Mbomukonzya Kubelesya Nzila zya Citondezyo
1. Ino mbuti mbotweelede kuzibona nzila zyacitondezyo nzyotupedwe?
1 Nzila zyacitondezyo zibelesyegwa kwaabila mamagazini eesu amabbuku zilatondezyegwa ciindi aciindi mu Mulimo Wesu wa Bwami. Notutola lubazu mumulimo, tatuyandiki kwiile kuzibala buyo nzila eezyi mbubwenya mbozilembedwe pe. Zibikkilidwe kutupa muzeezo wazintu nzyotukonzya kwaamba. Tunoocita kabotu kuti nzila eezyi zyacitondezyo katuzyaamba mumajwi eesu. Kuti naa twaambaula mbotwaambaula lyoonse, ciyoopa kuti mukamwini ŋanda aanguluke akubona kuti nzyotumwaambila nzyamasimpe alimwi tazidoonekwi.—2 Kor. 2:17; 1 Tes. 1:5.
2. Ino nkaambo nzi ncotuyandika kuzibikkila maano zilengwa zyankotubede ciindi notulibambila nzila zyakubelesya?
2 Amucince Mubandi Wenu Kweelana Abukkale: Mbotwaamba makani mabotu kuli mbokujatikizyidwe azilengwa zicitwa ooko nkotubede. Sena mulakonzya kwaanzyanya amukamwini ŋanda mwamana nomuya mwaambe makani ngimwaunkkila naa sena bantu mucilawo canu bayanda kuti mubaambile makani ngimwaunkkila mbomwasikila buyo? Eeci ciliindene kubusena bumwi abumwi alimwi akumuntu umwi aumwi. Bupampu abwalo bulayandika ciindi notubelesya mibuzyo. Imibuzyo ilimvwisya kuti iili buyo kabotu mumasena amwi ilakonzya kuti kaibajazya nsoni bantu kumwi kubusena. Aboobo cabusongo tweelede kucinca mubandi wesu kweelana ambubazyibona zintu ooko kubusena.
3. Nkaambo nzi ncotweelede kububikka mumizeezo bukkale ambobayeeya aabo mbotukanana limwi?
3 Ikuyungizya ali ceeco, tweelede kububikka mumizeezo bukkale ambubayeeya bantu bali mucilawo cesu ciindi notuli bambila kuya mumulimo wamumuunda. Mucikozyanyo, inga mwayanda kubandika lugwalo lwa Matayo 6:9, 10 kumuntu ulyaabide kapati mucikombelo Cakatolika munzila iimpene kapati ambomukonzya kubandika amuntu umwi uutauzyi kabotu mupailo wa “Mwami.” Kuti twalibambila kabotu, tulakonzya kucinca mubandi wesu munzila iikonzya kubagwasya bantu mbotuswaanganya mumulimo.—1 Kor. 9:20-23.
4. Nkaambo nzi ncokuyandika kulibambila kabotu?
4 Kufwumbwa notuyeeya kuyoobelesya nzila zya citondezyo kweelana ambozilembedwe, ikulibambila kabotu kulayandika kapati. Tweelede kucibala kabotu cibalo eeco ncotukanza kwaamba alimwi tweelede kutulanga twaambo tukonzya kubakkomanisya. Mwamana atutubikkilizye twaambo ootu mumubandi wesu. Kolikke kwaazibila kabotu makani aali mumabbuku eesu nkokukonzya kutugwasya kukabandika kabotu kaambo.
5. Ino nkaambo nzi ncotunga twalibambila nzila iindene, alimwi mbuti mbotukonzya kucita oobo?
5 Inzila Zimwi: Sena tuyandika buyo kubelesya nzila eezyo zilembedwe zyacitondezyo? Peepe. Ikuti naa cilamuubaubila ikubelesya nzila imwi naa ilugwalo lumbi inga mwazibelesya. Ikapati mumagazini, amube aluyandisisyo lwakwaamba zibalo zyamukati zyalo zikonzya kubakkomanisya bali mucilawo canu. Iciindi nzila zibelesyegwa mumulimo wamumuunda nozitondezyegwa ku Muswaangano wa Mulimo, ibubambe bulakonzya kubambwa bwakutondezya nzila iili yoonse iikonzya kubeleka kabotu mucilawo motubede. Munzila iili boobu boonse inga bagwasyigwa kukambauka makani mabotu cabusungu.