April

Babelesi ba Jehova bakaindi, bakali kusikilwa mapenzi ngobatakali kuyeeyela. Mucikozyanyo, amuyeeye kujatikizya Jakobo. Bausyi bakamulailila kuti akakwate mukaintu akati kabana basimbi ba Labani, walo iwakali wacibbululu alimwi mukombi Leza. Alimwi Jakobo wakasyomezyedwe kuti Jehova wakali kuyoomulongezya kapati. (Matl. 28:1-4) Aboobo Jakobo wakacita ncaakaambilwa. Wakanyamuka kuzwa ku Kanana akuunka kuŋanda ya Labani, walo iwakajisi bana basimbi bobilo, Leya alimwi a Rakele. Jakobo wakamuyanda kapati Rakele iwakali musyoonto, akuzumina kumubelekela Labani kwamyaka iili ciloba kutegwa amukwate. (Matl. 29:18) Pele zintu tiizyakeenda kweelana ambwaakali kuyeeyela Jakobo. Labani wakamwiinda kumaano akumupa kukwata Leya, mwanaakwe wakali mupati. Labani wakazumina kuti Jakobo inga wamukwata awalo Rakele kwainda nsondo yomwe, pele lilikke buyo kuti wamubelekela kwamyaka iimbi iili ciloba. (Matl. 29:25-27) Kuyungizya waawo, Labani tanaakali kusyomeka mumakwebo ngaakali kucita a Jakobo. Mubufwaafwi, Labani wakamucitila cabumpelenge Jakobo kwamyaka iili 20!—Matl. 31:41, 42. w23.04 15 ¶5

Nguni ngotweelede kulomba luumbulizyo alimwi abusolozi? Tacidoonekwi buya kuti tulibuzyi bwiinguzi bwamubuzyo ooyu. Tweelede kulomba Jehova Leza kwiinda mumupailo. Jehova uyanda kuti katucita oobo. Uyanda kuti ‘katupaila cakutaleka.’ (1Tes. 5:17) Tulakonzya kupaila kulinguwe cakwaanguluka akulomba busolozi mumbazu zyoonse zyabuumi bwesu. (Tus. 3:5, 6) Mbwaanga ngu Leza mwaabi, kunyina natwaambila bunji bwaziindi nzyotweelede kupaila kulinguwe. Jesu wakalizyi kuti mipailo yesu ilayandika kapati kuli Jehova. Myaka minji katanaboola anyika, wakali kubabona Bausyi kabaingula mipailo yabamaalumi abamakaintu basyomeka. Mucikozyanyo, Jesu wakali munsi a Bausyi ciindi nobakali kwiingula mipailo iyakapailwa kuzwa ansi aamoyo, mbuli mupailo wa Hana, Davida alimwi a Elija. (1Sam. 1:10, 11, 20; 1Bam. 19:4-6; Int. 32:5) Nkakaambo kaako Jesu wakayiisya basikwiiya bakwe kupaila lyoonse alimwi cakutawayawaya.—Mt. 7:7-11. w23.05 2 ¶1, 3

Mupaizi Mupati Jehoyada wakali kumuyoowa Jehova. Eeci cakalibonya ciindi mwana musimbi wa Jezebeli, Ataliya, naakatalika kulela mu Juda kakunyina kuzumizyigwa. Mukaintu ooyu wakali silunya kapati alimwi wakali kubuyanda bweendelezi cakuti wakasola kujaya bazyukulu bakwe boonse kutegwa ayendelezye nguwe. (2Mak. 22:10, 11) Umwi wabazyukulu bakwe wakali Jehoasi, walo iwakafwutuka akaambo kakuti Jehosabati mukaintu wa Jehoyada wakamusisa. Walo amulumaakwe bakamusisa alimwi akumulanganya. Kwiinda mukucita boobu, Jehoyada alimwi a Jehosabati bakapa kuti umwi wamukwasyi wa Davida afwutuke akuba mwami. Nokuba kuti wakalicembeede, Jehoyada wakali kusyomeka kuli Jehova alimwi tanaakalekela kuyoowa Ataliya kumupa kuleka kucita ciluzi. Ciindi Jehoasi naakali amyaka iili ciloba, Jehoyada alimwi wakatondezya kuti wakali kusyomeka kuli Jehova. Mucikozyanyo, wakayandaula nzila yakugwasya Jehoasi. Kuzwidilila kwanzila eeyi kwakali kuyoopa kuti Jehoasi abe mwami, simulyazina wa Davida weelela. Pele kuti naa nzila eeyi noyatakazwidilila, Jehoyada wakali kukonzya kujaigwa. Aboobo, kwiinda mukugwasyigwa a Jehova, nzila eeyi yakazwidilila. w23.06 17 ¶12-13

