December

Sena sinkuta muna Etiopiya wakalilibambilide ncobeni kubbapatizyigwa? Amubone kaambo aaka: Mwaalumi ooyu muna Etiopiya “wakaunkide ku Jerusalemu kuyookomba.” (Mil. 8:27) Aboobo kweelede kuti wakasanduka buya kuba mu Juda. Tacidoonekwi kuti wakaiya kujatikizya Jehova kuzwa mumalembe aasetekene aa Magwalo aa Chihebrayo. Nokuba boobo, wakacili kuyanda kwiiya zinji. Ciindi Filipo naakaswaangana amwaalumi ooyu mumugwagwa, wakali kubala bbuku lyakuvwunga lyamusinsimi Isaya. (Mil. 8:28) Wakali kuyanda kuzumanana kwiiya. Wakeenda kuzwa ku Etiopiya kuya ku Jerusalemu kutegwa akakombe Jehova kutempele. Mwaalumi ooyu muna Etiopiya wakaiya twaambo tumwi tuyandika kapati kuzwa kuli Filipo, mbuli kakuti Jesu ngo Mesiya. (Mil. 8:​34, 35) Luyando lwakwe kuli Jehova a Jesu, lwakakomena. Eeci cakamupa kubweza ntaamu iiyandika kapati mubuumi, nkokuti kubbapatizyigwa akuba sikutobela Jesu Kristo. Filipo naakabona kuti mwaalumi ooyu wakalilibambilide, wakamubbapatizya. w23.03 8-9 ¶3-6

Tatukonzyi kumukkomanisya Jehova kuti katubeja. (Tus. 6:​16, 17) Nokuba kuti bantu banji mazuba aano kubeja bakubona kuti kuli buyo kabotu, swebo tulazumanana kukubona mbwakubona Jehova. (Int. 15:​1, 2) Tulakutantamuka kubeja cacigaminina, alimwi akweeleba cilengwa cakutabaambila bamwi twaambo toonse tujatikizyidwe. Tweelede kutantamuka kuvwiya. (Tus. 25:23; 2Tes. 3:11) Ikuti mwabona kuti muntu watalika kuvwiya, amuucince mubandi kwiinda mukwaamba twaambo tuyaka. Mbwaanga tupona munyika mwalo ŋambawido mbyaabi moivwulide kapati, tweelede kubeleka canguzu akubona kuti ŋambawido yesu ilamukkomanisya Jehova. Uyootulongezya kuti twasolekesya kwaambaula munzila iimutembaula ciindi notuli mumulimo wamumuunda, kumiswaangano alimwi amumibandi yesu yabuzuba abuzuba. Ciindi Jehova aakwiinyonyoona nyika eeyi mbyaabi, cinooli cuubauba kumulemeka kwiinda mumajwi ngotwaambaula.—Jud. 15. w22.04 9 ¶18-20

Twayeeya Jehova a Jesu mbobatuyanda kapati, citupa kuti andiswe tubayande. (1Joh. 4:10) Alimwi twayeeya kuti Jesu wakafwida ndiswe kutugama citupa kuti tubayande kapati. Mwaapostolo Paulo wakakazumina kaambo aaka, alimwi wakatondezya kulumba kwakwe ciindi naakalembela bana Galatiya kuti: ‘Mwana wa Leza, wakandiyanda akulyaaba akaambo kandime.’ (Gal. 2:20) Kwiinda mucinunuzyo, Jehova wakamukwela nywebo kulinguwe kutegwa mube balongwe bakwe. (Joh. 6:44) Kweelede kuti cilamukkomanisya kapati kuzyiba kuti kuli cintu cimwi cibotu Jehova ncaakabona mulindinywe alimwi akuti wakabbadela muulo waatala kapati kutegwa mweelele kuba mulongwe wakwe. Alimwi buya eeci cimupa kuyumya luyando ndomujisi kuli Jehova a Jesu. Aboobo inga cabota kulibuzya kuti, ‘Ino luyando oolu lweelede kundikulwaizya kucita nzi?’ Luyando ndotujisi kuli Leza alimwi a Kristo, lutukulwaizya kubayanda bamwi.—2Kor. 5:​14, 15; 6:​1, 2. w23.01 28 ¶6-7   

Bbaibbele ncibelesyo ciyandika kapati calo Jehova ncabelesya kugwasya bantu bakwe ‘kumubelekela calukamantano. Jehova wakapa kuti zibeela zinji zya Magwalo zilembwe munzila njobakonzya kumvwisya bantu balicesya. (Lk. 10:21) Bantu munyika yoonse balalibala Bbaibbele. Pele balikke buyo bantu balicesya mbobalimvwisya ncobeni alimwi akuzitobela nzyolyaamba. (2Kor. 3:​15, 16) Bbaibbele lilabutondezya busongo bwa Jehova. Jehova ubelesya Magwalo kumuyiisya akumuumbulizya umwi aumwi wesu kumugama ikutali buyo mbuli nkamu. Aboobo, toonse tulakonzya kubona Jehova mbwatubikkila maano ciindi notubala Jwi lyakwe. (Is. 30:21) Sena kuli nomwakabalide lugwalo lumwi akulimvwa mbuli kuti lwakalembelwa ndinywe buya kumugama? Nokuba boobo, Bbaibbele lilabagwasya bantu banji. Pele nkaambo nzi ncolijisi twaambo tukonzya kumugwasya lwanu kumugama? Nkaambo kakuti Sikwaanza Bbaibbele ngomusongo kapati mububumbo boonse.—2Tim. 3:​16, 17. w23.02 4-5 ¶8-10

