Sena Bantu Bacinca Mizeezo Yabo Mukupa Mali Kubantu Bapengede?

NOYAKALWANWA New York City alimwi a Washington, D.C., mu September 11, 2001, ibantu bakalilibambide kapati kugwasya baabo bakajatikizyidwe mumapenzi aayo. Imbunga zyibwezelela mali azintu zisanga bantu izyakugwasya bali mumapenzi zyakajana mali aasika ku $2.7 billion aakubelesya mukulanganya mikwasyi yakajatikizyidwe. Nobakagambwa mbolwakali lupati lunyonyooko lwakacitika, bantu koonse-koonse bakalilibambide kugwasya.

Nokuba boobo, bantu bamwi bakanyema kapati nobakamvwa kuti imbunga eezi kunyina nozyakali kwaabelesya kabotu mali aayo. Kwakaba kunyema kapati ikumvwa kuti imbunga imwi mpati ilanganya bantu bali mumapenzi, yakali kuyanda kubweza mali aatandila kucisela ca $546 million aabantu bapengede, kutegwa yaabelesye mulimo uumbi. Nokuba kuti imbunga kumbele yakacinca muzeezo alimwi akulilekelela, sikuluula umwi wakati: “Ikucinca muzeezo ooku basikukazya bakakubona kuti takukonzyi kubagwasya kuti bantu baisyome mbuli mbobakali kwiisyoma kacitana citika cintu eeci.” Ino mbuti nywebo? Sena mwaleka kuzisyoma kapati mbunga zilanganya bantu bali mumapenzi mazubaano?

Sena Kupa Zintu naa Mali Kumbunga Eezi Nkunyonyoona?

Ikupa mali kumbunga eezi kulalumbaizyigwa kapati. Pele, tabali bantu boonse bacibona munzila eeyi. Myaka iinda ku 200 yainda, Samuel Johnson uucibwene kulemba milaso waku England wakalemba kuti: “Mulakonzya kusinizya kuti mucita kabotu ciindi nomuvwozya babelesi mali, ikutali ciindi nomupa mali kumbunga zilanganya bantu bali mumapenzi.” Imazubaano, bantu bamwi balawayawaya ikusanga zintu, alimwi malipooti aakuti imbunga zilanganya bantu bali mumapenzi tazibelesyi kabotu zintu zisangwa, apa kuti bantu kabatazisyomi. Atulange-lange zikonzyanyo zyobile zyakacitika ino-ino.

Imweendelezi wacikombelo icilanganya bantu bali mumapenzi ku San Francisco wakatandwa eelyo naakabelesya mali aayo kuti akabikkwe lukanda lumbi kubusyu alimwi akuula cakulya camali aasika ku $500 ansondo mukaanda kajikilwa zyakulya kwamyaka yobile. Ku Britain ibeendelezya cisobano cidumide caa TV cigwasya kujana mali aakugwasya bali mumapenzi, bakausa nokwakazibwa kuti mali aatandila ku $10 million aaku U.S. aakatuminwa kuti akayasye maanda mapya aabamucaala ku Romania, kwakayakwa buyo maanda aali 12 aatayakidwe kabotu pe. Pele mali manji kunyina naakaambwa ncaakabeleka. Malipooti aaya mabi boobu apa kuti mbunga zisanga mali zicenjele kumali ngozisanga alimwi ambobasangila.

Ikupa naa Kutapa

Nokuba boobo, cipa nsoni ikulekela mizeezo yabantu basyoonto buyo naa mbunga kuti itulesye kubikkila maano alimwi akutondezya lubomba kubantu. Ibbaibbele lyaamba kuti: “Busyomi busalala butakwe kampenda mumeso aa-Leza Taateesu mbombubo obu, bwakuti muntu aswaye bamusyaala abamukabafu mumapenzi aabo.” (Jakobo 1:27) Inzya, ikugwasya bacete alimwi ababulide ncecintu cipati ku Bunakristo.

Nokuba boobo mulakonzya kweezyeezya kuti, ‘Sena ndeelede kuzumanana kusanga kumbunga zilanganya bantu bali mumapenzi naa kugwasya buyo bantu kwiinda muzipego?’ Ino nkupa kuli buti Leza nkwalangila? Icibalo citobela cilaulanga-langa mubuzyo ooyu.