February

Ciindi Mwami Hezekiya naakacisidwe kapati, wakalomba Jehova kuti amuponye. Jehova wakamwiingula akumuponya. (2Bam. 20:1-6) Kulubazu lumwi, ciindi mwaapostolo Paulo naakakombelezya Jehova kuti agusye “mumvwa mumubili” wakwe, ambweni bulwazi bumwi mbwaakajisi, Jehova kunyina naakamuponya. (2Kor. 12:7-9) Mwaapostolo Jakobo a Petro bakali kuyanda kujaigwa a Mwami Heroda. Jakobo wakajaigwa, pele Petro wakavwunwa camaleele. (Mil. 12:1-11) Ambweni tulakonzya kulibuzya kuti, ‘Nkaambo nzi Jehova ncaakamuvwuna Petro ikutali Jakobo?’ Bbaibbele talyaambi pe. Nokuba boobo, ncotusinizyide ncakuti Jehova ngu Leza “uutaciti zitaluleme.” (Dt. 32:4) Zimwi ziindi, Jehova tayiinguli mipailo yesu kweelana ambotwali kulangila. Pele akaambo kakuti tulisinizyide kuti Jehova lyoonse ucita zintu caluyando alimwi acabululami, kunyina notutongooka mbwayingula mipailo yesu.—Job. 33:13. w23.11 21 ¶6

Jakobo wakasololelwa amuuya kulemba kuti bantu basongo ‘balilibambilide kumvwida.’ Amuyeeye buyo eeci ncocaamba. Caamba kuti tweelede kuti katulibambilide kumvwida baabo Jehova mbapede nguzu zyakweendelezya. Masimpe kuti, Jehova tayandi kuti katumvwida muntu uutwaambila kutyola milawo yakwe. (Mil. 4:18-20) Tulakonzya kulimvwa kuti ncuubauba kumvwida Jehova kwiinda bantu. Amana buya, Jehova lyoonse inga utupa busolozi bulondokede. (Int. 19:7) Pele bantu bapedwe nguzu zyakweendelezya balo tabalondokede. Nokuba boobo, Taateesu wakujulu wakapa bazyali, mfwulumende zyabantu alimwi abaalu nguzu zyakweendelezya. (Tus. 6:20; 1Tes. 5:12; 1Pet. 2:13, 14) Ciindi notubamvwida, mubwini tumvwida Jehova. w23.10 6 ¶2-3

Nzila imwi mbotukonzya kuyumya lusyomo lwesu nkwiinda mukuzinzibala kuyeeya kujatikizya nguzu zyajisi Jehova. Ulijisi nguzu zyakuzuzikizya zintu zyoonse nzyaakasyomezya. Amana buya walo ngu Leza Singunzuzyoonse. (Job. 42:2; Mk. 10:27 Ef. 3:20) Wakaambila Abrahamu a Sara kuti bakali kuyooba amwana mubucembele bwabo. (Matl. 17:15-17) Alimwi wakaambila Abrahamu kuti baluzubo lwakwe bakali kuyoopegwa nyika ya Kanana. Ciindi bana Israyeli balo ibakali baluzubo lwa Abrahamu nobakali mubuzike mu Egepita kwamyaka minji, kweelede kuti cakali kulibonya mbuli kuti cisyomezyo eeci tacikazuzikizyigwi. Pele cakazuzikizyigwa. Wakaambila Mariya walo iwakali nakalindu, kuti wakali kuyoomuzyalila mwana. Eeci cakali kuyoozuzikizya cisyomezyo Jehova ncaakasyomezya mumuunda wa Edeni kakwiindide myaka minji! (Matl. 3:15) Ciindi notuzinzibala kuyeeya zisyomezyo zyoonse Jehova nzyaakasyomezyede alimwi ambwaakazizuzikizya, tulabona kuti ulijisi nguzu zinji kapati. Aboobo eeci citupa kuba alusyomo luyumu mucisyomezyo canyika mpya.—Jos. 23:14; Is. 55:​10, 11. w23.04 28 ¶10-12

Jehova wakawiingula mupailo wa Davida wakulomba kufwutulwa. (1Sam. 19:10, 18-20; 2Sam. 5:17-25) Andiswe tulakonzya kusyoma oobo. (Int. 145:18) Zimwi ziindi, Jehova ulakonzya kwiingula mipailo yesu munzila njotutayeeyeli. Paulo wakalomba Leza kuti agwisye “mumvwa mumubili” wakwe. Kwaziindi zyotatwe, Paulo wakapaila kujatikizya penzi eeli ilyakali kumukatazya kapati. Sena Jehova wakayiingula mipailo eeyi? Inzya, pele kutali munzila njaakali kuyeeyela. Muciindi cakuligwisya penzi, Jehova wakamupa buyo nguzu nzyaakali kuyandika kutegwa azumanane kumubelekela cakusyomeka. (2Kor. 12:7-10) Zimwi ziindi, andiswe tulakonzya kwiingulwa munzila njotwatali kuyeeyela. Pele tuli masimpe kuti Jehova ulizyi nzila yiinda kubota yakutugwasya. Mane buya zimwi ziindi ulakonzya “kucita zintu zinji kapati kwiinda aali zyeezyo nzyotumulomba naa nzyotuyeeyela.” (Ef. 3:20) Akaambo kaceeci, ulakonzya kwiingula mipailo yesu aciindi ncotutayeeyeli naa munzila njotutayeeyeli. w23.05 8-9 ¶4-6

