Amube Bantu Bakombelezya Ciindi Nomuyiisya
1. Ino kulibelesya kabotu Jwi lya Leza ciindi notukambauka kanji-kanji kubikkilizya nzi?
1 Bakambausi bacibwene, mbuli mwaapostolo Paulo, balizyi kuti ‘mukupandulula makani aalusinizyo mbukweelede’ kuli zyintu zinji zibikkilizidwe kutali buyo kuzubulula Magwalo Aasalala. (2 Tim. 2:15) Mukuyiisya kwesu, ino mbuti mbotukonzya kuba bantu “bakombelezya” notubelesya Jwi lya Leza?—Inc. 28:23.
2. Ino mbuti mbotukonzya kugwasya bantu kuti kabalilemeka Jwi lya Leza?
2 Amubatondezye Ncolyaamba Jwi lya Leza Baswiilizi Benu: Cakusaanguna, amubatondezye ncolyaamba Bbaibbele alimwi amucite oobo munzila iikonzya kubapa kulilemeka akuzyiba kuti lijisi busongo buzwa kuli Leza. Ikuti twatondezya kuti tulalisyoma Jwi lya Leza, baswiilizi besu balakonzya kukulwaizigwa kubikkila maano ciindi notubala lugwalo. (Heb. 4:12) Mulakonzya kwaamba kuti: “Ndibona kuti cilagwasya kapati kuzyiba Leza mbwayeeya kujatikizya kaambo aaka. Amubone ncolyaamba Jwi lyakwe.” Lyoonse, nocikonzyeka kucita boobo, amubatondezye ncolyaamba Jwi lya Leza kwiinda mukubala Bbaibbele kuligama.
3. Mwamana kubala lugwalo, ino ncinzi ncomukonzya kucita kutegwa mugwasye baswiilizi benu kumvwisya ncolwaamba?
3 Cabili, amulupandulule lugwalo ndomwabala. Bantu banji balakatazyigwa kumvwisya ncolwaamba lugwalo nobalubala ciindi cakusaanguna. Kanji-kanji inga kuyandika bupanduluzi kutegwa bazyibe mbolweendelana akaambo kabandikwa. (Lk. 24:26, 27) Amubatondezye majwi aali mulugwalo aasalazya kaambo kali mukubandikwa. Mulakonzya kubuzya mubuzyo kutegwa muzyibe naa baswiilizi benu balumvwisya lugwalo.—Tus. 20:5; Inc. 8:30.
4. Mukuyiisya kwesu, ino ninzila nzi yamamanino iiyandika kutegwa tube bantu bakombelezya?
4 Kamubelesya Magwalo: Catatu, amubasike amoyo baswiilizi. Amubatondezye bamukamwini ŋanda lugwalo mbolukonzya kubagwasya lwabo kubagama. Kubelesya Magwalo notuyiisya kulakonzya kubapa kucinca mbobayeeya. (Inc. 17:2-4; 19:8) Mucikozyanyo, twamana kubala Intembauzyo 83:18 tulakonzya kwaamba mbociyandika kuzyiba zyina lyamuntu ciindi notuyanda kuba acilongwe anguwe. Mwamana mulakonzya kubuzya kuti, “Sena muyeeya kuti kuzyiba zyina lya Leza kuyakupa kuti kamupaila mipailo iimvwika?” Kwiinda mukumutondezya mbuli lugwalo mbolukonzya kubeleka mubuumi bwakwe walo kumugama, mukamwini ŋanda ulakonzya kubona mbolugwasya. Ikuyiisya cakukombelezya akubelesya Jwi lya Leza munzila eeyi kulakonzya kugwasya babombe moyo kukomba Jehova, Leza wakasimpe alimwi muumi.—Jer. 10:10.