Kuyungizya Luzyibo Lwesu Mumulimo Wakukambauka—Kutalisya Mubandi Kutegwa Mucite Bukambausi Bwamukwiizya

Ikaambo Ncociyandika: Ciindi notuli mumulimo wakuŋanda aŋanda, ambweni bantu bamwi inga kabatali aŋanda. Nokuba boobo, tulakonzya kubajana ciindi notuli mubbaasi, notulindila kubonana abadokota, notulyookezya kucikolo naa kumilimo alimwi akumwi buyo. Jehova uyanda kuti bantu boonse babe acoolwe cakumvwa Mulumbe wa Bwami. (1 Ti. 2:3, 4) Kanji-kanji kutegwa tupe bumboni, tweelede kubweza ntaamu yakutalisya mubandi.

Mbotukonzya Kucita Oobo:

Kamusala wakubandika limwi. Sena muntu ooyo ulaseka-seka abantu alimwi uboneka kuti ulayanda kubandika? Sena bukkale bulazumizya kuti inga mwaba amubandi mubotu? Basikumwaya bamwi inga basaanguna kumulanga muntu mpoonya akumwetamweta. Ikuti awalo wamwetamweta, balasoleka kutalisya mubandi.
Ikuti kamutajisi busicamba bwakutalisya mubandi, amupaile mubufwaafwi cakaumuumu.—Neh. 2:4; Mil. 4:29.
Amutalike amajwi masyoonto, mbuli kumupa mooni. Jesu tanaakatalika mubandi amukaintu muna Samariya kwiinda mukwaamba zya Bwami. (Joh. 4:7) Zimwi ziindi mubandi ulakonzya kutalisyigwa kwiinda mukumulumba muntu. Mulakonzya kwaamba kuti: “Bana banu balalilemeka kapati!” Kubuzya mubuzyo ninzila imwi njomukonzya kubelesya kutalisya mubandi. Mulakonzya kubuzya kuti: “Sena mwakaamvwa makani aakali a T.V. jilo masiku?”
Ikuti mubandi watalika, amujane nzila yakubandika makani mabotu, pele mutafwambaani kucita oobo. Amuleke kuti mubandi weende mbuli mbotubandika lyoonse. Ambweni mulakonzya kwaamba kaambo kakonzya kupa muntu kuyanda kuzyiba zintu zinji naa kakonzya kumupa kuti amubuzye mubuzyo. Mucikozyanyo, kuti mubandi uyeeme amakani aamukwasyi, mulakonzya kwaamba kuti: “Ndakajana lulayo lusyomeka kujatikizya mbotukonzya kukomezya bana.” Kuti kamubandika makani aajatikizya nzyomwakamvwa muli sikapepele mulakonzya kwaamba kuti: “Caino-ino ndakakkomana kubala makani mabotu alo aaindene amakani ngotumvwa lyoonse.” Kuti mubandi wamana kamutanapa bumboni, mutatyompwi pe.
Kamweenda amatulakiti naa mabbuku aamwi ngomukonzya kupa muntu watondezya luyandisisyo.

Amusole Kucita Eeci Mwezi Uuno:

Mumvwiki imwi aimwi amusole kutalisya mubandi omwe kumwi kamujisi makanze aakupa bumboni bwamukwiizya.