Ciindi aciindi, cilayandika kapati kulindiswe toonse kuzinzibala kuyeeya cisyomezyo camu Bbaibbele cijatikizya bulangizi bwabubuke. Nkaambo nzi? Nkaambo kakuti tatuzyi notukonzya kuciswa bulwazi bupati naa kufwidwa muyandwa wesu cakutayeeyela. (Muk. 9:11; Jak. 4:13, 14) Kuba alusyomo mubulangizi bwabubuke kulakonzya kutugwasya kuliyumya mubukkale oobu bukatazya. (1Tes. 4:13) Magwalo atwaambila kuti Taateesu wakujulu ulituzyi kabotu alimwi ulatuyanda kapati. (Lk. 12:7) Amuyeeye buyo Jehova Leza mbwatuzyi kabotu cakuti ulakonzya kutubusya katujisi bube alimwi amizeezo njiyonya. Jehova ulatuyanda kapati alimwi uyanda kuti katupona kukabe kutamani. Aboobo nokuba kuti twafwa uyootubusya. Nkaambo nzi ncotucisyoma cisyomezyo cabubuke? Nkaambo kakuti tulisinizyide kuti ooyo wacisyomezya uliyandide kucizuzikizya alimwi ulijisi nguzu. w23.04 8-9 ¶2-4

Josefa a Mariya alimwi bakabelekela antoomwe kuyumya cilongwe cabo a Jehova. Bakalizyi mbociyandika kapati kukomba Jehova antoomwe mbuli mukwasyi. (Lk. 2:22-24; 4:16) Eelo kaka eeci ncikozyanyo cibotu kapati kuli banabukwetene mazuba aano! Ikuti naa mujisi bana mbuli Josefa a Mariya, cilakonzya kukatazya kujanika kumiswaangano naa kuba aciindi cakukomba mumukwasyi. Cilakonzya kukatazya nokuba kujana ciindi cakwiiya naa kupaila antoomwe mbuli banabukwetene. Pele kamuyeeya kuti ciindi nomukomba Jehova antoomwe, cilongwe canu anguwe cilayuma alimwi aceeco ncomujisi akati kanu. Aboobo kukomba acibe cintu ciyandika kapati mumukwasyi wanu. Kuti kamujisi mapenzi mucikwati canu, kuyeeya buyo makani aakuba antoomwe akucita kukomba kwamumukwasyi inga kakutakkomanisyi. Ikuti kacili boobo, amutalike kwiinda mukulanga-langa buyo makani masyoonto alimwi aakkomanisya. Kucita boobu, kulakonzya kumugwasya kutalika kuyandana kapati alimwi akuyanda kukomba Jehova antoomwe mbuli banabukwetene. w23.05 22 ¶7-8

Ino kuyoowa kuli boobu kwakamugwasya buti Obadiya? Bwini mbwakuti, kwakamugwasya kuba muntu uusyomeka alimwi uusyomwa; aboobo mwami wakamusala kulanganya ŋanda yakwe. (Amweezyanisye a Nehemiya 7:2.) Alimwi kuyoowa Leza kwakamugwasya Obadiya kuba sicamba, ibube mbwaakali kuyandika kapati. Wakapona ciindi Mwami mubi Ahabu naakali kulela. (1Bam. 16:30) Alimwi mukaintu wakwe, Jezebeli iwakali kukomba Baala, tanaakali kumuyanda Jehova cakuti wakasola kumanizya bukombi bwakasimpe mubwami bwakunyika. Alimwi buya wakajaya basinsimi ba Leza banji. (1Bam. 18:4) Ciindi Jezebeli naakatalika kuyandaula basinsimi ba Leza kutegwa abajaye, Obadiya wakabweza basinsimi bali 100 akubasisa ‘kabali 50 mumpangala imwi aimwi alimwi wakali kubatolela cakulya amaanzi.’ (1Bam. 18:13, 14) Kuti Jezebeli naakazyiba ncaakacita Obadiya, naakamujaya. Tacidoonekwi buya kuti, Obadiya wakaliyoowede alimwi tanaakali kuyanda kufwa. Pele wakali kumuyanda kapati Jehova abantu bakwe kwiinda mbwaakali kuyanda buumi bwakwe. w23.06 16 ¶9-10

