Izilongezyo Zyamulimo Wabupainiya
“Lulongezyo lwa-Jehova lulavubya, alimwi tayungizyi mause kulindulo.”—TUSIMPI 10:22.
1, 2. (a) Mbuti umwi mupainiya mbwaakapandulula mbwalimvwa kujatikizya mulimo waciindi coonse? (b) Nkaambo nzi bapainiya ncobali mucibaka cakujana lukkomano lunji kwiinda bamwi mumulimo wakugwasya bamwi kuba basiciiya?
“SENA kuli lukkomano lupati lumbi kwiinda lwakubona muntu ngomwakaiisya ciiyo ca Bbaibbele waba sikutembaula wa Jehova munkutwe? Cilakondelezya kapati alimwi ciyumya-yumya lusyomo ikubona nguzu zya Jwi lya Leza mukukulwaizya bantu kuti bacince maumi aabo kutegwa bamukkomanisye Jehova.” Oobu mbwakalemba mupainiya umwi wakucisi ca Canada walo uucizumanana mumulimo waciindi coonse kwamyaka iinda ku 32 ono. Kaamba mulimo wakwe wabupainiya, wakati: “Kwiina nondinga ndayeeya kucita mulimo umbi. Mmasimpe buya kwiina cintu cimbi ncondinga ndayeeya cinga cilandiletela lukkomano lweelene andondijisi ono.”
2 Sena andinywe mulazumina kuti kuli lukkomano lupati mukutola lubazu mukugwasya muntu umwi kuba munzila iitola kubuumi? Aino, tabali bapainiya balikke ibajisi lukkomano luli boobu. Ibabelesi ba Jehova boonse balijatikizidwe mumulawo wa ‘kuyiisya bantu bamisyobo’ yoonse, alimwi balizuunyene kucita boobo. (Matayo 28:19) Pele, mbwaanga bapainiya balakonzya kubeleka kwamaoola manji mumulimo wamumuunda, balo bali muciimo cakujana lukkomano lunji mukugwasya bamwi kuba basiciiya. Pele mulimo wabupainiya ujisi bulumbu bumbi alimwi. Amukanane abapainiya, muyakumvwa bayakumwaambila kuti mulimo wabupainiya ninzila imwi imbotu kapati yakujanina ‘lulongezyo lwa-Jehova iluvwubya.’—Tusimpi 10:22.
3. Ncinzi cikonzya kutukulwaizya mbotuzumananina kubelekela Jehova?
3 Calino-lino awa, ibapainiya ibazwa mumanyika aandene-andene bakabuzigwa kuti bapandulule izilongezyo nzyobajana mumulimo waciindi coonse. Atulange-lange nzyobakaamba. Pele mutatyompwi, ikuti naa kamutakonzyi akaambo kakuciswa-ciswa, kucembaala naa mapakasyo amwi. Amuyeeye kuti cintu cipati kapati nkubelekela Jehova camoyo woonse uumaninide, nomubeleka muciimo cili coonse. Ikuteelela nzyobaamba bapainiya bamwi kulakonzya kutucitya kuti tuyandisisye kucita mulimo oyu uugwasya kuti kacikonzeka.
Ukkazika Moyo Kapati Akuletela Lukkomano
4, 5. (a) Nkaambo nzi kukanana makani mabotu abamwi ncouli mulimo uugwasya? (b) Mbuti bapainiya mbobalimvwa kujatikizya kutola lubazu mumulimo wamumuunda waciindi coonse?
4 Jesu wakati, “Kupa kuletela cileleko cipati kwiinda kutambula.” (Milimo 20:35, Ci) Inzya, kupa amoyo omwe kulagwasya munzila imwi. (Tusimpi 11:25) Eeci cilalibonya ikapati ciindi notukambaukila bamwi makani mabotu. Ikuti twayeeya, ncipego nzi cipati ncotunga twapa muntuma kwiinda kumugwasya kujana luzibo lwa Leza ilutola kubuumi butamani?—Johane 17:3.
