Sena Mulimo Wanu Mulauzuzikizya Bweelede?
1 Mubbuku lya Incito twaambilwa kuti, basikwiiya ba Jesu bakauzuzikizya mulimo wabo wakukambaukila bantu kwiinda ‘mukubalungulwida.’ (Inc. 2:40; 8:25; 28:23) Aayo ngaakali makanze amwaapostolo Paulo. (Inc. 20:24) Sena aayo taali ngamakanze aanu mbomuli babelesi bamakani mabotu? Ino mbuti mbomukonzya kucizuzikizya eeci?
2 Kamulibambila Nzila Zyanu Zyamumulimo: Ikutegwa mucikonzye kupa bumboni bubotu mumulimo, kulibambila kulayandika. Eeci ncamasimpe ikapati ciindi notwaabila mamagazini akaambo kakuti makani alacinca-cinca ciindi cili coonse. Ikutegwa tugwasyigwe, ooyu Mulimo Wesu Wabwami uli mukutupa cibeela cipya—cibeela cili kulumwensyi cilijisi nzila zitondezya mbuli mamagazini mapya aa Ngazi Yamulindizi alimwi a Galamukani! mbwaakonzya kumwaigwa. Imutwe wamwaigwaa ciindi ceelede ngobayookkomanina bantu banji, uyookananwa mumagazini iimwi aimwi. Ino mbuti mbomunga mwalibambila nzila eezi zifwaafwi?
3 Amusale kaambo nkomubona kwaamba kuti kalakonzya kubeleka kabotu mucilawo canu. Amubikkile maano ciindi nomubala cibalo ciyoobelesyegwa alimwi amutulangisisye twaambo tugaminina tulangilwa kubusya luyandisyo. Amulange-lange lugwalo luli mumagazini lweendelanaa makani aali mukubandikwa lwalo ndomukonzya kubalila mukamwini ŋanda. Amumanizye kwiinda mukuyungizya kwaamba mubufwaafwi akumuyumya-yumya muswiilizi wanu ikubala magazini alimwi amwaambe majwi masyoonto nokwayandika kuti mukamwini ŋanda ulakonzya kusanga kumulimo wanyika yoonse wa Bakamboni ba Jehova. Mwamaniizya, mulakonzya kwiindulula nzila yanu eeyo.
4 Amulibambile Kubelesya Bbaibbele: Kwiinda mukulibambila kabotu, lugwalo lulakonzya kubikkilizyigwa mumubandi wanu. Mucikozyanyo, basikumwaya balaa luzibo lunji balazwidilila mumasena manji kwiinda mukuunka kuŋanda yamuntu a Bbaibbele mujanza akumwaanzya mukamwini ŋanda alimwi akwaamba kuti:
◼ “Tuli mukubuzya bantu kuti naa balacisyoma eeci . . .” Amubale Matalikilo 1:1, alimwi amubuzye kuti: “Sena mulakazumina kaambo aaka?” Ikuti muntu wazumina, eelyo amwaambe kuti: “Andime mbweena ndilaazumina makani aaya. Nokuba boobo, sena muyeeya kuti, ikuti kali Leza wakalenga zintu zyoonse eezyi nkokuti nguweelede kupegwa mulandu kumakani aabubi buliko?” Mwamana kubuzyiba bwiinguzu bwamuntu ooyo, amubale Mukambausi 7:29. Amuvwunune bbuku lya Luzibo peeji 71 akubala muncali wa 2. Amumuyumye-yumye muntu ooyo kubala bbuku eelo. Ikuti mukamwini ŋanda tazuminizyi kukaambo kali ku Matalikilo 1:1, amumwaambile kuti akalilingaule bbuku lya Creation.
5 Amujokele Kulibaabo Batondezya Luyandisyo: Inga tamukonzyi kuuzuzikizya mulimo wanu ikuti naa kamutabajokeleli aabo batondezya luyandisyo. Ciindi nomulaa mubandi uukondelezya, ambweni momwaabila mamagazini naa bbuku limbi buyo, amumulembe zina lyakwe muntu ooyo alimwi akkeyala yakwe. Cabunkutwe amusoleke kujokela cakufwambaana kumuntu ooyo watondezya luyandisyo. Cakutawayawaya amumwaabile ciiyo ca Bbaibbele.
6 Basikwiiya bamumwaanda wamyaka wakusaanguna bakalizyi kwaamba kuti Jesu wakalibalailide kuti ‘balungulule.’ (Inc. 10:42) Ooko kulailila kulatujatikizya andiswe, nkaambo njenzila yomwe buyo njotukonzya kubelesya mukugwasya bantu kuba basikwiiya. (Mt. 28:19, 20) Atubeleke mbuli mbotukonzya kutegwa tuuzuzikizye mulimo wesu bweelede.—2 Tim. 4:5.