Mbotuli Banakristo bakasimpe, tulamuyanda kapati Jehova. Tuyanda kumubelekela kusikila mpotugolela. Pele kutegwa tumucitile zyoonse nzyotukonzya, tweelede kulibikkila mbaakani zyakumuuya, mbuli kuba abube bwa Bunakristo, kwiiya milimo iigwasya, alimwi akujana nzila zyakugwasya bamwi. Nkaambo nzi ncotweelede kukukkomanina kuyaambele kumuuya? Nkaambo tuyanda kukkomanisya Taateesu wakujulu siluyando. Jehova ulakkomana ciindi natubona katubelesya zipego alimwi abusongo bwesu mumulimo wakwe. Kuyungizya waawo, tuyanda kuyaambele kumuuya kutegwa tubagwasye kapati bakwesu abacizyi. (1Tes. 4:​9, 10) Tacikwe makani abulamfwu bwaciindi ncitwakkala mukasimpe, toonse tulakonzya kuyaambele kumuuya. w22.04 22 ¶1-2

Mfwulumende zyamunyika lino-lino ziyoomubukila Babuloni Mupati, ibulelo bwanyika yoonse bwabukombi bwakubeja. Aaya anooli matalikilo aamapenzi mapati. Sena eeci ciyoopa kuti bantu banji basale kumukomba Jehova? Peepe. Muciindi caboobo, Ciyubunuzyo caandaano 6 citondezya kuti aciindi eeco cikatazya, aabo ibatamubelekeli Jehova bayooyandaula lukwabililo kumfwulumende alimwi akuli basimakwebo bamunyika, balo ibakozyanisyigwa kumalundu. Mbwaanga bantu aabo tabanoogwasyilizyi Bwami bwa Leza, Jehova uyoobabona kuti mbaasinkondonyina. (Lk. 11:23; Ciy. 6:​15-17) Masimpe, babelesi ba Jehova basyomeka banakwiindene abantu boonse kuciindi eeco cikatazya. Nkaambo mbembabo balikke anyika ibanoobelekela Jehova Leza alimwi akukaka kugwasyilizya “munyama.”—Ciy. 13:​14-17. w22.05 16-17 ¶8-9

“Makani mabotu aa Bwami” tauli ngomulumbe ulikke ngobeelede kwaambilizya bantu ba Leza. (Mt. 24:14) Alimwi bayandika kugwasyilizya mumulimo ngobacita bangelo baambidwe mubbuku lya Ciyubunuzyo caandaano 8 kusikila ku 10. Bangelo aaba baambilizya mulongo wamapenzi aayoobacitikila aabo ibakazya Bwami bwa Leza. Aboobo Bakamboni ba Jehova balaambilizya mulumbe, walo uukozyanisyigwa ‘kucivwulamabwe amulilo’ ikutondezya lubeta lwa Leza kuzibeela zyanyika ya Saatani mbyaabi. (Ciy. 8:​7, 13) Bantu beelede kuzyiba kuti mamanino alaafwaafwi kapati, aboobo beelede kucinca bukkale bwabo cakufwambaana kutegwa bakafwutuke lyabuzuba bwabukali bwa Jehova. (Zef. 2:​2, 3) Pele ooyu mulumbe ngobatazyibide pe. Kwaambilizya mulumbe ooyu kuyandika busicamba. Lyamapenzi mapati, mulumbe walubeta lwamamanino unooli mulumbe mukali kapati alimwi wacigaminina.—Ciy. 16:21. w22.05 7 ¶18-19

Amuyeeye kujatikizya banabukwetene Banakristo balangila kuba bazyali. Kwamyaka minji bali kumvwa makani aamba kujatikizya kukomezya bana. Pele lino makani aayo alayandika kapati kulimbabo. Nkaambo nzi? Nkaambo kakuti lino beelede kukomezya mwanaabo uubageme. Eelo kaka mukuli ooyu mupati! Aboobo ciindi ibukkale nobwacinca, magwalo aamwi alatalika kuyandika kapati kulindiswe. Aaka nkakaambo kamwi bakombi ba Jehova ncobabala Magwalo mbubwenya bami bana Israyeli mbobakaambilidwe kuti kabacita, nkokuti kuzinzibala kuyeeya alingawo “mazuba oonse” abuumi bwabo. (Dt. 17:19) Nobazyali, mulijisi coolwe cilibedelede cakuyiisya bana banu kujatikizya Jehova. Pele muyandika kucita zinji kunze buyo lyakubayiisya makani aajatikizya Leza. Mweelede kubagwasya bana banu kumuyanda kapati Jehova. w22.05 26 ¶2-3

