Mulakonzya Kucita Bukambausi Bwamukwiizya!
1. (a) Ino bukambausi bwamukwiizya bucitwa buti? (b) Ino muli mongaye nomwakayiya kasimpe kwiinda mubukambausi bwamukwiizya?
1 Ino bali bongaye bantu mumbungano yanu ibakayiiya kasimpe kwiinda mubukambausi bwamukwiizya? Mulakonzya kugambwa kuzyiba kuti mbanji. Bukambausi bwamukwiizya bubikkilizya kukambauka makani mabotu kubantu mbotuyaanya abuzuba, notuli mulweendo, notuswaya bamukwasyi naa basimukoboma, notuula zyintu, notuli kucikolo, notuli kumilimo akumwi buyo. Mukabunga ka Bakamboni bainda ku 200 babbapatizyidwe, kwakajanika kuti mweelwe wa 40 pasenti bakayiya kasimpe kwiinda mubukambausi bwamukwiizya. Aboobo, nzila eeyi yabukambausi ilagwasya kapati.
2. Ino nzikozyanyo nzi nzyotujana mu Magwalo zyabantu bakacita bukambausi bwamukwiizya?
2 Bakambausi bamumwaanda wamyaka wakusaanguna bunji bwaziindi bakali kucita bukambausi bwamukwiizya. Mucikozyanyo, naakali kwiinda mu Samariya, Jesu wakakambaukila mukaintu iwakali kuteka meenda kumugodi wa Jakobo. (Joh. 4:6-26) Filipo wakatalika kubandika amwaalumi waku Etiopiya iwakali kubala bbuku lya Isaya kwiinda mukumubuzya kuti: “Sena ulacimvwisya eco ncobala?” (Inc. 8:26-38) Mwaapostolo Paulo naakali muntolongo ku Filipi, wakakambaukila sikulindila ntolongo. (Inc. 16:23-34) Paulo kaangidwe muŋanda wakali ‘kubatambula boonse ibakali kumuswaya akubakambaukila bwami bwa Leza, akwiisya makani aa Mwami Jesu Kristo.’ (Inc. 28:30, 31) Anywebo mulakonzya kucita bukambausi bwamukwiizya nokuba kuti mulaansoni. Ino mbuti mbomukonzya kucita oobo?
3. Ino ncinzi cikonzya kutugwasya kumana nsoni?
3 Mbomukonzya Kutalika: Bunji bwesu cilatukatazya kubandika abantu mbotutazyi, nobaba baabo mbotuzyi ibatali Bakamboni, kubandika ambabo makani aajatikizya kasimpe cilatukatazya. Nokuba boobo, tulakonzya kukulwaizyigwa kucita boobo ikuti naa twayeeya bubotu bwa Jehova, kasimpe nkaakatupa alimwi abukkale bwesu mbobwiindene abukkale bwabantu bali munyika. (Jon. 4:11; Int. 40:5; Mt. 13:52) Alimwi, tulakonzya kumulomba Jehova kuti atugwasye kuba “akaanzambwene” naa busicamba. (1 Tes. 2:2) Imukwesu umwi wakanjila cikolo ca Gileadi wakaamba kuti: “Bunji bwaziindi mupailo ulagwasya ikuti ndakatazyigwa kubandika abantu.” Ikuti kacimuyumina kutalisya mubandi, amupaile mubufwaafwi cakaumuumu.—Neh. 2:4.
4. Ino mbuti mbotukonzya kutalisya mubandi alimwi ino nkaambo nzi ncotweelede kucita boobo?
4 Notucita bukambausi bwamukwiizya, tulakonzya ikutalisya mubandi nokuba kuti tiitwabala lugwalo. Cilakonzya kutugwasya ikutalisya mubandi kakunyina kulimvwisya kuti tukambauka buya. Basikumwaya banji baamba kuti ikucita boobu kwabagwasya kukambauka makani mabotu. Ikuti muntu katayandi kubandika tatweelede kumusinikizya. Cabulemu kamubasiya bantu aabo akuzumanana kubandika abamwi.
