Sena Mulilibambilide Kucita Bukambausi Bwamukwiizya?
1. Ncikozyanyo nzi citondezya kuti bukambausi bwamukwiizya bulagwasya?
1 Bukambausi bwamukwiizya bulagwasya kapati. Mu Bbaibbele muli zikozyanyo zinji zitondezya bantu bakagwasyigwa akaambo kabukambausi bwamukwiizya. (Joh. 4:7-15) Ino ncinzi ncotukonzya kucita kutegwa tulibambile kukambauka munzila iili boobu?
2. Ino mbuti kusama akulibamba kabotu mbokukonzya kutugwasya kukambauka?
2 Kusama Akulibamba Kabotu: Ikubikkila maano mbotusama akulibamba ciindi coonse kupa kuti katubakambaukila bantu cakulikwaya. (1 Tim. 2:9,10) Ikuti katutalibonyi kabotu, tuya kufwa nsoni kubakambaukila bantu. Kulibonya kabotu kwesu inga kwapa kuti bantu bayande kuzyiba ncotulibonya boobu. Mucikozyanyo, banabukwetene Bakamboni ibakali mulweendo, bakakkede munsi-munsi amusankwa mu Muslimu. Naakabona mbubakali kulibonya, wakababuzya naa bakali Banakristo. Eeci cakapa kuti bamukambaukile kwama woola otatwe.
3. Kweelana acikozyanyo ca Jesu, ino mbuti mbomukonzya kutalika mubandi?
3 Kutalika Mibandi: Jesu naakajana mukaintu muna Samariya amugoti wa Jakobo, wakatalika mubandi kwiinda mukumulomba maanzi aakunywa. Mbubwenya buyo, andiswe tulakonzya kutalika mubandi kwiinda mukwaamba kaambo mubufwaafwi naa kubuzya mubuzyo uutakatazyi. Nokuba kuti aabona tulayoowa, kusyoma Jehova kulakonzya kutugwasya “akutuyumya-yumya” kuti tutalike mubandi.—1 Tes. 2:2.
4. Ino mbuti mbotukonzya kulibambila bukambausi bwamukwiizya?
4 Kamujana Ciindi Cakukambauka Nomwiizya: Basikumwaya banji bajana nzila nzyobakonzya kubelesya nobakambauka nobaizya. Amulange-lange bukkale bwanu akubona bantu mbomukonzya kukambaukila buzuba oobo. Amunyamunizye mabbuku ngomukonzya kubelesya a Bbaibbele. Kamubona ncobacita bantu mwamana inga mwabandika ambabo. Ikuti naa mwalibambilila limwi mulakonzya kupa bumboni buli kabotu kubantu mbomukonzya kujana buzuba oobo.—Flp. 1:12-14; 1 Pet. 3:15.
5. Ino nkaambo nzi bukambausi bwamukwiizya ncobuyandika kapati?
5 Kuli twaambo tobilo tutupa kukambauka notwiizya.—iluyando ndotujisi kuli Jehova abeenzuma. (Mt. 22:37-39) Mbwaanga ciindi cakukambauka ciceede ncisyoonto, tweelede kulibambila kucita bukambausi bwamukwiizya. Aboobo tweelede kulibambila kukambauka makani mabotu aa Bwami kubantu nokucili ciindi.—Rom. 10:13, 14; 2 Tim. 4:2.