5 Aboobo bapainiya baciindi coonse kanjikanji baamba buyo lukkomano ndobajana mumulimo wabo wamumuunda alimwi amboukkazika moyo. Umwi mupainiya waku Britain uulaa myaka iili 64 yakuzyalwa wakaamba kuti, “Ndilizyi kuti kwiina mulimo umbi wakali kunoondikkazika moyo mbuli yooyu wakukambaukila bantu kasimpe.” Mukamufwu wakucisi ca Zaire wakaamba mulimo wabupainiya mbowakamugwasya, wakati: “Imulimo wabupainiya wakanduumbulizya cini-cini ciindi mulumi wangu ngondakali kuyanda kapati naakafwa. Icandigwasya kutaumbaalilwa kapati nkuya mumulimo wakukambauka ikugwasya bantu kanjikanji. Ndilasyoma muzisyomezyo zya Jehova alimwi akuyeeya mbondinga ndagwasya baabo mbondiisya kuti bacince bukkale bwabo. Buzuba bumwi abumwi mbobumanina, iŋonzi zyangu zilalweela, alimwi moyo wangu inga uzwide lukkomano.”
6. Ndukkomano nzi lulibedelede bapainiya bamwi ndobajana?
6 Bamwi ibazumanana mumulimo wabupainiya kwamakumi-makumi aamyaka bakonzya kubelekela muminzi iili kule amadolopo mapati, ikutalisya mbungano zinji, zyalo izyakazikukomena kuba mabbazu. Mucikozyanyo, ku Abashiri, Hokkaido (icibeela ca nsumbu yacisi ca Japan cili kunyika kwini), kuli mucizi iwazumanana kali mupainiya kwamyaka iili 33. Ulayeeya kuti amuswaangano wakwe wakusaanguna iwabbazu—mu Hokkaido yoonse mboizulwa—kwakali buyo bantu ibali 70 ibakajanika. Ino ono mbuti? Kuli mabbazu aali 12 munsumbu eyi, aalaabasikumwaya ibali 12,000. Amweezeezye buyo mbwakkomana kapati mumoyo wakwe ciindi najanika aamiswaangano misyoonto alimwi amipati antoomwe amakamu-makamu aabasikwaambilizyanyina ba Bwami munsumbu eeyo!
7, 8. Ndukkomano nzi bapainiya banabunji ibazumanana kwaciindi cilamfwu mumulimo oyu ndobajana?
7 Bamwi bapainiya ibazumanana kwaciindi cilamfwu bakajana lukkomano mukubona bantu mbobakayiisya Bbibbele kababbapatizigwa alimwi akuzumanana mane abalo bapegwa mikuli mipati. Mucisi ca Japan mucizi umwi iwabeleka mumasena aayindene-indene aali fwuka kali mupainiya kuzwa mumwaka wa 1957 ulayeeya ciindi naakapa musimbi umwi uubeleka mubbanga imagazini ya Awake! Mweena mumyeezi iili fwuka, ooyu musimbi wakabbapatizigwa. Mukuya kwamazuba wakazikukwatwa, mpoona walo amulumi wakwe bakaba bapainiya baalubazu. Ino wakakkomana kaka mucizi ooyu ciindi mbungano nkwaakabede kucilawo catatu kutumwa noyakaswayigwaa mulangizi mupya wabbazu amukaintu wakwe—nkujana mukaintu wamulangizi ooyu wakali musimbi uulya ngwaakayiisya Bbaibbele!
8 Anu aabo ibazumanana mumulimo wabupainiya, ncobaulanga kuti “ncoolwe cipati kwiinda iceelede kuyandwa kapati,” mbubwena mbuli bwakaamba mupainiya umwi uulaamyaka iili 22 kali mumulimo ooyu!
Icitondezyo Cakuti Jehova Ulabalanganya
9. Mbwali Mugwasyi Mupati, ncinzi Jehova ncabasyomezya balanda bakwe, alimwi ino eeci caamba nzi kulindiswe?
9 Jehova, Mugwasyi Mupati, usyomezya kulanga balanda bakwe, ikubalanganya munzila yakumuuya alimwi ayakumubili. Wakaliluzi Mwami Davida ciindi naakaamba kuti: “Ndakali mulombe, sunu ndakomena, pele nsina bona uululeme uusiidwe, nanka lunyungu lwakwe lukumbila insima.” (Intembauzyo 37:25) Aino, eeci cisyomezyo ca Leza tacaambi kuti twanyangwa mukuli wesu iwakubamba banamukwasyi munzila yakumubili, alimwi kwiina nocitupa mulawo wakwiide kukkala akulangila buyo lugwasyo kubakwesu Banakristo. (1 Ba-Tesalonika 4:11, 12; 1 Timoteo 5:8) Pele kuti naa twalisungula kuti tubelekele Jehova cakumaninina, kwiina nayakutulekelezya ziyume zibe buti.—Matayo 6:33.