Mwami Nebukadinezara naakayeeya kuti Daniele wakali sinkondonyina alimwi naakamujaya. Pele Daniele wakatondezya busicamba alimwi wakacipandulula ciloto. Ncinzi cakagwasya Daniele kuba sicamba mubuumi bwakwe boonse? Naakacili mwana, Daniele wakaiya cikozyanyo cabausyi abanyina. (Dt. 6:6-9) Daniele tanaakazyi buyo Mulawo wantalisyo, mbuli Milawo Iili Kkumi, pele alimwi wakalizyi zijatikizyidwe caboola kuzintu muna Israyeli nzyaakeelede kulya naa kutalya. (Lev. 11:4-8; Dan. 1:8, 11-13) Kunze lyaboobo, Daniele wakaiya kujatikizya makani aakaindi aabantu ba Leza alimwi azyeezyo izyakali kubacitikila nobakali kwaalilwa kupona kweelana azyeelelo zya Jehova. (Dan. 9:10, 11) Zintu izyakamucitikila Daniele zyakamupa kusyoma kuti Jehova alimwi abangelo bakwe basinguzu bakali kumugwasyilizya.—Dan. 2:19-24; 10:12, 18, 19. w23.08 3 ¶5-6

Rebeka wakali mukaintu musongo mubuumi bwakwe boonse, wakali kucita zintu cabusicamba alimwi wakalizyi naakeelede kucita cintu cimwi. (Matl. 24:58; 27:5-17) Nokuba boobo, wakalijisi bulemu alimwi wakali kulibombya. (Matl. 24:17, 18, 65) Aboobo, ikuti andinywe cakulicesya kamubutobela bubambe bwa Jehova mbuli mbwaakali kucita Rebeka, munooli cikozyanyo cibotu mumukwasyi alimwi amumbungano. Kulibombya abwalo mbube buyandika kapati ku Banakristo boonse. Esita wakali mukaintu uusyomeka iwakali kulibombya. Akaambo kakuti wakali kulibombya, kunyina naakatalika kulisumpula ciindi naakaba namalelo. Wakaaswiilila akwaatobela malailile ngaakapegwa amweeninyina Moodekai. (Es. 2:10, 20, 22) Andinywe mulakonzya kutondezya kuti mulalibombya kwiinda mukulomba lulayo akulutobela. (Tit. 2:3-5) Esita wakatondezya kuti wakali kulibombya munzila ayimbi. Mucikozyanyo, “wakali mubotu alimwi weebeka,” pele kunyina naakayanda kuti bantu boonse kababikkila buyo nguwe maano.—Es. 2:7, 15. w23.12 19-20 ¶6-8

Kuciindizya kulipa mulandu, mukuli Jehova ngwatayandi kuti tunyamuna. Ikuti twakalyaambilila zibi zyesu akubweza ntaamu ziyandika kutegwa tutaciinduluki cibi eeco, tulakonzya kuba masimpe kuti Jehova wakatulekelela. (Mil. 3:19) Ikuti naa twakabweza ntaamu eezyo, Jehova tayandi kuti katuzumanana kulipa mulandu. Kayi ulizyi kuti kucita boobo kulakonzya kututyompya. (Int. 31:10) Ikuti twazumanana kutyompwa, tulakonzya buya akucileka kubalika mumuzundano wakubuumi. (2Kor. 2:7) Ikuti kamuciindizya kulipa mulandu, mweelede kubikkila maano ‘kukulekelela kwancobeni’ Leza nkwatulekelela. (Int. 130:4) Ikuti aabo ibeempwa ncobeni wabalekelela, usyomezya kuti: “cibi cabo tandikaciyeeyi limbi pe.” (Jer. 31:34) Eeci caamba kuti Jehova kunyina nayoomupa mulandu akaambo kazibi zyanu zyakaindi. Tamweelede kulipa mulandu akaambo kakuti mwakasweekelwa mikuli imwi njomwakajisi mumbungano. Jehova kunyina nazumanana kuyeeya kujatikizya kulubizya kwanu, aboobo andinywe tamweelede kuzumanana kukuyeeya. w23.08 30-31 ¶14-15

Lyabulwazi bwa COVID-19, Bakamboni ba Jehova ibakali kuswiilila busolozi mboyakali kupa mbunga tiibakalibilika kapati mbuli baabo ibakali kuswiilila makani aakubeja. (Mt. 24:45) Tweelede kuzumanana kubikkila maano ‘kuzintu ziyandika kapati.’ (Flp. 1:9, 10) Zintu zinyonganya zilakonzya kutumanina ciindi anguzu nzyotweelede kubelesya kucita zintu ziyandika kapati. Zintu nzyotucita mubuumi bwabuzuba abuzuba mbuli kulya, kunywa, kulikondelezya alimwi akubeleka mulimo wakumubili zilakonzya kuba zintu zinyonganya kuti naa zyaba nzezintu ziyandika kapati mubuumi bwesu. (Lk. 21:34, 35) Kunze lyaboobo, buzuba abuzuba tulamvwa akubala kujatikizya manyongwe aacitika alimwi amakani aajatikizya twaambo twacisi. Tatweelede kunyonganizyigwa azintu zili boobu. Buyo-buyo, inga twatalika kulombozya kuba kulubazu lumwi mumizeezo yesu alimwi amumoyo. Saatani ubelesya nzila ziindene-indene kutegwa atupe kwaalilwa kucita ciluzi. w23.07 16-17 ¶12-13

