Amube Bankutwe ‘Mukupandulula Makani’
1, 2. Ino ncinzi cimukondelezya kapati kujatikizya Paulo mbwaakali kukulanga kukambauka makani mabotu, alimwi ino mbuti mbotukonzya kwiiya cikozyanyo cakwe cabunkutwe ‘mukupandulula makani’?
1 Mbubwenya mbuli Jesu alimwi ababelesi banji basyomeka bakaindi, imwaapostolo Paulo wakali mukambausi musungu wamakani mabotu, wakali ‘kupandulula makani’ mubukkale buli boonse. Noliba leelyo naakaangidwe aŋanda yakwe, wakali ‘kubatambula kabotu boonse bakali kuboola kumuswaya. Wakali kukambauka zya Bwami bwa Leza akwiisya makani aa Mwami Jesu Kristo. Wakali kwaamba cakwaanguluka.’—Inc. 28:16-31.
2 Aswebo tulakonzya kuba bankutwe ‘mukupandulula makani’ muciindi coonse. Eeci cilabikkilizya akukambauka kubantu mbotuswaanganya notuunka naa notupiluka ku Muswaangano Wacooko wa “Amumulemeke Leza” alimwi anotuli mudolopo mucitilwa muswaangano.—Inc. 28:23; Int. 145:10-13.
3. Ino mbuti mbotunga twacita ikutegwa bukambausi bwesu bwamukwiizya butabi cintu cilicitikila buyo?
3 Ibukambausi Bwamukwiizya, ino Mbukambausi Buli Buti? Bukambausi bwamukwiizya tacili cintu cilicitikila buyo kakunyina mbaakani, mbuli kuti ncintu catalibambilidwe naa citayandiki kapati. Masimpe bupanduluzi oobo tabupandululi mulimo wesu. Mbubonya mbocakabede kuli Paulo, ikumulemeka Leza kwiinda mukukambauka kulayandika kapati kulindiswe. Alimwi yeelede kuba mbaakani yesu kukambauka kufwumbwa buyo nocakonzyeka notunooli mulweendo mwaka uuno. Pele, mbotukonzya kubasikila bantu kulakonzya kupandululwa kabotu-kabotu kuti nkwiizya, nkokuti cakukkalikana, cabulongwe alimwi katuli mbotubede lyoonse. Inzila eeyi ilakonzya kuleta mpindu zibotu kapati.
4. Ino ncinzi cakamugwasya Paulo kukambauka aŋanda yakwe?
4 Amulibambile Ikukambauka: Paulo wakali kujana ziindi zyakukambauka naakali ku Roma kaangidwe aŋanda. Kali aŋanda yakwe, wakabweza ntaamu yakwiita basololi bana Juda kuŋanda yakwe ibakali kubusena ooko. (Inc. 28:17) Nokuba kuti kwakali mbungano ya Bunakristo ku Roma, Paulo wakazyiba kuti ciinga caba Juda mudolopo eelyo kunyina nobakajisi luzibo lunji lwantalisyo zyalusyomo lwa Bunakristo. (Inc. 28:22; Rom. 1:7) Aboobo kunyina naakapiluka munsi ‘mukupandulula makani’ aa Jesu Kristo a Bwami bwa Leza.
5, 6. Ino nzyoolwe nzi nzyotukonzya kujana zyakucita bukambausi bwamukwiizya, alimwi ino nkulibambila kuli buti nkotukonzya kucita kutegwa tuzwidilile kapati?
5 Amubayeeyele limwi bantu boonse mbomukonzya kuswaanganya mulweendo lwanu ibajisi luzibo lusyoonto buyo ikapati kujatikizya Bakamboni ba Jehova. Ambweni inga kabatazyi kuti tulacita ziiyo zya Bbaibbele zyaaŋanda zitabbadelelwi. Amupakamane kuzyoolwe zyakupa bukambausi kuli baabo mbomujana nomuli mulweendo, mumasena mobapumunina banamutekenya, mubikkilwa mungwimba, nomuli mukuula zintu mumantoolo, nomuli muhotela, nomuli mukulya mumasena aakulida, nomuli muzyeendelo zyabuleya alimwi amubukkale bumwi. Amulibambile ncomukonzya kwaamba ikutalisya mubandi alimwi akukambauka mubufwaafwi. Ambweni kumbele mulakonzya kucita oobo kwiinda mubukambausi bwamukwiizya kuli basimukobonyoko, basazinyoko, babelesinyoko alimwi abantu bambi mbomuzyi.