10, 11. Kwiinda muzintu nzyobakalibonena, ncinzi bapainiya banji ncobazyi kujatikizya inguzu zya Jehova zyakugwasya?
10 Munyika yoonse mboizulwa ibapainiya balibonena alimwi balizi kuti Jehova ulabagwasya aabo ibalibikka mumaanza aakwe. Amuyeeye buyo banabukwetene bamwi ibapainiya ibakalongela kukadolopo kamwi ikwakali kuyandika basikukambauka ba Bwami kapati. Nokwakainda myeezi misyoonto, mulimo wakumubili wakakatazya kujana, aboobo mali oonse ngobakajisi akabamanina. Mpoona bakazikutambula ipepa lyamutelo wabukwabilizi bwa mootokala wabo lyamali aasika ku $81. “Twakazyingwa, twakabula anzila mbotwakali kunga twaabbadela mali aaya,” mbwapandulula obu mukwesu. “Twakapailaa cini-cini masiku buzuba oobo.” Ibuzuba bwakatobela, bakatambula ikkaadi kuzwa kumukwasyi umwi awalo iwakali kwiile kupengana kujana mali. Ooyu mukwasyi wakatambwide mali kuzwa kumfwulumende aakaindilide kumutelo ngobakeelede kubbadela, mbokwakalembedwe mukkaadi, alimwi akaambo kakuti akali manji kwiinda mbuli mbobakali kuyeeyela, bakayanda kuti baabane abapainiya aaba banabukwetene. Icakabikkilizidwe mukkaadi ndi cceki lyamali aasika ku $81! “Tandikabulubi buzuba oobo—ndakakkomana ciseka nkuku!” mbwaamba obu oyu mukwesu mupainiya. “Twakaulumba kapati mukwasyi ooyu kubwaabi mbobakatondezya.” Jehova awalo ulabalumba bantu balaa luzyalo luli boobu, lwalo luli ngomuuya wakupa ngwakulwaizya mubabelesi bakwe.—Tusimpi 19:17; Ba-Hebrayo 13:16.
11 Ibunji bwabapainiya balakonzya kuluula zyakabacitikila zikozyanya azeezi. Amubabuzye, bayakumwaambila kuti kwiina ciindi ‘nobakasiilwa limwi.’ Kayeeya myaka iinda ku 55 njaakabeleka mumulimo wabukambausi bwaciindi coonse, imupainiya umwi uulaamyaka yakuzyalwa iili 72 waamba kuti, “Jehova kwiina ciindi naakandilekelezya.”—Ba-Hebrayo 13:5, 6.
“Ninzila Imbotu Kapati Yakuswena Munsi aa Jehova”
12. Nkaambo nzi mulimo wakwaambilizya makani mabotu ncouli coolwe cipati cilibedelede?
12 Ikututuma nkwatutuma Jehova kuti twaambilizye makani mabotu aa Bwami bwakwe ncoolwe cipati. Nokuba kuti tuli bantunsi batalondokede—walo utubona kuba “basimilimonyina” mumulimo ooyu uuvwuna maumi. (1 Ba-Korinto 3:9; 1 Timoteo 4:16) Ciindi notukambaukila bamwi makani aa Bwami bwa Leza, ciindi notwaambilizya mamanino aabubi, ciindi notupanduluda bantu iluyando lwakwe luteeli ndwaakatondezya mukutupa cinunuzyo, ciindi notuvwununa Ijwi lyakwe ligwasya kapati kubantu alimwi akuyiisya makani mabotu aali mulindilyo kubabombe myoyo, eezi zituswenya aafwaafwi ku Mulengi wesu, Jehova.—Intembauzyo 145:11; Johane 3:16; Ba-Hebrayo 4:12.