Kubantu ba Jehova, buzuba bwa Ciibalusyo ca lufwu lwa Kristo, mbuzuba buyandika kapati mumwaka. Mbobuzuba bulikke Jesu mbwaakalailila basikumutobela kuti kababuyeeya. (Lk. 22:19, 20) Inga cituyeezya nzila mbotukonzya kutondezya kulumba kwesu akaambo kacipaizyo ca Jesu. (2Kor. 5:14, 15) Alimwi cilatupa coolwe ‘cakuyumizyanya’ abakwesu abacizyi. (Rom. 1:12) Kuyungizya waawo, bantu banji bajisi luyandisisyo balakulwaizyigwa kutalika kwiiya Bbaibbele akaambo kazintu nzyobabona alimwi akumvwa. Amweezeezye buyo Ciibalusyo mbocikamantanya bunyina bwa nyika yoonse. Twaambo toonse ootu tupa kuti Ciibalusyo kaciyandika kapati kulindiswe! w24.01 8 ¶1-3

Ciindi notuzinzibala kuyeeya muulo Jehova a Jesu ngobakabbadela, tuyoomvwisya mbobamuyanda kapati umwi aumwi wesu. (Gal. 2:20) Cinunuzyo ncipego caluyando. Jehova wakatondezya kuti ulatuyanda kwiinda mukwaaba mwanaakwe ngwayandisya kapati, nkokuti Jesu. Mane buya wakazumizya kuti Mwanaakwe apenge akufwa akaambo kandiswe. Mbubwenya mbotwabona, Jehova tagoleli buyo akuzyiba kuti ulatuyanda, pele ulatwaambila mbwatuyanda kapati. (Jer. 31:3) Jehova ulatutamba kuti tube balongwe bakwe akaambo kakuti ulatuyanda. (Amweezyanisye a Deuteronomo 7:7, 8.) Kunyina cintu cili coonse cikonzya kutwaandaanya kuluyando lwakwe. (Rom. 8:38, 39) Ino luyando oolu lumupa kulimvwa buti? w24.01 28 ¶10-11

Banakristo bananike balabukkomanina kapati bulangizi bwabo bwakujulu. Mu 1991 Mukwesu Frederick Franz, wakaamba mbwaakali kulimvwa kujatikizya bulangizi oobu naakati: “Bulangizi bwesu buyoozuzikizyigwa ncobeni, alimwi toonse notuli 144,000 tuyootambula ncaakatusyomezya Leza. Bulumbu bwesu bunooli bubotu citaambiki kwiinda cintu cili coonse ncotujisi.” Mukwesu Franz wakaamba kuti: “[Tucibukkomanina] kapati bulangizi bwesu. . . . Akaambo kakubulindila kwaciindi cilamfwu, capa kuti tubuyande kapati. Tuliyandide kubulindila. Lino ndilabukkomanina kapati bulangizi bwesu kwiinda kaindi.” Kufwumbwa naa tulangila kuyoopona buumi butamani kujulu naa anyika, toonse tulijisi bulangizi butaliboteli bwalo ibutupa kukkomana. Alimwi tulakonzya kubuyumya bulangizi bwesu. w23.12 9¶6; 10 ¶8

Anze aamulyango watente lyakubunganina, kwakali cipaililo camukuba aawo mpobakali kutuulila banyama kazili zipaizyo kuli Jehova. (Kul. 27:1, 2; 40:29) Nokuba boobo, zipaizyo eezyo kunyina nozyakali kupa kuti bantu balekelelwe zibi zyabo cakumaninina. (Heb. 10:1-4) Aboobo, kupa zituuzyo zyabanyama ikwakali kucitwa kutente lyakubunganina, cakali citondezyo cacipaizyo comwe icakali kuyoopa kuti bantu boonse balekelelwe zibi zyabo cakumaninina. Jesu wakalizyi kuti Jehova wakamutuma aano anyika kutegwa azikwaabe buumi bwakwe kacili cipaizyo cacinunuzyo kubantu boonse. (Mt. 20:28) Aboobo naakali kubbapatizyigwa, Jesu wakalyaaba kucita kuyanda kwa Jehova. (Joh. 6:38; Gal. 1:4) Jesu wakalyaaba acipaililo cacikozyanyo icakali kwiiminina “kuyanda” kwa Leza kwakuti Mwanaakwe atuule buumi bwakwe bulondokede. Jesu wakaaba buumi bwakwe “ciindi comwe buyo kukabe kutamani” kunununa, naa kuvwumba zibi zyabantu boonse cakumaninina aabo ibatondezya lusyomo muli Kristo.—Heb. 10:5-7, 10. w23.10 26-27 ¶10-11

