Mulimo Wabupainiya—Sena Inga Mwaucita?
1 “Kunyina ncenga ndeezeezya kuti inga ndacita kunze lyaceeci. Taakwe cimbi ncenga ndeezeezya cinga candiletela lukkomano oolu.” Nguni wakaamba majwi aaya? Ngumwi wa Bakamboni ba Jehova bali myaanda-myaanda yazyuulu ibacita bupainiya bwaciindi coonse kuti ube mulimo wabo uukkomanisya mubukkale bwabo. Sena kuli nomwakakkala ansi akuyeeyesya naa inga mwacikonzya kucita bupainiya? Mbwaanga twakalyaaba camoyo woonse kuli Jehova, tweelede kubona naa inga twayaambele mukumwaya mulumbe mubotu wa Bwami. Kamujisi amakanze aya, amulibuzye mibuzyo banji njobabuzya kujatikizya mulimo wabupainiya.
MUBUZYO 1: “Bamwi baamba kuti bupainiya tabali boonse banga babucita. Ino inga ndaziba buti kuti inga ndabucita?”
2 Oyu mubuzyo inga waingulwa kweelana abukkale alimwi azintu zimwi zimwaangilila nzyomulaililwa kucita a Magwalo. Kuli banji banga tabakonzyi kubeleka mawoola aali 70 amwezi mumulimo akaambo kakuciswa-ciswa naa ciimo ncobabede lino. Atwaambe mbuli bacizi banji Banakristo basyomeka ibakwetwe alimwi bamatumbu. Balatola lubazu mumulimo kanjikanji kweelana ambobacikonzya. Cakonzeka, balacita bupainiya bwakugwasilizya mumwezi omwe naa minji mwaka amwaka kabajana lukkomano luboola akaambo kakuyungizya mulimo wabo mumuunda. (Gal. 6:9) Nokuba kuti tabakonzyi kuba bapainiya baciindi coonse caino, balakulwaizya muuya wabupainiya, elyo ncoolwe kubaa mbabo mumbungano aaba basikumwaya basungweede bamakani mabotu.
3 Kulubazu lumwi bakwesu abacizi banji ibatajisi mikuli minji iibaangilila balijulila mulyango wakucita mulimo wabupainiya kwiinda mukubambulula zintu zyakucita. Ino yebo mbuti? Sena uli mukubusi wakamanizya cikolo? Sena muli bakaintu balaa mulumi uukonzya kusanina kabotu mukwasyi? Sena muli banabukwetene ibatajisi bana bakulela? Sena mwakacileka kubeleka mulimo wakunyika? Ikucita bupainiya naa pe ncintu muntu amuntu ncayelede kulisalila. Mubuzyo ngwakuti, Sena inga mwasola kujana nzila yakucita bupainiya mubuumi bwanu?
4 Saatani ubelesya nyika kutupa kuti tujate bubi azintu zimwi akutucita kuti tusyaanikizigwe azintu zyakumubili nzyotuyanda. Ikuti katukanzide kutaba banyika, Jehova ulatugwasya kubikkila maanu kusaanguna kuzintu zya Bwami akukonzya kunjila milimo yoonse yateokrasi iikonzeka kulindiswe. Ikuti kamukonzya kujana ciindi cakucita bupainiya, ino nkaambo nzi ncomutacitili oobo?
MUBUZYO 2: “Ino inga ndaziba buti kuti nookonzya kulisanina ndanooli mumulimo waciindi coonse?”
5 Masimpe kuti mumasi manji mawoola aabelekwa nsondo ansondo kuti muntu kajana mali aakuligwasya ayungizigwa myaka yainda. Nokuba boobo banji bali kucita bupainiya kwamakumi aamyaka, elyo Jehova wazumanana kubagwasya. Ikutegwa tuzwidilile mubupainiya, tuyandika lusyomo amuuya wakulyaaba. (Mt. 17:20) Tulasyomezegwa ku Intembauzyo 34:10 kuti ‘abo bayandaula Jehova tabakabuli cintu cibotu neciba comwe.’ Kufwumbwa muntu uunjila mulimo wabupainiya weelede kucita oobo alusyomo lunji lwakuti Jehova ulamugwasya. Eeco ncali mukucita kubapainiya basyomeka koonse-koonse! (Int 37:25) Aino kweelana acaambwa ku 2 Ba-Tesalonika 3:8, 10 alimwi a 1 Timoteo 5:8, ibapainiya tabeelede kulangila kuti bamwi banoobagwasya kumali.