13. Akaambo kamulimo wabo wabupainiya, ncinzi bamwi ncobaamba kuti cacitika kubulongwe bwabo a Jehova?
13 Ibapainiya balabeleka ciindi cilamfwu mweezi amweezi mukwiiya alimwi akuyiisya inzila zya Jehova. Bayeeya kuti eeci cibajatikizya buti mubulongwe bwabo a Leza? “Mulimo wabupainiya ninzila imbotu kapati yakuswena munsi aa Jehova,” mbwaamba mwaalu umwi kucisi ca France walo iwazumanana mumulimo wabupainiya kwamyaka yiinda ku kkumi ono. Aumbi mupainiya mucisi eeco nciconya iwabeleka mumulimo waciindi coonse kwamyaka iili 18, waamba boobu: “Imulimo wabupainiya utupa coolwe ca ‘kulabila akubona kuti Jehova mubotu,’ alimwi buzubaa buzuba tuyumya bulongwe bwesu a Mulengi wesu.” (Intembauzyo 34:8) Umwi mucizi mucisi ca Britain iwazumanana mumulimo wabupainiya kwamyaka iili 30 ulimvwa mbubwena oobu. “Kusyoma mumuuya wa Jehova kuti kuundisololela mumulimo wangu wamumuunda, candigwasya kuswena afwaafwi anguwe,” mbwaamba obu. “Ndalimvwa buya kanjikanji kuti muuya wa Jehova nguundisolweda kuya kuŋanda njondiswaya aciindi aciindi ceelede.”—Amweezyanisye Incito 16:6-10.
14. Mbuti bapainiya mbobagwasigwa ciindi nobabelesya Ibbaibbele alimwi amabbuku aapandulula Bbaibbele buzubaa buzuba mukuyiisya bamwi?
14 Ibunji bwabapainiya bajana kuti kwiinda mukubelesya Ibbaibbele alimwi amabbuku amwi aapandulula zyamu Bbaibbele ciindi aciindi mukupandulula alimwi amukuyiisya kasimpe kamu Magwalo cilabagwasya kapati kwaaziba kapati Majwi aa Leza. Mukwesu umwi uulaamyaka yakuzyalwa iili 85 mucisi ca Spain walo iwazumanana mumulimo wabupainiya kwamyaka iili 31 upandulula kuti: “Mulimo wabupainiya wandigwasya kujana luzibo lunji lwa Bbaibbele, iluzibo ndweebelesya kugwasya bantu bamwi kuti bamuzibe Jehova alimwi amakanze aakwe.” Imucizi aumbi kucisi ca Britain iwazumanana mumulimo wabupainiya kwamyaka iili 23 waamba boobu: “Imulimo waciindi coonse wandigwasya kuti ndiyandisye cakulya cakumuuya lyoonse.” Kwiinda mukupanduluda bamwi “makani aalusyomo lumukalilide” mulakonzya kuyumya-yumya lusinizyo lwanu kuzintu zibotu alimwi zipati nzyomusyoma. (1 Petro 3:15) Aumbi mupainiya wakucisi ca Australia waamba boobu: “Mulimo wabupainiya usumpula lusyomo lwangu ciindi nondikananina bamwi.”
15. Ncinzi banji ncobali mukulisungula kucita kutegwa batalike mulimo wabupainiya akuzumanana mulinguwo, alimwi ino nkaambo nzi?
15 Cakutadooneka aaba bapainiya balisinizizye kuti bakasala mulimo uubaletela zilongezyo zizwa kuli Jehova iziteeli. Anu ncobalisungula kucinca bukkale bwabo, mane kusika nkobacileka kubeleka mulimo wakumubili akutandila buvwubi, ikutegwa banjile mumulimo wabupainiya akuzumanana mulinguwo!—Tusimpi 28:20.
Sena Moyo Wanu Ukanza Kucita Kwiinda Mbomucita Lino?
16, 17. (a) Ikuti naa tamuzi kabotu naa mulimo wabupainiya inga mwaukonzya, ncinzi ncomweelede kucita? (b) Mbuti bamwi mbobalimvwa ciindi nobatakonzyi kucita bupainiya?
16 Kwiinda mukuyeeya nzyobaamba bapainiya kujatikizya zilongezyo zijanika mumulimo wabupainiya, antela ono muli mukuyeeya naa oyu mulimo wabupainiya inga mwaukonzya. Ikuti naa mboobo, nkaambo nzi ncomutakanani amupainiya iwazwidilila mumulimo waciindi coonse? Inga alimwi camugwasya ikukanana aumwi wabaalu mumbungano, walo uumuzyi kabotu—ciimo cabuzumi bwanu, izintu nzyomukakilwa kucita alimwi amikuli yanu yamukwasyi. (Tusimpi 15:22) Nzyobatimwaambile bamwi kujatikizya mulimo mboubede zilakonzya kumugwasya kutelaika kabotu-kabotu naa mulimo wabupainiya inga mwaukonzya naa pe. (Amweezyanisye Luka 14:28.) Ikuti naa inga mwacikonzya kucita mulimo wabupainiya, mmasimpe muyakulongezegwa kapati.—Malaki 3:10.
