Mbobakali Kupona Banakristo Bamumwaanda Wamyaka Wakusaanguna
‘Bakutauka Kabotu Mumaanda Aabo’
‘Eno mulweendo lwabo wakanjila mumunzi umwi, mpoonya mpoonya mukaintu uutegwa Marta wakamutambula muŋanda yakwe. Wali kujisi mwanaakwabo uutegwa Mariya, uwali kukala kumatende aa-Mwami akuswiilila makani aakwe. Kwalo Marta wakalikataazya akubambisya cakulya, waboola kulinguwe wati, Omwami, sena tokwe amakani mwanaakwesu mbwaandisia endike mukubamba cakulya? Komwaambila azoondigwasye. Pele Jesu wakamuvuwa kuti, Marta, Marta, walikataazya akuyeeyesya zintu zinjizinji, anukuti iciyandika ncintu comwe, nkaambo Mariya walisalila caabilo cibotu ncatakooyoonyangwa.’—LUKA 10:38-42.
MARTA wakali mukaintu munkutwe. Cakutadooneka, bamwi bakali kumulemeka. Kweelana azilengwa zyaba Juda bamumwaanda wamyaka wakusaanguna, kutegwa mukaintu alemekwe, wakeelede kuba munkutwe kubeleka milimo yaaŋanda akubabikkila maano bamukwasyi wakwe.
Bamakaintu Banakristo bamumwaanda wamyaka wakusaanguna abalo bakali kukulwaizyigwa “kukutauka kabotu mumaanda aabo.” (Tito 2:5) Pele bakalijisi coolwe amukuli wakuyiisya bamwi kujatikizya lusyomo lwabo lwa Bunakristo. (Matayo 28:19, 20; Incito 2:18) Ino ‘milimo minji’ iili buti mukaintu muna Juda wamumwaanda wamyaka wakusaanguna njaakali kubeleka? Alimwi ino ncinzi ncotukonzya kwiiya kumajwi Jesu ngaakaambila Mariya?
‘Kukutauka Milimo Minji’ Mukaintu muna Juda wakali kufwuma kubuka, izuba kalitana pola. (Tusimpi 31:15) Amana kubajikila ceele naa kalimba bula bamukwasyi wakwe, wakali kubasindikila bana bakwe basankwa kucikolo cakucikombelo. Bana basimbi bakali kucaala aŋanda kutegwa bayiye milimo iikonzya kubagwasya kuba bakaintu babotu.
Banyina abana basimbi bakali kufwuma akutalika kubeleka milimo yaaŋanda mbuli kubikka mafwuta mumalampi (1), kupyaanga (2) akukama mpongo (3). Bamana kucita boobo, bakali kupanga zinkwa. Bana basimbi bakali kusaanguna kukwaapula wiiti kutegwa bagusye tombe (4), bamana kucita boobo bakali kuuziiya (5). Banyina bakali kubweza busu oobu bwakubambya cinkwa akubusanganya ameenda acimena. Bakali kukanda (6) akucibikka kutegwa cifwute kumwi kababeleka milimo iimwi. Balo bana basimbi bakali kubamba mukupa wampongo kuba cciizi (7).
Lyatanta-tanta, banyina abana basimbi bakali kuunka kumusika. Basika okuya bakali kuula zyintu ziyandika kumwi kabamvwa bantu bakazyanya akaambo kakudula kwazyintu, kulila kwabanyama alimwi azyintu zinunkila (8). Kweelede kuti akati kazyintu zimwi nzyobakali kuula, kwakali cisyu mani answi ziyumu. Ikuti naa Mbanakristo, bakali kubelesya ciindi ciya kwaambaula zyalusyomo lwabo kubantu bakali kumusika.—Incito 17:17.
