Amumutembaule Jehova Kwiinda Mubukambausi Bwamukwiizya
1 Ibantu ba Jehova basyomeka balajana ciindi abuzuba cakumutembaula. (Int. 96:2, 3; Heb. 13:15) Inzila iimwi motukonzya kucita boobo, nkwiinda mubukambausi bwamukwiizya. Ibunji bwabakombi ba Jehova sunu balalumba kuti muntu umwi wakabaambila mulumbe wa Bwami kwiinda mubukambausi bwamukwiizya.
2 Ikucita bukambausi bwamukwiizya kumuntu umwi, cipa kuti bamwi baumvwe mulumbe wa Bwami. Mucikozyanyo, mubandi wa Jesu amukaintu mu Samariya kumukala wa Jakobo, wakapa kuti banji babe aluyandisisyo kumakani mabotu. (Joh. 4:6-30, 39-42) Ciindi Paulo a Sila nobakabikkwa muntolongo ku Filipi, bakapa bumboni kuli sikulindila basintolongo, eelyo walo abasiŋanda yakwe boonse bakakatambula kasimpe.—Inc. 16:25-34.
3 Ziindi Zyakwiizya: Ino nziindi nzi nzyomukonzya kucita bukambausi bwamukwiizya? Ibamwi balacita oobo nobaula zintu mumantoolo, nobali muzyakweendela zyabuleya antela nobalindila kuti babonane adokotela kucibbadela. Ibamwi balakonzya kucita oobo kumilimo naa kucikolo nobali abbuleki. Ikubikka mabbuku aamba zya Bbaibbele mpaakonzya kubonwa, kulakonzya kupa kuti bamwi babuzye nzyotusyoma.—1 Pet. 3:15.
4 Mbotukonzya Kutalika: Imusimbi ulaansoni ulaamyaka iili ciloba wakateelela kumuswaangano mbociyandika kapati kuti boonse kabakambauka. Nobakali kuunka kukuula zintu abanyina, wakabikkilizya amabroshuwa obilo mucibbeeke. Banyina nobakajisi bubi ikubbadelela zintu mucintoolo, imusimbi ooyu wakaabila mukaintu umwi ibroshuwa, walo wakiibweza cakukkomana. Naakabuzyigwa nkwaakabujana busicamba bwakwaambaula amukaintu ooyu, imusimbi ooyu ulaansoni wakaingula kuti: “Ndalyaambila kuti, Libambile Lino, Talika! Mpoonya ndatalika.”
5 Ikuti katuyanda kucita bukambausi bwamukwiizya, toonse tweelede kuba amuuya mbuli wamusimbi ooyu. Ino ncinzi cikonzya kutugwasya? Amupailile busicamba kutegwa mucikonzye kwaambaula. (1 Tes. 2:2) Amulibambile mubuzyo naa kaambo kakkomanisya nkomukonzya kubelesya kutalisya mubandi wanu. Amumusyome Jehova kuti uyoomulongezya mukusoleka kwanu.—Lk. 12:11, 12.
6 Ikucita bukambausi bwamukwiizya kubantu mbotuyaanya abuzuba kupa kuti Jehova atembaulwe alimwi kutuletela lukkomano. Kulakonzya kugwasya umwi kuti ajane inzila iisololela kubuumi butamani.