Mazuba aano, Jehova wazumanana kubasololela bantu bakwe mbuli mbwaakali kucita kaindi. Wali kucita oobo kwiinda mukubelesya Jwi lyakwe a Mwanaakwe, imutwe wambungano. Sena kuli bumboni mbotubona ibutondezya kuti wazumanana kubelesya bantu kumwiiminina? Inzya. Mucikozyanyo, amumvwe cakacitika kumamanino aamyaka yakuma 1800. Ba Charles Taze Russell abeenzinyina bakatalika kumvwisya kuti mwaka wa 1914 wakali kuyooba mwaka uuyandika kapati kujatikizya Bwami bwa Leza. (Dan. 4:25, 26) Bakakazyiba kaambo aaka kwiinda mukuvwuntauzya businsimi bwamu Bbaibbele. Sena Jehova wakali kubagwasya mukuvwuntauzya kwabo? Eeco tacidoonekwi buya. Zintu izyakacitika mu 1914 zyakasinizya kuti Bwami bwa Leza bwakatalika kulela. Mucikozyanyo, kwakaba Nkondo Yakusaanguna Yanyika Yoonse, zilwazi, mizuzumo yanyika alimwi anzala. (Lk. 21:10, 11) Aboobo tacidoonekwi buya kuti Jehova wakali kubelesya bamaalumi aaba Banakristo basyomeka kugwasya bantu bakwe. w24.02 22 ¶11

Mbotuli bantu ba Jehova, tulizyi kuti ulatuyanda kapati alimwi uyanda kuti katupona buumi bukkomanisya. (Rom. 8:35-39) Alimwi tulizyi kuti njiisyo zyamu Bbaibbele zilagwasya lyoonse ikuti naa twazibelesya. (Is. 48:17, 18) Pele ino ncinzi ncotweelede kucita kuti naa twasikilwa mapenzi cakutayeeyela? Mucikozyanyo, munamukwasyi ulakonzya kututyompya munzila imwi. Tulakonzya kuciswa bulwazi bukonzya kupa kuti twaalilwe kucita zinji mumulimo wa Jehova. Tulakonzya kuba amapenzi aboola akaambo kantenda zilicitikila. Naa kupenzyegwa akaambo kazintu nzyotusyoma. Ciindi notwacitikilwa mapenzi aali boobu, tulakonzya kutalika kulibuzya kuti: ‘Nkaambo nzi eeci ncocacitikila ndime? Sena kuli cibi ncondakacita? Sena Jehova tacindibikkili maano?’ Sena kuli nomwakalimvwide kale boobu? Kuti kacili boobo, mutatyompwi pe. Bunji bwababelesi ba Jehova basyomeka abalo mbobakali kulimvwa oobo.—Int. 22:1, 2; Hab. 1:2, 3. w23.04 14 ¶1-2

Ciindi notwasunkwa kucita cintu citali kabotu, tweelede kufwambaana kukukaka kuyeeya kuli koonse naa micito iikonzya kunyonganya cilongwe cesu a Jehova. Jehova uyanda kuti ‘katumuswiilila kuzwa ansi aamoyo.’ (Rom. 6:17) Zintu nzyatwaambila kucita lyoonse zigwasya ndiswe alimwi tatukonzyi kwiicinca milawo yakwe. (Is. 48:17, 18; 1Kor. 6:9, 10) Diabolosi ulasola kupa kuti tutyompwe kwiinda mukubelesya kulwanwa cacigaminina alimwi akuyungwa. Makanze aakwe ‘ngakutumena buumbulu,’ ikunyonyoona cilongwe ncotujisi a Jehova. (1Pet. 5:8) Banakristo bamumwaanda wamyaka wakusaanguna bakali kukongwa, kuumwa alimwi akujaigwa akaambo kamakanze aabo aakuyanda kuzumanana kusyomeka. (Mil. 5:27, 28, 40; 7:54-60) Amazuba aano, Saatani wazumanana kubelesya kupenzyegwa. Eeci cilalibonya twalanga basikukazya mbobapenzya bakwesu abacizyi ku Russia alimwi amuzisi zimbi. Kunze aakupenzyegwa cacigaminina, Saatani ubelesya “bucenjezu.”—Ef. 6:11. w23.07 15-16 ¶6-9

