BAKUBUSI BALABUZYA
Mbuti Mbondikonzya Kunoobandika Kabotu Abamwi?
Mucibalo eeci, tulalanga-langa makani aatobela:
Nkaambo nzi ncociyandika kubandika cacigaminina?
Bantu bamwi baamba kuti kubandika cacigaminina cilakatazya alimwi akulibilisya. Cibaubila, nkubandika kwiinda mukulemba tugwalo twaafooni.
“Cilakatazya kwaambaula cacigaminina kayi tokonzyi kucinca naa kumwaya cintu cili coonse ncowaamba.”—Ba Anna.
“Kulembelana tugwalo twaafooni cili mbuli pulogilamu yakalekkoodwa kale, pele kubandika cacigaminina cili mbuli cintu cili mukucitwa aciindi eeco. Ciindi nondaambaula amuntu uumwi, mumoyo inga ndiile kuti, ‘Utalubizyi kaka!”—Ba Jean.
Nokuba boobo, aciindi cimwi muyooyandika kuzyiba mbomukonzya kubandika abantu cacigaminina. Mucikozyanyo, muyooyandika luzyibo oolu kutegwa mupange balongwe bapya, mujane mulimo akuzumanana kubeleka, naa kutalika cisyabo ciindi mwaakulibambila.
Ncomweelede kuzyiba ncakuti kubandika cacigaminina takweelede kumuyoosya pe. Mulakonzya kwiiya nokuba kuti mulaansoni.
“Zimwi ziindi toonse tulakonzya kwaamba zintu zitali kabotu alimwi akufwa nsoni, kayi tatulondokede.”—Neal.
Mbomukonzya kutalisya mubandi
Amubuzye mibuzyo. Amuyeeye kujatikizya kaambo kakonzya kukwelelezya bantu, mpoonya akutalisya nkako mubandi. Mucikozyanyo, mulakonzya kubuzya kuti:
“Sena kuli nkomwakaunkide mucilimo eeci cainda?”
“Eeyi niwebbusaiti mbotu. Sena kuli nomwakaibona kale?”
“Sena mwakamvwa kujatikizya . . . ?”
Kutegwa mwaambe cacigaminina, amuyeeye cintu cimwi calo ncomweendelana amuntu ooyo. Mucikozyanyo, sena mwiiya acikolo comwe naa mubeleka antoomwe? Mpoonya mulakonzya kubuzya mubuzyo kujatikizya zintu nzyomweendelana.
“Amuyeeye mibuzyo iimukkomanisya yalo njomukonzya kuyanda kumvwa bwiinguzi mbobapa bantu.”—Maritza.
Ncomweelede kuzyiba: Tamweelede kucita mbuli kuti muyanda kumujanina mulandu muntu kwiinda mukubuzya mibuzyo minji. Kunze lyaboobo, amusole kutabuzya mibuzyo iikonzya kupa muntu kufwa nsoni. Mibuzyo mbuli yakuti “Ncinzi cimupa kuyoowa kapati?” naa “Nkaambo nzi lyoonse ncomusama mubala wabbulu?” ilakonzya kupa muntu kulimvwa bubi. Mubuzyo wabili mane ulakonzya kupa muntu kulimvwa mbuli kuti mumufwubaazya buya.
Nzila imbi mbomukonzya kutapa muntu kulimvwa mbuli kuti muyanda kumujanina mulandu, nkwiinda mukutaamba mbomuyeeya nywebo kujatikizya mubuzyo ngomwabuzya katanaingula walo naa amana kwiingula. Munzila imwi, tamweelede kucita mbuli kuti mubuzya-buzya buya, pele weelede kuba mubandi.
Sena mibuzyo yanu imupa kulibonya mbuli kuti muyanda kujanina bamwi milandu?
Njiisyo yamu Bbaibbele: “Mizeezo iili mumoyo wamuntu ili mbuli maanzi aali mumugoti mulamfwu, pele mupampu nguukonzya kwiiteka.”—Tusimpi 20:5.
Amube muswiilizi mubotu. Kutegwa mube aamubandi mubotu, cilayandika kapati kuswiilila kwiinda kuba muntu waambaulisya.
“Ndilasola kwiiya cintu cimwi cipya kujatikizya muntu ngondibandika limwi. Mpoonya, ndiIasola kuziyeeya zintu nzyaandaambila muntu ooyo kutegwa ciindi ciboola ndaakuba amubuzyo mubotu wakutalisya mubandi.”—Ba Tamara.
Ncomweelede kuzyiba: Mutalibiliki kujatikizya ncomutaambe kuzwa waawo. Ikuti mwaswiilila cakubikkila maano, mulakonzya kujana cakwaamba kuzintu eezyo nzyataambe muntu ooyo.
Njiisyo yamu Bbaibbele: ‘Kamufwambaana kuswiilila, akumuka kwaambaula.’—Jakobo 1:19.
Amutondezye kuti mulabikkila maano ncobeni. Mulakonzya kuukkomanina kapati mubandi ikuti kamumubikkila maano muntu ngomubandika limwi.
“Ikuti muntu ngomubandika limwi wabona kuti mulazibikkila maano ncobeni zintu nzyaamba, mubandi inga wakkomanisya, nokuba kuti kunooli ziindi nomutanoojisi zyakwaamba.”—Ba Marie.
Ncomweelede kuzyiba: Mutapi muntu kufwa nsoni. Kwaamba kuti, “Nkabotu kaka kakkoti aako! Ino mwaakaula mali nzi?” kulakonzya kupa muntu kulimvwa bubi.
Njiisyo yamu Bbaibbele: “Mutabikkili buyo maano kuzintu nzyomuyanda nywebo zilikke, pele akuzintu nzyobayanda bamwi.”—Bafilipi 2:4.
Ino inga mwaumana buti mubandi? Mukubusi umwi wazina lya Jordan wakaamba kuti: “Amusole kumana mubandi kwiinda mukwaamba cintu cimwi cikkomanisya. Ikwaamba kuti, ‘Ndakkomana kubandika andinywe’ naa ‘Mubeleke kabotu’ kulakonzya kupa kuti mukajane aakutalikila ciindi ciboola mwaakuswaangana amuntu ooyo.”