5. Ino ncinzi camugwasya mucizyi umwi ulaansoni kucita bukambausi bwamukwiizya?
5 Imucizyi umwi ulaansoni ulamulanga muntu ngwayanda kukambaukila akubona naa tabindide. Ikuti wabona kuti ulijisi ciindi, ulatalika kubandika anguwe. Ikuti naa muntu ooyo wavwiila kabotu, imucizyi ooyu ulazumanana kubandika anguwe. Ulaswiililisya kutegwa abone naa makani nzi aajatikizya makani mabotu aakonzya kukkomanisya muntu ooyo. Kwiinda mukubelesya nzila eeyi, imucizyi ooyu wacikonzya kwaabila mabbuku manji alimwi akutalisya ciiyo ca Bbaibbele.
6. Ino mbuti mbotukonzya kutalisya mubandi notwiizya abantu?
6 Kutalisya Mubandi: Ino mbuti mbotukonzya kutalisya mubandi? Jesu naakabandika amukaintu amugodi, wakasaanguna kulomba maanzi aakunywa. (Joh. 4:7) Ncimwi buyo andiswe, tulakonzya kusaanguna kumwaanzya muntu akumubuzya mubuzyo kutegwa tutalisye mubandi. Nomubandika, mulakonzya kujana ciindi cakusyanga mbuto yakasimpe kwiinda mukwaamba kaambo kali mu Magwalo, ambweni muntu ooyo ulakonzya kwiiya kasimpe. (Muk. 11:6) Bamwi bazwidilila kwiinda mukwaamba kaambo kakonzya kupa kuti sikuswiilila abe aluyandisisyo lwakuzyiba zinji. Mucikozyanyo, nomulindila kuti mubonane adokota, mulakonzya kutalisya mubandi kwiinda mukwaamba kuti, “Ndiya kukkomana kapati nenditakaciswi limbi.”
7. Ino mbuti kubikkila maano kuzyintu zicitika mbokukonzya kutugwasya kutalisya bukambausi bwamukwiizya?
7 Ikubikkila maano kuzyintu zicitika kulakonzya kutugwasya kutalisya mubandi. Ikuti naa twabona muzyali uujisi bana balilemeka, tulakonzya kumulumba muzyali ooyo akumubuzya kuti, “Ino ncinzi camugwasya kubalela kabotu bana banu?” Mucizyi umwi ulaswiilila kumakani ngobabandika babelesinyina alimwi akujana makani aakonzya kubakkomanisya. Naakamvwa kuti mukaintu umwi ngobabeleka limwi uyanda kukwatwa, wakamupa Sinsimuka! iipandulula muntu mbwakonzya kulibambila mucado. Eeci cakapa kuti bazumanane kubandika makani aamu Bbaibbele.
8. Ino mbuti mbotukonzya kubelesya mabbuku eesu kutalisya mubandi?
8 Inzila aimwi iikonzya kutugwasya kutalisya mubandi nkubala mabbuku eesu mubuleya. Imukwesu umwi ulasala cibalo cikkomanisya icili mu Ngazi Yamulindizi naa Sinsimuka! akutalika kubala cakaumuumu. Ikuti wabona kuti kuli muntu uubbida kulanga nzyabala, ulamubuzya mubuzyo naa kwaamba kaambo kamwi mubufwaafwi ikali mucibalo eeco. Bunji bwaziindi, eeci cipa kuti batalike kubandika makani aamu Bbaibbele. Ikusiya mabbuku eesu abusena mpobakonzya kwaabona babelesinyoko naa basicikolonyoko kulakonzya kupa kuti babe aaluyandisisyo.
9, 10. (a) Mbuti mbotukonzya kujana ciindi cakucita bukambausi bwamukwiizya? (b) Ino mucijana buti ciindi cakucita bukambausi bwamukwiizya?
9 Amujane Ciindi: Tweelede kulibambila kucita bukambausi bwamukwiizya akaambo kakuti ciindi camana. Aboobo tweelede kujana ciindi cakucita bukambausi bwamukwiizya notubeleka milimo yabuzuba abuzuba. Kamulibambilila limwi makani ngomukonzya kubandika abantu mbomuyaanya. Amubwezelezye Bbaibbele amabbuku ngomukonzya kwaabila baabo bajisi luyandisisyo.—1 Pet. 3:15.
10 Basikumwaya bankutwe bacikonzya kujana ciindi cakucita bukambausi bwamukwiizya. Imucizyi umwi uukkala kuŋanda iikwabilidwe kapati, ulaakubikka zifwanikiso zitondezya zilenge kubusena bwakusobanina. Basikweebelela nibaamba kujatikizya bubotu bwazyintu zitondezyedwe, imucizyi ooyu ulatalika kubandika ambabo alimwi akubaambila kuti Ibbaibbele lisyomezya kuti kuyakuba “ijulu ipya anyika impya.” (Ciy. 21:1-4) Sena kuli nzyomukonzya kucita kutegwa mujane ciindi cakucita bukambausi bwamukwiizya?
