Impindu Yakucita Mulimo Wabupainiya
1, 2. Ino zilongezyo nzi ziswaangene kapati akucita mulimo wabupainiya, alimwi nkaambo nzi?
1 Imukwesu umwi mupainiya wakati, “ndilizyi kuti kunyina mulimo uumbi uukonzya kundipa kukkutila kunze lyamulimo wakukanana kasimpe kubantu.” Imucizyi aumwi mupainiya wakati: “Buzuba bumwi abumwi mbobumanina iŋonzi zyangu zilalweela, alimwi moyo wangu inga ulikkomene kapati.” Aaba bapainiya balabaiminina bakwesu abacizyi kuli koonse ibakaibona kale mpindu yakucita mulimo wabupainiya.—Tus. 10:22.
2 Ikugwasya bantu kuti babe aaluzibo lufwutula luli mu Jwi lya Leza, kutupa kukkomana kapati. (Inc. 20:35; 1 Tes. 2:19, 20) Imukwesu umwi wacita bupainiya kwaciindi cilamfwu wakati, “cilakkomanisya alimwi cilayumya lusyomo ikuzyiba mbolili liyumu Jwi lya Leza mukukulwaizya bantu kuti bacince buumi bwabo.” Camasimpe, kwiinda mukulyaaba ikugwasya bantu alimwi akweendelezya ziiyo zya Bbaibbele, bapainiya bali boobu balajana zilongezyo zili boobu.
3, 4. Ino mbuti kucita bupainiya mbokuyiisya muntu kusyoma Jehova, alimwi mbuti eeci mbocigwasya muntu kusima kumuuya?
3 Ikusyoma Jehova: Lyoonse ikusyoma muuya wa Leza nobabeleka mulimo wabupainiya, kulabagwasya kuba a “micelo ya-Muuya” alimwi ulabakwabilila. (Gal. 5:16, 22, 23) Ikuyungizya waawo, mbwaanga babelesya Jwi lya Leza lyoonse, bapainiya balazyibila kubelesya Magwalo ikwiiminina kasimpe alimwi akuyumya-yumya bamwi. (2 Tim. 2:15) Imukwesu wacita bupainiya kwamyaka minji waamba kuti: “Ibupainiya bwandigwasya kuti ndibe aaluzibo lunji lwamu Bbaibbele, iluzibo lwalo lwandipa kuti ndigwasye bantu banji kuti bamuzyibe Jehova alimwi amakanze aakwe.” Elo kaka cilakkazika moyo!
4 Ibapainiya baciindi coonse abalo beelede basyoma Jehova munzila zinji azimbi. Ilusyomo lwabo lulayumizyigwa nobabona Jehova mbwabagwasya mukujana zintu zyobayandika kumubili. Imukwesu imupainiya waciindi coonse uulaamyaka iili 72 wacita bupainiya kwamyaka iili 55 waamba kuti: “Jehova tanaandilekelezya pe.” Kunze lyaboobo, kwiinda mukuubya-ubya buumi bwabo, bapainiya balikwabilila kuzwa kuzintu zinji zyamubuumi zilibilisya. Sena makani aaya andinywe alamukkomanisya?—Mt. 6:22; Heb. 13:5, 6.
5. Ino mbuti kucita bupainiya mbokunga kwagwasya muntu kuswenena kuli Jehova?
5 Kuswenenena Kuli Leza: Icilongwe cesu a Jehova ncintu ciyandisi ncetujisi. (Int. 63:3) Notubeleka kapati mumulimo akaambo kaluyando ndotujisi kuli Jehova, icilongwe cesu cilayuma nta. (Jak. 4:8) Imukwesu mupainiya wabeleka mulimo ooyu kwamyaka iinda ku 18 waamba kuti: “Imulimo wabupainiya watupa kuti ‘tulabile akubona Jehova kuti mubotu.’ Ibuzuba abuzuba icilongwe cesu cilayuma nta a Mulengi wesu.”—Int. 34:8.
6. Ino ncinzi bapainiya ncobeelede kuba aancico, alimwi mbaani abamwi bagwasyigwa kunze lyabapainiya?
6 Ikuyungizya azintu zyobeelede kuba aanzizyo, bapainiya beelede kuba aalusyomo lutazungaani, luyando lwini-lwini muli Leza akuli basimukobonyina alimwi akulibambila kulyaaba. (Mt. 16:24; 17:20; 22:37-39) Nokuba boobo, ikukkomana kwabapainiya koonse-koonse, kutondezya kuti izilongezyo zyamulimo wabupainiya zilainda kubota. (Malk. 3:10) Izilongezyo eezi tazili buyo kubapainiya pe, imikwasyi yabo ambungano zilagwasyigwa kapati akaambo kamuuya mubotu bapainiya ngobatondezya.—Flp. 4:23.