Tuli Bakamboni Ciindi Coonse
1. Ino ncinzi ncotwiiya kucibalo caamba kujatikizya Jesu naakakambaukila mukaintu kumugoti?
1 Jesu wakazwa akweenda musinzo mulamfwu. Wakalikatede alimwi wakafwide nyota. Basikwiiya bakwe nobakaunka kuyakuula zyakulya, wakakkala kuti alyookezye ambali amugoti kunze amunzi wa Samariya. Jesu tanaakaunkila kukambauka ku Samaria; pele wakali kwiinda buyo ciindi naakali kuunka ku Galilaya kuti akazumanane amulimo wakwe wakukambauka. Nokuba boobo, wakakambaukila mukaintu wakaunkide kuyakuteka meenda. (Joh. 4:5-14) Ino nkaambo nzi? Jesu tanaakalekede kuba “kamboni [wa Jehova] uusyomeka uusinizye.” (Ciy. 3:14) Twiiya Jesu kwiinda mukuba Bakamboni ba Jehova ciindi coonse.—1 Pet. 2:21.
2. Ino mbuti mbotukonzya kulibambila kupa bumboni bwamukwiizya?
2 Amulibambile: Tulakonzya kulibambila kupa bumboni bwamukwiizya ikuti katutolelezya mabbuku kufwumbwa nkotwaunka. Basikumwaya banji beenda amatulakiti ngobaabila basambazi bamuzintoolo, basikuulisya mungwimba, abamwi mbobayaanya buzuba boonse. (Muk. 11:6) Imucizyi umwi uuvwula kuba mulweendo, lyoonse ulabwezelezya Bbaibbele abbuku lya Bbaibbele Ncoliyiisya mukabbeeke kakwe, alimwi ulasola kutalisya mubandi abantu bali munsi-munsi.
3. Ino mbuti mbotukonzya kutalisya mubandi?
3 Amutalisye Mubandi: Notupa bumboni bwamukwiizya, tatuyandiki kutalisya mubandi wa Mumagwalo pe. Jesu tanaakatalisya mubandi kumukaintu ngobakali limwi kumugoti kwiinda mukusaanguna kumwaambila kuti ngu Mesiya. Pele wakatalisya mubandi kwiinda mukumulomba meenda aakunywa. (Joh. 4:7-9) Mucizyi umwi wakabona kuti nzila njabelesya iikonzyenye ayeeyi ilamugwasya kutalisya mubandi ciindi bantu nobamubuzya naa wakakkomana kusekelela kilisimasi naa buzuba bumwi bwakulyookezya. Muciindi cakubaambila kuti tanaakacita oobo akaambo kakuti ngumwi wa Bakamboni ba Jehova, ubaingula kuti: “Ndakalisalila ndemwini kuti kanditasekeleli.” Kanji-kanji inga bayanda kuzyiba ncaakasalila boobo, eeci cimupa coolwe cakubakambaukila.
4. Ino nkaambo nzi lugwalo lwa Matayo 28:18-20 ncolumukulwaizya?
4 Nokuba kuti Jesu wakaumanizya mulimo wakwe ngwaakali kubeleka cabusungu anyika, ucuubikkila maano mulimo wakukambauka uucitwa lino. (Mt. 28:18-20) Aboobo, mbubwenya mbuli Jesu, tuli Bakamboni ibalibambilide lyoonse kwaambila bantu makani aajatikizya lusyomo lwesu.—Heb. 10:23.