Kwaandaanizigwa Kuti Tube Basikutembaula Bakondwa Nyika Yoonse Mbwiizulwa
“Amutembaule Jehova. Amutembaule, nobalanda ba-Jehova. Amutembaule izina lya-Jehova.”—INTEMBAUZYO 113:1.
1, 2. (a) Kweelena a Intembauzyo 113:1-3, nguni weelela kutembaula kwesu cakusungwaala? (b) Mubuzyo nzi weelela kubuzya?
JEHOVA LEZA ngo Mulengi Mupati wajulu anyika, Muleli Wakoonse-koonse kusikila kutamani. Uleelela cini-cini kuti swebo tusungwaale kumutembaula. Nkakaambo kaako bbuku lya Intembauzyo 113:1-3 ncolitulailila ategwa: “Amutembaule Jehova. Amutembaule, nobalanda ba-Jehova. Amutembaule izina lya-Jehova. Lilumbwe izina lya-Jehova, lino alyoonse mane kukabe kutamani. Kuzwa kubuzwezuba akusikila kumabbililo, izina lya-Jehova lileelede kutembaulwa.”
2 Mbotuli Bakamboni ba Leza tulakkomana kucita boobu. Cilakondelezya kaka kuti Jehova Leza lino-lino uyoocita kuti olu lwiimbo lukkomanisya lwakutembaula ndotwiimba sunu lukazulile nyika yoonse! (Intembauzyo 22:27) Sena jwi lyanu lilamvwigwa munkamu mpati yabaimbi eyi yanyika yoonse? Kuti kakuli boobo, mulikkomene kaka kwaandanizigwa kunyika eyi iitakamantene, iitakwe lukkomano!
3. (a) Ncinzi cipa kuti bantu ba Jehova kabaandeene, kabalibedelede? (b) Munzila nzi motuzandudwe?
3 Ikutembaula Jehova nkotucita calukamantano masimpe kutupa kuti katwaandeene alimwi katulibedelede. Tulaambaula akuyiisya mukuzuminana alimwi tubelesya nzila zikozyenye ikumwaya ‘mpuwo yabubotu bwa Jehova.’ (Intembauzyo 145:7) Inzya, mbotuli bantu ba Jehova balyaabide tulizandudwe kuti tucitile Jehova Leza wesu mulimo. Leza wakaambila bantu bakwe balyaabide bana Israyeli ikwaandaana amasi aakali munsi-munsi ambabo akutasofwaazigwa amicito yamasi aayo. (Kulonga 34:12-16) Wakapa bantu bakwe milawo yakubagwasya kucita boobu. Mbubwena buyo asunu Jehova watupa Jwi lyakwe Lisalala, Ibbaibbele. Malailile andilyo alatutondezya mbotukonzya kwaandaana anyika eyi. (2 Ba-Korinto 6:17; 2 Timoteo 3:16, 17) Tatuzandudwe kwiinda mukubikkwa mumamonastiri alimwi amakkoniventi mbuli bamaalumi balibenga kutakwata alimwi abanakazi balibenga kutakwatwa bamuli Babuloni Mupati. Kutobela cikonzyanyo ca Jesu Kristo, tuli basikutembaula Jehova kubuleya.
Atumwiiye Sikutembaula Mupati Iwa Jehova
4. Ino Jesu wakacipa buti cikonzyanyo cakutembaula Jehova?
4 Jesu kwiina naakaalekaa makanze akwe aakutembaula Jehova. Eci cakamuzandula kuzwa kunyika. Muzikombelo alimwi amutempele mu Jerusalemu wakatembaula zina lya Leza lisalala. Kufwumbwa naa mpaatala aamulundu naa mumbali aa lwizi, kufwumbwa bantu nkobakali kubungana, Jesu wakali kukambauka kubuleya kasimpe ka Jehova. Wakati: “Ndakulumba, Ta, mwami wakujulu aansi.” (Matayo 11:25) Nociba ciindi ncaakali kubetekwa kuli Pontiyo Pilato, Jesu wakati: “Ncendakazyalilwa, ncendakasikila ansi ano, kuti nkalungulule bwini.” (Johane 18:37) Jesu wakaubona mbuwakali kuyandika mulimo wakwe. Kufwumbwa nkwaakabede, Jesu wakali kucitila bumboni kuli Jehova alimwi wakali kumutembaula caantangalala.