17 Pele ino mbuti zyabaabo basikumwaya banji ba Bwami basyomeka ibatakonzyi kuba bapainiya, pesi ibayandisisya kuuvwuzya mulimo wabo wamumuunda? Mucikozyanyo mboobu mbwalimvwa mucizi umwi Munakristo walo uuli mukupengana kukomezya bana bakwe bone alikke. “Ndilabijilwa kapati,” mbwatongooka obu, “nkaambo ndakali mupainiya waciindi coonse, pele ono akaambo kaciimo mondibede tandikonzyi kuunka mumulimo wamumuunda kwaziindi zinji mbuli mbondakali kucita.” Ooyu mucizi ulabayanda kapati bana bakwe alimwi ulayandisisya kuti ababambe kabotu. Pele kunze lyaboobo ulayandisisya kuvwuzya mulimo wakwe mumulimo wakukambauka. Upandulula kuti, “Ndilauyanda kapati mulimo wamumuunda.” Oobo mbobalimvwa Banakristo bambi ibalisungwide aabo ibayandisisya kumubelekela Jehova ‘amoyo wabo woonse,’ akaambo kakuyanda Leza.—Intembauzyo 86:12.
18. (a) Ncinzi Jehova ncalangila kulindiswe? (b) Nkaambo nzi ncotuteelede kutyompokelwa ikuti naa ciimo cesu tacituzumizyi kucita mbuli mbotukonzya kucita?
18 Amuyeeye kuti Jehova ncalangila kulindiswe mulimo wamoyo woonse uumaninide. Ikuvwula kwamulimo ooyu kulakonzya kwiindana kumuntu umwi aumwi. Bamwi balakonzya kubambulula bukkale bwabo kutegwa babeleke kabali bapainiya baciindi coonse. Alimwi bunji bwabamwi balalilembya kubeleka kabali bapainiya bakugwasilizya muzyiindi naa kwaciindi coonse, kababeleka kwamawoola aali 60 mweezi amweezi mumulimo wamumuunda. Pele ibunji bwabantu ba Jehova balabeleka canguzu kukambauka akuyiisya camoyo woonse uumanininde kabali buyo basikumwaya mumbungano. Aboobo ikuti tamukonzyi kucita kwiinda mbuli mbomucita lino akaambo kakuciswa-ciswa, kucembaala, mikuli yamukwasyi naa bukkale bumbi, mutatyompwi pe. Kufwumbwa kuti kamucita kweelana ampomugolela, mulimo wanu ulaampindu mpati mumeso aa Leza mbubwena mbuli wabaabo bali mumulimo waciindi coonse!
Toonse Tulakonzya Kutondezya Muuya Wabupainiya
19. Ino kubaa muuya wabupainiya caamba nzi?
19 Nokuba kuti inga tamukonzyi kulilembya kuba bapainiya, pele mulakonzya kutondezya muuya wabupainiya. Ino ikubaa muuya wabupainiya caamba nzi? Mulimo Wesu Wabwami wamu July 1988 wakaamba kuti: “Ulakonzya kupandululwa kuti, nkubaa ciimo cakutumika caboola kumulimo wakukambauka alimwi akugwasya bamwi kuba basiciiya, ikutondezya luyando cakumaninina alimwi akulanganya bantu, ikubaa muuya wakulisungula, ikujana lukkomano mukutobela Mwami alimwi akukkomanina zintu zitali zyakumubili pele zyakumuuya.” Mbuti mbomunga mulautondezya muuya wabupainiya?
20. Mbuti bazyali mbobanga batondezya muuya wabupainiya?
20 Ikuti kamuli bazyali bajisi bana bacili basyoonto, camoyo woonse mulakonzya kubakulwaizya ikubaa mbaakani yakuba bapainiya. Ikuti mwatondezya kuti mulauyanda mulimo, balakonzya kukulwaizigwa kucita mulimo wa Jehova kuba cintu cipati kwiinda mubuumi bwabo. Mulakonzya kutamba bapainiya alimwi abalangizi beendeenda abamakaintu babo kuŋanda kwanu kutegwa bana banu bagwasigwe kwiinda muzikozyanyo zyabaabo ibajana lukkomano mumulimo wamumuunda waciindi coonse. (Amweezyanisye Ba-Hebrayo 13:7.) Nomuba mumaanda munga bukombi buliindene, ibazyali basyoma, kwiinda muŋambilo alimwi akwiinda mukucita nzyobaamba balakonzya kugwasya bana babo kubikka mulimo waciindi coonse kuba imbaakani mubuumi bwabo.—2 Timoteo 1:5; 3:15.
