Amubabikkile Maanu Ibamwi—Kwiinda Mukulibambila
1 Kulibambila kabotu mulimo kulatugwasya kubabikkila maanu ibamwi. Munzila nzi? Ikuti katulibambilide kabotu, inga mizeezo yesu tiigaminide buyo kutwaambo ntutwalibambila pele citupa kumubikkila maanu kapati uuli aŋanda. Kuyungizya waawo, cilatugwasya kutayoowa alimwi citupa kwaambaula cakulikwaya. Aboobo, mbuti mbotukonzya kulibambila nzila iigwasya?
2 Amubelesye Nzila Yeelela: Amusale nzila zyacitondezyo izigwasya mubusena bwenu ikuzwa mu Mulimo Wesu wa Bwami wa January 2006 alimwi akulanga-langa mbomukonzya kuzyaamba mumajwi eenu. Amwiicince kweelana acilawo cenu. Mucikozyanyo, ikuti bunji bwaziindi kamuyaanya bantu bacikombelo cimwi naa bukkale bwiindene-indene, amuyeeye nzila yenu mboikonzya kubakkomanisya. Kucinca mubandi wenu kweelana abantu mbomubandika limwi kutondezya kuti mulababikkila maanu kapati.—1 Kor. 9:22.
3 Nomutalika kwiibelesya nzila eeyo, amuzumanane kwiibambulula. Mbokunga majwi aakusaanguna alayandika kapati, mweelede kuswiililisya bantu mbobaingula. Sena kaambo kalabakkomanisya? Sena mibuzyo njomubuzya ipa muntu kwiingula? Ikuti kacitali boobo, amucince kusikila mane mwaba antalisyo iigwasya.
4 Izikonzya Kumugwasya Kwiibaluka Twaambo: Banji cilabakatazya kwiibaluka nzila eeyo ciindi nobasika amunzi wamuntu. Ikuti kacili boobo akulindinywe, sena mwakalisolekede kwiinduluka-induluka nzila eeyo cakupozya kumuntu umwi? Eeci cilakonzya kumugwasya kutuzyiba kabotu twaambo akutwaamba munzila nguba-uba iitobeleka. Alimwi cilakonzya kumupa kuti mukonzye kubulanganya bwiinguzi busiyene-siyene bwa uuli aŋanda.
5 Acimwi cikonzya kumugwasya kwiibaluka twaambo nkwiilemba mubufwaafwi nzila eeyo akapepa alimwi akwiilanga kwakaindi kasyoonto buyo kamutanasika amunzi wamuntu. Ciyeezyo cifwaafwi eeci bamwi bacibona kuti cilabagwasya kuti kabalikwayide kapati alimwi kabacikonzya kubandika abantu. Munzila eezi, kulibambila kabotu kulakonzya kutugwasya kubabikkila maanu ibamwi eelyo aboobo tulayaambele anzila yesu njotubelesya mukubandika makani mabotu.