Mbomuyaabuyaambele kwiiya Jwi lya Leza, alwalo luyando lwanu kuli Jehova lunooyaabukomena. Mpoonya luyando oolo lulamukulwaizya kutalika kuzibelesya zintu nzyomwiiya. Mulatalika kusala zyakucita kweelana anjiisyo zyamu Bbaibbele. Mulaiya kuyeeya akucita zintu ziluzi kutegwa mumukkomanisye Leza. Mbubwenya mbuli mwana mbwaiya muzyali siluyando, andinywe mulasola kwiiya Taata wenu wakujulu. (Ef. 5:1, 2) Tulakonzya kulibuzya mibuzyo mbuli yakuti: ‘Sena ndilamuyanda kapati Jehova lino kwiinda ciindi nondakaba Munakristo? Kuzwa ciindi nondakabbapatizyigwa, sena kuyeeya kwangu ambondicita zintu kuleendelana akwa Jehova, kwaambisya mumakani aakutondezya luyando kubakwesu abacizyi?’ Ikuti naa mwabona kuti ‘luyando ndomwakajisi kumatalikilo’ lwaceya, mutatyompwi pe. Eeci cakabacitikila a Banakristo bamumwaanda wamyaka wakusaanguna. Jesu kunyina naakaleka kubayanda, andiswe takaleki kutuyanda. (Ciy. 2:4, 7) Kayi ulizyi kuti tulakonzya kulubukulusya luyando ndotwakajisi kumatalikilo ciindi notwakaiya kasimpe. w23.07 8 ¶2-3

Mwaapostolo Petro wakalubizya ziindi zili mbozibede. Cakusaanguna, Petro wakatondezya muuya wakulisyoma kwiinda mukwaamba kuti walo wakali kuyoozumanana kusyomeka nokuba kuti baapostolo bambi bamusiya Jesu. (Mk. 14:27-29) Kumane, cakwiinduluka-induluka Petro wakaalilwa kuzumanana kulinda. (Mk. 14:32, 37-41) Mpoonya, ciindi nkamu yabantu bakajisi mapanga nobakaboola kumujata Jesu, Petro wakamusiya akutija. (Mk. 14:50) Kumamanino, Petro wakamukaka Jesu ziindi zyotatwe, mane buya akukonka kuti tamuzyi. (Mk. 14:66-71) Ino Petro wakacita buti naakazyiba kuti wacita cibi cipati? Wakalila citaambiki. (Mk. 14:72) Mpoonya muciindi cakumukalalila akaambo kakulubizya kwakwe, Jesu wakasyomezya mulongwe wakwe ooyu kuti wakali kuyoopegwa mikuli iiyungizyidwe. (Joh. 21:15-17) Petro wakalizyi kuti wakacita cibi cipati, pele wakazumanana kusola kucita ciluzi. Nkaambo nzi? Nkaambo wakalisinizyide kuti Jesu Simalelaakwe, wakacili kumuyanda. Ncinzi ncotwiiya? Jehova uyanda kuti tusinizye kujatikizya luyando alimwi akulekelela kwakwe.—Rom. 8:38, 39. w24.03 18-19 ¶13-15

Kucita bwaamu kulakonzya kupa muntu kusampuka, kulimvwa kubula mpindu, kuba amada aamusyokwe alimwi akunyonganya mikwasyi. Aboobo, cilisalede kuti ncabusongo kwiitantamuka “ŋanda yamukaintu mufwubafwuba”. Kunze aakusweekelwa cilongwe a Jehova, bantu banji ibacita bwaamu balaba amalwazi alo aakonzya kubajaya. (Tus. 7:23) Kapango 18 ka Tusimpi caandaano 9 kalamanizya amajwi aakuti: “Beenzu bamukaintu ooyu bali kunsi kwini kwa Cuumbwe.” Pele, nkaambo nzi bantu banji ncobakuzumina kutamba kwakwe kwalo ikusololela kumapenzi? (Tus. 9:13-18) Cintu cimwi cipa bantu banji kuzumina kutamba kwakwe nkweebelela zintu ziletela muzeezo wakoonana. Bamwi bayeeya kuti kweebelela zintu zili boobu kunyina ambokubede. Pele bwini mbwakuti, kweebelela zintu ziletela muzeezo wakoonana kuletela ntenda, kupa kubula bulemu alimwi ncilengwa cikatazya kuleka. Ikuti muntu wabona zifwanikiso zitali kabotu, cilakatazya kapati kuziluba. Kuyungizya waawo, kweebelela zintu ziletela muzeezo wakoonana takukonzyi kugwasya muntu kuleka kulombozya zintu zitali kabotu, muciindi caboobo kupa kuti kwiindile buya. (Kol. 3:5; Jak. 1:​14, 15) Aboobo, bunji bwabantu beebelela zintu ziletela muzeezo wakoonana balazumanana kucita bwaamu. w23.06 23 ¶10-11