6 Muyooyandika mabbuku aali mbwaabede aakubelesya nomucita bukambausi bwamukwiizya. Ino mabbuku nzi? Mulakonzya kubelesya tulakiti yakuti Sena Mulayanda Kuzyiba Zinji Kujatikizya Bbaibbele? Amukanane mincali yakusaanguna iili musanu, oomo twaambo tusiyene-siyene motupedwe ncolyeelede kubalwa Bbaibbele. Amumutondezye busena busiidwe aawo sikutambula katulakiti aaka mpakonzya kulemba akulomba ciiyo ca Bbaibbele caaŋanda citabbadelelwi. Nomwajana muntu uujisi luyandisisyo, amumwaabile broshuwa ya Ncayanda. Ikulibambila kuswaanganya muntu uukanana mwaambo uumbi, amubwezelezye kabbuku kakuti Good News for All Nations. Apeeji 2 kulipanduludwe mbokanga kabelesyegwa mubukambausi. Ikuti mwabelesya mootokala mulweendo, mulakonzya kubwezelezya amabbuku amwi aayandika kapati aakupa baabo ibatondezya luyandisisyo lwini-lwini kumulumbe wa Bwami.
7, 8. Ino nkucenjezya kuli buti kumakani aakusama alimwi akulilemeka kwesu notwiinka kumuswaangano aciindi cakulyookezya nkotweelede kutobela?
7 Amubikkile Maano Kunsamino Yanu Akulilemeka: Tweelede kubona kuti mbotulilemeka alimwi ansamino yesu ikubikkilizya ambotulibamba tazipi bantu bambi kutuyeeyela bumbi naa kubapa kuti batalike ‘kukazya’ mbunga ya Jehova. (Inc. 28:22) Eeci taciyandiki buyo lilikke eelyo nomuli kumuswaangano wacooko pele aleelyo nomwiinka kumuswaangano alimwi aciindi cakulyookezya amana mapulogilamu. Ngazi Yamulindizi yamu August 1, 2002 apeeji 18 muncali 14 yakaamba kuti: “Kusama kwesu takweelede kuba kwakulisumpula, kusama buteelede, ikukonzya kubusya muzeezo wakoonana, ikutondezya zizyo zyamubili zyeelede kusiswa naa kuciindilizya kusama zisani zyamisyobo mipya. Kunze lyaboobo, tweelede kusama munzila iitondezya ‘kuyoowa Leza.’ Eeci citupa kuti tukkale ansi akuyeeya, sena tabusi oobo na? Eeci tacaambi kuti nkusama buyo kabotu ciindi notuli kumiswaangano yambungano [naa kumuswaangano wacooko], mpoonya akucileka kubikkila maano ciindi notutali nkuko. Mbotuboneka lyoonse kweelede kutondezya kuti tulibakombi alimwi tulalilemeka nkaambo tuli Banakristo alimwi tuli babelesi ciindi coonse.”—1 Tim. 2:9, 10.
8 Tweelede kusama bweelede alimwi cabulemu. Ikuti naa lyoonse mbotusama alimwi akulilemeka kakutondezya lusyomo lwesu muli Leza, kunyina notuyoopiluka munsi kucita bukambausi bwamukwiizya akaambo kakuti tatulibonyi munzila yeelela mukambausi.—1 Pet. 3:15.
