Amutembaule Jehova Abuzuba
1. Ino ncinzi ncobakulwaizyigwa kucita babelesi ba Leza, alimwi ino nkaambo nzi?
1 Mwami Davida wakaamba makanze ngaakajisi aakutembaula Jehova “mazuba oonse” mane kukabe kutamani. (Int. 145:2, 7, 21) Andiswe tujisi twaambo tubotu tweelede kutupa kumutembaula Jehova abuzuba.—Int. 37:10; 145:14, 18; 2 Pet. 3:13.
2. Ino mbuti mikwasyi mboikonzya kutembaula Jehova abuzuba?
2 Kutembaula Jehova Muŋanda Yesu: Tujisi mabbuku manji ngotukonzya kubelesya mumibandi yesu yakumuuya ciindi notulingaula lugwalo lwabuzuba, ciindi ca Kukomba Mumukwasyi alimwi anotulibambila miswaangano yambungano. Mikwasyi minji ijisi bubambe bwakulida antoomwe nociba ciindi comwe buyo abuzuba. Kulida antoomwe kupa kuti banamukwasyi bacikonzye kubandika cakulikwaya alimwi akutembaula Jehova. Mibandi njobatalisya bazyali ilakonzya kubagwasya kulela bana babo “mulwiiyo lwa-Mwami amumilazyo yakwe.”—Ef. 6:4; Dt. 6:5-7.
3. Ino mbuti mbotukonzya kutembaula Jehova notuli abakwesu?
3 Atutembaule Jehova Notuli Abakwesu: Notuli mumulimo wakukambauka naa kumiswaangano yambungano, tulijisi coolwe cakutembaula Jehova antoomwe abasyomima. (Tus. 15:30; Flp. 4:8; Heb. 13:15) Mbokunga toonse tulamuyanda Jehova, tweelede kulikwaya kwaamba mbotulimvwa kujatikizya bubotu bwa Jehova notubandika ambabo.—Int. 106:1.
4. Ino mmuubukkale buli buti momukonzya kutembaula Jehova?
4 Atutembaule Jehova Notubandika Abantu Batasyomi: Nokuba kuti tuli mubukkale butakonzyi kutuzumizya kuunka mumulimo wakukambauka abuzuba, ikubandika mubufwaafwi abasicikoloma, babelesima alimwi abantu bamwi mbotuyaanya ikujatikizya makani aa Jehova alimwi amakanze aakwe kulakonzya kupa kuti bantu bajisi luyandisisyo babe abulangizi. (Int. 27:14; 1 Pet. 3:15) Naakali mulweendo kubelesya ndeke, mucizyi umwi wakakambaukila sinyendonyina wakaumbulizyigwa akukulwaizyigwa kapati amakani ngaakamvwa cakuti wakapa mucizyi ooyu kkeyala anamba yakwe yaluwaile kutegwa bakazumanane amubandi ngobakajisi. Bubi mbobuyaabuvwula munyika, babelesi ba Jehova balazumanana kukambaukila bantu bayanda kuswiililila “makani mabotu loko.” Eeci cipa kuti bantu bamwi babe abulangizi akutalika kutembaula Jehova.—Is. 52:7; Rom. 15:11.
5. Ino nkaambo nzi ncotujisi makanze aakutembaula Jehova, alimwi ino ncinzi cikonzya kucitika?
5 Elo kaka Jehova ulakkomana kubona babelesi bakwe kabamutembaula abuzuba! Mbubwenya bucita zyintu nzyaakalenga nzyotubona ameso, andiswe tulakonzya kuzumanana kutembaula Jehova abuzuba mumaanda eesu, mumbungano alimwi aleelyo notubandika abantu ibatanatalika kumutembaula Jehova.—Int. 19:1-4.