“Mulakonzya Kuba Bapainiya!”
1. Ino mbuti mucizyi umwi mbwaakalimvwa kujatikizya mulimo wabupainiya?
1 Ba Kathe B. Palm bakaamba kuti: “Kunyina mulimo uumbi wakali kukonzya kundikkomanisya naa kundiyumya kumuuya.” Bakali bapainiya kwamyaka minji alimwi bakali kukambaukila mucisi coonse ca Chile cili ku South America. Amuyeeye buyo mbobakkomana aabo bali mumulimo waciindi coonse, ambweni kuli bakamwaambila kale kuti: “Mulakonzya kuba bapainiya!”
2. Amupandulule kaambo ikapa kuti katukkomana notucita zyintu zyakumuuya.
2 Mulimo Uukomanisya: Jesu iwakatusiila cikozyanyo cibotu wakali kukkomana kubeleka mulimo wa Baswaabo. (Joh. 4:34) Aboobo cakusinizya, Jesu wakabayiisya basikumutobela kuti lukkomano lwini-lwini lulakonzya kujanwa kwiinda mukubeleka milimo iijatikizya bukombi bwa Jehova. Tulakkomana notubeleka milimo iimukkomanisya Jehova. Kuyungizya waawo, tulakkomana kapati ikubelesya ciindi cesu, nguzu zyesu azyintu nzyotujisi kugwasya bamwi.—Inc. 20:31, 35.
3. Ino mbubotu nzi mbotukonzya kujana kuti twayungizya ciindi ncotubeleka mumulimo wakukambauka?
3 Ikuti katubeleka ciindi cilamfwu mumulimo wakukambauka, tunakukkomana kapati kutalisya akweendelezya ziiyo zya Bbaibbele. Noliba leelyo notujana bantu bakonzya kulibonya kuti balibbaatidwe naa tababikkili maano, tulakonzya kujana kuti ibantu mucilawo cesu balakonzya kuswiilila ikuti twatalika mulimo wabupainiya. Bapainiya bakkwanya mwaka omwe balakonzya kuunka ku Cikolo Camulimo Wabupainiya alimwi akubelesya nzyobakaiya. (1 Tim. 2:15) Ikuti mwaliyumya, mulakonzya kusyanga mbuto zyakasimpe ziya kuzyala micelo.—Muk. 11:6
4. Ino ncinzi ncobeelede kuyeeya bakubusi bayanda kumanizya cikolo?
4 Bakubusi: Nomuyanda kumanizya cikolo, sena mulaa kuyeeya ncomuya kucita kumbele? Bunji bwaciindi ncomujisi lino mucibelesya kucita zyintu zyakucikolo. Ino mwaakumanizya cikolo muna kucibelesya buti ciindi ncomwakali kucita zyintu zyakucikolo? Muciindi cakubeleka mulimo wakumubili, sena tamukonzyi kucibikka mumupailo kuti mube bapainiya baciindi coonse? Zyintu nzyomuya kwiiya mumulimo ooyu—kukambaukila bantu baindene-indene, kuliyumya mumapenzi, kukkalikana akuyiisya bamwi—ziya kumugwasya mubuumi bwenu.
5. Ino mbuti bazyali abamwi mumbungano mbobakonzya kukulwaizya bana kubeleka mulimo wabupainiya?
5 Nobazyali, sena mulabagwasya bana banu kuti bakabeleke mulimo waciindi coonse? Majwi ngomwaamba alimwi acikozyanyo canu cibotu zilakonzya kubagwasya kubikka zyintu zyabwami mubusena bwakusaanguna. (Mt. 6:33) Ray, iwakatalika mulimo wabupainiya naakamanizya cikolo wakaamba kuti: “Bamaama bakali kwaamba kuti kubeleka mulimo wabupainiya cipa kukkomana mubuumi.” Boonse mumbungano balakonzya kukulwaizya bamwi kubeleka mulimo wabupainiya kwiinda muzyintu nzyobaamba akucita. Jose, uuzwa kucisi ca Spain wakaamba kuti: “Bakwesu bamumbungano nkondizwa bakali kubona kuti mulimo wabupainiya ngomulimo mubotu ngobakonzya kubeleka bakubusi. Ikwaamba bubotu bwamulimo wabupainiya alimwi alugwasyo ndobakali kupa, zyakandikulwaizya kuti andime nditalike mulimo wabupainiya.”