Kayi notwatakacikonzya kulifwutula lwesu tobeni kuzwa kucibi alufwu. (Int. 49:7, 8) Aboobo, Jehova wakapanga bubambe bwakuti Jesu aabe buumi bwakwe kutegwa tufwutulwe. Masimpe Jehova a Jesu bakatondezya kulyaaba kupati. Ikuti katujana ciindi cinji cakuzinzibala kuyeeya kujatikizya kulyaaba kwa Jehova alimwi a Jesu, tunoolumba kapati akaambo kacinunuzyo. Ciindi Adamu naakabisya, wakasweekelwa bulangizi bwakupona buumi butamani, walo abana bakwe boonse. Kutegwa apilusye ceeco ncaakasweekelwa Adamu, Jesu wakaaba buumi bwakwe bulondokede. Mubuumi bwakwe boonse bwaanyika, Jesu “tanaakacita cibi, alimwi kunyina lweeno lwakajanwa mukanwa lyakwe.” (1Pet. 2:22) Ciindi Jesu naakafwa, wakalilondokede mbubwenya mbuli Adamu mbwaakabede katanabisya. Aboobo, kwiinda mukwaaba buumi bwakwe, wakabbadelela buumi mbwaakasowa Adamu.—1Kor. 15:45; 1Tim. 2:6. w24.01 10 ¶5-6

Naakabusyigwa Jesu, wakanjila mu Busena Busalalisya bwatempele lyakumuuya. Kusikila waawa, twabona mbobusumpukide kapati bubambe bwa Jehova bwabukombi busalala kweelana acipaizyo cacinunuzyo alimwi akuti Jesu Kristo mupaizi mupati. Mupaizi mupati mu Israyeli wakali kunjila mu Busena Busalalisya ibwakapangwa abantu kumwi kajisi bulowa bwabanyama kacili cipaizyo, pele walo Jesu “wakanjila kujulu kwini buya,” ibusena busalalisya kapati akulibonya kumbele lya Jehova. Okuya wakaaba mpindu yabuumi bwakwe bulondokede akaambo kandiswe “kuti amanizye cibi kwiinda mucipaizyo cakwe mwini.” (Heb. 9:24-26) Kufwumbwa naa tujisi bulangizi bwakuyoopona kujulu naa aano anyika, toonse buyo tulakonzya kumukomba Jehova mutempele lyakwe lyakumuuya. w23.10 28 ¶13-14

Amuyeeye buyo kujatikizya mulimo ngwacita Jesu kujulu mbwali Mwami wesu alimwi Mupaizi Mupati silweetelelo. Kwiinda mulinguwe, tulakonzya kuswena “kucuuno cabwami caluzyalo lwa Leza” mumupailo akulomba kuti atufwide luse alimwi akutugwasya “aciindi ceelede.” (Heb. 4:14, 15) Aboobo, buzuba abuzuba atusolekesye kuzinzibala kuyeeya zintu Jehova a Jesu nzyobatucitila kale alimwi anzyobali mukutucitila. Luyando ndobajisi kulindiswe lweelede kutukulwaizya kuba basungu mukubelekela Jehova. (2Kor. 5:14, 15) Nzila imwi yiinda kubota mbotukonzya kutondezya kulumba nkwiinda mukusolekesya kugwasya bamwi kuti babe Bakamboni ba Jehova alimwi abasikwiiya ba Jesu. (Mt. 28:19, 20) Eeci ncaakacita mwaapostolo Paulo. Wakalizyi kuti Jehova uyanda kuti “bantu boonse bafwutulwe akuba aluzyibo lwini-lwini lwakasimpe.”—1Tim. 2:3, 4. w23.10 22-23 ¶13-14

Bunji bwesu tulalubelesya lugwalo oolu kuumbulizya bantu mbotukambaukila alimwi akubatondezya buumi mbobunoobede mu Paradaiso. Aboobo, mbuti mbotukonzya kugwasya bamwi kusyoma kuti zilongezyo zyaambidwe kulugwalo lwa Ciyubunuzyo 21:3, 4 ziyoocitika ncobeni? Alimwi mbuti mbotukonzya kuyumya lusyomo lwesu muli Jehova azisyomezyo zyakwe? Jehova wakaamba twaambo tulimvwisya ncotweelede kusyoma kuti uyoocizuzikizya cisyomezyo eeci. Tulatujana twaambo itutupa kusyoma kuti cisyomezyo ca Jehova ca Paradaiso ciyoozuzikizyigwa ncobeni mutupango ootu tutobela. Tubala kuti: “Mpoonya ooyo uukkede acuuno cabwami wakati: ‘Amubone! Ndilengulula zintu zyoonse kuti zibe zipya.’ Alimwi, waamba kuti: ‘Kolemba, nkaambo majwi aaya alasyomeka alimwi ngamasimpe.’ Alimwi wakandaambila kuti: ‘Zyacitika! Ndime Alefa a Omega, imatalikilo amamanino.’”—Ciy. 21:5, 6a. w23.11 3 ¶3-5