21. (a) Mbuti toonse mbotunga tulagwasilizya baabo ibali mukucita bupainiya? (b) Ncinzi baalu ncobanga bacita kuti bakulwaizye bapainiya?
21 Mumbungano toonse tulakonzya kubagwasilizya camoyo woonse aabo ibakonzya kucita bupainiya. Mucikozyanyo, sena inga mwalibambila kuti mubeleke amupainiya mumulimo wamumuunda ikapati ciindi mupainiya ooyu nali alikke mumulimo? Muyakujana kuti kuya kuba ‘kuyumizyanya.’ (Baloma 1:11, 12, Ci) Ikuti naa kamuli baalu, nzinji nzyomukonzya kucita ziinda waawa kuti mukulwaizye bapainiya. Ciindi ikabunga kabaalu nokaswaangana, kanjikanji beelede kubikkilizya azintu zinga zyacitwa ikugwasya bapainiya. Ciindi mupainiya natyompokelwa naa najana buyumuyumu mumulimo, mutafwambaani kupa muzeezo wakuti aleke buyo kucita bupainiya. Nokuba kuti kupa muzeezo ooyu zimwi ziindi inga kwayandika, mutalubi kuti ibupainiya ncoolwe cibotu kapati calo mubelesi waciindi coonse ncanga kayandisya kapati kubaaco. Ambweni uyandika buyo kukulwaizya aniini alimwi akulaigwa naa kugwasigwa. Ofesi lyamutabi wa Sosaiti kucisi ca Spain lyakalemba kuti: “Iciindi baalu nobakulwaizya bupainiya, nobagwasya bapainiya mumulimo wabo wamumuunda alimwi anobabalingula ciindi aciindi, ilukkomano lwabapainiya lulakomena, balimvwa kuba bantu bayandika, alimwi balayandisisya kuzumanana kakunyina makani amapenzi aanga abuka.”
22. Mumazuba aano aakatazya kwiinda mubukkale bwamuntu, ncinzi ncotweelede kusinizya kucita?
22 Tukkede mumazuba aakatazya kwiinda mazuba oonse mubukkale bwamuntu. Jehova watupa mulimo uuvwuna buumi bwabantu kuti tuumaninizye. (Ba-Roma 10:13, 14) Kunyina makani naa tulakonzya kutola lubazu mumulimo ooyu kwaciindi coonse katuli bapainiya naa pe, atutondezye muuya wabupainiya. Atubindaane alimwi akubaa muuya wakulisungula. Atuyume tumupe Jehova ncayanda kuzwa kulindiswe—mulimo wamoyo woonse uumaninide. Alimwi atuyeeye kuti, iciindi notupa zyoonse nzyotukonzya kupa, nokuba kuti zikozyenye aatudibilisi tobile twamukamufwu naa mafwuta aadulisya aa Mariya, mulimo wesu ngwamoyo woonse uumaninide, alimwi Jehova ulaukkomanina naa kaucitwaa camoyo woonse uumaninide!
Sena Mulayeeya?
◻ Nkaambo nzi mulimo waciindi coonse ncoukkazika moyo alimwi akuletela lukkomano?
◻ Kwiinda muzintu nzyobakalibonena, ncinzi bapainiya banji ncobazyi kujatikizya nguzu zya Jehova zyakulanganya balanda bakwe?
◻ Akaambo kamulimo wabo, ncinzi bapainiya ncobayeeya kuti cilacitika kubulongwe bwabo a Jehova?
◻ Mbuti mbomunga mulatondezya muuya wabupainiya?
[Cifwanikiso icili apeeji 17]
Bapainiya bajana lukkomano lupati mukugwasya bamwi kuba basiciiya
[Cifwanikiso icili apeeji 17]
Bana banu balakonzya kugwasigwa kapati kwiinda mukuyanzana abasikwaambilizya ba Bwami baciindi coonse
[Cifwanikiso icili apeeji 17]
Baalu balakonzya kubakulwaizya bapainiya mumulimo wamumuunda