Mbotukonzya Kukombelezya Bamwi
1 Imwaapostolo Paulo wakalaampuwo yakuba mubelesi uukombelezya. (Inc. 19:26) Mane Mwami Agripa wakamwaambila kuti: “Kukucikombelezya kuniini ulandisandula kuba mu-Kristo.” (Inc. 26:28) Ncinzi cakapa kuti Paulo abe muntu uukombelezya mumulimo wakwe? Wakakanana zyamu Magwalo munzila izula, kabikkilide maanu kuli basikumuswiilila mumibandi yakwe.—Inc. 28:23.
2 Mukwiiya cikozyanyo ca Paulo, andiswe tuyandika kuba bantu bakombelezya mumulimo wesu. Munzila nzi? Nkwiinda mukubelesya luzibo eelyo notubandika alimwi anotuswiilila bamwi. (Tus. 16:23) Inzila zyotatwe ziyandika kapati ziyootugwasya kucita boobu.
3 Amuswiililisye: Amumuswiilile muntu ooyo ngomubandika limwi nabandika kutegwa mujane kaambo kamwi mpomulaatalikile kubandika. Ikuti naa watalika kukazya, amusole kubona kaambo ncaali mukumukazya. Ciyoomugwasya kuziba ncasyoma muntu ooyo, ncasyomena boobo alimwi acakamusinizya kutegwa abe alusyomo luli boobo. (Tus. 28:13) Amumubuzye mibuzyo cabusongo.
4 Amubuzye Mibuzyo: Ikuti naa muntu kasyoma muli Leza wa Butatu, inga mwamubuzya kuti: “Sena mwali kusyoma muli Leza wa Butatu kuzwa kaindi?” Amwiindilizye amubuzyo wakuti: “Sena kuli nomwakaliyiide Bbaibbele cakusitikila akubona ncolyaamba kujatikizya makani aaya?” Alimwi mulakonzya kubuzya kuti: “Ikuti naa Leza kali cibeela ca Butatu, sena inga tatulangili Bbaibbele kuti lilakonzya kwaamba cakusalazya kujatikizya makani aaya?” Ibwiinguzi kumibuzyo eeyi buyoomugwasya kubona twaambo ntomukonzya kubelesya mukugwasya muntu ooyo kuteelela icaamba Magwalo kujatikizya makani aaya.
5 Amubelesye Twaambo Tumvwika: Umwi Kamboni wakabuzya mwanakazi umwi wakali kusyoma kuti Jesu ngu Leza, wakati: ‘Ikuti naa kamuyanda kupandulula kuti bantu bobile baleelene, ino nkuswaangana kuli buti kwamumukwasyi nkomukonzya kubelesya?’ Mwanakazi wakavwiila kuti: “Inga ndabelesya banabunyina.” Kamboni ooyo wakayungizya kuti: “Ambweni kubelesya nobaba bana bamaanga. Pele Jesu nakatuyiisya kuti Leza ngu Taata alimwi walo kuti Mwana, ino ncinzi ncaakali kusola kwaamba?” Mwanakazi ooyo wakaamvwisya makani aakuti umwi mmupati kwiinda umwi alimwi ulijisi nguzu. (Mt. 20:23; Joh. 14:28; 20:17) Muntu ooyu wakazulwaa kukombelezya.
6 Nokuba kuti tulakonzya kwaambaula munzila ili kabotu alimwi iiluzi, tabali boonse ibakatambula kasimpe pe. Pele mbubwenya mbuli Paulo, atusungwaale mukuyandaula baabo babombe myoyo mucilawo cesu, akubakombelezya kuti bautambule mulumbe wa Bwami.—Inc 19:8.