6. Ino ncinzi ncotweelede kucita ikuti tulimvwa kuti tatukonzyi kubeleka mulimo wabupainiya?
6 Kuzunda Zisinkilizyo: Ino mbuti kuti mwaamba kuti, ‘Tandiyandi kubeleka mulimo wabupainiya.’ Ikuti naa mbomulimvwa oobu, amupaile kuli Jehova akumwaambila mbomulimvwa. Mulakonzya kumwaambila kuti, ‘Tandizyi naa ndeelede kubeleka mulimo wabupainiya, pesi ndiyanda kucita cikonzya kukukkomanisya.’ (Int. 62:8; Tus. 23:26) Mwamana kucita boobo Leza ulakonzya kumusolweda kwiinda mu Jwi lyakwe ambunga. Bunji bwabapainiya baciindi coonse bakasaanguna kucita bupainiya bwakugwasyilizya, alimwi lukkomano ndobakajana lwakabapa kuti batalike bupainiya bwaciindi coonse.—Int. 34:8.
7. Ino ncinzi ncotweelede kucita ikuti katuyeeya kuti tatukonzyi kukkwanya mawoola aali 70 aayandika amwezi?
7 Ino ncinzi ncomweelede kucita ikuti naa muyeeya kuti tamukonzyi kukkwanya mawoola aali 70 aayandika amwezi? Amubandike abapainiya bakali kulimvwa boobo. (Tus. 15:22) Mwamana, amulembe milongo iikonzya kumugwasya. Mulakonzya kujana kuti kuliimya zyintu zimbi zitayandiki kapati kutegwa mujane ciindi cakubeleka mumulimo wakukambauka tacikatazyi mbuli mbomwakali kuyeeya.—Ef. 5:15, 16.
8. Ino nkaambo nzi ncotweelede kuzilanga-langa zyintu kwainda ciindi?
8 Amuzilange-lange Zyintu Alimwi; Bunji bwaziindi, zyintu zitucitikila zilacinca. Aboobo, tweelede kuzilanga-langa zyintu alimwi kwainda ciindi. Mucikozyanyo, sena muyanda kucileka mulimo wakumubili? Ba Randy ibakafwambaana kucileka mulimo baamba kuti: “kufwaambana kucileka mulimo kwakandigwasya kuti nditalike bupainiya bwaciindi coonse antoomwe abakaintu bangu, alimwi catupa coolwe cakubelekela kubusena kubulide basikumwaya. Ndalongezyegwa kapati akaambo kakusala nkondakacita, pesi ciinda zyoonse ncakuti ndijisi manjezyeezya aasalala.”
9. Ino ncinzi ncobeelede kucita banabukwetene?
9 Banabukwetene bamwi balilingula akujana kuti boonse bobilo tabeelede kubeleka mulimo wakumubili. Masimpe, eeci caamba kuti banamukwasyi beelede kuubya-ubya buumi bwabo, pesi kucita boobo kulagwasya kapati. Ba John ibajisi bakaintu bakacileka kubeleka caino-ino kutegwa bayungizye ciindi ncobabeleka mumulimo wakukambauka bakaamba kuti: “Cilandikkomanisya kapati kuzyiba kuti bakaintu bangu bacita zyintu zyakumuuya abuzuba.”
10. Ino ncinzi cibapa kubeleka mulimo wabupainiya Banakristo?
10 Citondezyo Caluyando Alusyomo: Mulimo wakukambauka ngomulimo uuyandika kapati ngwaakatupa Jehova. Oobu bweende bwazyintu bulanyonyoonwa ino-ino, alimwi balikke baita zyina lya Jehova mbabayoofwutulwa. (Rom. 10:13.) Ikuyanda Leza akumulumba akaambo kazyintu zyoonse nzyatucitila, kutukulwaizya kubeleka mulimo wakukambauka ngwaakatupa kwiinda mu Mwanaakwe. (Mt. 28:19, 20; 1 Joh. 5:3) Kuyungizya waawo, ikusyoma kuti tukkala mumazuba aakumamanino kweelede kupa kuti tuubeleke camoyo woonse mulimo wakukambauka nokucili ciindi, muciindi cakubelesya zyintu zyaansi cakumaninina.—1 Kor. 7:29-31.
11. Ino tweelede kulimvwa buti bamwi nobatwaambila kuti inga twaba bapainiya?
11 Tatubeleki mulimo wabupainiya bwaciindi coonse akaambo buyo kakukulwaizyigwa kubeleka mawoola manji, pele tulacita oobo akaambo kakuti twakalyaaba kuli Leza. Aboobo, ikuti umwi wamwaambila kuti mulakonzya kuba bapainiya, mweelede kukkomana. Alimwi amwaapailile makani aaya kutegwa mubasangane aabo bacita mulimo ooyu uukkomanisya.
[Majwi aakwelelezya sikubala aali apeeji 4]
Nobazyali, sena mulabagwasya bana banu kuti bakabeleke mumulimo waciindi coonse?
[Majwi aakwelelezya sikubala aali apeeji 5]
Mulimo wakukambauka ngomulimo uuyandika kapati ngwaakatupa Jehova.