Amulibelesye Kabotu Bbaibbele
1. Ino ncinzi ncomunga mwacita nomulibambila kuya mumuunda?
1 Kunyina makani naa tuyanda kubelesya bbuku lili mumulimo, cilagwasya kusala lugwalo lupa kukkala ansi kuyeeya lwakubala abaabo bakonzya kuswiilila. (Heb. 4:12) Ikusala lugwalo lujanika mubbuku limwaigwa cilagwasya nkaambo inga cilauba-uba kubandika zili mubbuku. Mumasena amwi, basikumwaya bacibona kuti cilagwasya kunyamuna Bbaibbele mumaanza nobasikila muntu naa nobali mumulimo wakuŋanda aŋanda.
2. (a) Ino mbuti mbotunga twatalika mubandi wesu alugwalo? (b) Mmakani nzi aamu Magwalo ngobakkomanina bantu mucilawo canu?
2 Amutalike Alugwalo: Basikumwaya bamwi batalika mubandi wabo kwiinda mukubuzya beniŋanda mubuzyo muuba-uba wakuzyiba mbobayeeya uujatikizya lugwalo lwamu Bbaibbele ndobayanda kubala. Cakufwambaana eeci cipa kubikkila maano kuli ceeco cili mu Jwi lya Leza. Sena intalisyo zimwi akati kazyeezyi inga zyabeleka mucilawo canu?
◼ “Nimwali kujisi nguzu, sena inga mwakucita kucinca ooku?” Amubale Ciyubunuzyo 21:4.
◼ “Nkaambo nzi mazuba aano ngotupona ncaakatazya?” Amubale 2 Timoteo 3:1-5.
◼ “Sena muyeeya kuti nobwali bubotu kukkala busena bwesu oobu ikuti bantu boonse nobali kutobela malailile aaya?” Amubale Matayo 7:12.
◼ “Sena muyeeya kuti bana banu baya kujanika mububotu bwaambwa waawa?” Amubale Intembauzyo 37:10, 11.
◼ “Sena muyeeya kuti kuli buzuba imajwi aaya naaya kuzuzikizyigwa?” Amubale Isaya 33:24.
◼ “Sena mulikuzi kucinca kwamfwulumende kwaambwa waawa?” Amubale Daniele 2:44.
◼ “Sena kuli nomuyanda kubuzya Leza mubuzyo ooyu zimwi ziindi?” Amubale Jobu 21:7.
◼ “Sena cilakonzyeka kubabona alimwi bayandwa besu bafwide?” Amubale Johane 5:28, 29.
◼ “Sena bafwide balizizyi nzyobacita baumi?” Amubale Mukambausi 9:5.
3. Ino inga twabagwasya buti bantu kumvwisya magwalo aamu Bbaibbele ngotubala?
3 Amupandulule, Amupe Cikozyanyo, Amubelesye: Imuntu nayanda kuti mubandike, mutaubindaanini mubandi pe. Amutole ciindi kupandulula, kupa cikozyanyo alimwi akubelesya lugwalo ndomwabala kutegwa muntu alumvwisye. (Neh. 8:8) Ibantu nobaswiilila akuzumina ncoliyiisya Jwi lya Leza, kulaba kucinca kugambya mubuumi bwabo.—1 Tes. 2:13.
4. Mbuti mbotunga twalibelesya kabotu Bbaibbele munyendo zyakupilukila?
4 Amuzumanane kulibelesya kabotu Ibbaibbele nomubapa kuzumanana kuba aluyandisisyo bantu. Inga mwabelesya nzila njeena eeyi anomucita nyendo zyakupilukila: (1) Amusale lugwalo lweelede. (2) Amubuzye mubuzyo muuba-uba uupa kwaamba mbwayeeya muntu kujatikizya lugwalo. Mpoonya amulubale. (3) Amulupandulule, amupe cikozyanyo ku lugwalo alimwi amulubelesye. Amusolekesye kuyungizya luzibo lwa Jwi lya Leza ndwajisi muntu lyoonse nomumuswaya. Takukooinda ciindi cilamfwu mulatalika kweendelezya ciiyo ca Bbaibbele!