Mukwesu mukubusi ulakonzya kutondezya kuti uyeeya kabotu kwiinda mukusala zisani zili kabotu akulibamba kabotu. Bunji bwabantu ibapanga mafasyoni abasikwaambilizya tabamulemeki Jehova alimwi tabalilemeki pe. Aboobo balakonzya kupanga zisani zijata kapati naa izikonzya kupa bamaalumi kulibonya mbuli kuti mbaamakaintu. Ciindi nasala zyakusama, mukwesu mukubusi uuyanda kuba Munakristo uusimide uyootobela njiisyo zyamu Bbaibbele alimwi azikozyanyo zibotu zyabakwesu mumbungano. Aboobo ulakonzya kulibuzya kuti: ‘Sena zintu nzyondisala zitondezya kuti ndiyeeya kabotu akuti ndilababikkila maano bamwi? Sena nsamino yangu ipa kuti cibaubile bamwi kusyoma kuti ndili mubelesi wa Leza uulyaabide?’ (1Kor. 10:31-33) Mukwesu uyeeya kabotu takalemekwi buyo abakwesu abacizyi pele alimwi uyookkomaninwa a Usyi wakujulu. w23.12 26 ¶7

Kaindi, “mwami wakumusanza” wakali kubapenzya bantu ba Jehova. (Dan. 11:40) Mucikozyanyo, lya Nkondo Yanyika Yoonse Yakusaanguna alimwi a Yabili, bakwesu banji bakaangwa akaambo kakutatola lubazu mutwaambo twacisi alimwi bana ba Bakamboni bakali kutandwa kuzikolo akaambo katwaambo ntomunya. Nokuba boobo, kwamyaka misyoonto yainda, babelesi ba Jehova ibakkala mumasena aayendelezyegwa amwami wakumusanza basunkwa munzila zitali zyacigaminina. Mucikozyanyo, ciindi nokuli kuvwoota, Munakristo ulakonzya kusunkwa kutalika kuyanda cipani cimwi camapolitikisi kwiinda zimbi. Takonzyi kusika antaamu yakuunka kuyoovwoota, pele mumoyo ulakonzya kutalika kulombozya kuti kubota cipani cimwi cizwidilile. Eelo kaka cilayandika kapati kutatola lubazu mutwaambo twacisi ikutali buyo mumicito pele amumoyo wesu!—Joh. 15:18, 19. w23.08 12 ¶17

Ciindi notubalika mumuzundano wesu wakubuumi, tweelede ‘kubalika munzila iinga yatupa kuyoojana bulumbu.’ (1Kor. 9:24) Jesu wakaamba kuti tulakonzya ‘kulengaana akaambo kabulyato, bucakolwa akulibilika azintu zyamubuumi.’ (Lk. 21:34) Magwalo aaya alimwi aambi alakonzya kumugwasya kubona aayandika kubambulula ciindi nomubalika mumuzundano wanu wakuunka kubuumi. Tulakonzya kuba alusyomo lwakuti tuyoozwidilila mumuzundano ooyu wakubuumi akaambo kakuti Jehova uyootupa nguzu zyakucikonzya kucita boobo. (Is. 40:29-31) Aboobo mutatyompwi pe! Amwiiye mwaapostolo Paulo iwakabalika cakuliyumya kapati kutegwa atambule bulumbu mbwaakabambilidwe. (Flp. 3:13, 14) Kunyina uukonzya kumwiiminina mumuzundano ooyu, pele kwiinda mukugwasyigwa a Jehova mulakonzya kuzwidilila. Jehova ulakonzya kumugwasya kunyamuna mikuli yanu alimwi akusowa zintu zitayandiki zyalo zikonzya kumulemena. Kwiinda mukugwasyigwa a Jehova, mulakonzya kubalika cakuliyumya akuyootambula bulumbu! w23.08 31 ¶16-17

Ciindi Jesu naakali amyaka iili 12, bazyali bakwe bakamusiya ku Jerusalemu. (Lk. 2:46-52) Wakali mukuli wa Josefa a Mariya kubona kuti bana babo boonse bali munkamu yabaabo ibakali kuzwa kupobwe. Aboobo ciindi Josefa a Mariya nobakamujana Jesu, Mariya wakamutongooka Jesu akaambo kakubapenzya. Naakali kuyanda, Jesu naakabaambila kuti eeci ncobakacita tiicakali kabotu pe. Muciindi caboobo, Jesu wakabaingula mubufwaafwi alimwi munzila yabulemu. Nokuba boobo, Josefa a Mariya “tiibakamvwisya ncaakali kubaambila.” Pele, walo Jesu “wakazumanana kubamvwida.” Nobakubusi, sena cilamukatazya kubamvwida bazyali banu ciindi nobalubizya naa nobatamumvwisyi? Ncinzi cikonzya kumugwasya? Amuyeeye Jehova mbwalimvwa. Bbaibbele lyaamba kuti ciindi nomubamvwida bazyali banu, “eeci cilakkomanisya mu Mwami.” (Kol. 3:20) Jehova inga ulizyi ciindi bazyali banu nobatamumvwisyi naa nobabikka milawo iikatazya kutobela. Pele ciindi nomubamvwida, ulakkomana kapati. w23.10 7 ¶5-6

