Sena Bakamboni ba Jehova Balijisi Bamakaintu Bayiisya?

Inzya, nyika yoonse Bakamboni ba Jehova balijisi mamiliyoni aabamakaintu ibayiisya. Ninkamu mpati yabakambausi bamakani mabotu aa Bwami bwa Leza. Lugwalo lwa Intembauzyo 68:11 lwakasinsima boobu kujatikizya bakambausi aaba: “Jehova walailila; bamakaintu baambilizya makani mabotu ninkamu mpati.”

Nokuba boobo, tamweelede kweezyanisya mulimo wakuyiisya ngobacita bamakaintu Bakamboni ba Jehova akuyiisya nkobacita bamakaintu bamuzikombelo zimbi. Kuli kwiindana kupati kuliko. Ino baindene buti?

Bantu mbobayiisya baliindene. Bamakaintu basololi bamuzikombelo, kwaambisya aabo ibali mu Bunakristo Bwanyika bacita bukambausi bwabo muzikombelo mumwenya alimwi baswiilizi babo mbantu bamucikombelo cabo. Pele bamakaintu Bakamboni ba Jehova, bantu mbobakambaukila mbaabo batali bacikombelo cabo, mbuli banamaleya aabo mbobajana mubukambausi bwabo bwaku ŋanda aŋanda alimwi amumasena aambi.

Inzila iimbi bamakaintu Bakamboni ba Jehova mbobaindene abamakaintu bamuzikombelo zimbi, nzintu nzyobacita mumbungano. Bamakaintu muzikombelo zya Bunakristo Bwanyika alimwi azikombelo zimbi balayiisya alimwi akulailila bantu bamucikombelo cabo imilawo yacikombelo. Nokuba boobo, bamakaintu Bakamboni ba Jehova tabayiisyi mumbungano ikuti bamaalumi babbapatizyidwe kabaliko. Balikke bamaalumi ibasalidwe kuba bamayi mbembabo bacita boobo.​—1 Timoteyo 3:2; Jakobo 3:1.

Bbaibbele litondezya kuti bamaalumi balikke mbobapedwe mulimo wabulangizi mumbungano. Amubone mwaapostolo Paulo ncaakalembela mulangizinyina, Tito: ‘Ndakakusiya mu Krete ikutegwa . . . usale baalu mumunzi amunzi.’ Paulo wakayungizya kuti mwaalumi uuli woonse uusalidwe weelede kuba mwaalumi “uunyina butongo, mulumi wamukaintu omwe.” (Tito 1:​5, 6) Mulugwalo ndwaakalembela mbungano, Paulo wakapa Timoteyo malailile aakuti: “Ikuti naa muntu uyanda kuba mulangizi, uyanda mulimo mubotu. Mulangizi weelede kuba muntu uutakwe kampenda, mulumi uukwete mukaintu omwe, . . . uukonzya kuyiisya kabotu.”​—1 Timoteyo 3:​1, 2.

Nkaambo nzi ncokubikkwa buyo bamaalumi kuti kabasololela mumbungano? Paulo wakaamba kuti: “Tandizumizyi mukaintu kuyiisya, naa kweendelezya mwaalumi, pele weelede kuumuna buyo. Nkaambo Adamu nguwakasaanguna kulengwa, nokuya kutobele Eva.” (1 Timoteyo 2:​12, 13) Aboobo bubambe bwa Leza bwazilenge butondezya makanze aa Leza aakusala baabo beelede kuyiisya alimwi akuba balangizi.

Babelesi ba Jehova batobela cikozyanyo camusololi wabo, Jesu Kristo. Sikwiiya Luka wakalemba boobu kujatikizya mulimo wa Jesu wakukambauka: “Jesu wakeenda muminzi mipati amisyoonto kayaabukambauka akwaambilizya makani mabotu aa Bwami bwa Leza.” Kumbele Jesu wakatuma basikumutobela kucita mulimo nguwenya ooyu: “Bakainda mucilawo coonse munzi amunzi, kabayaabwaambilizya makani mabotu.”​—Luka 8:1; 9:​2-6.

Mazuba aano, babelesi ba Jehova, nkokuti bamaalumi alimwi abamakaintu balacizuzikizya cabusungu Jesu ncaakasinsima kuti: “Makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.”​—Matayo 24:14.