Nokuba kuti zimwi ziindi masi amwi alakonzya kubukazya Bulelo Bweendelezya Nyika Yoonse bwa Anglo-America, kunyina pe nayoocikonzya kubunjilila busena. Tulizyi oobu akaambo kakuti “bbwe” lyalo iliiminina Bwami bwa Leza liyoopwayaula zimpata, nkokuti cibeela cacibumbwa ciiminina Anglo-America. (Dan. 2:34, 35, 44, 45) Sena mulasyoma ncobeni kuti businsimi bwa Daniele bujatikizya zimpata zyabutale abulongo mbwamasimpe? Ikuti naa mulasyoma, nkokuti eeci cilabujatikizya buumi mbomupona. Tamukabikkili kapati maano kusola kujana mali manji naa zintu zinji zyakumubili akaambo kakuti mulizyi kuti lino-lino nyika eeyi mbyaabi ilanyonyoonwa. (Lk. 12:16-21; 1Joh. 2:15-17) Kunze lyaboobo, kubumvwisya businsimi oobu kuyoomugwasya kubona kaambo mulimo wakukambauka akuyiisya ncouyandika kapati. (Mt. 6:33; 28:18-20) Mbwaanga twamana kulanga-langa businsimi oobu, cilayandika kapati kulibuzya kuti, ‘Sena zyakusala zyangu zilatondezya kuti ndilasyoma ncobeni kuti Bwami bwa Leza lino-lino buyoonyonyoona mami oonse aabantu?’ w23.08 11 ¶13-14

Cakulibombya amuzumine kuti tamukonzyi kunoocita zyoonse nzyomuyanda akaambo kaciimo, kuciswa naa bukkale bwanu. Mbubonya mbuli Barizilai, amulisungule kukaka, ikuti kuciswa naa ciimo canu kazitamuzumizyi kuubeleka kabotu mulimo ngomwapegwa. (2Sam. 19:​35, 36) Mbubwenya mbuli Musa, amuzumine kugwasyigwa abamwi alimwi akupa bamwi milimo ikuti kwayandika. (Kul. 18:21, 22) Kulibombya kuli boobo kuyoomugwasya kutacita zintu nzyomutakonzyi kuzuzikizya zyalo zikonzya kumupa kucileka kubalika. Alimwi tatweelede kulipa mulandu akaambo kakwaalilwa kusala kabotu kwabamwi. Tatukonzyi kubasalila zyakucita bamwi; naa kubakwabilila lyoonse kuzintu zibyaabi zikonzya kubacitikila akaambo kakutasala kabotu. Mucikozyanyo, mwanaanu ulakonzya kusala kucileka kubelekela Jehova. Kusala ooko kulakonzya kubapa kuusa kapati bazyali. Nokuba boobo, bazyali ibalipa mulandu akaambo kakutasala kabotu kwamwanaabo inga balikulika mukuli uuminya. Tauli mukuli Jehova ngwalangila kuti banyamune. w23.08 29 ¶11-12

Samusoni wakali muntu uutalondokede mbubwenya mbuli ndiswe, aboobo zimwi ziindi tanaakali kusala kabotu. Kusala kumwi nkwaakacita kwakamuletela mapenzi aataambiki. Nakamana kubeleka kali mubetesi kwaciindi cili mbocibede, Samusoni “wakayanda mukaintu ku Kkuti lya Soreki, izina lyakwe wakali Delila.” Katanamuyanda mukaintu ooyu, Samusoni wakayandide mukaintu mu Filisiti, aaya makani ‘akazwide kuli Jehova’ walo iwakali “kuyandaula nzila yakulwana ba Filisiti.” Kumbele, Samusoni wakatalika kukkala muŋanda yamukaintu muvwuule mumunzi waba Filisiti ku Gaza. Okuya, Leza wakapa Samusoni nguzu zyakucikonzya kuzyula zijazyo zyamunzi calo cakapa kuti munzi ubule lukwabililo. (Bab. 14:1-4; 16:1-3) Nokuba boobo, kweelede kuti Delila wakali muna Israyeli. Delila wakazumina kupegwa mali manji kuba Filisiti kutegwa amwaabe Samusoni kulimbabo. w23.09 5 ¶12-13

Bupampu bulakonzya kutugwasya kubomba moyo. Muntu uujisi bupampu ulalilesya kunyema ciindi nakazyigwa kujatikizya nzyasyoma. Mucikozyanyo, mizeezo yamuntu ili mbuli maanzi malamfwu. Muntu ulakonzya kubuzya mubuzyo, pele kanji-kanji inga katutakazyi kaambo keni kamupa kubuzya. Aboobo katutanamwiingula, inga cabota kusaanguna kuzyiba kaambo kamupa kubuzya mubuzyo ooyo. (Tus. 16:23) Amubone Gideoni mbwaakabaingula baalumi bana Efraimu. Cabukali bakamubuzya kaambo ncaatakabaitila kuti bamusangane mukulwana basinkondonyina bana Israyeli. Pele mubwini, sena aaka nkakaambo keni ikakabapa kuti banyeme boobo? Ambweni bakanyema akaambo kakuti bakali kulisumpula citaambiki. Kufwumbwa mbocakabede, Gideoni wakatondezya bupampu. Wakasolekesya kumvwisya cakabapa kuti banyeme akubaingula cabubombe. Ncinzi cakazwa mpawo? Bbaibbele litwaambila kuti, “naakaamba boobu, bakatontomana.”—Bab. 8:1-3. w23.09 16 ¶8-9