Kwiile kuusa buyo akaambo kazibi nzyotwakacita takuzulide pe. Tweelede kubweza ntaamu. Kaambo kambi kayandika kapati Jehova nkabikkila maano, ciindi nasala kulekelela naa pe, nkusanduka. Kusanduka caamba “kucinca bukkale bwesu.” Munzila imwi, muntu weelede kuleka nzila mbyaabi alimwi akutalika kupona kweelana ambwayanda Jehova. (Is. 55:7) Muntu ooyo weelede kucinca mizeezo yakwe kutegwa kaisololelwa amizeezo ya Jehova. (Rom. 12:2; Ef. 4:23) Weelede kuleka mizeezo mibyaabi alimwi amicito iitaluzi. (Kol. 3:​7-9) Pele lusyomo lwesu mucipaizyo ca Kristo ndolupa kuti Jehova atulekelele alimwi akutusalazya kucibi. Jehova uyootulekelela kwiinda mucipaizyo eeco, lilikke buyo aakubona kuti tulabeleka canguzu kutegwa tucince bukkale bwesu.—1Joh. 1:7. w22.06 6 ¶16-17

Kuzwa kaindi bantu bali kucitilana zintu zibyaabi. (Muk. 8:9) Mucikozyanyo, bantu babelesya nguzu munzila iitali kabotu, zigwebenga zilatalisya nkondo, basicikolo ibapenzya basicikolonyina balabatukila alimwi akubakonga beenzinyina. Kuyungizya waawo, bantu bamwi babeendelezya calunya bamumukwasyi wabo. Nkakaambo kaako bantu ncobayoowa bantunyina. Mbuti Saatani mbwasola kubelesya kuyoowa muntu kuba kakole? Saatani ulasola kutupa kuyoowa bantu kutegwa tucileke kukambauka alimwi akucita zintu zimwi Jehova nzyatwaambila kucita. Kwiinda mukuyungwa a Saatani, mfwulumende zilaulesya mulimo wesu alimwi akutupenzya. (Lk. 21:12) Munyika ya Saatani bantu banji balamwaya makani aakubeja kujatikizya Bakamboni ba Jehova. Ibantu baasyoma makani aaya aakubeja balatufwubaazya naa kutulwana buya. (Mt. 10:36) Sena tulagambwa anzila zyabucenjezu nzyabelesya Saatani? Peepe. Nkaambo wali kuzibelesya nzila eezyi nomuba mumwaanda wamyaka wakusaanguna.—Mil. 5:​27, 28, 40. w22.06 16 ¶10-11

Ino mbaani ibanooli akati ‘kabantu banji’ bayoolulama? Aaba bayoobikkilizya baabo ibayoobusyigwa alimwi abaabo bayoofwutuka lya Amagedoni antoomwe abana bali boonse ibayoozyalwa munyika mpya. Kumamanino aamyaka iili 1,000, bantu boonse ibanoopona anyika banoolondokede. Tweelede kuyeeya kuti kulondoka kulikke takukonzyi kupa muntu kujana buumi butamani. Amuyeeye ba Adamu a Eva. Bakalilondokede, pele bakeelede kutondezya kuti balamumvwida Jehova Leza kabatanapegwa buumi butamani. Pele cuusisya ncakuti, bakaalilwa kumumvwida. (Rom. 5:12) Mbwaanga boonse banoolondokede kumamanino aamyaka iili 1,000, sena boonse bayoobugwasyilizya bweendelezi bwa Jehova cakumaninina mane kukabe kutamani? Sena bamwi bayooba mbuli ba Adamu a Eva, balo nokuba kuti bakalilondokede, bakaleka kusyomeka? Mibuzyo eeyi iyandika bwiinguzi. w22.09 22-23 ¶12-14

Nomubona zicitika munyika, sena cilamukatazya kusyoma kuti zintu ziyakuba kabotu kumbele? Banamukwasyi tabaciyandani. Bantu bayabwiindila buya kuba bakali alimwi akuliyanda. Banji cilabakatazya kubasyoma aabo ibali mubweendelezi. Pele bukkale oobu bulakonzya kumupa kuba alusyomo. Muunzila nzi? Nkaambo bantu bapona mbubwenya mbokwakasinsimwa kujatikizya “mazuba aamamanino.” (2Tim. 3:​1-5) Kunyina muntu uusyomeka uukonzya kukazya kuti businsimi oobu buli mukuzuzikizyigwa alimwi kuzuzikizyigwa kwambubo kutondezya kuti Kristo Jesu ulalela kali Mwami wa Bwami bwa Leza. Pele oobu mbusinsimi buyo bomwe akati kabusinsimi bunji bujatikizya Bwami. Businsimi boonse oobu buliswaangene kapati calo icitugwasya kubona mpotweendela mumulongo wazintu nzyabikkide Jehova. w22.07 2 ¶1-2

