Amwiiye Kusyomeka Nkwaakatondezya Itai
“MILIMO yako mipati, ilagambya, Mwami Leza Singuzuzyoonse. Ziyanza zyako nzyalusinizyo, zililuleme. Nduwe Mwami waciindi coonse. Nguni uutakuyoowi, Mwami, akulemeka izina lyako? Nkaambo nduwe olike [uusyomeka, NW].” Lwiimbo oolu, ilwakaimbwa kujulu abaabo “ibakazundide cinyama acikozyano caco,” lulatugwasya kubona kusyomeka kwa Leza. (Ciy. 15:2-4) Jehova uyanda kuti bakombi bakwe kabamwiiya mukutondezya bube bubotu oobu.
Pele Saatani Diabolosi, ulasoleka kapati kuti aandaanye babelesi ba Leza ibali anyika, kuluyando lwa Leza ngobakomba. Nokuba boobo, ibunji bwabo bazumanana kusyomeka kuli Leza, nomuba mubukkale bukatazya kapati. Elo kaka tulalumba kapati kuzyiba kuti Jehova ulakukkomanina kulyaaba kuli boobu! Masimpe, tusyomezyegwa kuti: “Jehova ulayandisya bululami, tasii [bantu bakwe basyomeka, NW].” (Int. 37:28) Kutegwa atugwasye kuzumanana kusyomeka, wakabikkilizya mu Jwi lyakwe imakani aajatikizya zyintu nzyobakacita bantu bakwe basyomeka. Amwi akati kamakani aaya ngayaayo aamba kujatikizya Itai muna Giti.
‘Mweenzu Alimwi Muzangalisi’
Itai uyeeyelwa kuti wakali kuzwa mumunzi uudumide wabana Filisti iwa Gati, mwalo sintanze Goliati alimwi abasinkondonyina Israyeli bambi ibayoosya mobakazyalilwa. Ciindi cakusaanguna kumumvwa mu Bbaibbele ooyu sikalumamba uucibwene Itai, cakali ciindi Abisalomu naakazangila Mwami Davida. Itai alimwi abaalumi bana Filisti ibali 600 balo ibakamutobela bakali bazangalisi ibakayubide kufwaafwi a Jerusalemu.
Bukkale bwa Itai abasikumutobela bweelede kuti bwakayeezya Davida mazuba ngaakali muzangalisi ciindi walo alimwi abasikalumamba bana Israyeli ibali 600 nobakaunka kucilawo camu Filisti akunjila mucisi ca Akisi mwami wa Gati. (1 Sam. 27:2, 3) Ino ncinzi ncaakali kuyoocita Itai abaalumi bakwe ciindi Davida naakatija mwanaakwe Abisalomu iwakamuzangila? Sena wakali kuyooba kulubazu lwa Abisalomu, naa ilwa Davida abantu bakwe ambweni naa tanaakali kuyooba kulubazu luli loonse?
Amuyeeye buyo Davida katija kuzwa ku Jerusalemu akwiima abusena butegwa “Ŋanda Iili Kule.” Ilangilwa kuti eeyi neŋanda iili kumamanino kwa Jerusalemu kulubazu lwa Cilundu ca Elaioni kabatanazabuka Kkuti lya Kedroni. (2 Sam. 15:17) Abusena aawa, Davida ulingula basikalumamba bakwe ciindi nobainda. Tabali buyo bana Israyeli basyomeka ibali anguwe pe, pele alimwi kuli bana Kereti abana Peleti boonse. Kuyungizya aali baaba, kuli abana Giti boonse—Itai abasikalumamba bakwe ibali 600.—2 Sam. 15:18.
Keetezyedwe kapati, Davida wakaambila Itai kuti: “Nkaambonzi ayebo noli aswe? Kobweeda kuyookala amwami, nkaambo uli mweenzu mutande. Kobweeda kulinduwe. Wakasika jilo buyo. Sa sunu ndakonzya kukucita kuti twiinke ayebo ciindi ecino ncindi mukweendeenda kufumbwa nkunja? Kobweeda akubweedezya abalo bananyokwe. Luzyalo alusinizyo lube ayebo.”—2 Sam. 15:19, 20.