Jehova a Jesu balijisi cilongwe ciyumu kapati icili mbuli ceeco ciba akati kamwana musankwa abausyi. Tacidoonekwi buya kuti cakumucisa kapati kumubona kapenga. Muzyali uli woonse iwakafwidwa mwanaakwe ulizyi mbocicisa kapati kufwidwa. Tulijisi lusyomo luyumu kapati lwakuti kuyooba bubuke, pele cilatucisa kapati ciindi muyandwa wesu naafwa. Cikozyanyo eeci citugwasya kumvwisya mbwaakalimvwa Jehova ciindi naakali kulangilila Mwanaakwe kapenga alimwi akufwa mu 33 C.E. (Mt. 3:17) Kabutanasika buzuba bwa Ciibalusyo, amusole kwiiya zinji kujatikizya cinunuzyo ciindi nomucita ciiyo canu nobeni naa nomukomba mumukwasyi. Mpoonya mubuzuba bwa Ciibalusyo, amukajane ciindi cakweebelela Kukomba Kwamafwumofwumo. Ikuti twalibambila mumoyo kujatikizya ciibalusyo, tuyoocikonzya kupa kuti bamwi bagwasyigwe abalo.—Ezr. 7:10. w24.01 11 ¶10-12

Kutegwa tucikonzye kutambula nguzu kuzwa kuli Jehova, tweelede kupaila kulinguwe. Jehova uyooyiingula mipailo yesu kwiinda mukutapa “nguzu zigambya iziinda zyabantu.” (2Kor. 4:7) Alimwi tulakonzya kujana nguzu nzyotuyandika kwiinda mukubala akuzinzibala kuyeeya Jwi lya Leza. (Int. 86:11) Mulumbe wa Jehova uuli mu Bbaibbele ‘ulaanguzu.’ (Heb. 4:12) Ikuti mwapaila kuli Jehova akubala Jwi lyakwe, muyoojana nguzu nzyomuyandika kutegwa muliyumye, muzumanane kukkomana naa kutegwa mucikonzye kuzuzikizya mukuli umwi uukatazya. Amubone Jehova mbwaakamugwasya kuliyumya Jona. Wakali kuyoowa kuunka nkwaakatumwa a Jehova. Aboobo wakatanta bwato akuunka kubusena bumwi. Akaambo kaceeci, walo abaabo mbaakali limwi mubwato bakafwutukila kumpela aalwala ciindi nokwakali guwo mpati mulwizi. Ciindi basikweenzya bwato nobakamusowela mulwizi, Jona wakalijana mubusena buyoosya kapati, nkokuti mwida lyanswi. Ino ncinzi ncaakacita Jona kutegwa atambule nguzu zyakucikonzya kuliyumya ciindi naakali mwida lyanswi? Wakapaila kuli Jehova.—Jon. 2:1, 2, 7. w23.10 13 ¶4-6

Nokuba kuti mwaapostolo Petro wakalembela Banakristo bakuciindi ncaakali kupona, Jehova wakasala kuti nzyaakalemba zibikkilizyigwe mu Jwi Lyakwe. Akaambo kaceeci, andiswe tulakonzya kugwasyigwa amagwalo aaya mazuba aano. (Rom. 15:4) Tupona munyika iizwide bantu batasyomi ncolyaamba Bbaibbele kujatikizya ziyoocitika kumbele. Basikukazya balakonzya kutufwubaazya akaambo kakuti kwamyaka minji twali kwaamba kuti mamanino alaboola. Bantu bamwi mane baamba kuti mamanino kunyina naayooboola. (2Pet. 3:3, 4) Ikuti majwi aayo twaamvwa kumuntu ngotukambaukila, mubelesima naa munamukwasyi, lusyomo lwesu inga lwasunkwa. Nokuba boobo, Petro wakacaamba cikonzya kutugwasya. Kuli bamwi, cilakonzya kulibonya kuti Jehova wamuka kuleta mamanino aanyika eeyi mbyaabi. Pele majwi aa Petro alakonzya kutugwasya kuzibona kabotu zintu nkaambo atuyeezya kuti Jehova uliindeene kapati abantu caboola kuli mbwacibona ciindi. (2Pet. 3:​8, 9) Myaka iili 1,000 ili mbuli buzuba bomwe kulinguwe. Jehova ulakkazika moyo akaambo kakuti tayandi kuti muntu uli woonse akanyonyoonwe. Pele buzuba bwakwe bwaakusika, nyika eeyi iyoomana. w23.09 26-27 ¶2-5

