Amuzibelesye Kabotu Zyoolwe Nzyomujisi Zyakukambauka Mulumbe wa Bwami!

1. Nciiyo nzi ncotukonzya kwiiya kucikozyanyo ca Davida?

¹ Mwami Davida muntu iwatakazumizya bukkale bwakwe kumunyonganya. Mucikozyanyo, Davida wakali kuyanda kuyakila Jehova ŋanda. Ciindi naakakasyigwa kucita boobo, Davida wakacinca mbaakani zyakwe akutalika kugwasya Solomoni kubamba zintu zyakuyasya tempele. (1 Bam. 8:17-19; 1 Mak. 29:3-9) Muciindi cakubikkila maano kuzintu nzyaatakali kukonzya kucita, Davida wakabikkila maano kuzintu nzyaakali kukonzya kucita. Mbuti mbotukonzya kwiiya cikozyanyo ca Davida notuyandaula nzila zyakwaambilizya mulumbe wa Bwami?

2. Ino ncinzi ncotweelede kulanga-langa?

² Amucite Nzyomukonzya: Banji baubya-ubya buumi bwabo kutegwa bacite bupainiya bwakugwasyilizya naa bwaciindi coonse. (Mt. 6:22) Sena inga mwabasangana? Nomupaila akubulanga-langa bukkale bwanu, mulakonzya kubona kuti “mulyango mupati uutola kumulimo” ulijalukide kulindinywe. Ikuti kacili boobo, amucibelesye kabotu coolwe eeco!—1 Ko. 16:8, 9.

3. Ino nzyoolwe nzi zyakukambauka nzyotukonzya kubelesya nokuba kuti bukkale bwesu tabutuzumizyi kucita bupainya?

³ Pele ino mbuti kuti bukkale bwanu kabutamuzumizyi kucita bupainiya? Amubikkile maano kuzyoolwe zimbi nzyomujisi. Mucikozyanyo, ikuti mulimo wanu wakumubili umupa coolwe cakuswaangana abantu batali basyomi, sena inga tiimwacibelesya coolwe eeco kubakambaukila? Naa ikuti kamuciswa, sena inga tiimwacibelesya coolwe eeco kukambaukila basilisi ibamusilika? Amuyeeye kuti kuli bubambe kulibaabo ibatacikonzyi kubeleka kabotu akaambo kakucembaala naa kuciswa kapati bwakulipoota ciindi ncobabeleka mumulimo wamumuunda mutubeela twamaminiti aali 15. Nomulemba lipooti yamulimo wanu wamumuunda mwezi amwezi, amubone kuti mwabikkilizya aciindi ncomwakabeleka mubukambausi bwamukwiizya alimwi amabbuku aali woonse ngomwakamwaya, kubikkilizya amatulakiti aasiyene-siyene, tupepa twakutamba bantu ku Ciibalusyo alimwi akumuswaangano wacooko. Muyoogambwa kubona mbocili cinji ciindi ncomwakabeleka nimwakajana zyoolwe zyakucita bukambausi bwamukwiizya.

4. Ino makanze nzi ngomujisi?

⁴ Kufwumbwa naa bukkale bwesu buli buti, atucibelesye coolwe cili coonse ncotujisi kukambauka makani mabotu. Twacita boobo, tuyookkutila ikuzyiba kuti twacita zyoonse nzyotukonzya akaambo ka Bwami.—Mk. 14:8; Lk. 21:2-4.