5. Nkuuli ni Intembauzyo 22:22 nkoibeleka alimwi tweelede kucita buti?
5 Kubbuku lya Intembauzyo 22:22 tujana kaambo aaka kabusinsimi kajatikizya Sikutembaula Mupati iwa Jehova kakuti: “Lino njoolwiida bakwesu makani aazina lyako, njookutembaula akati kambungano.” Ku Ba-Hebrayo 2:11, 12, imwaapostolo Paulo ubelesya tupango otu kwaamba Mwami Jesu alimwi abaabo Jehova Leza mbaazandula kubulemu bwakujulu. Mbubwena mbuli nguwe, tabausi nsoni kutembaula zina lya Jehova akati ka mbungano. Sena mbotulimvwa aswebo ciindi notujanika kumiswaangano yambungano? Ikutola lubazu kwesu mumiswaangano cakusungwaala kwiinda mukuswiilisisya alimwi amukwaambaula akwiimba, zitembaula Jehova. Pele sena kutembaula kwesu cakukondwa kumanina mpoona awo?
6. Mulimo nzi Jesu ngwaakapa basikwiiya bakwe alimwi mbuti mbobamulemeka Leza aabo bayanda mumuni?
6 Kweelena abbuku lya Matayo 5:14-16, Mwami Jesu wakabatuma basikumutobela kumunika mumuni wabo kutegwa bambi batembaule Jehova. Wakati: “Ndinywe mumuni wanyika. . . . Mumuni wanu umunike kunembo lyabantu, kuti babone milimo yanu mibotu, balemeke Usowanu uuli kujulu.” Ibayanda mumuni bamuletela bulemu Leza. Sena bacita boobu kwiinda mukwaamba akucita zintu zibotu zitondezya lubomba? Peepe, muciindi caboobo balacita obo kwiinda mukulemya Jehova calukamantano. Inzya, basikuyanda mumuni balalyaaba kuli Leza akuba basikutembaula bakondwa. Sena mwatola ntaamu eyi iikondelezya?
Ikukondwa Kuzwa Kukutembaula Jehova
7. Nkaambo nzi ncobakondwa basikutembaula Jehova alimwi nkaambo nzi ncobakakondwa mubuzuba bwa Pentekoste wamu 33 C.E.?
7 Nkaambo nzi basikutembaula Jehova ncobakondwa? Nkaambo kakuti kukondwa mucelo wamuuya uusalala wa Leza. Ku Ba-Galatiya 5:22 kulilembedwe mpoona buyo munsi aa luyando. Basiciiya ba Jesu bamumwaanda wakusaanguna wamyaka bakautondezya ooyu mucelo wamuuya wa Jehova. Mubuzuba bwa Pentekoste wa 33 C.E., ciindi Leza naakatila muuya wakwe kuli basiciiya ba Jesu ibali 120, boonse bakatalika kutembaula Jehova mumilaka yaandeene. Bama Juda basyomi bakaboolede ku Jerusalemu kuzwa kumasi manji ‘bakazingwa akwaankamana.’ Bakati: “Twabamvwa balaamba milimo mipati ya-Leza mumyaambo yesu”! (Incito 2:1-11) Ncinzi cakacitika akaambo kakutembaula Jehova mumilaka minji? Bama Juda alimwi abasikusandulwa kuba ba Juda basika ku 3,000 bakaatambula makani mabotu aa Bwami aajatikizya Mesiya. Bakabbapatizigwa, bakatambula muuya uusalala akusanganya majwi aabo cakusungwaala akuba basikutembaula Jehova bakondwa. (Incito 2:37-42) Elo bakalongezyegwa kaka!
8. Nobwakainda buzuba bwa Petekoste ncinzi ncobakacita Banakristo kuyungizya kukondwa kwabo?
8 Makani alazumanana kuti: “Mazuba oonse bakali kusungweede amoyo omwe muntempele, akukomona mukamu mumaanda aabo, balya zilyo zyabo akubotelwa amyoyo iituba, balalumba Leza akukonda bantu boonse. Mazuba amazuba Mwami wakabayungilila abo abali kufutulwa.” (Incito 2:46, 47) Sena nkuyanzana kwabo antoomwe kwalo alimwi akulya cakulya kwakali kubaletela kukondwa? Peepe, kukondwa kwabo kwini-kwini kwakali kuzwa kukutembaula Jehova Leza buzubaa buzuba. Alimwi kukondwa kwabo kwakaindila ciindi nobakabona zyuulu zyabantu kazitondezya kuyanda kuswiilila mulumbe walufwutuko. Ncimwi buyo andiswe sunu.
Basikutembaula Bakondwa Mumasi Oonse
9. (a) Ndilili alimwi muunzila nzi Leza mwaakatalika kupa bantu bamumasi oonse coolwe cakuswiilila makani aakwe mabotu? (b) Nkaambo nzi muuya uusalala ncowakatilwa kuli Korneliyo abeenzinyina kabatana bbapatizigwa?
