Mupailo
6 Sena Inga Wagwasya?
SENA kupaila kulatugwasya? Bbaibbele litondezya kuti mubwini, mipailo yababelesi ba Leza basyomeka ilabagwasya. (Luka 22:40; Jakobo 5:13) Kupaila inga kwatugwasya kapati kumuuya, mumizeezo, alimwi akumubili. Munzila nzi?
Atwaambe kuti mujisi mwana watambula cipego. Sena muyoomuyiisya buyo kuti kulimvwa kulumba kulizulide? Naa muyoomuyiisya kuti katondezya kulumba ooko? Ciindi notwaamba mbotulimvwa, tulayumizyigwa. Sena mbocibede notubandika a Leza? Inzya. Amulange-lange zikozyanyo zimwi.
Mipailo yakulumba. Ciindi notulumba Taateesu kujatikizya zyintu zibotu nzyotujana, tulabikkila maano kuzilongezyo zyesu. Eeci inga catupa kuti tulimvwe kukkomana akulumba kapati alimwi akuzilanga kabotu zyintu.—Bafilipi 4:6.
Cikozyanyo: Jesu wakabalumba Bausyi kujatikizya mbobakali kuswiilila akwiingula mipailo yakwe.—Johane 11:41.
Mipailo yakulomba kulekelelwa. Ciindi notulomba Leza kuti atulekelele, tulaayumya manjezeezya eesu, tuleempwa cakusinizya akuyungizya luzyibo lwesu lwakubona kuti cibi makani mapati. Alimwi tulalemununwa kukulimvwa kuba simulandu.
Cikozyanyo: Davida wakatondezya kweempwa akuusa kwiinda mukupaila. —Intembauzyo 51.
Kupailila busolozi abusongo. Ikulomba Jehova kuti atusololele akutupa busongo mbotuyandika kutegwa tusale kabotu kuyootugwasya kuba bantu balibombya. Tulayeezegwa kujatikizya kulezya kwesu alimwi tulagwasyigwa kuyumya lusyomo lwesu muli Taateesu wakujulu.—Tusimpi 3:5, 6.
Cikozyanyo: Cakulibombya Solomoni wakalomba busolozi abusongo bwakweendelezya cisi ca Israyeli.—1 Bami 3:5-12.
Mipailo ciindi camapenzi. Ikuti twamwaambila Leza zyoonse zili mumoyo wesu notwaba amapenzi, tulakatalusyigwa alimwi tuyoosyoma Jehova muciindi cakulisyoma.—Intembauzyo 62:8.
Cikozyanyo: Mwami Asa wakapaila ciindi naakalangana asinkondo mupati.—2 Makani 14:11.
Kupailila babulide. Mipailo iili boobu itugwasya kulwana muuya wakuliyanda, kuba aluzyalo alimwi alweetelelo.
Cikozyanyo: Jesu wakabapailila basikumutobela.—Johane 17:9-:17.
Mipailo yakutembaula. Ciindi notutembaula Jehova akaambo kamilimo yakwe iigambya alimwi abube bwakwe, tulamulemeka akumulumba kapati. Alimwi mipailo iili boobu inga yatugwasya kuswena kuli Leza Taateesu.
Cikozyanyo: Davida wakatembaula Leza akaambo kazyintu nzyaakalenga.—Intembauzyo 8.
Cilongezyo acimbi ciboola akaambo kakupaila “nduumuno lwa Leza oolo lwiinda kumvwisya koonse.” (Bafilipi 4:7) Ncobeni kujana luumuno munyika iino iizwide mapenzi ncilongezyo cipati. Tulagwasigwa nikuba kumubili. (Tusimpi 14:30) Pele sena kulongezegwa ooku kuboola akaambo kanguzu zyesu? Naa sena kuli acimbi cipati cijatikizyidwe?
[Majwi aakwelelezya sikubala aali apeeji 10]
Mupailo ulapa mpindu zinji —kumubili, mumizeezo alimwi kwiinda zyoonse, kumuuya