Sena Mulalikwabilila Ijwi lya Leza?
1 Munyika bantu kanji-kanji mobatalisyomi Ibbaibbele, Banakristo bakasimpe balalikwabilila Ijwi lya Leza cabusungu. Katusinizyide kuti “Magwalo aya oonse akazwa kuli-Leza,” tuleendelana a Jesu Kristo walo wakaamba boobu mumupailo kuli Jehova: “Ijwi lyako mbobwini.” (2 Tim. 3:16; Joh. 17:17) Ino mbuti mbotunga twalikwabilila munzila iili kabotu Ijwi lya Leza?
2 Amwaaiye Magwalo: Kakunyina akudooneka, Jesu wakaliiya Ijwi lya Leza cabusungu. Eeci cakamupa kuti kayiisya kwiinda mukubelesya Magwalo mumulimo wakwe woonse. (Lk. 4:16-21; 24:44-46) Ino mbuti mbotukonzya kunooyeeya magwalo manji? Tulacita oobu kwiinda mukubala Bbaibbele abuzuba eelyo mpoonya akuzinzibala kuyeeya akapango nkotwabona kuti kalakulwaizya naa kugwasya mumulimo. Ciindi notulibambila miswaangano, tweelede kubala magwalo aabikkidwe kuzwa mu Bbaibbele alimwi ambweni akulibambila kaambo kali mumagwalo aayo. Notuli kumiswaangano, tweelede kutobelezya mu Bbaibbele lyesu ciindi mwaambi nabala magwalo. Ikwiiya zibalo zyamu Bbaibbele kuyootugwasya kuciziba ‘kupandulula makani aalusinizyo mbukweelede.’—2 Tim. 2:15.
3 Atubelesye Bbaibbele: Notuli mumulimo wakukambauka, tweelede kubelesya Bbaibbele. Mucikozyanyo, ikuti bukkale kabuzumizya, tweelede kusola kubala lugwalo alimwi akulubandika auli aŋanda. Ikuti naa wabuzya mubuzyo naa watalika kukazya, inga cainda kubota kubelesya Bbaibbele mukwiingula. Ciindi uuli aŋanda najisi bubi, tulakonzya kumutondezya kaambo kamu Bbaibbele kwiinda mukwaamba kuti, “Kanditanaunka, amuleke ndimubalile lugwalo lomwe buyo oolu.” Ikuti kacikonzyeka, amubale cacigaminina kuzwa mu Bbaibbele akuzumizya uumuswiilila kuti amutobelezye nomubala.
4 Ciindi uuli aŋanda umwi naakatondezyegwa magwalo aakazya Butatu, wakaamba boobu, “Ndali kuunka kucikombelo lyoonse mubuumi bwangu alimwi tiindalizi naaceya kuti Ibbaibbele mbolyaamba oobu!” Wakazumina kuba aciiyo ca Bbaibbele. Jesu wakaamba kuti mbelele zyakwe ziyoolimvwa ijwi lyakwe. (Joh. 10:16, 27) Nzila mbotu mbobakonzya kukaziba kasimpe bantu babombe myoyo nkulibonena buya balikke kuzwa mu Magwalo. Aboobo, atube basikukwabilila Ijwi lya Leza lyakasimpe!