Bantu Banji Munyika Balomba Cintu Comwe

AMUYEEYE buyo, myaanda-myanda yatuulunzuma twabantu boonse balomba cintu comwe. Balomba muntu wiinda nguzu mububumbo boonse kubapa ncobayanda. Pele, mbasyoonto ibazyi cini ncobalomba. Sena cintu camusyobo ooyu inga cacitika ncobeni? Masimpe ngakuti, cilacita lyoonse. Ino ncinzi bantu aaba boonse ncobalomba? Balomba kuti Bwami bwa Leza buboole!

Kweelana akubala kumwi kwakacitwa, kuli zikombelo zili 37,000 zilyaamba kuti Mbanakristo, alimwi basyoma kuti Jesu Kristo musololeli wabo. Kuli bantu ibainda ku 2 bbiliyoni ibasyoma boobo. Bunji bwabo bapaila caambwa kanji-kanji kuti Mupailo wa Mwami. Sena muluuzi mupailo ooyu? Kweelana a Jesu mbwaakabayiisya basikumutobela, wakati: “Taateesu ooli kujulu, alilemekwe izina lyako, abuze Bwami bwako, alucitwe luyando lwako, ansi ano mbubonya mbuli kujulu.”—Matayo 6:9, 10.

Kwamyaanda yamyaka lino, basizikombelo balaabelesya cakwiinduluka-induluka majwi aaya nobakomba. Alimwi balaainduluka mumikwasyi alimwi amuntu aumwi kumugama nobali mumapenzi anobakkomene. Baamba majwi aaya kuzwa ansi amoyo. Bantu bamwi baabikka mumutwe majwi aaya alimwi lyoonse balaamba kabatazi ancaamba. Aaba bantu ba Bunakristo Bwanyika tabali balikke babulangila akubupailila kuti buboole Bwami bwa Leza.

Imupailo Ubelesyegwa Amuzikombelo Zitali zya Bunakristo

Mupailo uuzibidwe waba Juda nguyooyo waambwa lyoonse mucikombelo naa ikuti muntu wamumukwasyi wafwa. Nokuba kuti taujatikizyi lufwu naa buumba bwini, kanji-kanji ulapailwa nokuli dilwe. Mupailo waamba kuti: “Walo [Leza] akkazyikizye Bwami bwakwe mubuumi bwanu . . . , cakufwambaana.”a Aumwi mupailo wakaindi wakali kupailwa muzikombelo wakali kwaamba bulangizi bwa Bwami bwa Mesiya kuzwa kuŋanda ya Davida.

Bantu bamwi batali Banakristo babona kuti makani aa Bwami bwa Leza mabotu. Kweelana amuteende wa The Times of India, mweendelezi wacikombelo caku India wamumwaanda wamyaka wa 19 uujisi mpuwo, iwakali kuyandisya kubona kweendelena kukonzya kuba akati kaba Hindu, ba Muslimu a Banakristo, wakaamba boobu: “Bwami bwa Leza wakasimpe tabukabooli ccita kuti bakujwe abakumbo kababelekela antoomwe.” Alimwi mweendelezi umwi wacikolo cipati caku Australia mu Strathfield, caino-ino wakalemba mumuteende kuti: “Mbuli bama Muslimu boonse, ndisyoma kuti Jesu uyooboola akukkazikizya Bwami bwa Leza bwakasimpe.”

Kakunyina akudooneka, kuli mabbiliyoni manji aabantu bajisi bulangizi alimwi balomba Bwami bwa Leza. Pele amulange-lange kaambo kamasimpe kakkomanisya.

Kweelede kuti mulizi kuti swebo to Bakamboni ba Jehova, ibamwaya magazini eeyi, tulaunka kuŋanda aŋanda mucilawo canu kwaambaula abantu makani aamu Bbaibbele. Kwaciindi cino, noilembwa magazini eeyi, tulaucita mulimo ooyu munyika yoonse mumasi aali 236 amumyaambo iinda ku 400. Mutwe mupati wamakani eesu aakukambauka Mbwami bwa Leza. Masimpe, amubone izina limaninide yamagazini eeyi ndyakuti, Ngazi Yamulindizi Yaambilizya Bwami bwa Jehova. Kanji-kanji tulababuzya bantu ikuti naa balabupailila Bwami oobo. Banji baingula kuti ee balacita oobo. Pele, nobabuzyigwa Bwami oobo ncobwaamba, bantu banji baingula kuti, “tabazi,” bwiinguzi bwabo tabusalali alimwi tabasinizyide.

Nkaambo nzi bantu banji ncobayanda kuti Bwami bwa Leza buboole nokuba kuti tababuzi? Sena nkaambo kakuti Bwami bwa Leza bulakatazya kumvwisya? Peepe. Bwami bulipanduludwe kabotu mu Bbaibbele. Kunze lyaboobo, imulumbe wamu Bbaibbele kujatikizya Bwami bulakonzya kumupa bulangizi bwini-bwini mumazuba aano aakatazya. Mucibalo citobela, tuyoolanga-langa Ibbaibbele mbolipandulula bulangizi oobo. Mpoonya tuyoobona mupailo wa Jesu uujatikizya Bwami nouyooingulwa.

Bupanduluzi buyungizidwe