11. Ino mbuti mbotukonzya kupilukila kumuntu watondezya luyandisisyo notucita bukambausi bwamukwiizya?
11 Kupilukila Kubantu Bakatondezya Luyandisisyo: Ikuti mwajana bantu batondezya luyandisisyo, mweelede kupilukila kulimbabo. Ikuti kakweelede, mulakonzya kubaambila kuti: “Ndakkomana kapati kubandika andinywe. Ino mbuti mbotukonzya kubonana alimwi kutegwa tukabandike?” Basikumwaya bamwi bapa kkeyala anamba yabo yafooni kubantu mbobabandika ambabo akubaambila kuti: “Ndakkomana kubandika andinywe. Ikuti kamuyanda kuzyiba zinji kujatikizya makani ngotwabandika, mulakonzya kubelesya kkeyala naa namba eeyi yafooni.” Ikuti kamutakonzyi kumuswaya alimwi, amucite bubambe bwakuti bamumbungano iili afwaafwi bakacite oobo kwiinda mukulemba foomu ya Amuzumanane a Muntu Ooyu (S-43) akupa mulembi wamumbungano yanu.
12. (a) Nkaambo nzi ncokuyandika kulemba mawoola ngotubeleka mubukambausi bwamukwiizya? (b) Mbubotu nzi bwajanwa mubukambausi bwamukwiizya? (Amubone kabbokesi kakuti, “Bubotu Bwabukambausi Bwamukwiizya”)
12 Tweelede kucilemba ciindi ncotubeleka mumulimo wabukambausi bwamukwiizya. Aboobo mweelede kubona kuti mwalemba ciindi ncomwabeleka nokuba kuti maminiti buyo masyoonto. Amuyeeye buyo: Ikuti sikumwaya umwi aumwi wacita bukambausi bwamukwiizya maminiti aali osanwe abuzuba, eeci inga caamba kuti tulakonzya kubeleka mawoola aainda ku 17 miliyoni amwezi.
13. Ino ncinzi cikonzya kutukulwaizya kucita bukambausi bwamukwiizya?
13 Kuli kaambo kapati katupa kucita bukambausi bwamukwiizya—luyando ndotujisi kuli Leza akuli basimukoboma. (Mt. 22:37-39) Ibube bwa Jehova amakanze aakwe ngaatupa kwaamba “bulemu bwabupati bwabwami bwakwe.” (Int. 145: 7, 10-12) Ikubabikkila maano basimukoboma nkokutupa kukambauka makani mabotu nokucili ciindi. (Rom. 10:13, 14) Ikuti twakkala ansi akwaayeeya kabotu makani aaya akulibambila kabotu, toonse tulakonzya kucita bukambausi bwamukwiizya alimwi tulakonzya kubona mbocikkomanisya kuyiisya kasimpe kumuntu uujisi luyandisisyo.
[Majwi aakwelelezya sikubala aali apeeji 4]
Mulakonzya kubona kuti kulagwasya kuba ambaakani yakutalika kubandika ambabo
[Majwi aakwelelezya sikubala aali apeeji 5]
Kwiinda mukuba bankutwe, basikumwaya banji bajana nzila zyakucita bukambausi bwamukwiizya
[Kabbokesi kali apeeji 5]
Nzila Zikonzya Kugwasya Kutalisya Mibandi
◼ Amupaile kutegwa mutalike
◼ Kamusala baabo balibonya kuti tabali bakali alimwi tababindide
◼ Kamumulanga, kamumwetamweta akwaamba kaambo kamwi kamukkomanisya
◼ Kamuswiililisya
[Kabbokesi kali apeeji 6]
Bubotu Bwabukambausi Bwamukwiizya
• Mukwesu umwi iwakali kulindila kuti bamubambile mootokala wakwe, wakali kubakambaukila bantu bakakkede munsi-munsi anguwe akubapa tupepa twakubatamba kumakani aabuleya. Nokwakainda mwaka, imukwesu umwi ngwaatakazyiba wakamwaanzya naakali kumuswaangano wacooko. Wakali umwi wabantu mbaakapede kapepa naakali kulindilila mootokala wakwe mwaka wainda. Musankwa uulya wakaunka kwaakuswiilila makani aabuleya alimwi wakalomba kuti kayiiya Bbaibbele. Walo amukaintu wakwe bakabbapatizyigwa.
