Mupailo

7 Sena Leza Ulaiswiilila Akuyiingula Mipailo?

IMUBUZYO uuli atala awa ulakkomanisya alimwi upa kuyanda kuzyiba kapati. Ibbaibbele litondezya kuti Jehova ulaiswiilila mipailo mazubaano. Kutegwa aiswiilile naa pe, ciyeeme kapati alindiswe.

Naakali anyika Jesu wakasinsa basololi bazikombelo ibakali kupaila cakuupaupa ameso, bakali kuyanda buyo kubonwa abanamaleya kuti baliluleme. Wakaamba kuti baalumi bali boobo “balijene kale bulumbu bwabo,” caamba kuti bakali kuyootambula buyo ncobayanda kapati, kubonwa abantu, kutali ncobakali kuyandika, kuswiililwa a Leza. (Matayo 6:5) Amazubaano, ibanji balapaila kweelana akuyanda kwabo kutali kwa Leza. Akaambo kakutatobela njiisyo zyamu Bbaibbele nzyotwabandika, Leza tabaswiilili.

Ino mbuti nywebo? Sena Leza inga waiswiilila akuyiingula mipailo yanu? Ibwiinguzi tabuyeeme amusyobo wanu, cisi nkomuzwa, naa mulimo ngomubeleka. Bbaibbele litusyomezya kuti: “Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.” (Milimo ya Batumwa 10:34, 35) Sena majwi aayo aamba ndinywe? Kuti kamumuyoowa Leza, mulamulemeka kapati, akutacita zimucima. Kuti kamucita bululami muyandaula kucita caamba Leza kuti cililuzi kutali kutobela ncomuyanda nobeni naa bantunyoko. Sena mulayandisya kuti Leza kaswiilila mipailo yanu? Bbaibbele lilamutondezya mbomukonzya kupaila mipailo njaswiilila Leza.a

Mubwini, banji bayanda kuti Leza kaingula mipailo yabo camaleele. Noliba lyansiku, talili lyoonse Leza naakali kucita maleele. Ziindi zimwi kwakali kwiinda myaanda yamyaka kuti acite maleele aatobela. Kuyungizya waawo, Bbaibbele litondezya kuti ciindi camaleele cakamana nobakamana baapostolo. (1 Bakolinto 13:8-10) Sena eeci caamba kuti Leza tainguli mipailo mazubaano? Peepe! Amulange-lange mipailo imwi njaingula.

Leza ulapa busongo. Busongo bwini-bwini Buzwa kuli Jehova. Mwaabi, ulabupa kuli baabo bayanda kusololelwa anguwe akupona kweelana abusongo oobo.—Jakobo 1:5.

Leza ulapa muuya wakwe uusalala ampindu nzyoujisi. Muuya usalala ninguzu Leza zyabelesya. Taakwe nguzu ziinda zyeezi. Inga zyatugwasya kuliyumya mumasunko, kuba aluumuno notukatazyidwe alimwi akuba abube abumbi bubotu. (Bagalatiya 5:22, 23) Jesu wakasyomezya basikumutobela bakwe kuti Leza ulapa cipego eeci.—Luka 11:13.

Leza ulabapa luzyibo bamuyandaula amoyo woonse. (Milimo ya Batumwa 17:26, 27) Nyika yoonse kuli bantu bayanda kuzyiba kasimpe. Bayanda kuzyiba Leza—zyina lyakwe, makanze ngajisi kujatikizya nyika abantu ambobakonzya kuswena kulinguwe. (Jakobo 4:8) Bakamboni ba Jehova balaakujana bantu bali boobo alimwi balakkomana kubandika ambabo twaambo ootu kwiinda mukubelesya Bbaibbele.

Sena nkakaambo ncomwatambwida magazini eeyi? Sena muyanda kumuzyiba Leza? Ambweni eeyi nenzila njaingula mupailo wanu.

[Bupanduluzi buyungizidwe]