Lyabulwazi bwa COVID-19, twakatambula busolozi ibusalede kujatikizya mbotwakeelede kucita miswaangano amulimo wakukambauka. Cakufwambaana twakatalika kucita miswaangano yambungano, yabbazu ayacooko kwiinda mukukwabana avidiyo. Twakatalika kukambauka kubelesya magwalo amafooni. Mpoonya Jehova wakakulongezya kusolekesya kwesu. Mumitabi minji kuli malipooti aatondezya kuyungizyika kwamweelwe wabasikumwaya. Alimwi buya, kuli zyakuluula zinji izikulwaizya izyakacitika muciindi eeci. Bamwi balakonzya kuyeeya kuti mbunga yakaciindizya kupa malailile kujatikizya bulwazi oobu. Pele cakalibonya kuti busolozi mbotwakali kutambula, mbwabusongo. Ciindi notuzinzibala kuyeeya nzila yaluyando Jesu mbwasololela bantu bakwe tulijisi lusyomo lwakuti kufwumbwa ciyootucitikila kumbele Jehova alimwi a Mwanaakwe uuyandwa banooli andiswe.—Heb. 13:​5, 6. w22.07 13 ¶15-16

Kunze buyo lyakumutembaula Jehova mumipailo yesu, tulakulwaizyigwa kumulumba akaambo kazintu zibotu kapati nzyatupa. Mucikozyanyo, tulamulumba Jehova akaambo kamibala iindene-indene njotubona kumaluba-luba, zyakulya zibotu ziindene-indene, alimwi abalongwe babotu mbotujisi. Taateesu siluyando ulatupa zintu eezyi alimwi azimwi zinji kutegwa katukkomana. (Int. 104:​12-15, 24) Kwiinda zyoonse, tweelede kumulumba Jehova akaambo kacakulya cakumuuya cinji ncatupa alimwi abulangizi bwakumbele bubotu kapati. Ncuuba-uba kuluba kumulumba Jehova kuzintu zyoonse nzyatucitila. Ncinzi cikonzya kutugwasya kutaluba? Tulakonzya kulemba mulongo wazintu zigaminide nzyotwakalomba akuzilanga ciindi aciindi kutegwa tubone Jehova mbwaakatwiingula. Mpoonya tulakonzya kupaila kutegwa tumulumbe akaambo kalugwasyo lwakwe.—Kol. 3:15. w22.07 22 ¶8-9

Mubwini, tulizyi kuti kwiiya buyo kasimpe takuzulide pe. Kutegwa tugwasyigwe cakumaninina, tweelede kupona kweelana akasimpe, nkokuti tweelede kuzibelesya nzyotwiiya. Kuti twacita oobo, ndendilyo lilikke notukonzya kuba alukkomano lwini-lwini. (Jak. 1:25) Mbuti mbotukonzya kuba masimpe kuti tulapona kweelana akasimpe? Mukwesu umwi wakapa muzeezo wakuti tweelede kulilingula kutegwa tubone mbazu motucita kabotu amoomo motweelede kubambulula. Mwaapostolo Paulo wakaamba kuti: “Kweelana akuyaambele nkotwacita kale, atuzumanane kweenda kabotu acilengwa nciconya eeci.” (Flp. 3:16) Amuyeeye buyo mbotugwasyigwa kwiinda ‘mukuzumanana kweenda mukasimpe’! Tulapona buumi bubotu, tulamukkomanisya Jehova alimwi abasyomima. (Tus. 27:11; 3Joh. 4) Ootu ntotwaambo twiinda itutondezya ncotweelede kukayanda kasimpe alimwi akupona kweelana ankako. w22.08 18-19 ¶16-18

Ino baalu inga batondezya buti kuti balamuyanda Jehova alimwi a Jesu? Nzila imwi iiyandika kapati mbobakonzya kucita oobo nkwiinda mukuzilanganya kabotu mbelele zya Jesu. (1Pet. 5:​1, 2) Jesu wakakasalazya kaambo aaka kuli Petro. Naakamana kumukaka Jesu ziindi zyotatwe, kweelede kuti Petro wakaliyandide kutondezya kuti ulamuyanda kapati Jesu. Naakabusyigwa, Jesu wakabuzya Petro kuti: “Simoni omwana wa Johane, sena ulandiyanda?” Kweelede kuti Petro wakalilibambilide kucita cili coonse kutegwa atondezye luyando ndwaakajisi kuli Simalelaakwe. Mpoonya Jesu wakaambila Petro kuti: “Koembela tubelele twangu.” (Joh. 21:​15-17) Alimwi mubuumi bwakwe boonse, Petro wakazilanganya caluyando mbelele zya Mwami, ikutondezya kuti wakali kumuyanda Jesu. Nobaalu, mbuti mbomukonzya kutondezya kuti majwi aa Jesu ngaakaambila Petro alayandika kapati akulindinywe? Mulakonzya kutondezya mbomumuyanda kapati Jehova a Jesu, kwiinda mukutola lubazu mumulimo wabweembezi alimwi akusolekesya kugwasya baabo batacisungweede kupilukila kuli Jehova.—Ezek. 34:​11, 12. w23.01 29 ¶10-11