6 Muntu uuli woonse uuyeeya kucita bupainiya weelede kucita mbuli mbwaakaamba Jesu kuti: ‘Akale ansi sansi, abale mali.’ (Lk. 14:28) Ikucita boobo citondezya busongo. Amukanane abaabo ibazwidilila kucita bupainiya kwamyaka minji. Amubabuzye bamwaambile Jehova mbwaali kubagwasya. Mulangizi wanu wabbazu ngupainiya uuzibide uunga wakkomana kumupa malailile aambokuzwidililwa mumulimo waciindi coonse.
7 Muntu taakwe nanga wabona kapati kululama kwacisyomezyo ca Jesu cili kuli Matayo 6:33 kusikila walibikka mumaanzaa Jehova. Mupainiya umwi uusyomeka wakati: “Mebo amweenzuma ngotwakali kubeleka limwi mubupainiya notwakasika abusena mpotwakatumidwe kubelekela, twakajisi buyo cisyumani cisyoonto, itufwuta twakulambika acinkwa alimwi teetwakajisi mali pe. Cakulya coonse twakacimana acilalilo, elyo twakati, ‘Lino taakwe ncotuya kulya bwaca.’ Twakacipailila eci, tumane twaya kukulala. Cifwumofwumo, Kamboni umwi munyenzi wakatuswaya, walipandulula wati, ‘Ndalikupaila kuti Jehova atume bapainiya. Lino tulakonzya kubelekelaamwi buzuba boonse, pele mbwaanga ndikkala muminzi kule, ndilalyaa ndinywe cikoboko, elyo ndaletelela acakulya eci cakuti tulye toonse.’ Kwakali nyama nji kapati alimwi acisyumani.” Anu Jesu ncaakatusyomezya kuti ‘tutalibiliki kubuumi bwesu, kuti tukalyenzi?’ Mpoonya wakayungizya kuti: “Nguni akati kanu uulibilika uukonzya kukomezya ciimo cakwe nikaba kakokola komwe?”—Mt. 6:25, 27.
8 Inyika motubede iyabwiindila mukuyandisya lubono. Eeci cili mukutusinikizya kuti andiswe tutobele muuya oyu. Pele, kubaa luyando lweelede lwamulimo waciindi coonse kulatupa kuti tukondwe azintu buyo zisyoonto zyakumubili. (1 Tim. 6:8) Ibapainiya bapona buumi butaduli alimwi beendelezya kabotu zintu bajisi ciindi cinji cakubeleka mumulimo elyo balakkomana kapati alimwi mbayumu munzila yakumuuya kukuyiisya bamwi kasimpe. Nokuba kuti tabasoleki kupona buumi bwakulisukata, ikululanga munzila yeelede lubono kwabapa kuti babe aazileleko zyakucita bupainiya.
9 Ikuti naa mwabona kuti tukkede mumazubaa mamanino akuti ciindi cili mukumana canyika eyi mbyaabi, mulakulwaizigwa munzila yakumuuya kulisungula kukambauka makani mabotu kufwumbwa kwajanika ciindi. Kwiinda mukusola alimwi kulingula ciimo canu kujatikizya zintu zyakumubili nzyomuyandika alimwi akubikka zintu mumaanzaa Jehova, inga mwajana kuti mulakonzya kumubelekela ciindi coonse. Nokuba kuti inga mwayandika kuliimya zintu zimwi zyakumubili kutegwa mucite bupainiya, Jehova uyoomuleleka kapati.—Int. 145:16.
MUBUZYO 3: “Ndemukubusi, nkaambo nzi ncondeelede kusala mulimo wabupainiya?”
10 Nomuli mumyaka yamamanino yalwiiyo lwanu, mutalika kuyeeya zyabukkale bwanu kumbele aamazuba. Muyanda kuti mukakkale kabotu, cakuliiba kamukkomene. Basilulayo muzikolo balasoleka kumukulwaizya kusala mulimo uuvwozya mali manji uuyanda kuzumanana kwamyaka minji mulwiiyo lwamuzikolo zipati. Manjezeezya aanu aayiisidwe amwaambila kuti mulibambile kubelekela Jehova kusika mpomukonzya. (Muk. 12:1) Mulakonzya alimwi kuyeeya zyakukwata naa kukwatwa bumwi buzuba akubaa mukwasyi. Ino mulacita buti?
