Amujane Ciindi Cakukambauka
1 Imbungano ya Bunakristo ibambidwe aabantu bajisi bukkale busiyene-siyene. Pele tulikamantene mukutembaula Jehova. (Int. 79:13) Ikuti kutapona kabotu naa bukkale bumwi bukatazya bwapa kuti katutatoli lubazu kapati mukwaambilizya makani mabotu, mbuti mbotukonzya kujana ciindi cakukambauka?
2 Mumilimo Yaabuzuba: Lyoonse Jesu wakali kubelesya ciindi ncaakali kuyanzana abantu ikupa bumboni. Wakabandika kuli Matayo naakasika kucitelelo, kuli Zakayu naakali mulweendo, alimwi akumukaintu muna Samariya naakali kulyookezya. (Mt. 9:9; Lk. 19:1-5; Joh. 4:6-10) Mumilimo yesu yaabuzuba, andiswe tulakonzya kupa bumboni kumuntu uuli oonse ngotubandika limwi. Twanoojisi Bbaibbele, amatulakiti naa mabroshuwa, ciyootukulwaizya kuba bantu balibambilide kubandika zyabulangizi bwesu.—1 Pet. 3:15.
3 Sena kutacikonzya kweendeenda kwamupa kuti kamutatoli lubazu mumulimo wakuŋanda aŋanda? Amubikkile maanu kuziindi zyakupa bumboni nomuswayigwa abasilisi alimwi anomuyaanya bantu bamwi. (Inc. 28:30, 31) Ikuti naa bunji bwaziindi bukkale kabutamuzumizyi kweendeenda, sena kuli nomwakasolekede kupa bumboni kwiinda mukubelesya luwaile naa kulemba ŋwadi? Umwi mucizyi ulabalembela maŋwadi lyoonse bamumukwasyi wakwe batali Bakamboni. Ulabikkilizya atwaambo tukulwaizya tuzwa mu Bbaibbele alimwi azyakamucitikila naakali kupa bumboni.
4 Kumilimo naa Kucikolo: Luyandisisyo lwesu lwakutembaula Jehova alwalo luyootupa kujana ciindi cakusyanga mbuto yakasimpe notuli kumilimo naa kucikolo. Sikumwaya wamyaka yakuzyalwa iili lusele wakaambila mbaakali kwiiya limwi kujatikizya nzyaakabala mu Awake! zijatikizya mwezi. Nobakazyiba nkwaakajana twaambo ootu, ibayi bamusankwa ooyo bakatalika kutambula Ngazi Yamulindizi alimwi Awake! lyoonse. Kumilimo nkotubelekela, ikuti twabikka bbuku lya Bbaibbele Ncoliyiisya aatuba mpobakonzya kulibona ibamwi cilakonzya kupa kuti bantu babuzye mibuzyo akutupa ciindi cakukambauka.
5 Sena mulakonzya kujana ciindi cakukambauka nomubeleka abuzuba? Kwiinda mukucibelesya kabotu ciindi ncotujana, atusolekesye abuzuba ‘kupa Leza cipaizyo cakulumba.’—Heb. 13:15.