Nkaambo nzi mwaapostolo Paulo ncaakabalembela lugwalo oolu Banakristo Bahebrayo ibakali kukkala mu Judaya? Ambweni, akaambo katwaambo tobilo ootu. Kakusaanguna, kutegwa abakulwaizye. Kayi kabatanaba Banakristo, banabunji bakali kutobela bukombi bwaci Juda. Aboobo, basololi bazikombelo mobakazwa ambweni bakali kubafwubaazya akaambo kakuba Banakristo. Nkaambo nzi? Nkaambo Banakristo tiibakajisi tempele lyeebeka mwakukombela, cipaililo cakayakidwe buya aakutuulila Leza zipaizyo alimwi abapaizi bakubakutaukila. Eeci cakali kukonzya kubatyompya basikwiiya ba Kristo akupa kuti lusyomo lwabo luceye. (Heb. 3:12, 14) Mane buya, ambweni bamwi bakali kukonzya kusunkwa kupiluka kubukombi bwaci Juda. Kabili, Paulo wakaambila Banakristo Bahebrayo kuti tiibakali kusolekesya kumvwisya njiisyo zipya naa ‘cakulya cakumuuya ciyumu’ eeco cijanika mu Jwi lya Leza. (Heb. 5:11-14) Kulibonya kuti, bamwi bakacili kukakatila kutobela Mulawo wa Musa. w23.10 24-25 ¶3-4

Bacizyi bamwi basala kutakwatwa, nokuba kuti kucita boobo cilasampuzya kubusena nkobakkala. (Mt. 19:10-12) Amuzyibe kuti Jehova a Jesu kunyina nobamubona kuti tamuyandiki akaambo buyo kakuti tamukwetwe. Munyika yoonse, bacizyi batakwetwe nzikozyanyo zibotu kapati mumbungano. Akaambo kakuti balabayanda akubabikkila maano bamwi, baba mbuli bacizyi bakumubili alimwi abazyali. (Mk. 10:29, 30) Bamwi balanjila mulimo waciindi coonse. Bacizyi balaugwasyilizya kapati mulimo wakukambauka nyika yoonse. (Int. 68:11) Sena inga mwanjila mulimo waciindi coonse? Mulakonzya kubeleka kamuli mupainiya, mubelesi wamayake naa wamukwasyi wa Beteli. Amwiipailile mbaakani yanu. Amubandike abaabo ibakaizuzikizya kale mbaakani eeyo, akubabuzya ncomweelede kucita kutegwa andinywe mweelele. Mpoonya amusale cakucita. Kuti mwanjila mulimo waciindi coonse, mulakonzya kuba azyoolwe zyakucita zinji mumulimo wa Jehova. w23.12 22 ¶16-17

Akaambo kakuti mapenzi mapati alaafwaafwi, cilayandika kapati kuutobela mulawo wakutola lubazu mumulimo wakukambauka. Nokuba boobo, cilakonzya kutuyumina kuubikkila maano mulimo wakukambauka ikuti katujisi penzi lyakubula mali naa ciindi mulimo ooyu noukazyigwa. Pele ncinzi cikonzya kutugwasya kubikka zintu zyabwami mubusena bwakusaanguna? Tweelede kuba alusyomo lwakuti “Jehova wamakamu” uli kulubazu lwesu. Unootugwasya ikuti twazumanana kubikka zintu zyakumuuya mubusena bwakusaanguna. Aboobo tatweelede kuyoowa. (Hag. 2:4) Jehova uyanda kuti tubikkile maano kumulimo wakufwutula buumi bwabantu kwiinda mukuzumanana kubagwasya kuti babe basikwiiya. Hagai wakakulwaizya bantu ba Jehova kuti bazumanane kuyakulula ntalisyo yatempele. Ikucita boobo kwakali kuyoopa kuti Jehova ‘abalongezye.’ (Hag. 2:18, 19) Mbubwenya buyo andiswe, Jehova uyootulongezya kuti twabikkila maano kumulimo ngwatupede. w23.11 16 ¶8; 17 ¶11

Mulugwalo ndwaakalembela bana Roma, mwaapostolo Paulo wakaamba kuti bantu boonse mbaasizibi. Aboobo, mbuti muntu sizibi mbwakonzya kubonwa kuti mululami akukkomaninwa a Leza? Kutegwa agwasye Banakristo boonse kwiingula mubuzyo ooyu, Paulo wakaamba cikozyanyo ca Abrahamu. Jehova wakaamba Abrahamu kuti mululami ciindi naakali kukkala munyika ya Kanana. Nkaambo nzi Jehova ncaakamwaamba kuti mululami? Sena nkaambo kakuti wakali kuutobela cakulondoka Mulawo wa Musa? Peepe. (Rom. 4:13) Kayi Mulawo ooyo wakapegwa kubana Israyeli nokwakainda myaka yiinda ku 400 kuzwa ciindi Leza naakaamba Abrahamu kuti mululami. Aboobo, ncinzi cakapa kuti Leza aambe Abrahamu kuti mululami? Kwiinda muluzyalo lwakwe, Jehova wakaamba Abrahamu kuti mululami akaambo kalusyomo lwakwe.—Rom. 4:2-4. w23.12 3 ¶4-5