Itai waamba kujatikizya kusyomeka kwakwe. Wiingula kuti: “Ncobeni Jehova mbwali muumi, amwami simalelaangu mbali muumi, kufumbwa nkwaabede mwami simalelaangu, nimuba mulufu nimuba mubuumi, nkukonya oko nkunjooba ndemulanda wako ambebo.” (2 Sam. 15:21) Majwi aaya ayelede kuti akayeezya Davida majwi aali mbuli yaaya ngobakaamba bakaapanyina ba Rute. (Rut. 1:16, 17) Majwi ngaakaamba Itai naakamunjila mumoyo, Davida wakamwaambila kuti: “Mbubo, koya kunembo” lya Kkuti lya Kedroni. “Lino Itai mu-Giti wakainda kunembo abantu bakwe boonse abanikenike mbaakali abo.”—2 Sam. 15:22.
‘Kutegwa Tuyiisyigwe’
Lugwalo lwa Ba-Roma 15:4 lwaamba kuti: “Makani aali boobo aakalembwa kalekale, nkukwiiya kwesu nkwaakalembelwa.” Aboobo inga twabuzya kuti: Ino nziiyo nzi nzyotwiiya kucikozyanyo ca Itai? Amulange-lange icakapa kuti asyomeke kuli Davida. Nokuba kuti wakali mweenzu alimwi muzangalisi uuzwa kucisi ca Filisti, Itai wakazyiba kuti Jehova ngo Leza mwini-mwini alimwi a Davida kuti mmunanike wa Jehova. Itai tanaakabikkila maanu kukutamvwana kwakaliko akati kabana Israyeli abana Filisti. Tanaakabikkila maanu kukaambo kakuti Davida ngonguwe iwakajaya sikalumamba mupati wabana Filisti Goliati alimwi abantu banji bamucisi cokwabo. (1 Sam. 18:6, 7) Itai wakabona Davida kuba muntu iwakali kuyanda Jehova alimwi wakabona abube bubotu mbwaakajisi Davida. Mpoonya Davida awalo wakamulemeka kapati Itai. Nkakaambo kaako Davida ncaakabikka “cipanzi catatu mumaanza aa-Itai” ciindi nobakalwana abasikalumamba ba Abisalomu.—2 Sam. 18:2.
Andiswe tweelede kubona bube bubotu mubantu, kutali kubasula akaambo kazilengwa, mubala naa musyobo. Cilongwe icakatalika akati ka Davida a Itai citondezya kuti ikuzyiba alimwi akuyanda Jehova kulakonzya kutugwasya kuzunda cilengwa cakusula bantu akaambo kazilengwa, mubala naa musyobo wabo.
Notuzinzibala kuyeeya cikozyanyo ca Itai, tulakonzya kulibuzya kuti: ‘Sena andime ndilasyomeka kuli Davida Mupati Kristo Jesu? Sena ndilakutondezya kusyomeka ooku kwiinda mukutola lubazu cabusungu mumulimo wakukambauka Bwami akugwasya bantu kuba basikwiiya?’ (Mt. 24:14; 28:19, 20) ‘Ino ndilisungwide kusika aali mukuliyumya kutegwa nditondezye kusyomeka kwangu?’
Basilutwe bamikwasyi abalo balakonzya kugwasyigwa kwiinda mukuzinzibala kuyeeya cikozyanyo ca Itai. Kusyomeka kwakwe kuli Davida alimwi akusala kwakwe kuti abe amwami uunanikidwe wa Leza kwakabajatikizya baalumi ba Itai. Mbubwenya buyo, kusala nkobacita basilutwe bamikwasyi mukutola ambele bukombi bwakasimpe kulaijatikizya mikwasyi yabo alimwi kulakonzya kuleta buyumuyumu kwaciindi cili mbocibede. Nokuba boobo, tusyomezyegwa kuti: “Kuli yooyo uusyomeka, [Jehova] ulasyomeka.”—Int. 18:25, NW.
Noyakamana inkondo akati ka Davida a Abisalomu, Magwalo taambi cili coonse kujatikizya Itai. Nokuba kuti makani aakwe aali mu Jwi lya Leza mmasyoonto buyo, atugwasya kumuzyiba kabotu akaambo kazyintu nzyaakacita aciindi eeci cikatazya mubuumi bwa Davida. Kaambo kakuti Itai ulaambwa mu Bbaibbele kapa bumboni bwakuti Jehova ulababona bantu ibasyomeka kulinguwe alimwi ulabapa bulumbu.—Heb. 6:10.