Amucitantamuke cilengwa cakuyeeya kuti, kunyina muntu uukonzya kulimvwisya penzi ndyomujisi. Kuyeeya kuli boobu kulakonzya kumupa kulimvwa kuti penzi lyanu talikonzyi kumana, akuti inga timwacikonzya kuzunda kulombozya kutali kabotu. Pele oobo tabusyi mbolyaamba Bbaibbele. Lyalo lyaamba kuti: “Mwanoosunkwa uyoomupa anzila yamatijilo kutegwa mukonzye kuliyumya musunko eelyo.” Nokuba kuti kulombonzya kutali kabotu kulakonzya kutukatazya kapati, inga twacikonzya kuliyumya, akuzumanana kusyomeka kuli Jehova. Kwiinda mulugwasyo lwakwe, tuyoocikonzya kutacita zintu zitali kabotu nzyotulombozya. Lyoonse katuyeeya kuti: Akaambo kakuti tatulondokede, tatukonzyi kucilekela limwi kulombozya zintu zitali kabotu. Pele ciindi notwatalika kucita oobo, tweelede kucileka cakufwambaana, mbubwenya mbuli Josefa mbwaakacita ciindi naakatija mukaintu wa Potifara. (Matl. 39:12) Tamweelede kuzicita zintu zitali kabotu nzyomulombonzya! w23.01 12-13 ¶16-17

Bululami mbube mbwajisi Jehova. (Dt. 32:4) Muntu mululami, kanji-kanji tasalululi pe. Alimwi buya oobo mbwabede Jehova, tasalululi. (Mil. 10:​34,35) Kutasalulula kwakwe, kulalibonya kwiinda mumyaambo yakabelesyegwa kulemba Bbaibbele. Jehova wakasyomezya kuti kumamanino aaciindi, “luzyibo lwini-lwini” lujanika mu Bbaibbele “luyoovwula kapati.” Alimwi banji bakali kuyoolumvwisya. (Dan. 12:4) Cintu cimwi cabagwasya bantu banji kulimvwisya Bbaibbele ncakuti, Bbaibbele alimwi amabbuku aamba zyamu Bbaibbele zyakasandululwa, akumwaigwa kubantu banji. Pele bantu ba Jehova bacikonzya kulisandulula Jwi lya Leza lyoonse mbolibede naa cibeela buyo, mumyaambo yiinda ku 240, alimwi muntu uuli woonse ulakonzya kuba andilyo kakunyina kubbadela. Aboobo eeci capa kuti bantu bazwa mumasi oonse bacikonzye kwiiya “makani mabotu aa Bwami” mamanino kaatanasika. (Mt. 24:14) Leza wesu mululami, uyanda kuti bantu banji babe acoolwe cakumuzyiba kwiinda mukubala Jwi lyakwe. Ulacita oobo akaambo kakuti ulatuyanda kapati toonse. w23.02 5 ¶11-12

Sena mulabuyanda bululami? Tacidoonekwi buya kuti mulabuyanda. Pele toonse tatulondokede, alimwi kuti naa tiitwacenjela, ncuuba-uba kujatikizyigwa amboibubona bululami nyika. (Is. 5:20) Ciindi bantu nobayeeya kujatikizya muntu mululami, banji balakonzya kuyeeya muntu uulisumpula, uubeteka bamwi naa uulipa kaleza-leza. Pele Leza kunyina nabuyanda bube oobu naaceya. Ciindi Jesu naakali waano anyika, wakabasinsa kapati basololi bazikombelo bamumazuba ngaakali kupona akaambo kakulibikkila zyeelelo zyabululami. (Muk. 7:16; Lk. 16:15) Muntu mululami ncobeni kunyina nalibona kuti ulabainda bamwi munzila iili yoonse naa kulipa kaleza-leza. Bululami mbube bubotu kapati. Bbala eeli lyaamba kucita cintu ciluzi mumeso aa Jehova Leza. Kweelana a Bbaibbele, bbala lyakuti “bululami” lipa muzeezo wakupona kweelana azyeelelo zisumpukide kapati, nkokuti zyeelelo zya Jehova. w22.08 27 ¶3-5

Jesu wakali kubasyoma basikwiiya bakwe nokuba kuti bakali kulubizya. (Joh. 15:16) Ciindi Jakobo a Johane nobakalomba kupegwa zyuuno zyaatala mu Bwami, Jesu kunyina naakaadooneka makanze aabo aakubelekela Jehova naa kubalesya kuba baapostolo bakwe. (Mk. 10:​35-40) Kumbele, basikwiiya ba Jesu boonse bakamusiya busiku naakaangwa. (Mt. 26:56) Nokuba boobo, Jesu kunyina naakaleka kubasyoma. Wakalikuzyi kabotu-kabotu kutalondoka kwabo; pele “wakabayanda kusikila kumamanino.” (Joh. 13:1) Naakabusyigwa, Jesu mane buya wakapa baapostolo bakwe ibali 11 mukuli mupati wakusololela mulimo wakugwasya bantu kuba basikwiiya alimwi akulanganya mbelele zyakwe ziyandwa. (Mt. 28:​19, 20; Joh. 21:​15-17) Wakalijisi twaambo tubotu itwakamupa kubasyoma baalumi aaba ibatakalondokede. Boonse bakabeleka cakusyomeka kusikila kumamanino aabuumi bwabo bwaanyika. Masimpe, Jesu wakatusiila cikozyanyo cibotu cakubasyoma bantu batalondokede. w22.09 6 ¶12