11 Izintu nzyomusala lino mubuumi bwanu inga zyacinca bukkale bwanu kumbele. Ikuti kamuli kale Bakamboni ba Jehova balyaabide, ibabbapatizidwe, mwalipa kuli Jehova amoyo wanu woonse. (Heb. 10:7) Kwajuka mulyango wakusaanguna, amusole kucita bupainiya bwakugwasilizya kwamwezi omwe naa minji. Eeci cilamulabizya lukkomano luzwa mubupainiya bwaciindi coonse alimwi amikuli iiboolaa mulimo oyu, elyo cilamugwasya kubona kabotu ncomweelede kucita mubuumi bwanu. Mpoonya muciindi cakucita mulimo wakumubili waciindi coonse nomwamanizya cikolo, nkaambo nzi ncomutacitili bupainiya bwaciindi coonse? Bamwi ibakalindila kabayeeya kuti bayoocita aakale mulimo wabupainiya babona kuti nocakabagasya kuti nobakatalika ndilyonya cakufwambaana.
12 Nobakubusi, mutabindi kukwata naa kukwatwa, amubone mpindu zizwa muciimo eci zyakukonzya kucita mulimo wakukambauka waciindi coonse. Ikuti kamuyanda kuyookwata naa kukwatwa bumwi buzuba, taakwe ntalisyo mbotu njomunga mwabaayo yalukwatano kwiinda kucita mulimo wabupainiya bwaciindi coonse kusaanguna. Mwanooyabukomena alimwi mwanooyabusima munzila yakumuuya, mulakonzya kusala mulimo wabupainiya amuntu uujisi muzeezo ngweena oyu ngomutikwatane limwi. Banabukwetene ibacita bupainiya antoomwe banjila mumulimo wabbazu naa wabumishinali. Ooyu mmulimo uukkomanisya cini-cini!
13 Nocilampa buti ciindi ncomucita bupainiya, munooli mwalumanizya lwiiyo lwanu akubaa lwiiyo lutakonzyi kujanwa mumulimo uuli woonse anyika. Bupainiya buyiisya kulyeendelezya, bulondo, mbokweendelezegwa bantu, kusyoma muli Jehova, alimwi buyiisya mbokukkazikwa moyo aluse—ezi zintu ziyoomugwasya kuyumuna mikuli mipati.
14 Taakwe ciindi cikozyenye aceecino caboola kukuzuzikizigwa kwakaambyo kakuti mazuba ngunamasandu. Nzisyoonto zintu zitacinci-cinci, zilikke zitacinci nzintu nzyaakasyomezya Jehova. Mbwaanga mulaangulukide kucita kufwumbwa ncomwayanda kumbele aamazuba, taakwe ciindi cibotu kwiinda lino cakukkala ansi akuyeeya ncomuyoocita mubuumi bwanu mumazubaa kumbele. Amuciyeeyesye kapati coolwe ncomujisi cakucita bupainiya. Mwasala mulimo wabupainiya taakwe nomutikatyompwe pe.
MUBUZYO 4: “Sena tacikoonoondikatazya kukkwanya mawoola aayandika? Ino kuti ndalezya kumawoola aayandika?”
15 Nomulemba afoomu yabupainiya, mweelede kuvwuwa mubuzyo wakuti: “Sena mwalibambila kutegwa mukakonzye kukkwanya mawoola aayandika aali 840 amwaka?” Ikutegwa mukkwanisye, abuzuba muyandika kubeleka mawoola aali obile acisela mumulimo. Aino eeci ciyanda kubamba mulongo weelede alimwi akulyeendelezya. Ibunji bwabapainiya babaa bubambe bugwasya ibukonzeka mumyezi misyoonto buyo.
16 Nokuba boobo ibbuku lya Mukambausi 9:11 lyaamba kuti, ‘Toonse tulasikilwa ziindi zyamapenzi.’ Mupainiya ulakonzya kuciswa kapati naa mapenzi aambi buyo inga amusikila aanga apa kuti alezye. Ikuti penzi teelyatola ciindi cilamfwu alimwi lyacitika kumatalikilo aamwaka wamulimo, ikuyungizya ciindi cakubeleka ambweni inga kwagwasya kukkwanya mawoola. Ino kuti mupainiya wabaa penzi pati nokwacaala myezi misyoonto buyo kuti umane mwaka wamulimo, elyo camwaalila kukkwanya mawoola?
