Ndilikkomene Nokuba Kuti Ndainda Mumapenzi Manji—Ibbaibbele Mbolyakandigwasya Kuti Ndiliyumye

Akaluulwa aba Enrique Caravaga Acosta

Mwakali mu April 15, 1971. Ndakali kuya kumunzi kwaakubona mukwasyi wangu. Mbwaanga kwakainda ciindi cilamfwu kuzwa nindakazwa kumunzi, ndakali kuyanda kubonana ambabo. Tiindakalizyi ikuti naa ndiyakubajana boonse. Nindakasika, ndakajana kuti bantu bone kubikkilizya abamaama bakajaigwa. Nguzu zyakandimana!

NDAKANYONGANA kapati. Ndakatalika kulibuzya kuti, “Ino nguni wabajaya? Ino ncinzi ncindilaacite?” Akaambo kakuti kwakanyina muntu uuli woonse, maano akandimana. Kanditanasakana kumwaambila makani aaya, amuleke ndimwaambile mbondakakomena. Ndasyoma cilamugwasya kubona mbondakalimvwa kujatikizya makani aaya amapenzi ambi aandicitikila mubuumi bwangu.

Mbotwakaiya Kasimpe

Ndakazyalilwa ku Quirimán, kufwaafwi adolopo lya Nicoya mucisi ca Costa Rica. Mumwaka wa 1953 kandijisi myaka iili 37, ndakali kukkala abazyali bangu ampulazi yesu. Nokuba kuti mumukwasyi wesu twakali ba Katolika, tiitwakali kuzikkomanina njiisyo zimwi aboobo twakali amibuzyo minji.

Buzuba bumwi, musankwa wazyina lya Anatolio Alfaro wakatuswaya kuŋanda yesu akutukulwaizya kuti tutalike kwiiya Bbaibbele. Wakatuyiisya magwalo manji anjiisyo zinji zyamu Bbaibbele. Mebo, bataata, bamaama, musyoonto wangu musankwa amusimbi, amweenzyinyina iwakali kukkala andiswe twakali kuswiilila musankwa ooyu naakali kutuyiisya. Twakabandika buzuba boonse. Twakali amibuzyo minji.

Anatolio wakoona nkotuzwa kumane nobwakaca twakazumanana kubandika. Makani ngaakatwaambila akatukkomanisya alimwi icakainda kutukkomanisya ncakuti wakali kwiingula mibuzyo njitwakajisi kwiinda mukubelesya Bbaibbele. Makani aaya akatunjila mumoyo. Nitwakakkala ansi kuyeeya nzyitwakaiya twakabona kuti twakali kwiiya kasimpe. Anatolio wakatusiila mamagazini amabbuku aamba zyamu Bbaibbele. Kumangolezya twakali kwaabala mabbuku aaya amukwasyi woonse. Eeci cakali kutukatazya akaambo kakuti tiitwakajisi magesi. Katutanatalika kwiiya, twakali kulivwumba masaka kumaulu kutegwa tutalumwi mansenya.

Nikwakainda myezi iili cisambomwe, mebo, bazyali bangu, musyoonto wangu musimbi amusankwa twakabbapatizyigwa. Twakatalika kuunka kuŋanda aŋanda kuya bukambaukila bamwi nzyotwakaiya. Twakali kweenda amaulu kwamawoola obilo kuya kuswaangana akakamu ka Bakamboni ba Jehova mudolopo lya Carrillo. Zimwi ziindi twakali kutanta mabbiza. Anatolio wakazumanana kutuyiisya Bbaibbele. Kumane buzuba bumwi twakaba amuswaangano aŋanda yesu. Bantu bakajanika kumuswaangano ooyo bakali lusele. Mukuya kwaciindi, boonse aaba bakazyi kubbapatizyigwa. Kakamu aaka kakakomena limwi yakaba mbungano yabantu basika ku 20.