Ciindi notusyoma kuti Jehova ulatuyanda akuti lyoonse uli kulubazu lwesu, tatukamuyoowi Saatani. Mucikozyanyo, mulembi wa Intembauzyo 118 wakajana mapenzi aakatazya kapati. Wakajisi basinkondonyina banji, kubikkilizya abantu balemekwa (kapango 9, 10). Zimwi ziindi, wakali kufwaankanyizyigwa amapenzi (kapango 13). Alimwi Jehova wakamupa lulayo lwanguzu (kapango 18). Nokuba boobo, sintembauzyo ooyu wakakulwaizyigwa kwiimba kuti: “Tandikooyoowa pe.” Nkaambo wakalizyi kuti nokuba kuti Jehova wakamupa lulayo, wakali kumuyanda. Sintembauzyo wakalisinizyide kuti kufwumbwa mubukkale mwaakali kuyoolijana, Leza wakwe siluyando wakalilibambilide kumugwasya. (Int. 118:29) Tweelede kusyoma kuti Jehova ulatuyanda swebo kutugama. Lusyomo oolo luyootugwasya kuzunda misyobo yabuyoofwu yotatwe iidumide, nkokuti, (1) kuyoowa kwaalilwa kulanganya mukwasyi wesu, (2) kuyoowa muntu, alimwi (3) akuyoowa lufwu. w22.06 15 ¶3-4

Tweelede kuba masimpe kuti kukomba Jehova ncecintu cakusaanguna mubuumi bwesu. Mbwaanga ngo Mulengi, Jehova uleelela kukombwa. (Ciy. 4:11; 14:​6, 7) Aboobo, tweelede kubikkila maano kutegwa katumukomba munzila njakkomanina, nkokuti kumukomba “mumuuya amukasimpe.” (Joh. 4:​23, 24) Tuyanda kuti muuya wa Leza uusalala kautusololela mubukombi bwesu kutegwa kabweendelana akasimpe kajanika mu Jwi lyakwe. Nokuba kuti tukkala mucisi oomo mulimo wesu moulesyedwe, bukombi bwesu bweelede kubikkwa mubusena bwakusaanguna. Calino, bakwesu abacizyi ibainda ku 100 bali muntolongo akaambo buyo kakuba Bakamboni ba Jehova. Nokuba boobo, calukkomano balacita kufwumbwa ncobakonzya kutegwa kabapaila, kwiiya alimwi akwaambila bamwi kujatikizya Leza wesu a Bwami bwakwe. Ciindi notufwubaazyigwa naa kupenzyegwa, tulakonzya kukkomana akaambo kakuzyiba kuti Jehova ulaandiswe alimwi akuti uyootulumbula.—1Pet. 4:14. w22.10 9 ¶13

Mubbuku lya Tusimpi, Jehova ulatupa lulayo lubeleka ciindi coonse. Atulange-lange zikozyanyo zyobilo buyo. Cakusaanguna, amukkutile azintu nzyomujisi. Lugwalo lwa Tusimpi 23:​4, 5 lupa lulayo oolu: “Utalijayi buya kuyandaula lubono. . . . Nkaambo ncobeni lulamena mababa mbuli aasikwaze akuuluka kuya mujulu.” Nokuba boobo, bantu banji bavwubi alimwi abacete balalibilika kapati kujatikizya mbobakonzya kujana mali. Nkakaambo kaako ncobacita zintu zikonzya kunyonganya mpuwo yabo, zilongwe, alimwi buya abuumi bwabo. (Tus. 28:20; 1Tim. 6:​9, 10) Cabili, amusaangune kuyeeya kamutanaambaula. Ikuti naa tiitwacenjela ŋambawido yesu ilakonzya kunyonyoona. Lugwalo lwa Tusimpi 12:18 lwaamba kuti: “Majwi aambwa cakutayeeya alayasa mbuli panga, pele mulaka wabasongo ulaponya.” Tulakonzya kuzikwabilila zilongwe zyesu kwiinda mukutantamuka cilengwa cakuvwiya.—Tus. 20:19. w22.10 21 ¶14; 22 ¶16-17

Ezekieli wakeelede kuumvwisya kabotu-kabotu mulumbe ngwaakali kuyooambilizya. Wakeelede kuusyoma mulumbe ooyu kutegwa umukulwaizye kukambauka. Mpoonya kuli cintu cigambya cakacitika. Ezekieli wakamvwa kuti bbuku lyakuvwunga eeli “lyakali kulweela mbuli buci.” (Ezk. 3:3) Nkaambo nzi? Kuli Ezekieli, coolwe cakwiiminina Jehova cakali cintu cilweela naa cikkomanisya. (Int. 19:​8-11) Wakalumba kapati kuti Jehova wakamuzumina kubeleka kali musinsimi wakwe. Mpoonya Jehova wakaambila Ezekieli kuti: “Majwi oonse ngendikwaambila, koabikka mumoyo wako alimwi koaswiililisya.” (Ezk. 3:10) Kwiinda mumalailile aaya, Jehova wakaambila Ezekieli kwaayobola majwi aakalembedwe mubbuku lyakuvwunga alimwi akuzinzibala kwaayeeya. Kucita boobo kwakayumya lusyomo lwa Ezekieli kumugama. Alimwi majwi aaya akamupa mulumbe wanguzu wakwaambila bantu. (Ezk. 3:11) Mbwaanga mulumbe wa Leza wakali mumoyo wakwe alimwi aamulomo wakwe, Ezekieli wakalilibambilide kuubeleka mulimo wakwe alimwi akuuzuzikizya. w22.11 6 ¶12-14

