Amukucenjelele Kubelesya Bbaibbele Munzila Yamasalamuzi
‘IJWI lya Leza lili abuumi alimwi lili anguzu.’ (Heb. 4:12) Kwiinda mumajwi aaya mwaapostolo Paulo wakatondezya nguzu nzyolijisi jwi lya Leza izikonzya kunjila mumoyo wamuntu alimwi akucinca buumi bwakwe.
Nokuba boobo, kuzyibona boobo nguzu zyamulumbe wamu Bbaibbele kwakanyonganizyigwa ciindi luleyo nolwakatalika nobakamana kufwa baapostolo. (2 Pe. 2:1-3) Mukuyakwaciindi, basololi bazikombelo bakatalika kwaamba kuti Jwi lya Leza lijisi nguzu zyamasalamuzi. Syaazibwene uutegwa Harry Y. Gamble wakalemba kujatikizya “kubelesya magwalo aa Banakristo munzila yamasalamuzi.” Wakaamba kuti mumwaanda wamyaka watatu, Fwala Wacikombelo uutegwa Origen wakali kwaamba kuti: “Kumvwa buyo mabala aasalala naambwa kulagwasya kubaswiilizi: ikuti mabala kaajisi nguzu mumasalamuzi aakunyika, nkokuti majwi aa Leza aakasimpe aajanwa mumagwalo ayelede kuba anguzu kapati.” Ba John Chrysostom ibakapona kumamanino aamwaanda wamyaka wane bakalemba kuti “diabolosi takonzyi kuunka kuŋanda ikujanika Magwalo aa Makani Mabotu.” Alimwi bakaamba kuti bamwi bakali kusama zibeela zimwi munsingo izyakali kuzwa muzibalo zya Makani Mabotu kutegwa kazibakwabilila. Basyaazibwene ba Gamble bakayungizya akwaamba kuti sikwiiya zyabukombi bwaba Katolika ba Augustine “bakali kucibona kuti cakali cintu cizumizyidwe kubikka zibeela zya Makani Mabotu aa Johane kumitwe ciindi cakoona ikuti muntu waciswa mutwe.” Munzila eeyo, magwalo aamu Bbaibbele akali kubelesyegwa munzila yamasalamuzi. Sena inga mwaamba kuti Bbaibbele lilakonzya kuba citumwa icikonzya kumuletela coolwe naa kumukwabilila kuzyintu zibi?
Nzila iitegwa bibliomancy nenzila iidumide kapati mobatalibelesyi kabotu Bbaibbele. Ino bibliomancy caamba nzi? Caamba kubala kapango kamu Bbaibbele nkomwasaanguna kubona mbomwajulila buyo Bbaibbele akusyoma kuti mulajana lugwasyo ndomuyanda mukapango aako. Mucikozyanyo, basyaazibwene ba Gamble bakaamba kuti, ciindi cimwi ba Augustine nobakamvwa jwi lyamwana wamumunzi kaliti: “Amubweze akubala, amubweze akubala,” ba Augustine balo bakayeeya kuti majwi aayo akali kuzwa kuli Leza kubalailila kuti bajalule Bbaibbele akutalika kubala kapango nkobatiisaangune kubona.
Sena mwakamvwa kale kujatikizya bantu ibakali mubukkale bukatazya ibakapaila kuli Leza akujalula Bbaibbele akutalika kubala kapango nkobakasaanguna kubona akusyoma kuti kalakonzya kubagwasya mupenzi lyabo? Nokuba kuti makanze inga kaali kabotu, oobo tabusi mbobeelede kulangaula busolozi bwamu Magwalo Banakristo.
Jesu wakasyomezya basikwiiya bakwe kuti wakali kuyakubatumina “mugwasyi, nkokuti muuya uusalala.” Wakayungizya kuti: “Ooyo ngwayootuma Taata muzyina lyangu, uyoomuyiisya zyintu zyoonse alimwi akumwiibalusya zyintu zyoonse nzindakamwaambila.” (Joh. 14:26) Mukwiimpana, kweelana aa bibliomancy muntu teelede kuba aluzyibo lwamu Magwalo kutegwa ajane kapango kakonzya kumugwasya.
Cilengwa ca bibliomancy alimwi azilengwa zimbi zyamasalamuzi izitaluzi mobalibelesya Bbaibbele, zilidumide kapati. Pele Jwi lya Leza lilakasya kusonda. (Lev. 19:26; Dt. 18:9-12; Mil. 19:19) Nokuba kuti “jwi lya Leza lili abuumi alimwi lili anguzu,” tweelede kulibelesya kabotu. Luzyibo lwini-lwini lwamu Bbaibbele ndolukonzya kucinca bantu kutali kubelesya bbuku eeli munzila yamasalamuzi. Kujana luzyibo munzila iili boobu kwabagwasya bantu banji kutegwa kabalilemeka, basiye bukkale bubyaabi, bayumye buumi bwamumukwasyi, alimwi kwabagwasya kuyumya cilongwe cabo a Sikwaanza Bbaibbele.