Sicikoloma ulakonzya kwaamba kuti Bakamboni ba Jehova beelede kucinca mbobaabona makani aajatikizya koonana kwabantu bajisi zizo zikozyenye. Tweelede kumwaambila kuti tulamvwisya kuti muntu uuli woonse ulijisi lwaanguluko lwakulisalila cakucita. (1Pet. 2:17) Mpoonya tulakonzya kumwaambila mbocigwasya kutobela zyeelelo zyakulilemeka zyamu Bbaibbele. Ciindi notwajana muntu uukazya kapati, tatweelede kufwambaana kuyeeya kuti tulizizyi nzyasyoma muntu ooyo. Mucikozyanyo, ino kuti sicikolonyoko waamba kuti kusyoma muli Leza mbufwubafwuba? Sena inga mwamuyeeyela kuti ulaisyoma kapati njiisyo yakusanduka kwazintu alimwi akuti uzyi makani manji kujatikizya njiisyo eeyo? Amana buya, ambweni wiile kwaamba buyo makani ngaakamvwa. Ambweni mulakonzya kumutondezya makani aajatikizya kulenga aali a jw.org. Kumbele ambweni inga waakuzumina kuba amubandi uuyeeme acibalo naa vidiyo iijanika mpawo. Masimpe, kuti twamupa bulemu, inga camugwasya kuyanda kwiiya makani manji aajatikizya Bbaibbele. w23.09 17 ¶12-13

Tulakonzya kuba alusyomo lwakuti andiswe Jehova unootubelesya alimwi akutulongezya nokuba kuti twalubizya, lilikke buyo kuti twabambulula nzila zyesu alimwi akuzumanana kumusyoma. (Tus. 28:13) Samusoni Tanaakalondokede, pele kunyina naakacileka kubelekela Jehova nociba ciindi naakalubizya mumakani aajatikizya Delila. Awalo Jehova kunyina naakacileka kumubelesya. Wakamubelesya alimwi Samusoni kunyonyoona basinkondonyina banji kapati. Jehova wakacili kumubona kuti muntu uusyomeka kapati, cakuti wakamubikkilizya mumulongo wamazina aabantu bakali kusyomeka aalembedwe ku Bahebrayo caandaano 11. Eelo kaka cilakulwaizya kuzyiba kuti tubelekela Taatesu wakujulu uujisi luyando walo uuyanda kutuyumya akutugwasya, kwaambisya ciindi notujisi mapenzi! Aboobo mbubwenya mbuli Samusoni, atumulombe Jehova kuti: “Kondiyeeya kaka akundiyumya.”—Bab. 16:28. w23.09 7 ¶18-19

Tulakulwaizyigwa kwaambilizya makani mabotu kuli bamwi akaambo kakuti tulizyi kuti buzuba bwa Jehova bwaswena afwaafwi. Pele zimwi ziindi tulakonzya kuyoowa kukambauka. Nkaambo nzi? Akaambo kakuyoowa bantu. Eeci ncecakamucitikila Petro. Busiku naakali kubetekwa Jesu, Petro wakaalilwa kulizyibya kuti wakali umwi wabasikwiiya ba Jesu mane buya akusika antaamu yakumukaka! (Mt. 26:69-75) Pele Petro wakalizunda penzi eeli lyakuyoowa bantu akulemba kuti: “Mutayoowi ncobayoowa balo, nokuba kunyongana.” (1Pet. 3:14) Majwi aa Petro atupa kuba alusyomo lwakuti tulakonzya kulizunda sunko lyakuyoowa bantu. Ncinzi cikonzya kutugwasya kuzunda sunko lyakuyoowa bantu? Petro utwaambila kuti: “Mumyoyo yanu amubone Kristo kuti Mwami.” (1Pet. 3:15) Tweelede kuliyeezya kuti Kristo Jesu Mwami wesu akuti ulijisi nguzu zinji. w23.09 27-28 ¶6-8