Ikuti naa kucinca ikwacitika mumbunga kwasunka kusyomeka kwanu, ncinzi ncomukonzya kucita? Amukutobele camoyo woonse kucinca kucitika mumbunga. Mulweendo lwabo munkanda, bana Kohati bakali kunyamuna bbokesi lyacizuminano kumbele lyabantu boonse. (My. 3:​29, 31; 10:33; Jos. 3:​2-4) Eelo kaka cakali coolwe cipati! Nokuba boobo, zintu zyakacinca kulimbabo ciindi bana Israyeli nobakasika mu Nyika Yakasyomezyedwe. Bbokesi tiilyakacili kuyandika kulonga-longa. Aboobo, bana Kohati bakapegwa milimo iimbi. (1Mak. 6:​31-33; 26:​1, 24) Pele Bbaibbele kunyina mpolyaamba kuti bana Kohati bakatongooka naa kwaamba kuti bapegwe mukuli waalubazu akaambo kakuti bakajisi mukuli waalubazu musyule. Nciiyo nzi ncotukonzya kwiiya? Tweelede kukutobela camoyo woonse kucinca kucitwa mumbunga ya Jehova, kubikkilizya akooko ikujatikizya mikuli yanu. Amukkomane amukuli uuli woonse ngomwapegwa. Amuyeeye kuti mukuli wanu tauli ngoupa kuti muyandike kuli Jehova. Ncakkomanina kapati Jehova nkumvwida kwanu ikutali mukuli uuli woonse. w22.11 23 ¶10-11

Onesiforo wakamuyandaula Paulo, naakamujana wakamugwasya mumbazu mwaakali kuyandika. Kwiinda mukucita boobu, Onesiforo wakabikka buumi bwakwe muntenda. Ino twiiya nzi kuli ceeci? Tatweelede kulekela kakole kakuyoowa muntu kutukonga naa kutulesya kugwasya bakwesu baangidwe. Muciindi caboobo, tweelede kubagwasya munzila iili yoonse motukonzya. (Tus. 17:17) Bayandika lugwasyo alimwi aluyando lwesu. Amubone bakwesu abacizyi ku Russia mbobabagwasya basyominyina bayandwa ibaangidwe. Ciindi bamwi nobabetekwa, bakwesu abacizyi banji inga balaboola kuzikubagwasyilizya kunkuta. Ino twiiya nzi kuli ceeci? Ciindi bakwesu beendelezya nobatamikizyigwa twaambo, kwaangwa naa kupenzyegwa, mutanikuyoowi pe. Amubapailile, amwiilanganye mikwasyi yabo, alimwi amujane nzila zimwi momukonzya kubagwasyilizya.—Mil. 12:5; 2Kor. 1:​10, 11. w22.11 17 ¶11-12

Baalu Banakristo balijisi mukuli wakukulwaizya bakwesu kuzwa mu Bbaibbele alimwi akugwasya baabo ibatyompedwe. (1Pet. 5:2) Nokwacitika ntenda, cakusaanguna baalu beelede kubona kuti mukwesu amucizyi umwi aumwi ulikwabilidwe, ulijisi cakulya, zyakusama alimwi abusena bwakoona. Pele kwamyezi minji noyainda ntenda, bakwesu bacinooyandika kukulwaizyigwa kuzwa mu Bbaibbele. (Joh. 21:15.) Mukwesu Harold, uubeleka mu Kkomiti Yamutabi alimwi iwakabandika abakwesu abacizyi banji ibakacitikilwa ntenda wakati, “Citola ciindi kutegwa muntu apone. Buumi bwabo inga bwatalika kuba kabotu, pele balakonzya kuzumanana kubayeeya bayandwa babo ibakafwa, zintu ziyandisi nzyobakajisi naa bukkale ibwakali kukonzya kubikka buumi muntenda. Kuyeeya zintu eezyi kulakonzya kubapa kutalika kuusa alimwi. Eeci ncintu cilangilwa, takuli kubula lusyomo pe.” Nobaalu, amulutobele lulayo ‘lwakulila abaabo ibalila.’—Rom. 12:15. w22.12 22 ¶1; 24-25 ¶10-11