• Mucizyi umwi iwakaiya kasimpe kwiinda mubukambausi bwamukwiizya wakaamba kuti ukambaukila bantu bazyibene abana bakwe botatwe. Cilawo cakwe cibikkilizya basimukobonyina abazyali mbajana kumiswaangano yabazyali iicitilwa kucikolo. Lyoonse utalisya mubandi kwiinda mukwaamba mubufwaafwi kuti Ibbaibbele ndebbuku lyamugwasya kulela kabotu bana bakwe, mpoonya ulacinca mubandi. Pele akaambo kakuti watalisya kale mubandi, cilamuubila kubelesya Bbaibbele nobabandika. Kwiinda mukubelesya nzila eeyi, wagwasya bantu bali 12 kusikila nkobabbapatizyigwa.
• Imucizyi umwi naakaswaigwa amuntu uubeleka ku insyuwalansi, wakamukambaukila. Wakamubuzya ikuti naa wakali kuyanda kupona buumi bwakutaciswa-ciswa akukkomana kukabe kutamani. Mpoonya musankwa ooyo wakazumina akumubuzya kuti amwaambile naa ni Insyuwalansi iili njaakali kwaamba. Wakamutondezya zisyomezyo zili mu Bbaibbele akumupa bbuku, aboobo wakalimanizya kulibala mangolezya ngawonya aayo. Bakapangana kuti atalike kwiiya Bbaibbele. Wakatalika kujanika kumiswaangano alimwi wakabbapatizyigwa.
• Mucizyi umwi naakali mundeke, wakamukambaukila mukaintu ngwaakabambene limwi. Nobakaseluka, mucizyi wakaambila mukaintu ooyu nkwakkala akumupa namba yafooni akumukulwaizya kuti kaiya Bbaibbele a Bakamboni ba Jehova. Buzuba bwakaccilila, Bakamboni bobilo bakamuswaya mukaintu ooyu. Mukaintu ooyu wakatalika kwiiya Bbaibbele alimwi wakayaambele cakufwaambana mane wakabbapatizyigwa. Lino uleendelezya ziiyo zyotatwe zya Bbaibbele.
• Mukwesu moofwu uujisi myaka yakuzyalwa iili 100 uukkala kuŋanda yabantu bacembeede, ulaakwaamba kuti, “Tuyanda Bwami.” Majwi aaya apa kuti bamanesi abalwazi kabamubuzya mibuzyo calo cimupa coolwe cakupandulula Bwami ncobwaamba. Mukaintu umwi uubeleka kuŋanda yabacembeede wakamubuzya ncayanda kwaakucita mu Paradaiso. Wakamwiingula kuti: “Ndiya kutalika kulanga akweenda alimwi ndiyakukaumpa kacinga kangu.” Mbwaanga tababoni, bakamulomba kuti kababalila mamagazini. Mwanaabo musimbi naakabaswaya bausyi, mubelesi ooyu wakamulomba kuti aabweze mamagazini kutegwa akaabale kuŋanda. Nesi wakamwaambila mwana musimbi kuti bantu boonse bali muŋanda eeyi yabacembeede bakazyibila kwaamba kuti: ‘Tuyanda Bwami.”
• Mucizyi umwi naakali amulongo wacakulya wakamvwa bamadaala bamwi bakakkede munsi-munsi kababandika twaambo twacisi. Mudaala umwi wakaamba kuti mfwulumende taikonzyi kumana mapenzi eesu. Mucizyi ooyu wakalyaambauzya kati, ‘Eeci ncecoolwe cangu.’ Wakapaila cakaumuumu kumane wakaunka mpobakabede. Naakamana kulipandulula, wakabaambila makani aajatikizya mfwulumende iiyakumana mapenzi aabantu, Bwami bwa Leza, kumane wakabapa kabroshuwa nkaakajisi. Mbwaakamanina buyo kubapa kabroshuwa, mupati wamilimo wakasika. Mucizyi wakali kuyeeya kuti ulatandwa. Muciindi caboobo, wakamwaambila kuti wali kuswiilila akuti awalo uyanda kabroshuwa. Mubelesi aumwi iwakali kuswiilila awalo wakaboola amisozi kayeenda. Wakalilekede kwiiya Bbaibbele pele lino wakali kuyanda kutalika kwiiya alimwi.