Sena inga Mwanjila ‘Mumulyango Mupati Wakucita Milimo’?
1. ‘Mulyango nzi mupati wakucita milimo’ uujalukide kulindiswe?
1 Ciindi “mulyango mupati wakucita milimo” nowakajalulwa kumwaapostolo Paulo, wakayandisya kubelesya ciindi eeci kuti azumanane mumulimo wakukambuka nokuba kuti bantu banji bakali kumukazya. (1 Kor. 16:9) Mazuba aano basikumwaya basika ku 642,000 nyika yoonse banjila mumulyango mupati wakucita milimo kwiinda mukuba bapainiya baciindi coonse.
2. Ino nkaambo nzi ncociyandika kubulanga-langa bukkale bwesu ciindi aciindi?
2 Bukkale Bulacinca: Nokuba kuti bukkale bwesu lino bulakonzya kupa kuti nguzu zyesu zyakucita milimo ziceye, bukkale bulakonzya kucinca. Aboobo, cilayandika kuti katubulanga-langa bukkale bwesu ciindi aciindi ikutali kulindila ciindi ncotuyeeyela kuti bukkale bwesu bunooli kabotu. (Muk. 11:4) Sena muli mukubusi uuli aafwaafwi kumanizya cikolo cakusekondali? Sena muli muzyali uujisi bana bali aafwaafwi kutalika cikolo? Sena muli aafwaafwi kucileka mulimo wanu wakumubili? Kucinca ooku kulakonzya kumupa ciindi cinji akumuzumizya kutalika mulimo wabupainiya bwaciindi coonse. Mucizi umwi wakajisi penzi lyakuciswa-ciswa wakasala kulilembya mulimo wabupainiya naakajisi myaka yakuzyalwa iili 89. Ino nkaambo nzi? Mbwaanga tanaakakkala mucibbadela kwamwaka oonse, wakayeeya kuti bukkale bwakwe bwakali kumuzumizya kucita bupainiya.
3. Mbuti bamwi mbubacinca bukkale mubuumi bwabo kutegwa bacite bupainiya bwaciindi coonse?
3 Paulo kusaanguna wakali kuyanda kuswaya ibanyina baku Korinto. Pele wakacinca mizeezo yakwe akaambo kamakani mabotu. Ibanji bacita mulimo wabupainiya bwaciindi coonse mazuba aano bakacinca bukkale bwabo kutegwa bacikonzye kucita bupainiya. Bamwi baba abuumi buuba-uba cakuti kubeleka mulimo waciindi cisyoonto buyo nkokuyandika kutegwa kabacikonzya kubbadelela zintu ziyandika mubuumi bwabo. Balaukkomanina mulimo wabo. (1 Tim. 6:6-8) Banabukwetene bamwi bacinca bukkale mubuumi bwabo kutegwa mulumi alikke kali nguubeleka, calo cipa kuti mukaintu acikonzye kucita bupainiya.
4. Ncinzi ncotweelede kucita ikuti katuyeeya kuti tatukonzyi kukkwanya mawoola aayandika?
4 Mutafwambaani kutyompwa ikucita bupaniya akaambo kakuyoowa kuti tamukonzyi kukkwanya mawoola aayandika. Kukkwanya mawoola aayinda buyo kuli obile abuzuba nceciyandika. Ikuti muyeeya kuti tamukonzyi kucita oobo, amusoleke kucita mulimo wabupainiya bwakugwasilizya kwamwezi omwe naa yobile pesi kamujisi makanze aakukkwanya mawoola aali 70. Eeci ciyoomugwasya kuba alukkomano luboola akaambo kakucita bupainiya. (Int. 34:8) Amubandike abaabo bacita bupainiya aciindi eeco. Balakonzya kuti ambweni bakabuzunda buyumu-yumu buli mbuli bwanu. (Tus. 15:22) Amumulombe Jehova kuti alongezye kusoleka kwanu kwakuyungizya ciindi ncomutola mumulimo.—1 Joh. 5:14.
5. Nkaambo nzi mulimo wabupainiya ncouli mbaakani iigwasya?
5 Mbaakani Iigwasya: Kubeleka kamuli bapainiya baciindi coonse kuletela zilongezyo zinji. Mulimo ooyu upa kuti mube alukkomano lunji luboola akaambo kakupa. (Inc. 20:35) Mulimo wabupaniya uuyoopa kuti muyaambele mukupandulula Jwi lya Leza lyakasimpe mbukweelede. (2 Tim. 2:15) Muyooba azyoolwe zinji zyakubona Jehova mbwagwasya. (Inc. 11:21; Flp. 4:11-13) Mulimo wabupainiya alimwi uyoomugwasya kuba abube bwakumuuya, mbuli kuliyumya alimwi uyoomugwasya kuswenenena kuli Jehova. (Jak. 4:8) Sena inga mwaunjila mulyango ooyu mupati wakucita milimo akuba mupainiya waciindi coonse?