Tweelede kuzumanana kwiikaka ‘milimo yabuyo yamudima.’ (Ef. 5:11) Masimpe kuti, ikuti naa muntu wazumanana kulangilila zintu zisofweede naa zitali kabotu, kuziswiilila naa kuzibandika buya, nkokuti inga camuubila kuzicita zintu eezyo. (Matl. 3:6; Jak. 1:14, 15) Saatani ulasola kutweena kwiinda mukutupa kuyeeya kuti zintu Jehova nzyaamba kuti tazili kabotu alimwi zilisofweede, mubwini zili buyo kabotu. (2Pet. 2:19) Kayi Diabolosi lyoonse wali kusola kubanyonganya bantu kutegwa baalilwe kuzyiba ciluzi acitaluzi. (Is. 5:20; 2Kor. 4:4) Nkakaambo kaako bunji bwamafilimu, izintu zitondezyegwa a TV alimwi amawebbusaiti aa Intaneti zikulwaizya zintu iziteendelani azyeelelo zya Jehova ziluleme. Saatani uyanda kutupa kuyeeya kuti micito iisofweede abukkale bwakutalilemeka zyalo izidumide kapati mazuba aano zilakkomanisya.—Ef. 5:6. w24.03 22 ¶8-10

Tente lyakubunganina cakali cintu ncobakali kunyamuna bana Israyeli nobakali kulonga kuzwa abusena bumwi kuunka abusena bumbi. Bakali kulibelesya tente eeli kwamyaka iitandila ku 500 kusikila ciindi tempele nolyakayakwa mu Jerusalemu. (Kul. 25:8, 9; My. 9:22) Tente lyakubunganina bwakali busena bana Israyeli mpobakali kuswaanganina kutegwa bakombe Leza alimwi akutuula zipaizyo. (Kul. 29:43-46) Nokuba boobo, tente lyakubunganina alyalo lyakali kwiiminina cintu ciyandika kapati. Cakali ‘cimvwule cazintu zyakujulu’ alimwi lyakali kwiiminina tempele lya Jehova lipati lyakumuuya. Mwaapostolo Paulo wakaamba kuti “Itente eeli [naa tente lyakubunganina] ncikozyanyo cakuciindi ecino.” (Heb. 9:9) Aboobo ciindi naakalembela Bahebrayo, tempele lyakumuuya lyakaliko kale. Lyakatalisyigwa mu 29 C.E. Ooyu ngomwaka Jesu ngwaakabbapatizyigwa, kunanikwa amuuya uusalala alimwi akutalika kubeleka kali “mupaizi mupati” mutempele lyakumuuya.—Heb. 4:14; Mil. 10:37, 38. w23.10 25-26 ¶6-7

Tobanakristo tweelede kuba bantu banyoneka, ibalibambilide kubbenda kutegwa tuzumanane kuyuma kumuuya. Mubuti? Tweelede kuba bantu banyoneka kwiinda mukucinca ciindi bukkale bwesu nobwacinca alimwi akulemeka mizeezo yabamwi azintu nzyobasala kucita. Mbotuli babelesi ba Jehova, tweelede kuba bantu banyoneka. Kuyungizya waawo, tweelede kuba bantu balicesya alimwi basilweetelelo. Jehova waambwa kuti “Nindomba” nkaambo ulakakatila, tazungaani pe. (Dt. 32:4) Nokuba boobo, ulanyoneka. Mboziyaabucinca zintu munyika iino, Jehova uluujisi kucinca kutegwa azuzikizye zisyomezyo zyakwe. Jehova wakalenga bantu mucinkonzya cakwe munzila yakuti kabacikonzya kucinca kweelana abukkale. Mu Bbaibbele tulajana njiisyo zikonzya kutugwasya kusala cabusongo mubukkale buli boonse motukonzya kulijana. Aboobo cikozyanyo ca Jehova alimwi anjiisyo nzyaatupa zilatugwasya kuzyiba kuti walo ulanyoneka nokuba kuti “Nindomba.” w23.07 20 ¶1-3

Mu Bbaibbele, Jehova ulikozyanisya kumutumbu siluyando. (Is. 66:12, 13) Amweezeezye buyo mutumbu mbwamulanganya caluyando mwanaakwe. Ciindi notutyompedwe, tweelede kuzyiba kuti Jehova ulatuyanda kapati. Kunyina naleka kutuyanda ciindi notwalubizya. (Int. 103:8) Bana Israyeli bakamunyemya Jehova cakwiinduluka-induluka, nokuba boobo, wakatondezya kuti wakali kubayanda kapati bantu aabo bakeempwa kwiinda mukubaambila kuti: ‘Mwakali kuyandika kapati mumeso aangu, mwakalemekwa, alimwi mebo ndakamuyanda.’ (Is. 43:4, 5) Leza kunyina naleka kutondezya luyando. Nokuba kuti twacita zibi zipati, ciindi notweempwa akupiluka kulinguwe, ulazumanana kutuyanda. Usyomezya ‘kutulekelela cakumaninina.’ (Is. 55:7) Bbaibbele lyaamba kulekelela ooku kuti kuleta “ziindi zyakukatalukwa . . . kuzwa kuli Jehova lwakwe.”—Mil. 3:19. w24.01 27 ¶4-5