17 Ikuti naa mwaciswa kwamyezi misyoonto naa kwabuka penzi lyamukasya kukkwanya mawoola aayandika, mulakonzya mwabona umwi wamu Kkomitii ya Mulimo ya Mbungano akumupandulwida penzi elyo. Ikuti naa baalu aba bayeeya kuti cililuzi kumuzumizya kuzumanana mumulimo wabupainiya kakunyina kulipenzya amawoola ngomwalezya, inga basala obo. Mulembi ulabikka cizibisyo aakkaadi ya Mbungano aa Lembelwa Zyasikumwaya kutondezya kuti tamuyandiki kuyungizya mawoola ngomwalezya. Eeci tacaambi kuti mwapegwa ciindi cakulyookezya pe, pele nduse ndomwatondezegwa akaambo kapenzi lyanu.—Amubone pepa lyamukati lya Mulimo Wesu Wabwami wa October 1986, muncali 18.
18 Ibapainiya bazibide babelekela limwi mawoola manji kumatalikilo aamwaka wamulimo. Imulimo wabo wabupainiya baubikka aambele, elyo cimwi ciindi bajana kuti cilayandika kuleka zintu zitayandiki cini-cini. Ikuti naa mupainiya walezya akaambo kabuyamba mumbelekelo yakwe naa ambweni tanaatobela bubambe bwambelekelo, weelede kubona kuti mmukuli wakwe kuzuzikizya ciindi ncaakalezya, tayelede kulangila kufwidwa luse pe.
19 Kuli ziindi nanga mupainiya wanjila mupenzi litakwe bucitwe. Inga kwajanika kuti walezya mawoola kwaciindi cilamfwu akaambo kakuciswa-ciswa, kukomena kwamukwasyi azimwi-zimwi. Aawa cinga cagwasya nkujokela buyo muciimo casikumwaya akutola lubazu kufwumbwa cakonzeka mubupainiya bwakugwasilizya. Taakwe bubambe buzumizya muntu kucaala amulongo wabupainiya kuti naa uli muciimo citamuzumizyi kukkwanya mawoola.
20 Tusyoma kuti bubambe bwakutondezya luse kuli baabo beelela bulakulwaizya banji kulilembya mumulimo wabupainiya kakunyina kulibilika kutayandiki. Ibubambe mbweena obu bweelede alimwi kukulwaizya baabo bali kale mumulimo wabupainiya bwaciindi coonse kuzumanana. Tuyanda kuti bapainiya bazwidilile mumulimo wabo waciindi coonse.
MUBUZYO 5: “Njanda kucita cintu cimwi, nkenookkomene kucicita. Sena mulimo wabupainiya inga wandikkomanisya?”
21 Lukkomano lwini-lwini luzwa mukumvwanaa Jehova alimwi amulusyomo lwakuti tulamubelekela cakusyomeka. Jesu wakaliyumya acisamu cakupenzezya “nkaambo kalukondo ndwaakabikilwa kunembo.” (Heb. 12:2) Lukkomano lwakwe lwakali kuzwa mukucita luyando lwa Leza. (Int. 40:8) Munyika omuno, tulakonzya kubaa lukkomano lwini-lwini kuti bunji bwazintu nzyotucita mubuumi kazijatikizya bukombi bwa Jehova. Imakanze aajatikizya zintu zyakumuuya apa kuti buumi bwesu bube aampindu nkaambo mumoyo tulizi kuti tucita cintu ciluzi. Lukkomano luzwa mukupa, alimwi taakwe nzila imbi yakulipa njotuzi kwiinda yakuyiisya bamwi mbobanga bajana buumi butamani munyika ya Leza mpya.—Inc. 20:35.
22 Mupainiya uulaa majwi aazubululwa mumuncali wamatalikilo wakacipandulula boobu: “Mwati kuli lukkomano lunji kwiinda lwakubona muntu ngowali kuyiisya waba sikutembaula Jehova? Cilakkomanisya alimwi ciyumya lusyomo kubona Jwi lya Leza mbolili aanguzu mukukulwaizya bantu kucinca bukkale bwabo kutegwa bakkomanisye Jehova.” (Amubone Ngazi Yamulindizi yamu November 1, 1997, mapeeji 26-30.) Aboobo, ncinzi cimuletela lukkomano? Ikuti naa kamuyanda zintu zyamaanu izitamani muciindi cazintu zikkomanisya buyo kwakaindi kasyoonto zyamunyika, ibupainiya bulamukkazika moyo, elyo mulakkomana cini-cini.