9 Jehova taakayanda kuti mulimo wamumuni wababelesi bakwe uyiile buyo mucisi comwe. Aboobo kutalika mu 36 C.E., wakapa coolwe kubantu bamumasi oonse cakuswiilila makani aakwe mabotu. Kwiinda mukulaililwa a Leza, Petro wakaunka kuŋanda yasilumamba mu Hedeni ku Kaisareya. Okuya wakaakujana Korneliyo kali antoomwe abalongwe bakwe amukwasyi wakwe. Nobakali kuswiilisisya kumajwi aa Petro, bakasyoma Jesu mumyoyo yabo. Tuzi buti? Nkaambo muuya uusalala wa Leza wakasikila basyomi abo bamasi. Kanjikanji cipego ca muuya uusalala wa Leza cakali kupegwa buyo musule lyakubbapatizigwa, pele kuciindi eco Jehova wakatondezya kuzuminizya kwakwe kuli baaba batakali bama Juda kabatana kubbapatizigwa. Kuti Jehova naatakacita obo, Petro naatakaba masimpe kuti lino Leza ulabatambula bamasi kuti babe babelesi Bakwe akuti baleelela kubbapatizigwa mumeenda.—Incito 10:34, 35, 47, 48.
10. Mbuti mbocakasinsimwa kuzwa kuciindi cansiku kuti bantu bamumasi oonse bayootembaula Jehova?
10 Kuzwa kuciindi cansiku, Jehova wakasinsima kuti bantu bamumasi oonse bayoomutembaula. Uyooba abasikumutembaula bakondwa mumasi oonse. Ikutondezya kuti masimpe aya, mwaapostolo Paulo wakazubulula businsimi kuzwa ku Magwalo aa Cihebrayo. Wakaambila mbungano ya Banakristo yamanyika aandeene ku Roma kuti: “Amusamausyanye, mbubonya mbuli Kristo mbwatusamausya kubulemu bwa-Leza. Ndaamba kuti Kristo wakaba mulanda wabasibupalule nkaambo kalusinizyo lwa-Leza, kuti azuzye insyomezyo nzibakapegwa bamataata, akuti bamasi balemeke Leza nkaambo kalweetelelo lwakwe, mbuli mbukulembedwe [ku Intembauzyo 18:49] kuti, nkaambo kaako nzookutembaula akati kabamasi, nzooimbila izina lyako. Alimwi [ku Deuteronomo 32:43] kuti, Amusekelele nubamasi, antoomwe abantu bakwe. Alimwi [ku Intembauzyo 117:1] kuti, amutembaule Jehova numasi oonse, amumutembaulisye, numisyobo yoonse.”—Ba-Roma 15:7-11.
11. Mbuti Leza mbwaagwasya bantu bamumasi oonse kwiiya kasimpe kakwe, alimwi ncinzi cacitika?
11 Bantu tabakonzyi kutembaula Jehova calukamantano ccita buyo kuti babikka lusyomo lwabo muli Jesu Kristo walo Leza ngwabikkide kuti alele bantu mumasi oonse. Ikubagwasya kuziba kasimpe Kakwe ikasololela kubuumi butamani, Leza watalisya progilamu yakuyiisya yamasi aandeene-andeene. Ulapa busolozi kwiinda mukabunga kamuzike musyomesi. (Matayo 24:45-47) Ncizi cacitika? Majwi aakondedwe aainda kumamiliyoni osanwe alaimba kutembaula Jehova mumasi aainda ku 230. Alimwi mamiliyoni aambi alatondezya kuti alayanda kucita obo. Amubone bakajanika ku Ciibalusyo mu 1996: 12,921,933. Cilakondelezya!
Inkamu Impati ya Basikutembaula Bakondwa Yakasinsimwa
12. Ncilengaano nzi ciyoosya ncaakabona mwaapostolo Johane alimwi caamba nzi?
12 Mucilengaano, mwaapostolo Johane wakabona “inkamu impati” yamumasi oonse. (Ciyubunuzyo 7:9) Mutwe nzi wantembauzyo ezi ziimbwa ankamu mpati antoomwe abananike ba Leza basyeede? Johane ulatwaambila kuti: “Lufutuko lulazwa kuli-Leza wesu uukede acuuno cabwami aku-Mwanambelele.” (Ciyubunuzyo 7:10) Eci cilaambwa cabusungu mumbazu zyoonse zyanyika. Katujisi amalala calukamantano tutembaula Leza kuti Muleli Wakoonse-koonse akulumbila cakukkomana kujulu aansi kuti lufwutuko lwesu “lulazwa” kuli nguwe aku Mwanaakwe, Mwanaambelele, Jesu Kristo. Cilagambya ncaakabona mwaapostolo Johane mucilengaano cikankamanisya cankamu mpati! Alimwi cilagambya sunu cakubona akuba lubazu lwankamu mpati eyo Johane njaakabona!