Banyina bankutwe bakali kugwasya bana babo kwiiya njiisyo zyamu Magwalo nobakali kuunka kumusika anobakali kujoka. (Deuteronomo 6:6, 7) Alimwi kweelede kuti bakali kubandika abana babo basimbi zyintu zikonzya kubagwasya kutegwa bacizyibe kuula zyintu.—Tusimpi 31:14, 18.
Aumwi mulimo ngobakali kucita bamakaintu waali wakuunka kumugoti (9). Basika kumugoti, bakali kuteka meenda akubandika abamakaintu bamwi. Bajoka kumeenda, banyina abana babo basimbi bakali kupanga zinkwa. Kusaanguna, bakali kubumba mukonde ngobakanda, bamane batupapalisya akutubikka mucitofwu (10) cakali aanze. Bakali kubandika kumwi kabalindilila zinkwa zyakali citofwu izyakali kununkila kapati.
Mpoonya bakali kuunka kumulonga kwaakuwasya (11). Bamakaintu bakali kusaanguna kuwasya zisani zyabo ansipa yakali kwiitwa kuti lye yakali kupangwa atwe lyacisamu cimwi. Bamana bakali kuzisukuluzya akuzikanya, mpoonya bakali kuziyanika azisamu aamabwe.
Bazileta zisani kuŋanda, banyina abana babo basimbi bakali kuzibweza kutegwa bazisume zisani (12) ziyaukide kabatana kuzibikka mozikkala. Mpoonya, bakali kuyiisya bana basimbi kusuma akuluka zyintu (13). Kakutanainda aciindi cilamfwu, bamakaintu bakali kujika cakulya camangolezya (14). Bakalicizyi kusamausya beenzu, aboobo banamukwasyi bakali libambilide kulya antoomwe abeenzu bali boonse, zinkwa acisyu mani acciizi answi alimwi akunywa maanzi aatontola.
Kumazuba, bana nobakali kulibambila kuya kwaakoona, bakali kubananika mafwuta kuzilonda zyakali mumagodo kutegwa zipone. Bamana kucita boobo, bakali kuyasya lampi kutegwa bazyali bababalile Lugwalo bana babo akupaila. Boonse baumunizya muŋanda, balumi lino bakali kubaambila bakaintu babo majwi aazyibidwe aakuti: “Ngwani uukonzya kujana mwanakazi mubotu? Ulayandika loko kwiinda mabwe aarubi.”—Tusimpi 31:10.
Kusala “Caabilo Cibotu” Cakutadooneka, bamakaintu bankutwe bamumwaanda wamyaka wakusaanguna bakalijisi ‘milimo minji’ yakucita. (Luka 10:40) Mbubwenya buyo, bamakaintu bamazuba aano, ikapati bamatumbu bajisi milimo minji. Zyintu zipangwa mazuba aano zyapa kuti milimo imwi yaaŋanda yuube-ube. Pele bamatumbu banji muciindi cakubeleka buyo aŋanda, bakanjila mulimo kumbi akaambo kazyintu zyakatazya.
Nokuba kuti bajana mapenzi, bamakaintu Banakristo banji mazuba aano batobela cikozyanyo ca Mariya iwaambwa kumatalikilo kwacibalo eeci. Balazibikkila maano kapati zyintu zyakumuuya. (Matayo 5:3) Balababikkila maano bamukwasyi, kweelana ambobakulwaizyigwa a Magwalo. (Tusimpi 31:11-31) Alimwi balaitobela njiisyo Jesu njaakaambila Marta. Akaambo kakuti wakali kuzyibikkila maano zyintu zyakumuuya, wakamvwa ncaakamwaambila. Bamakaintu Banakristo, tabalekeli milimo yaaŋanda kubamanina ciindi cakwiiya makani aa Leza (15) naa kwaambila bamwi zyalusyomo lwabo. (Matayo 24:14; Ba-Hebrayo 10:24, 25) Aboobo, basala “caabilo cibotu.” (Luka 10:42) Akaambo kakucita oobo, balayandwa a Leza, Kristo abamukwasyi wabo.—Tusimpi 18:22.