Jehova ulakonzya kutugwasya ciindi notuli mubukkale bukatazya. Mucikozyanyo, ciindi notulomba basikutulemba mulimo kuti tukajanike kumuswaangano wacooko naa kutuzumizya kuti katujanika kumiswaangano yoonse yambungano, tupa kuti tulibonene janza lya Jehova mubuumi bwesu. Alimwi tulakonzya kugambwa kubona zintu mbozikonzya kutweendela kabotu. Akaambo kaceeci, lusyomo lwesu muli Jehova lulakonzya kuyuma kapati. Cakulicesya Ezara wakapaila kuli Jehova kulomba lugwasyo. Kufwumbwa ciindi naakali kulibilika, Ezara wakali kupaila kuli Jehova. (Ezr. 8:21-23; 9:3-5) Akaambo kakuti wakali kusyoma Jehova, cakapa kuti bamwi bamugwasyilizye alimwi akwiiya lusyomo lwakwe. (Ezr. 10:1-4) Aboobo ciindi notwalibilika kujatikizya zintu nzyotuyandika kumubili naa mbotukonzya kukwabilila mukwasyi wesu, tweelede kupaila kuli Jehova. w23.11 18 ¶15-17

Jehova tatwaambili kucita milimo njaakacita Abrahamu kutegwa twaambwe kuti tuli balulami. Mubwini, kuli nzila zinji motukonzya kutondezya kuti tulijisi lusyomo kwiinda mumilimo yesu. Tulakonzya kutambula bapya mumbungano, kugwasya bakwesu abacizyi babulide ncobeni akubacitila zibotu banamukwasyi calo ncakkomanina Leza alimwi cilakonzya kupa kuti atulongezye. (Rom. 15:7; 1Tim. 5:4, 8; 1Joh. 3:18) Nzila iiyandika kapati motukonzya kutondezya kuti tulijisi lusyomo, nkwiinda mukubakambaukila bamwi makani mabotu cabusungu. (1Tim. 4:16) Toonse tulakonzya kutondezya lusyomo lwesu kwiinda mumilimo kuti zisyomezyo zya Jehova ziyoocitika ncobeni alimwi akuti lyoonse ucita zintu ziinda kubota. Ikuti twacita oobo, tulakonzya kuba alusyomo lwakuti Leza uyootubona kuti tuli balulami alimwi tuyooba balongwe bakwe. w23.12 2 ¶3; 6 ¶15

Mwaapostolo Paulo wakakulwaizya Banakristo baku Efeso kwiinda mukubaambila majwi aali atala aawa. Lulayo oolu lulayandika kubaalumi Banakristo boonse. Kutegwa bacite oobo, beelede kutobela milawo ya Leza alimwi akubelesya njiisyo zyamu Bbaibbele mubuumi bwabo boonse. (Lk. 2:52) Nkaambo nzi ncociyandika kubakwesu bana-bana kuba Banakristo basimide? Mwaalumi Munakristo ulijisi mikuli minji iiyandika kapati njayelede kuzuzikizya mumukwasyi alimwi amumbungano. Nobakwesu bacili bana-bana, kweelede kuti mulauyeeya mikuli njomulangilwa kuyooba anjiyo kumbele. Ambweni mujisi mbaakani yakuyooba mupainiya, mukutausi mpoonya akuba mwaalu mumbungano. Alimwi andiza muyanda kuyookwata akuba abana. (Ef. 6:4; 1Tim. 3:1) Kutegwa mukazizuzikizye mbaakani eezyi alimwi akuzwidilila, mweelede kuba Munakristo uusimide. w23.12 24 ¶1-2

Baalu Banakristo bakapegwa mulimo wakulanganya mbelele zya Jehova ziyandika kapati. Bamaalumi aaba balyaabide balaubikkila maano kapati mulimo ooyu wakubelekela bakwesu abacizyi, alimwi balabeleka canguzu kuba ‘beembezi beembela kabotu.’ (Jer. 23:4; 1Pet. 5:2) Eelo kaka tulalumba kapati kuba abamaalumi bali boobu mumbungano zyesu! Baalu balakonzya kwiiya cikozyanyo ca Mubetesi Gideoni. (Heb. 6:12; 11:32) Wakali mukwabilizi alimwi mweembezi wabantu ba Leza. (Bab. 2:16; 1Mak. 17:6) Mbubwenya mbuli Gideoni, baalu bakasalwa kuti kabalanganya bantu ba Leza kwaambisya muziindi zikatazya kapati. (Mil. 20:28; 2Tim. 3:1) Tulakonzya kwiiya kulicesya kwakwe alimwi akumvwida. Kuliyumya kwakwe kwakasunkwa ciindi naakali kucita mulimo wakwe. Kufwumbwa naa tuli baalu naa pe, tweelede kwiiya kubalumba kapati baalu. Tweelede kubelekela antoomwe abakwesu aaba basimide kumuuya alimwi ibabeleka canguzu.—Heb. 13:17. w23.06 2 ¶1; 3 ¶3