13. Ncinzi caandaanya bantu ba Jehova kuzwa kunyika?
13 Mbotuli babelesi ba Jehova, cakukkomana tujisi zina lyakwe. (Isaya 43:10, 12) Akaambo kakuba Bakamboni ba Jehova citupa kuti katwaandeene anyika. Cilakkomanisya kaka kubona kuti tujisi zina lya Leza lilizanduzide alimwi akucita mulimo wakwe wabuleza kuti ube mulimo wabuumi bwesu! Makanze mapati aa Jehova aakulomya zina lyakwe lisalala alimwi akusalazya bulelo bwakwe bwakoonse-koonse kwiinda mu Bwami bwapa kuti buumi bwesu bube kabotu. Alimwi watugwasya kubaa busena mumakanze aakwe aabuleza kujatikizya zina lyakwe a Bwami. Eci wacicita munzila zyotatwe.
Kupegwa Kasimpe
14, 15. (a) Ninzila nzi yomwe Leza njaatugwasya kubaa busena mumakanze aakwe aabuleza kujatikizya zina lyakwe a Bwami bwakwe? (b) Ino Bwami bwakakkazikwa buti mu 1914 C.E. kwaandaana aboobo bwakasandulwa mu 607 B.C.E.?
14 Kutaanguna, Jehova wapa bantu bakwe kasimpe. Makani aayubunudwe aakkomanisya kapati ngakuti Bwami bwakwe bwakatalika kulela mu 1914. (Ciyubunuzyo 12:10) Eyi mfwulumende yakujulu iliindene a bwami bwacikonzyanyo bwakali mu Jerusalemu mwalo bami bamumulongo wa Davida mubakali kupegwa bwami. Obo bwami bwakaatulwa elyo kutalika mu 607 B.C.E., Jerusalemu wakali kulelwa abulelo bwa Bamasi basinguzu banyika yoonse. Ibwami bupya Jehova mbwaakatalisya mu 1914 mbulelo bwakujulu bwalo butakwe nobuyoolelwa aumbi pele Jehova alimwi taakwe nobuyoonyonyoonwa pe. (Daniele 2:44) Alimwi bulelo bwanjiyo buliindene. Munzila nzi? Ibbuku lya Ciyubunuzyo 11:15 lilaingula ategwa: “Kwakali majwi mapati mujulu, aati, Bwami bwaansi bwaba bwa-Mwami wesu abwa-Kristo wakwe, nkabela uyooendelezya lyoonse mane kukabe kutamani.”
15 ‘Bwami bwa-Mwami wesu abwa-Kristo wakwe’ bweendelezya bantu nyika yoonse mbwiizulwa. Obu Bwami bwa bulelo bwa Jehova ibubikkilizya Mwanaakwe Mesiya alimwi abanabokwabo Jesu ibali 144,000 balo bunji bwabo lino babusidwe kubulemu bwakujulu tacili cintu cakuziba buyo pe—icintu cakwaamba buyo calo basikwiiya ncobanga bayanda kubandika. Peepe, Bwami obu bwakujulu nimfwulumende ini-ini. Alimwi bulangizi bwesu bwakupona kukabe kutamani katulondokede akaambo kakulela kwanjiyo kutupa kaambo kakuzumanana kukondwa. Ikupegwa kasimpe kali boobu ka Jwi lya Jehova kutupa kuti katwaamba zintu zibotu kujatikizya njiyo. (Intembauzyo 56:10) Sena mulacita obo lyoonse, kwaambila bantu boonse kuti Bwami bwabu Mesiya bwa Leza bulalela lino kujulu?
Ikugwasyigwa a Muuya Uusalala Alimwi a Bunyina bwa Nyika Yoonse
16, 17. Ninzila nzi yabili ayatatu Leza njabelesya kutugwasya kuti tube alubazu mumakanze aakwe aabuleza?
