Amwaabile Mamagazini Aapa Bumboni Kukasimpe
1. Ino mamagazini aa Ngazi Yamulindizi a Awake! ajisi mulimo nzi?
1 Ngazi Yamulindizi Yaambilizya Bwami bwa Jehova amagazini yeendela antoomwe ya Awake!, ngamamagazini ngotubelesya kapati mumulimo wakukambauka Bwami akugwasya bantu kuti babe basikwiiya. (Mt. 24:14; 28:19, 20) Tulakkomana lyoonse notwaabila mamagazini obilo aaya aboola aciindi ceelede, notwaabelesya mumbazu ziindene-indene mumulimo wa Bwami.
2. Ino nkucinca kuli buti kwacitwa mu Ngazi Yamulindizi amu Awake!, alimwi nkaambo nzi?
2 Kwamyaka minji twabona kucinca mukulembwa anzila nzyotubelesya kumwaya magazini alimwi akukomena naa kuceya kwamagazini. Ooku kucinca kwakacitwa kutegwa mamagazini eesu kaakulwaizya alimwi kaagwasya kutegwa mulumbe wa Bwami kuubasika amoyo “bantu boonse [kutegwa] bafutulwe akuboola kuluzibo lwakuziba lusinizyo.”—1 Tim. 2:4.
3. Ino mamagazini inga abelesegwa buti mumulimo wamumuunda?
3 Kuzwa mu January 2006, kwali nzila zinji nzitwali kubelesya zyakwaaba magazini yomwe ya Awake! amwezi. Alimwi lino tulazumanana kubelesya nzila ziindene-indene zyakwaaba magazini ya Ngazi Yamulindizi Yaambilizya Bwami bwa Jehova yomwe akati kamamagazini obilo ngotutambula amwezi. Cikozyanyo cambotukonya kwaabila magazini yomwe-yomwe cililembedwe kupeeji yamamanino ya Mulimo Wesu wa Bwami. Zikozyanyo eezi lyoonse zitondezya cibalo comwe akati kazyeezyo zili kumatalikilo mumagazini, pele zimwi ziindi zibalo zimbi zikkomanisya bantu zilaakutondezyegwa. Izitondezyo zilembedwe inga zyabelesyegwa kabotu ikuti naa katucizi kabotu cibalo caambwa alimwi inga cainda kubota kuti twabelesya mabala eesu kutali kubala buya notuli mucilawo motubelekela.
4. Ino cigwasya buti ikubelesya citondezyo cimbi citako mu Mulimo Wesu wa Bwami?
4 Nokuba kuti Mulimo Wesu wa Bwami ujisi buyo nzila zyobilo zyakubelesya kumwaya magazini aimwi, inga mwaanguluka kubelesya nzila iindene. Ikaambo komwe kakonzya kumupa kucita boobo nkakuti zibalo zimwi zilakonzya kubeleka kabotu mucilawo momubede. Ambweni mulakonzya kulimvwa kuti inga mwacaamba kabotu cikonzyanyo kuti naa mwabelesya cibalo camukonda.
5. Ino ncinzi ncomweelede kucita kamutana libambila cikonzyanyo camagazini njomuyanda kubelesya?
5 Mbomukonzya Kulibambila Zyomuya Kwaamba: Cakutaanguna, muyandika kuciziba kabotu cibalo eeco ncimuyanda kubelesya. Talili lyoonse nomukonzya kuzizyiba kabotu zibalo zyoonse zyamumagazini kutegwa mutalike kwiibelesya mumulimo wamumuunda. Nokuba boobo, muyandika kwaamba cabusungu amoyo kaukkede kutondezya kuti mulicizi ncomwaamba kucibalo ncimwasala. Inga mwacita oobo ikuti naa mwakaziba kaambo nkomuyanda kwaamba.
6. Ino mbuti mbotukonzya kulibambila zikonzyanyo citalembedwe?
6 Mulakonzya kucinca-cinca mbomukonzya kutalika mubandi wanu. Mulakonzya kubelesya mubuzyo weendelana acibalo ikutegwa mutalisye mubandi. Coonse ciindi mweelede kusyoma mu Jwi lya Leza kutegwa mumusike amoyo muntu. (Heb. 4:12) Amusale lugwalo lukonzya kweendelana kabotu akaambo nkomwatalika, kuti kacikonzyeka inga mwabelesya lugwalo luli mucibalo naa luzubuludwe mucibalo ncomuyanda kubelesya. Amubone mbomukonzya kweendelanya lugwalo acibalo.
7. Ino mbuti mbotukonzya kusumpuka mukubelesya nzila zyesu?
7 Ciindi Coonse: Nzila yoonse kutegwa ibeleke kabotu yeelede kubelesyegwa. Kamubasangana bakwesu kumbungano mu Mujibelo nobamwaya mamagazini mubukambausi. Kamubaabila mamagazini ibantu aabo bali kutambula mabbuku. Lyoonse kamubapa mamagazini aabo mbomwiiya limwi Bbaibbele abaabo bajanika nomwapilukila. Mulakonzya kubapa mamagazini aabo mbomubandika limwi nomuya kumantoolo, nomuli mulweendo naa nomulindila kuti mubonane adokotela muofesi yakwe. Kamuyabusumpuka nomuya bubelesya nzila zyenu mumwezi oonse.
8. Ino mamagazini aa Ngazi Yamulindizi a Awake! alilibedelede muunzila nzi?
8 Magazini ya Ngazi Yamulindizi a Awake! alilibedelede. Asumpula Jehova kuti ngo Mwami Mupati wabubumbo boonse. (Inc. 4:24) Aumbulizya bantu amakani mabotu aa Bwami bwa Leza akubakulwaizya kuba alusyomo muli Jesu Kristo. (Mt. 24:14; Inc. 10:43) Alalangilila zintu zicitika munyika mboziyabuzuzikizya businsimi bwamu Bbaibbele. (Mt. 25:13) Amubagwasye bali mucilawo cenu kutegwa bagwasigwe amamagazini kwiinda mukubaabila ciindi coonse.
9. Mbuti mbotukonzya kucita kutegwa tukapilukile?
9 Ikuti mwacikonzya kwaabila mamagazini naa kubandika amuntu zintu zyakumuuya, mweelede kulibambila kumusiila mubuzyo naa kaambo kakonzya kupa kuti mukazumanane kubandika mwaakupilukila. Ikuti katuli basungu kusyanga mbuto ya bwini, tulakonzya kuba masimpe kuti Jehova uyakubagwasya aabo bayanda kumuziba akumubelekela.—1 Kor. 3:6.