Kubeleka Mulimo wa Leza Waciindi Coonse

Mukuya kwaciindi, bakuofesi yamutabi ya Bakamboni ba Jehova ku Costa Rica bakaambilizya kuti kuyandika bantu bakonzya kutola lubazu mumulimo wakukambauka waciindi coonse. Mu 1957, ndakatalika mulimo waciindi coonse. Ooyu mulimo wakali kukkomanisya kapati. Ziindi zinji ndakali kweenda mawoola manji kutegwa ndikakambaukile bantu muminzi. Bantu bamwi tiibakali kunditambula kabotu. Ndilayeeya ziindi zyotatwe basankwa bamwi bakatiindijaye apanga, bakali kuyanda kuzyiba ncindakali kucita.

Kuma 1950, kwakanyina nzila zibotu aboobo cakali kutukatazya kubasikila bantu. Aboobo, kutegwa tusike kumasena amwi twakali kutanta mabbiza. Twakali kuzabuka milonga alimwi zimwi ziindi twakali koona buyo anze. Mansenya akali kutuluma. Kunze lyaboobo, tiitwakali kuliiba pe akaambo kakuti kubusena oobu kwakali nzoka abaciwena. Nokuba boobo, ndakaba acoolwe cakugwasya bantu kwiiya makani aamba zya Jehova Leza. Alimwi ndajoka kuŋanda ndakali kukkomana kapati akaambo kakuti ndakali kuyiisya bantu kasimpe kamu Bbaibbele. Ikukambauka akubala Bbaibbele abuzuba kwakali kupa kuti ndimuyande kapati Jehova Leza.

Nikwakainda ciindi cili mbocibede ndakasalwa kuba mulangizi weendeenda alimwi ndakabeleka mulimo ooyu kwamyaka yiinda kukkumi. Ndakali kuswaya akuyumya-yumya mbungano yomwe amvwiki. Nokuba kuti ndakazyi kucileka kubeleka mulimo ooyo akaambo kakuciswa, ndakazumanana kubelekela Leza mumulimo waciindi coonse.

Mapenzi Mbwaakatalika

Nindakali ku Nicoya mu 1971, ndakaunka kumunzi kuya kubona bamukowa. Nindakasika kumunzi ndakajana bamaama ibakajisi myaka iili 80 kabalede acibuye. Muntu umwi wakabadubula akubayasaula pesi bakacili kuyoya. Nikwakainda ciindi cili mbocibede bakafwida mumaanza aangu. Muncikini ndakajana mubelesi iwakajisi da lyamyezi iili lusele kafwide. Alimwi ndakajana mucizyi ngotwakali kuswaangana limwi kafwide mukoce amwana wamubelesi kafwide mucisambilo. Bakajaigwa kwiinda mukudubulwa akuyasaulwa. Ino nguni wakabajaya alimwi nkaambo nzi?

Nindakazwa anze, ndakajana bataata babadubula kumutwe pesi bakacili kulanga! Ndakabalikila kuŋanda yamusyoonto wangu musankwa, ikweendwa maminiti aali 15, nindakasika ndakaambilwa kuti mukaintu umwi amwanaakwe musankwa bajaigwa. Ndakanyongana kapati nindakazyiba kuti iwakabajaya bantu aaba mujwa wangu uugaukide iwakali amyaka iili 17 alimwi uutali Kamboni. Nindakasika tiindakamujana, wakatija. Bamapulisa bakali kumuyandaula mucisi coonse ca Costa Rica.

Aaya akaba makani mapati mulisikapepele. Nikwakainda mazuba aali ciloba, bamapulisa bakamujana kajisi panga antobolo. Muntu umwi wakamusambala ntobolo eeyi nokuba kuti wakalizyi kuti uligaukide. Bamapulisa bakaile kumudubula nobakamujana aboobo wakafwa mpoonya aawo.

Nobakali kumuyandaula, ibanji bakali kundaambila kuti nditije. Bakali kuyoowa kuti inga wajokela akundijaya. Imakani aaya ndakaapailila akaambo kakuti ndakali kuyanda kukkala abamukowa bakaceede abakwesu abacizyi bamumbungano. Aboobo, tiindakatija pe.

Mapenzi Akatobelana

Mukubula coolwe, Bataata bakafwa nikwakainda buyo mwaka omwe. Imwaka wakatobela, muce wangu, imubelesi uusyomeka wa Jehova Leza wakajaigwa abantu bambi. Mukwasyi woonse wakanyongana akaambo kalufwu oolu. Cakatuyumya mate. Mumapenzi aaya oonse, ndakali kumusyoma Jehova akumulomba kuti andiyumye.

