Kuyungizya Luzyibo Lwesu Mumulimo Wakukambauka​—Kutalisya Mibandi Iikonzya Kutupa Coolwe Cakukambauka

Jesu wakacikonzya kupa bumboni bwamukwiizya kumukaintu muna Samariya nkaambo wakabandika anguwe. Mbuti mbotukonzya kuyungizya luzyibo lwesu lwakutalisya mibandi kubantu mbotutazyi?

• Amube bantu baseka-seka alimwi akubandika abantu. Nokuba kuti wakalikatede, Jesu wakatalisya mubandi kwiinda mukulomba buyo maanzi aakunywa. Aboobo mulakonzya kutalisya mubandi kwiinda mukumwaanzya buyo muntu mpoonya ambweni akwaamba kaambo kamwi kujatikizya mbobwaca, naa makani amwi aakacitika caino-ino. Kamuyeeyede kuti, mbaakani yakusaanguna njakutalisya buyo mubandi, aboobo mulakonzya kubandika kufwumbwa makani aakonzya kumukkomanisya muntu ooyo. Ikuti naa tanaamwiingula, mutatyompwi pe. Amusole alimwi kumuntu uumbi. Amumulombe Jehova kuti amupe busicamba.—Neh. 2:4; Mil. 4:29.

• Amubikkile maano kucoolwe cili coonse ncomukonzya kuba ancico cakukambauka makani mabotu, pele mutabindi pe kutalika kukambauka. Amuuleke kuti mubandi uzumanane kwaciindi cili mbocibede. Ikuti naa mwabinda, muntu ulakonzya kutalikwaya mpoonya akuleka kubandika. Mutatyompwi kuti naa mubandi wamana kamutanamukambaukila muntu. Ikuti naa mulayoowa kutalisya mubandi wakukambauka makani mabotu, amusole kuba acilengwa cakutalisya buyo mibandi kakunyina kuba amakanze aakukambauka. [Amweebelele akubandika kavidiyo kakusaanguna.]

• Amusole kupa bumboni kwiinda mukwaamba kaambo kamwi kajatikizya lusyomo lwanu, kalo kakonzya kupa kuti muntu uumuswiilila ayande kumvwa zinji. Jesu wakaamba kaambo ikakapa kuti mukaintu abuzye mibuzyo. Mpoonya ciindi naakatalika kwaamba makani mabotu, wakali kwiingula buyo mibuzyo njaakabuzya mukaintu. [Amweebelele akubandika kavidiyo kabili, mpoonya mwamana mweebelele akubandika kavidiyo katatu.]