka kusyoma Jehova ambunga yakwe. Pele tulakonzya kumukazya. Ciindi lusyomo lwesu noluli luyumu alimwi anotusyomeka kuli Jehova cakumaninina, tuyoozumanana kumusyoma Leza ambunga yakwe.—Int. 31:​13,14. w22.11 14 ¶1-3

Banakristo bakasimpe banji balikubikka lwaanguluko lwabo abuumi bwabo muntenda akaambo kaluyando ndobajisi kuli Jehova Mweendelezi wabo Mupati. Mbanakristo basyomeka, ibakanzide mbubwenya mbuli bana Hebrayo botatwe ibakafwutuka mubbibi lyamulilo akaambo kakuzumanana kusyomeka ku Mupati Kwiinda. Sintembauzyo Davida wakalemba kujatikizya mbociyandika kuzumanana kusyomeka naakati: “Jehova uyoobabeteka bantu. Kondibeteka O Jehova kweelana abululami bwangu alimwi akweelana akubula kampenda kwangu.” (Int. 7:8) Alimwi Davida wakalemba kuti: “Bululami akubula kampenda azindikwabilile.” (Int. 25:21) Cintu ciinda kubota nkuzumanana kusyomeka kuli Jehova! Kuti twacita oobo, tuyoolimvwa mbubwenya mbwaakalimvwa sintembauzyo iwakalemba kuti: “Balikkomene aabo basyomeka . . . , ibeenda mumulawo wa Jehova.”—Int. 119:​1, bupanduluzi buyungizyidwe. w22.10 17 ¶18-19

Akati kamibandi yoonse Jobu njaakaba anjiyo mubuumi bwakwe boonse, kweelede kuti mubandi ngwaakajisi a Jehova Leza wakalilibedelede. Mumubandi ooyu, Jehova wakaambila Jobu kulanga zintu zimwi zibotu nzyaakalenga. Eeci cakali kukonzya kugwasya Jobu kuzyiba mbwali musongo Jehova alimwi akuba masimpe kuti ulakonzya kupa babelesi bakwe zintu zyoonse nzyobayandika. Mucikozyanyo, Leza wakayeezya Jobu kuti ulabalanganya banyama, aboobo takonzyi kwaalilwa kumulanganya. (Job. 38:​39-41; 39:​1, 5, 13-16) Kwiinda mukulanga-langa zikozyanyo eezyi zyazilenge, Jobu wakaiya ziiyo zinji kujatikizya bube mbwajisi Leza. Andiswe tulakonzya kwiiya zinji kujatikizya Leza kwiinda mukubikkila maano kuzintu nzyaakalenga. Pele zimwi ziindi tacili cuuba-uba kucita boobo. Ikuti katukkala mudolopo, ambweni inga tiitwakonzya kuzibona zilenge zya Jehova buzuba abuzuba. Pele nokuba kuti tukkala muminzi, zimwi ziindi tulakonzya kwaalilwa kujana ciindi cakulangilila zilenge, pele tweelede kusolekesya kujana ciindi cakulangilila zilenge. w23.03 15 ¶1-2

Jesu wakaamba kuti mamanino naatanasika kuyooba “mizuzumo yanyika mipati” alimwi antenda zimwi buyo. (Lk. 21:11) Alimwi wakaamba kujatikizya ‘kuvwula kwabubi,’ calo cilibonya mumicito yabugwebenga, nkondo, akujayana cijaye-jaye. (Mt. 24:12) Jesu kunyina naakaamba kuti mapenzi aali boobu anoocitikila buyo baabo Jehova mbatakkomanini pe. Mubwini, babelesi ba Leza banji balijatikizyidwe amapenzi aali boobu. (Is. 57:1; 2Kor. 11:25) Jehova takonzyi kutukwabilila camaleele kumapenzi oonse aaya, pele uyootupa kufwumbwa ncotuyandika kutegwa tuzumanane kuliiba mumoyo alimwi akuba aluumuno. Ciyootuubila kuliiba mumoyo nokwacitika ntenda ikuti naa twakalibambila kujatikizya ncotukonzya kucita. Pele sena kulibambilila limwi kutondezya kuti tatumusyomi Jehova? Naaceya. Mubwini, kulibambila kujatikizya ntenda kutondezya kuti tulijisi lusyomo munguzu zyakwe zyakutulanganya. Mubuti? Jwi lya Leza litukulwaizya kulibambila ntenda zikonzya kucitika. w22.12 18 ¶9-10