Mu 1985, kwamazuba otatwe ndakali kucikolo cabaalu Banakristo mudolopo mpati litegwa San José. Icikolo eeci cakapa kuti ndiyume kumuuya. Ibuzuba bwakatobela mu Muvwulo cifwumofwumo, ndakaunka kwaakukkwela bbaasi liya kumunzi. Nindakali kuya kucitisyini, babbi bakandisina akundibbida. Eeci cakacitika mukulaba kwaliso cakuti tiindakabazyiba. Alimwi cakapa kuti kanditaambauli mbobaambaula bantu bakokuno ku Costa Rica. Kuno kucooko ca Guanacaste, basankwa balaakwaambaula ajwi lyaatala bayaana naa nobayanda kuzyibya bantu kuti basika. Kaindi ndakali kwaambaula ajwi lyaatala, pele kuzwa nibakandisina cilandaalila kucita oobo.

Mu 1979 twakakwatana a Celia, Kamboni wamumbungano yakali afwaafwi ankotuzwa. Celia wakali kuliyanda Bbaibbele. Abuzuba twakali kubala akwiiya Bbaibbele. Mukubula coolwe, wakafwa akansa mu July 2001. Zimwi ziindi ndilaakulendelelwa, pele icindiyumya-yumya mbulangizi bwabubuke.—Johane 5:28, 29.

Ndilikkomene Nokuba Kuti Ndainda Mumapenzi

Nokuba kuti mapenzi aandisikila manji kwiinda aabasikila bantu bamwi, eeci cindipa kuti kandisyomeka kuli Jehova. (Jakobo 1:13) Kutegwa nditatyompwi akaambo kamapenzi aaya, ndilaakuyeeya majwi aakuti toonse ‘tulasikilwa ziindi zyalufwu azyamapenzi.’ (Mukambausi 9:11) Alimwi ndilizyi kuti ‘mazuba aano aamamanino alakatazya’ nkaambo bantu mbakali, tabasayi alimwi tabalilesyi. (2 Timoteo 3:1-5) Kunze lyaboobo, ndilaakuyeeya cikozyanyo ca Jobu. Nokuba kuti wakapenga kapati—wakafwidwa bana, wakasweekelwa lubono alimwi wakali kuciswa—Jobu wakaamba kuti: “Kalumbwa Jehova.” Aboobo, Jehova wakamuleleka akaambo kakusyomeka kwakwe. (Jobu 1:13-22; 42:12-15) Twaambo ootu twamu Bbaibbele tulaakupa kuti kandikkomana nokuba kuti ndainda mumapenzi manji.

Jehova nguwandigwasya kuti kandimusyoma lyoonse. Ikubala Bbaibbele abuzuba kupa kuti kandiliyumya mumapenzi. Nindipaila kuli Jehova ndilaakuba ‘aluumuno lwa Leza lwiinda miyeeyo yoonse yabantu.’ (Ba-Filipi 4:6, 7) Eeci ncecindikkazyika moyo. Kunze lyaboobo, ikujanika akutola lubazu mumiswaangano ya Banakristo kupa kuti lusyomo lwangu luyume.—Ba-Hebrayo 10:24, 25.

Nokuba kuti lino ndacembaala, ndilamulumba Jehova akaambo kakuti ndicili anguzu zyakubeleka a Banakristoma, kuyiisya bamwi Bbaibbele akutola lubazu mumulimo wakukambauka. Ikucita zyintu eezyi kulandigwasya kutegwa nditatyompwi. Ndilamulumba kapati Jehova nokuba kuti ndainda mumapenzi manji.a

Bupanduluzi buyungizidwe

Majwi aakwelelezya sikubala aali apeeji 18]

Ikubala Bbaibbele abuzuba kupa kuti kandiliyumya mumapenzi

[Cifwanikiso icili apeeji 17]

Ciindi cakusaanguna nindakapa makani aa Bbaibbele

[Cifwanikiso icili apeeji 18]

Mumulimo wamumuunda nindakacili mukubusi