Jehova ulatugwasya kucita ciluzi kwiinda mukutupa muuya wakwe usalala cabwaabi. Aboobo ciindi notwiiya Jwi lyakwe, tuzumina kweendelezyegwa amuuya ooyu. Alimwi tulatambula muuya usalala ciindi notujanika kumiswaangano yesu. Kumiswaangano eeyi ya Bunakristo, tulaba aciindi cakuyanzana abakwesu abacizyi, balo basolekesya kucita ciluzi mbubwenya mbuli ndiswe, alimwi eeci cilakulwaizya kapati. (Heb. 10:​24, 25; 13:7) Kuyungizya waawo, ikuti twapaila kuli Jehova camoyo woonse, akumukombelezya kuti atugwasye kulwana penzi limwi, uyootupa muuya wakwe uusalala kutegwa tucikonzye kuzumanana kulilwana penzi eelyo. Nokuba kuti zintu eezyi tazikonzyi kupa kuti kulombozya kutali kabotu kumane, pele zilakonzya kutugwasya kutazicita zintu eezyo nzyotulombozya. Ciindi notwatalika kucita zintu zitugwasya kuba acilongwe cibotu a Jehova, cilayandika kapati kuzumanana kucita zintu eezyi alimwi akuzumanana kulombozya zintu zili kabotu. w23.01 11 ¶13-14

Nokuba kuti Bbaibbele talili bbuku lyabusilisi naa lyaamba makani aazyakulya zyeelede, lilatwaambila mbwayeeya Jehova kujatikizya makani aaya. Mucikozyanyo, utwaambila ‘kuzitantamuka zintu zibi’ izikonzya kunyonganya mibili yesu. (Muk. 11:10) Bbaibbele litwaambila kuti tatweelede kuba balyato naa bacakolwa, nkaambo zintu eezyi zilakonzya kunyonganya buumi bwesu alimwi akutujaya buya. (Tus. 23:20) Jehova uyanda kuti katulilesya kujatikizya zintu nzyotweelede kulya naa kunywa. Alimwi buya uyanda kuti katutaciindizyi kulya naa kunywa. (1Kor. 9:25) Kuyeeya kabotu kulakonzya kutugwasya kupanga zyakusala izitondezya kuti tulalumba kapati akaambo kacipego ca Leza cabuumi. (Int. 119:​99, 100; Tus. 2:11) Mucikozyanyo, kulatugwasya kusala cabusongo kujatikizya nzyotweelede kulya. Ikuti naa katuyandisya cakulya cimwi mpoonya kacitupa kuciswa, kuyeeya kabotu kulatugwasya kutacilya cakulya eeco. Alimwi tulatondezya kuti tuyeeya kabotu kwiinda mukujana ciindi cinji cakoona, kunyanyaasya mubili lyoonse, kuzumanana kwiibamba kabotu mibili yesu alimwi akusalazya maanda eesu. w23.02 21 ¶6-7

Ino inga mwazijana buti mbono zyakumuuya ciindi nomubala Bbaibbele? Amubone ncolwaamba lugwalo lwa 2 Timoteyo 3:​16, 17. Lugwalo lwaamba kuti “magwalo oonse . . . alagwasya” (1) mukuyiisya (2) mukusinsa (3) mukululamika zintu alimwi (4) mukulaya. Mulakonzya kugwasyigwa atwaambo ootu tone nomuba mumabbuku aamu Bbaibbele ngomutavwuli kubala. Amubone cibalo eeco ncocimuyiisya kujatikizya Jehova, makanze aakwe naa njiisyo zyakwe. Amubone mbocigwasya mukusinsa. Amucite oobo kwiinda mukubona cibalo mbocimugwasya kuzyiba bube butali kabotu akumugwasya kubukaka, mpoonya akuzumanana kusyomeka kuli Jehova. Amulange-lange mbomukonzya kubelesya cibalo eeco kululamika kaambo kataluzi ambweni umwi nkaakaamba mumulimo wamumuunda. Mpoonya amusole kubona lulayo luli loonse luli mucibalo, ilukonzya kumugwasya kubona zintu mbuli mbwazibona Jehova. Kuti kamutuyeeya twaambo ootu tone, muyoojana mbono zyakumuuya izikonzya kupa kuti mugwasyigwe kapati ciindi nomubala Bbaibbele. w23.02 11 ¶11

Businsimi bumbi ibuli kubbuku lya Daniele bwakasinsima kuti Jesu wakali kuyoopegwa Bwami kumamanino aaziindi izili ciloba. Sena cilakonzyeka kuzyiba nocakacitika cintu eeci cikkomanisya? (Dan. 4:​10-17) “Ziindi zili ciloba” ziiminina myaka iili 2,520. Ciindi eeci cakatalika mu 607 B.C.E. ciindi bana Babuloni nobakagwisya mwami wamamanino acuuno cabwami bwa Jehova mu Jerusalemu. Mpoonya cakamana mu 1914 C.E. ciindi Jehova naakabikka Jesu kuba Mwami wa Bwami bwa Leza, “ooyo uuzumizyidwe amulawo.” (Ezk. 21:​25-27) Mbuti mbotukonzya kugwasyigwa abusinsimi oobu? Kumvwisya businsimi bujatikizya “ziindi zili ciloba” kutugwasya kuba alusyomo lwakuti Jehova ulazizuzikizya zisyomezyo zyakwe aciindi ceelede. Mbubwenya mbwaakabikka ciindi cigaminide nobwakali kuyootalika kulela Bwami bwakwe, uyoobona kuti businsimi bumbi boonse bwazuzikizyigwa aciindi cakwe ncabikkide. Inzya, buzuba bwa Jehova “tabukamuki pe!”—Hab. 2:3. w22.07 3 ¶3-5