“Masiku ngoonya aayo” musinsimi Natani naakambila Mwami Davida majwi ali atala, Jehova wakaambila Natani kuti Davida talinguwe wakali kuyooyaka tempele, muciindi caboobo mwanaakwe ngowakali kuyoocita oobo. (1Mak. 17:3, 4, 11, 12) Ino Davida wakacita buti naakamvwa makani aaya? Wakacinca makanze aakwe. Wakabikkila maano kuyandaula mali alimwi azintu nzyaakali kuyoobelesya mwanaakwe Solomoni mumulimo ooyu. (1Mak. 29:1-5) Davida mbwaakaambilwa buyo kuti talinguwe wakali kuyooyaka tempele, Jehova wakapanga cizuminano anguwe. Wakasyomezya Davida kuti umwi wabaluzubo lwakwe wakali kuyoolela mane kukabe kutamani. (2Sam. 7:16) Amweezeezye buyo mbwayookkomana Davida munyika mpya, lya Bulelo bwa Myaka Iili 1,000 aakuzyiba kuti Mwami Jesu, ngumwi wabaluzubo lwakwe! Cibalo eeci cituyiisya kuti nokuba kuti inga tiitwakonzya kucita zyoonse nzyotuyanda mumulimo wa Jehova, ulakonzya kutulongezya munzila iimbi njotutayeeyeli. w23.04 16 ¶8-10

Kubala mabbuku amwi amu Bbaibbele kulakonzya kumuumbulizya kapati ciindi nomwayoowa. Mucikozyanyo, mulakonzya kukulwaizyigwa kubala bbuku lya Jobu, Intembauzyo, Tusimpi alimwi amajwi aa Jesu aajanika ku Matayo caandaano 6. Ciindi nomupaila kuli Jehova akubala Jwi lyakwe, muyoowumbulizyigwa kapati. Tulijisi lusyomo lwakuti Jehova unootulanganya lyoonse muziindi zyamapenzi. Kunyina nayootulekelezya pe. (Int. 23:4) Jehova utusyomezya kutukwabilila, kutwiimika nji, kutugwasya alimwi akutuumbulizya. Kujatikizya Jehova, lugwalo lwa Isaya 26:3 lwaamba kuti: “Yebo uunoobakwabilila bantu balanga kulinduwe muzintu zyoonse; uyoobapa luumuno lutamani, nkaambo basyoma mulinduwe.” Aboobo, amumusyome Jehova alimwi akucita kufwumbwa nzyomukonzya kutegwa mugwasyigwe anzila nzyabelesya kumugwasya. Ikuti mwacita oobo, muyooyumizyigwa nomuba muziindi zikatazya kapati. w24.01 25 ¶16-17

Aaya majwi aakasololelwa amuuya aali mulugwalo luli atala aawa, ali mukuzuzikizyigwa mazuba aano. Lino majwi aawumbulizya aaya aatobela, alabeleka akuciindi cino ncotupona: “Bana bako boonse bayooyiisyigwa a Jehova, alimwi luumuno lwabana bako luyoovwula kapati. Uyookkazikizyigwa mubululami. . . . Tokayoowi cintu cili coonse alimwi takukabi cintu cikupa kuyoowa, nkaambo tacikakusweni afwaafwi pe.” (Is. 54:13, 14) Naba Saatani, “leza wabweende bwazintu obuno” takonzyi kuulesya mulimo wakuyiisya ngobacita bantu ba Jehova. (2Kor. 4:4) Bukombi bwakasimpe bwakabukulusyigwa alimwi kunyina nobuyoosofwaazyigwa kabili pe. Amana buya, bunooliko lyoonse mane kukabe kutamani. Kunyina cilwanyo cakapangilwa kulwana ndiswe iciyoozwidilila! w24.02 4 ¶10

Mbotuli Banakristo, tulacilemeka kapati cikonke cesu cakulyaaba kuli Jehova. Eeci cilazijatikizya zintu nzyotusala alimwi akucita mumakani aajatikizya mukwasyi. Tulabeleka canguzu kulanganya mukwasyi, pele tatweelede kusolozya nzyobayanda banamukwasyi kwiinda nzyayanda Jehova. (Mt. 10:35, 36; 1Tim. 5:8) Zimwi ziindi, inga twayandika kupanga zyakusala nzyobatakkomanini banamukwasyi pele zikkomanisya Jehova. Nguwakatalisya mukwasyi, alimwi uyanda kuti banamukwasyi kabakkomene. (Ef. 3:14, 15) Aboobo kuti katuyanda kukkomana ncobeni, tweelede kucita zintu Jehova nzyayanda. Amube alusyomo lwakuti Jehova ulalumba kapati akaambo kakuliimya zintu zimwi nkomucita, kutegwa mumubelekele akulanganya mukwasyi wanu caluyando abulemu.—Rom. 12:10. w24.02 18 ¶11, 13