Ciindi Josefa naakali muntolongo, Jehova wakapa mwami wa Egepita kulota ziloto zyobilo zikatazya. Ciindi mwami naakazyiba kuti Josefa wakali kukonzya kupandulula ziloto, wakamwiita. Kwiinda mukugwasyigwa a Jehova, Josefa wakazipandulula ziloto alimwi Farao wakakkomana kapati akaambo kazintu zigwasya nzyaakaambilwa kuti acite. Farao naakabona kuti Jehova wakali a Josefa, wakamusala kulanganya zyakulya mucisi coonse ca Egepita. (Matl. 41:​38, 41-44) Kumbele, kwakaba nzala mpati mu Egepita alimwi amucisi ca Kanana, oomo bamukwasyi wa Josefa mobakali kukkala. Aboobo lino Josefa wakali kukonzya kugwasya bamukwasyi wakwe kuti batafwi akaambo kanzala akukwabilila luzubo mwaakali kuyoozyalilwa Mesiya. Tacidoonekwi buya kuti, Jehova ngowakapa kuti zyoonse nzyaakali kucita Josefa zizwidilile. Nokuba kuti banabokwabo Josefa bakali kuyanda kumujaya, Jehova wakacinca bukkale bwakwe ikutegwa azuzikizye makanze aakwe. w23.01 17 ¶11-12

Muntu uulilingula mwini, ulabikkila maano kuzintu zili zyoonse zikonzya kunyonganya cilongwe cakwe a Jehova alimwi akusola kuzitantamuka. Kwiinda mukucita boobo, ulazumanana kukkala muluyando lwa Leza. (Tus. 22:3; Jud. 20, 21) Mwaapostolo Paulo wakaambila Banakristo kulilingula beni. Mucikozyanyo, wakaambila Banakristo baku Efeso kuti: “Amucenjele kapati, mutanikweendi mbuli bafwubafwuba pe, pele mbuli bantu basongo.” (Ef. 5:​15, 16) Saatani uluujisi kuyanda kunyonganya cilongwe cesu a Jehova, nkakaambo kaako Bbaibbele litwaambila ‘kuzumanana kumvwisya ncayanda Jehova’ kutegwa tucikonzye kumuzunda. (Ef. 5:17) Kutegwa tusale cabusongo, tweelede kumvwisya naa kuzyiba “ncayanda Jehova.” Tulakonzya kucita oobo kwiinda mukuba abubambe busitikide bwakwiiya Jwi lya Leza akuzinzibala kuyeeya nzyotwiiya. Ikuti twakumvwisya kuyanda kwa Jehova alimwi akusola kuba “amizeezo ya Kristo,” tuyoocikonzya kweenda mbuli bantu basongo noliba leelyo nokutakwe milawo iigaminide iitwaambila ncotweelede kucita.—1Kor. 2:​14-16. w23.02 16-17 ¶7-9

Ino ŋanda yanu mwiisalazya ziindi zinji buti? Ambweni kamutanalongela mumo, mwakasaanguna kwiisalazya cakulomya. Pele ino ncinzi cakalikukonzya kucitika ikuti nomwakalekela limwi kwiisalazya kuzwa ciindi eeco? Tacidoonekwi buya kuti, noyakazula dooti alimwi akasuko. Aboobo, ikutegwa ŋanda yanu kaiboneka kabotu, mweelede kunooyisalazya lyoonse. Mbubwenya buyo, tweelede kuzumanana kubeleka canguzu, kululamika mizeezo yesu akubambulula bube bwesu. Tacidoonekwi buya kuti, katutanabbapatizyigwa twakabeleka canguzu kucinca mbotwakalikupona kutegwa “tulisalazye kuzintu zyoonse zisofwaazya mubili amuuya.” (2Kor. 7:1) Pele lino, tweelede kutobela lulayo lwa Mwaapostolo Paulo “lwakuzumanana kubukulusya mizeezo.” (Ef. 4:23) Dooti alimwi akasuko zyamunyika eeyi zilakonzya kutupa kutasalala kuli Jehova. Pele kutegwa tuzumanane kukkomaninwa anguwe, tweelede kunooyilingula lyoonse mizeezo yesu, bube bwesu alimwi azintu nzyotulombozya. w23.01 8 ¶1-2