9. Ino nkuzwidilila kuli buti Paulo nkwaakaba aankuko mubukambausi ku Roma?
9 Bukambausi Bwamukwiizya Buletela Mpindu: Mumyaka yobile Paulo njaakakkala ku Roma kaangidwe aŋanda, wakajana mpindu zinji akaambo kakusolekesya mubukambausi bwakwe. Luka uluula kuti “bamwi bakasyoma ayo aakaambwa, bamwi pe tabakasyomede.” (Inc. 28:24) Paulo kumugama wakalanga-langa mbwaakali kucita kabotu ‘mukupandulula makani’ naakalemba kuti: “Zyoonse zyandiwida mbuzyagwasya kutola kunembo Makani Mabotu. Nkaambo bwaange bwangu mbwengangidwe nkaambo ka-Kristo bwaboneka moonse muŋanda yabasimpi akumeso aabantu bamwi boonse, nkabela banji akati kabakwesu bamu-Mwami, nibakabona bwaange bwangu, bakainda kuyumya myoyo yabo akuba akaanzambwene kakwaamba makani aa-Leza cakutayoowa.”—Flp. 1:12-14.
10. Ino nkuzwidilila kuli buti mubukambausi banabukwetene nkobakaba aankuko mwaka wamana?
10 Mwaka wamana, nobakazwa kucibeela cabuzuba bwakusaanguna bwamuswaangano wacooko, banabukwetene bakaba acakuluula cikkomanisya kapati cakupa bukambausi bwamukwiizya kumwanakazi uubeleka mucintoolo musambalilwa zyakulya ooyo wakababuzya zyamabbaaji aabo aakumuswaangano. Bakamwaambila zyamuswaangano alimwi abulangizi bwamu Bbaibbele bwabuumi bwakumbele bwabantu. Bakamupa katulakiti kakuti Sena Mulayanda Kuzyiba Zinji Kujatikizya Bbaibbele? alimwi akumupanduluda bubambe bwaciiyo ca Bbaibbele caaŋanda citabbadelelwi. Mwanakazi ooyu wakaamba kuti wakali kuyanda muntu wakumuyiisya, aboobo wakalemba zina akkeyala kusyule lyakatulakiti, alimwi wakalomba banabukwetene kucita bubambe. Ino nkuzwidilila kuli buti nkomukonzya kujana mwaka uuno kwiinda mukuba bankutwe ‘mukupandulula makani’?
11. Ino mbube nzi mbotweelede kuba aambubo kutegwa tutole ambele makani mabotu mwaka uuno kwiinda ‘mukupandulula makani’?
11 Ikutola Ambele Makani Mabotu Cabunkutwe: Amweezeezye buyo mbwaakakkomana Paulo naakamvwa kuti Banakristonyina bakali kutobela cikozyanyo cakwe cabusungu! Atucite zyoonse nzyotukonzya mukutola ambele makani mabotu kwiinda mubukambausi bwamukwiizya zyalusyomo lwesu lwamu Bbaibbele mbotuzumanana aswebo kugwasyigwa kumuswaangano wacooko mwaka uuno.
Kabbokesi kali apeeji 3]
Mabbuku Aayandika Mubukambausi Bwamukwiizya
■ Sena Mulayanda Kuzyiba Zinji Kujatikizya Bbaibbele? (katulakiti)
■ Ncinzi Leza Ncayanda Kulindiswe? (broshuwa)
■ Good News for All Nations (kabbuku)
■ Mabbuku aambi aayandika
Kabbokesi kali apeeji 4]
Mutabalubi Pe!
Ino mbabaani? Mbantu boonse bajisi luyandisisyo ibakajanika ku Ciibalusyo calufwu lwa Kristo naa kumakani aalubazu. Sena twakabatamba kale kumuswaangano wacooko mwaka uuno? Cakutadooneka, ibunji bwabo ikuti bakulwaizyigwa caluyando, bayoojanika. Nobali mukuyanzana munzila iiyaka aamuswaangano wacooko alimwi akukkomana apulogilamu yakumuuya iikulwaizya, bayoomuyandisisya Jehova alimwi ambunga yakwe. Sena tamukonzyi kubatamba akumvwa naa inga bazumina? Amubapandulude makani oonse ngobayandika, kubikkilizya amadeeti aamuswaangano, mbobakonzya kweenda kuti basike kubusena bucitilwa muswaangano, ziindi zibeela nozitalika akumana alimwi apulogilamu yoonse mboibede.