“Ijwi lya-Leza . . . Lili Anguzu”
1 Imwaapostolo Paulo wakalemba kuti: “Ijwi lya-Leza lili abuumi, lili anguzu.” (Heb. 4:12) Ino ncinzi ncaakali kupandulula? Ijwi lya Leza naa mulumbe uujanika mu Bbaibbele ulijisi nguzu zipati zyakucinca bantu. Ibusongo bujanika mu Bbaibbele bulijisi nguzu zyakucinca bukkale bwabantu kubaa buli kabotu. Luumbulizyo alimwi abulangizi mbolipa busololela bantu kuli Sikupa Buumi, Jehova Leza. Mulumbe wandilyo ulakonzya kutalisya babombemyoyo kweenda munzila iisololela kubuumi butamani. Nokuba boobo, kutegwa tubone mpindu eezi, tweelede kulibelesya Bbaibbele notukambaukila bamwi.
2 Amubale Lugwalo Kufwumbwa Nomwajana Ciindi: Kulibonya kuti basikumwaya banji tabavwuli kubelesya Bbaibbele nobaunka mumilyango. Sena mbocibede obo akulindinywe? Akaambo kakuti bantu banji balibonya kuti banyina ciindi cakubaa mubandi mulamfwu, ambweni mwatalika kubaa cilengwa cakumwaya buyo mabbuku naa kwaamba lugwalo mumajwi aanu. Tukulwaizya basikumwaya boonse kusolekesya kubala nokaba kapango komwe buyo kuzwa mu Bbaibbele eelyo nomuli mukumwaya makani mabotu, aboobo mukucita boobo munootondezya muntu kubona kuti mulumbe wesu mubwini ulajanika mu Jwi lya Leza.
3 Nokuba kuti mbasyoonto bantu bajisi cilengwa cakubala Bbaibbele, licilemekwa kapati abantu banji. Nobaba bantu bajisi bubi, kanjikanji balakonzya kwaaba miniti yomwe naa obile kutegwa baswiilile kumulumbe uubalwa kuzwa mu Jwi lya Leza lini. Eelyo lugwalo lweelede nolwabalwa cakusangalizya alimwi akupandululwa mubufwaafwi, inguzu zyajwi lya Jehova zilakonzya kumugwasya muntu uuswiilila. Pele mbuti mbomukonzya kukamantanya kaambo kakumatalikilo akukubala kapango kuzwa mu Bbaibbele?
4 Amwiisole Nzila eyi Mumulimo Wamamagazini: Imulangizi umwi weendeenda ulaabelesya kabotu Magwalo eelyo natola lubazu mumulimo wamamagazini. Weendaa ka Bbaibbele kasyoonto munkomo. Amana buyo kutondezya mamagazini alimwi akukanana mubufwaafwi acibalo cimwi, ujalula Bbaibbele kakunyina akuwayawaya akubala kapango keendelanaa cibalo eeco. Eeci cilakonzya kucitwa kwiinda mukwiile kubuzya kuti, “Ino muyeeya buti kujatikizya cisyomezyo eci cikulwaizya?” mpoonya akuzumanana kubala lugwalo ndomwasala.
5 Ayibe mbaakani yanu kubala kapango komwe naa tobile kuzwa mu Bbaibbele kumuntu umwi aumwi uumuswiilila. Inguzu zyandilyo izikulwaizya zilakonzya kujula nzila kubantu banji kuti bakwelelwe kuli Leza.—Joh. 6:44.