Amweezeezye buyo mbocakabede kuswiilila Jesu kayiisya. Kanji-kanji wakali kuzubulula twaambo tuli mu Magwalo Aasalala kuzwa mumutwe. Ciindi naakabbapatizyigwa akunanikwa amuuya uusalala, kweelede kuti Jesu wakayeeya ciindi naakali kupona kujulu katanaboola anyika. Majwi aakwe aakusaanguna kuzwa naakabbapatizyigwa alimwi aamamanino amwi ngaakaamba katanafwa, Jesu wakaazubulula mu Magwalo. (Dt. 8:3; Int. 31:5; Lk. 4:4; 23:46) Kunze lyaboobo, mumyaka yotatwe acisela akati kaziindi eezyi zyobilo, kanji-kanji Jesu wakali kwaabala Magwalo kubuleya, kwaazubulula alimwi akwaapandulula buya. ( Mt. 5:​17, 18, 21, 22, 27,28; Lk. 4:​16-20) Kwamyaka minji katanatalika mulimo wakwe, Jesu wakali kulibala Jwi lya Leza akulimvwa cakwiinduluka-induluka. Kweelede kuti kuŋanda, wakali kumumvwa Mariya a Josefa kabazubulula Magwalo. (Dt. 6:​6, 7) Alimwi Jesu wakali kuunka kucikombelo antoomwe abanamukwasyi lyoonse mu Sabata. (Lk. 4:16) Naakali kucikombelo, kweelede kuti wakali kuswiilila kapati ciindi Magwalo naakali kubalwa. w23.02 8 ¶1-2

Kuli twaambo tunji tweelede kutupa kumuyanda Jehova. Mucikozyanyo, mwakazyiba kuti ‘ngokasensa kabuumi’ akuti nguupa “cipego cibotu cili coonse alimwi acipego cilondokede cili coonse.” (Int. 36:9; Jak. 1:17) Kufwumbwa cintu cili coonse cibotu ncomujisi, cizwa kuli Leza wesu mwaabi alimwi siluyando. Cinunuzyo ncipego cibotu kapati Jehova ncaakatupa. Nkaambo nzi ncotwaambila boobo? Amuyeeye buyo mbocakali ciyumu cilongwe cakali akati ka Jehova a Mwanaakwe. Jesu wakaamba kuti: ‘Ulandiyanda Taata’ akuti “Ndilamuyanda Taata.” (Joh. 10:17; 14:31) Cilongwe cabo cakayuma kapati ciindi nobakali kukkala antoomwe kwamyaka minji kapati. (Tus. 8:​22, 23, 30) Lino amweezeezye buyo mbocakamucisa Leza kuzumizya Mwanaakwe kuti apenge alimwi akufwa. Jehova ulabayanda kapati bantu kubikkilizya andinywe buya kumugama, cakuti wakapa Mwanaakwe ngwayandisya kacili cipaizyo, kutegwa nywebo alimwi abamwi mukapone mane kukabe kutamani. (Joh. 3:16; Gal. 2:20) Aaka nkakaambo kapati ikeelede kutupa kumuyanda Leza. w23.03 4-5 ¶11-13

Tweelede kuzikaka njiisyo zyabasiluleyo. Jesu wakabasinsa bamwi mumbungano yaku Pergamo akaambo kakuleta lwaandaano akati kabakwesu. (Ciy. 2:​14-16) Pele wakabalumbaizya bamumbungano yaku Tiyatira akaambo kakukaka “zintu zisisidwe zya Saatani,” alimwi akubakulwaizya ‘kukakatila’ kukasimpe. (Ciy. 2:​24-26) Banakristo bamumbungano eezyi ibatakali bayumu, balo ibakoongelezyegwa anjiisyo zyakubeja, bakeelede kweempwa. Mbuti kujatikizya ndiswe mazuba aano? Tweelede kwiikaka njiisyo iili yoonse iteendelani akuyeeya kwa Jehova. Basiluleyo balakonzya ‘kulibonya mbuli kuti balilyaabide kubukombi, pele nguzu zyambubo balazikazya.’ (2Tim. 3:5) Ikuti katuli basungu kubala Jwi lya Leza, ciyootugwasya kuzizyiba njiisyo zyakubeja akuzikaka. (2Tim. 3:​14-17; Jud. 3, 4) Tweelede kuba masimpe kuti bukombi bwesu bulatambulika kuli Jehova. Ikuti naa kuli cintu cimwi ncotucita cikonzya kupa kuti bukombi bwesu butatambulwi, tweelede kubweza ntaamu cakufwambaana kutegwa tubambulule zintu.—Ciy. 2:​5, 16; 3:​3, 16. w22.05 4 ¶9; 5 ¶11