MUBUZYO 6: “Ikuti naa tacili cintu ciyandika kutegwa muntu abe abuumi butamani, sena tandeelede kulisalila kucita bupainiya naa pe?”
23 Masimpe mulimo wabupainiya ncintu ncomweelede kulisalila. Ngu Jehova alikke uuzi naa inga mwakonzya naa pe. (Rom. 14:4) Ulangila kuti mulamubelekela amoyo woonse, buumi, mizeezo yanu yoonse alimwi anguzu zyanu zyoonse. (Mk. 12:30; Gal. 6:4, 5) Uyanda muntu uupa calumwemwe, uumubelekela kakkomene, cakutanyonosya moyo nanka cakusinikizigwa. (2 Kor. 9:7; Kol. 3:23) Mweelede kumubelekela ciindi coonse Jehova akaambo kakumuyanda alimwi akaambo kakuyanda bantu bamucilawo ncomupedwe. (Mt. 9:36-38; Mk. 12:30, 31) Ikuti naa oobo mbomulimvwa, mulimo wanu wabupainiya weelede kubikkilwa maanu kapati.
24 Tusyoma kuti caambwa aawa cilamugwasya kubona naa inga mwacita bupainiya. Sena inga tamukonzyi kujana ciindi cakucita bupainiya bwaciindi coonse? Aawa ansi kwabikkwa kkalenda ilaa mutwe wakuti “Mulongo Wangu Wabupainiya Wansondo Ansondo.” Amubone naa inga mwalemba mukati imulongo ngomunoobelesya uutimuzumizye kubeleka mawoola aali 18 nsondo ansondo mumulimo. Kuzwawaawo amusyome muli Jehova. Mulazwidilila kwiinda mulugwasyo lwakwe! Wakasyomezya kuti: “Njoomujalwida . . . akumutilila coolwe cakufwasuka loko.”—Malk. 3:10.
25 Aboobo mubuzyo ngotubuzya ngwakuti, “Mulimo wabupainiya—sena inga mwaucita?” Ikuti naa mulaingula kuti “Ee,” amubikke buzuba mbomuyootalika kucita bupainiya bwaciindi coonse ino-ino, elyo amusyome kuti Jehova uyoomulongezya abuumi bwalukkomano!
Ccaati iili apeeji 9]
(For formatted text, see publication)
Mulongo Wangu Wabupainiya Wansondo Ansondo
MUHHULO: Mulimo wammuunda cifwumofwumo
BWABILI: Mulimo wammuunda cifwumofwumo
BWATATU: Mulimo wammuunda cifwumofwumo
BWANE: Mulimo wammuunda cifwumofwumo
BWASANU: Mulimo wammuunda cifwumofwumo
MUJIBELO: Mulimo wammuunda cifwumofwumo
NSONDO: Mulimo wammuunda cifwumofwumo
MUHHULO: Mulimo wamumuunda kumazuba
BWABILI: Mulimo wamumuunda kumazuba
BWATATU: Mulimo wamumuunda kumazuba
BWANE: Mulimo wamumuunda kumazuba
BWASANU: Mulimo wamumuunda kumazuba
MUJIBELO: Mulimo wamumuunda kumazuba
NSONDO: Mulimo wamumuunda kumazuba
MUHHULO: Mulimo wamumuunda mangolezya
BWABILI: Mulimo wamumuunda mangolezya
BWATATU: Mulimo wamumuunda mangolezya
BWANE: Mulimo wamumuunda mangolezya
BWASANU: Mulimo wamumuunda mangolezya
MUJIBELO: Mulimo wamumuunda mangolezya
NSONDO: Mulimo wamumuunda mangolezya
Amublesye pensulo kulemba mulongo wanu wabuzuba abuzuba munsondo yomwe-yomwe.
Amibikke mbaakani yamawoola aali 18 ngomunoobleka nsondo ansondo mumulimo wamumuunda.
Mawoola woonse kwasanganya aansondo-ansondo ․․․․․․․․․․․․․․․․․․․․