Ikuti Kaizwidilila, Amwiibelesye!
1 Mulimo Wesu Wabwami wazumanana kutupa makani aantalisyo aasiyene-siyene kuti twaabelesye mumulimo wamumuunda. Eci citugwasya kubaa nzila zipya zyakukulwaizya bantu kuyanda mulumbe wa Bwami. Ndiza mulasoleka mweezi amweezi ikwiiya ntalisyo yamakani yomwe naa zinji akati kazeezi. Pele, basikumwaya bamwi bajana kuti inga mbobamana buyo kubelesya ntalisyo kwaziindi zili mbozibede, kuletwa zimbi zipya mu Mulimo Wesu Wabwami uumbi. Masimpe inga tacikonzeki kuti boonse bacizibe kubelesya intalisyo zipya kabatana kuzibila kubelesya zyakataanguna.
2 Aino, kuli zyuulu-zyuulu zyabapainiya alimwi abasikumwaya bamwi lyoonse ibajanika mumulimo wamumuunda. Kunze lyaboobo, imbungano izinji zilazimanizya zilawo zyazyo zyoonse mbokwaindila buyo nsondo zisyoonto. Mumasena muli boobu, basikumwaya balazikkomanina ntalisyo zipya alimwi anzila zipya zyakwaambilizya mulumbe. Eci cibagwasya kuyaambele. Alimwi cicitya kuti mulimo wabo ube mulimo uukkomanisya kapati alimwi uuzwidilila akubagwasya kulwana mapenzi ngobajana mumuunda.
3 Nokuba boobo, ikuti naa mwakalibambila ntalisyo zibeleka kabotu mukubusya kuyanda kwabantu, amuzumanane kuzibelesya! Takweelede kuleka kubelesya inzila iizwidilila. Amwiibelesye kwiinda mukwiiyendelanyaa bbuku ndyomumwaya mweezi oyo. Iciindi nomwiinduluka inzila zyakubelesya izipedwe mu Mulimo Wesu Wabwami, amulange-lange twaambo tubotu ntomuyeeya kuti inga mwatujatikizya mumakani aanu aantalisyo.
4 Elyo iciindi nomutambula Mulimo Wesu Wabwami mupya, amuyeeye kuti intalisyo zili mukati ninzila buyo nzyomunga mwabelesya. Ikuti naa inga mwazibelesya, cili kabotu. Pele ikuti naa mujisi kale ntalisyo yamakani iili mukuzwidilila mucilawo canu, amwiibelesye! Icintu cipati ‘nkukondezesya mulimo ngomwakapegwa’ munzila imbotu, ikujana bantu babombe myoyo akubagwasya kuba basikwiiya.—2 Tim. 4:5.