16 Inzila yabili Leza njaatugwasya kubaa busena mumakanze aakwe aabuleza nkwiinda mukutupa muuya wakwe uusalala walo uutupa kuti tuzyale micelo yanguwo mibotu mubuumi bwesu akuba bantu bazuminidwe kulinguwe. (Ba-Galatiya 5:22, 23) Kunze lyaboobo Paulo wakalembela Banakristo bananike ategwa: “Muuya ngututambwide . . . ngu-Muuya uuzwa kuli-Leza, kuti tumvwisye zintu nzitwapegwa caluzyalo lwa-Leza.” (1 Ba-Korinto 2:12) Kwiinda mukutobela muuya wa Jehova, toonse tulakonzya kuziba lino akuziteelela zintu zibotu nzyaatupa calubomba—zisyomezyo zyakwe, milawo, njiisyo azimwi-zimwi.—Amweezyanisye Matayo 13:11.
17 Inzila yatatu Leza njatugwasya, tulijisi bunyina bwanyika yoonse mbwiizulwa abubambe bubotu bwakukomba bwambunga bwa Jehova. Mwaapostolo Petro wakaamba ciindi naakatwaambila kuti “amuyande babunyina.” (1 Petro 2:17) Mukwasyi wesu mubotu wamanyika aandeene wabakwesu abacizi utugwasya kubelekela Jehova alukkomano lunji mbubwenya bbuku lya Intembauzyo 100:2 mbolyaamba kuti: “Amukombe Jehova cakukondwa, amuboole kubusyu bwakwe anyimbo.” Kapango ka 4 kalayungizya kwaamba kuti: “Amunjile kumilyango yakwe akulumba, amucikalilo cakwe akutembaula. Amumulumbe akulongezya izina lyakwe.” Aboobo kufwumbwa naa tukambauka kubuleya naa kujanika kumiswaangano yesu, tulakkomana. Twalujana kaka luumuno akuliiba mumbuwa zya Jehova zya tempele ya kumuuya!
Amutembaule Jehova Cakukondwa!
18. Nkaambo nzi ncotweelede kukondwa mukutembaula Jehova nokuba kuti tulapenzyegwa naa mapenzi aambi aatusikila?
18 Kufwumbwa naa mbukkale buli buti, kupenzyegwa naa mapenzi amwi aakonzya kutusikila, atukondwe kuti tuli muŋanda ya Jehova yakukombela. (Isaya 2:2, 3) Amuyeeye kuti kukondwa nciimo camumoyo. Bakwesu abacizi Banakristo bakusaanguna bakali basikutembaula Jehova bakondwa nokuba kuti bakalaa buyumuyumu bunji alimwi akusowekelwa. (Ba-Hebrayo 10:34) Basyomima sunu bali buyo mbuli mbabo.—Matayo 5:10-12.
19. (a) Malailile nzi aaindulukwa-indulukwa aatukulwaizya kutembaula Jehova? (b) Buumi bwesu butamani buyeemi anzi alimwi tukanzide kucita nzi?
19 Toonse swebo notubelekela Jehova tulayanda kutobela malailile aa Bbaibbele aakumutembaula. Ibbuku lya Ciyubunuzyo lilaindulula-indulula kubikka ntembauzyo zya Leza antoomwe ajwi lyakuti “Aleluya!” (Ciyubunuzyo 19:1-6) Mutupango tuli cisambomwi twa Intembauzyo 150 tulaambilwa ziindi zili 12 kuti tutembaule Jehova. Oku nkulomba kwanyika yoonse kuzilenge zyoonse ikusangana kwiimba cakukondwa ntembauzyo zya Jehova. Buumi bwesu butamani buyeemi akusangana kwiimba Aleluya mupati! Inzya, bantu balikke bayoopona kukabe kutamani mbabaabo batembaula Jehova cakutaleka. Aboobo tulikanzide kuswenenena kumbungano iisyomeka ya Jehova yanyika yoonse mamanino mbwaasika afwaafwi. Mpoonya tulakonzya kulangila kwaabona majwi aamamanino aa Intembauzyo 150 nkwaazuzikizigwa cakumaniina aakuti: “Kufumbwa zilenge ziyooya zitembaule Jehova! Amutembaule Jehova!”
Inga Mwaingula Buti?
◻ Ncinzi cipa kuti bantu ba Jehova kabali bantu baandeene, ibalibedelede?
◻ Nkaambo nzi ncobakondwa babelesi ba Jehova?
◻ Ncinzi citwaandaanya kuzwa kunyika?
◻ Munzila nzi zyotatwe Leza nzyaatugwasya kubaa busena mumakanze aakwe aabuleza?
[Cifwanikiso icili apeeji 27]
Kufwumbwa nkwaakabede, Jesu wakacita bumboni kuli Jehova alimwi wakali kumutembaula mubuleya